Wɛ Nijoŋnu
Malasi Tɔnɔ
1
Kwǝrǝ kalʋ Baŋa-Wɛ na kwe DƖ pa Malasi sɩ o lwǝni o brɩ Yisɩrayɛlɩ tiinə bam tɩn mʋ tɩntʋ.
Baŋa-Wɛ soe Yisɩrayɛlɩ dwi dɩm
2 Baŋa-Wɛ mʋ tagɩ DƖ wɩ: «Maŋa maama wʋnɩ mʋ amʋ tiini a jɩgɩ abam sono.»a Abam nan daa ta yəni á bwe amʋ á wɩ: «Brɩ dɩbam cwe sɩlʋ nmʋ na tɔgɩ yɩ n soe dɩbam tɩn.»
Amʋ Baŋa-Wɛ ma ləri a wɩ: «Yɩ swe-na nɩ abam nabaarʋ Zakɔbɩ dɛɛn yɩ nyaanɩ mʋ o zɩmbaarʋ Esayu yigə nɩ. Amʋ nan jɩgɩ Zakɔbɩ dɩ o dwi dɩm sono, 3 yɩ a culi Esayu dɩ o dwi dɩm ni-taanɩ. Kʋntʋ ŋwaanɩ mʋ amʋ pipiri Esayu na je pweeru laŋa kalʋ nɩ tɩn, pa ka yɩ yɔɔ yɩranɩ. Ba tɩga kam ma ji kagʋa yɩ ga-vara karɩ ka wʋnɩ ba beerǝ.»b
4 Esayu dwi Edɔm tiinə bam wʋ́ wanɩ ba ta ba wɩ: «Dɩbam tɩʋ kʋm sɩɩnɩ kʋ cɔgɩ mʋ. Dɩ́ nan wʋ́ joori dɩ́ lɔ-kʋ dɩ́ zɩgɩ.»
Amʋ Paŋwa Tu Baŋa-Wɛ nan ta nɩ: «Ba na kɩ dam ba joori ba lɔ ba tɩʋ kʋm, amʋ ta lagɩ a yigi-kʋ mʋ a dɩ tɩga nɩ. Nɔɔna wʋ́ taa yáalɩ ba tɩʋ kʋm ba wɩ kʋ yɩ tɩ-balɔrɔ mʋ, yɩ ba bǝi Edɔm tiinə bam nɩ ba yɩ balʋ Baŋa-Wɛ banɩ na fɔgɩ dɩ wʋ ba baŋa nɩ tɩn.»
5 Abam Yisɩrayɛlɩ tiinə bam wʋ́ na tɩntʋ maama, yɩ á laan wʋ́ ta nɩ: «Baŋa-Wɛ dam daga. DƖ dam dɩm nan kɛ dɩ yi tɩɩnɩ dɩdonnǝ nɩ mʋ sɩ kʋ daɩ dɩbam tɩʋ kʋm sisəm dɩm yɩranɩ.»
Wɛ na bwɛ kaanɩm tiinə bam te tɩn
6 Paŋwa Tu Baŋa-Wɛ jɩgɩ kwǝrǝ kantʋ mʋ sɩ DƖ pa kaanɩm tiinə bam:
«Biə maŋɩ sɩ ba taa nɩgɩ ba kwə mʋ, sɩ balʋ na tʋŋɩ ba paɩ nɔɔna tɩn dɩ taa nɩgɩ balʋ na te-ba tɩn. Amʋ nan mʋ yɩ abam ko dɩ á yuutu dɩ. Á nan ba nɩgɩ-nɩ. Bɛɛ mʋ te kǝm dɩntʋ maama? Abam tiini á gooni amʋ, yɩ á ta yəni á bwe á wɩ: ‹Tɩta seeni mʋ dɩ́ gooni nmʋ?› 7 Abam pɛ cavɩɩra ja-nɩ, bɛŋwaanɩ á jɩgɩ wʋdiu kʋlʋ na digimi tɩn mʋ á kɩ kaanɩm á pa-nɩ, yɩ á daa ta jɩgɩ ni sɩ á bwe amʋ á wɩ: ‹Dɩbam brɩ dɩ́ kɩ ta mʋ yɩ dɩ́ pa cavɩɩra ja nmʋ tɩn?› Nii-na mʋ! Abam kǝm dɩm brɩ nɩnɛɛnɩ á yǝni á nii amʋ kaanɩm bimbim dɩm mʋ yɩ á gooni á wɩ: dɩ yɩ wo-kafɛ mʋ. 8 Abam na yǝni á ja varɩ-lilwə dɩ varɩ-gwanɩ dɩdaanɩ varɩ-yawɩɩna bam sɩ á ma‑á kɩ kaanɩm á pa amʋ tɩn, kʋntʋ daɩ lwarɩm mʋ na? Á wʋ́ wanɩ á ja vara kʋntʋ doŋ á vu á pa á tɩʋ kʋm yuutu mʋ na? Á ya na kɩ kʋntʋ, á bʋŋɩ nɩ o wʋʋ wʋ́ poli dɩ abam sɩ o wanɩ o nii á seeni na?c 9 Abam nan na ve yigə sɩ á taá jaanɩ vara kʋntʋ doŋ á tui á kɩ kaanɩm á pa amʋ, yɩ á laan ba á loori lanyɩranɩ a tee nɩ, á bʋŋɩ nɩ amʋ wʋ́ cəgi abam taanɩ mʋ na?»
10 Paŋwa Tu Baŋa-Wɛ na jɩgɩ kʋlʋ sɩ DƖ ta tɩn mʋ tɩntʋ:
«Abam wʋnɩ dɩdʋa ya mʋ na maŋɩ o pɩ Wɛ diga kam ni dɩm, kʋ yaá taa gara. Kʋntʋ wʋ́ pa á daa bá ja kaanɩm dɩlʋ na ba jɩgɩ kuri tɩn á ba á zwɛ á pa-nɩ. Amʋ ba jɩgɩ wʋpolo dɩ abam kaanɩm tiinə bam na kɩ te tɩn. Kʋntʋ ŋwaanɩ mʋ a bá joŋi á pɛɛra yam. 11 Amʋ zulə yam wʋ́ zaŋɩ baŋa baŋa mʋ lʋgʋ baŋa tɩɩnɩ dɩdonnǝ wʋnɩ. Kʋ zɩgɩ tɩɩnɩ dɩlʋ na jeeri wa-puli seeni tɩn sɩ kʋ yi dɩlʋ na wʋ wa-zʋʋrɩ seeni tɩn, dɩ maama wʋ́ zuli amʋ. Je maama nɩ mʋ nɔɔna wʋ́ ja taloŋ-ywəŋə dɩdaanɩ pɛɛra yalʋ na yɩ lanyɩranɩ fasɩ tɩn ba ba sɩ ba pa-nɩ zulə. 12 Kʋ nan na yɩ abam, á gooni-nɩ mʋ, nɩnɛɛnɩ á na yǝni á bʋŋɩ nɩ amʋ bimbim dɩm mʋ ba jɩgɩ kuri tɩn. Abam ma yǝni á ja wʋdi-yɔɔrʋ á ba dáa nɩ sɩ á pa-nɩ. 13 Abam na yəni á ŋɔɔnɩ te tɩn mʋ tɩntʋ: ‹Wɛ tɩtʋŋa yam tiini ya camma mʋ›, yɩ á daarɩ á virigi á kwaga á ya amʋ. Abam na ŋɔgɩ vara á ja á ba, naa á na jaanɩ varɩ-yawɩɩna dɩdaanɩ varɩ-gwanɩ mʋ á ba sɩ á pa amʋ, á bʋŋɩ nɩ amʋ ta wʋ́ joŋi tɩntʋ maama yɩ a wʋʋ poli na? 14 Kampwəl-balɔrɔ mʋ daŋɩ kampin-nyɩna bam yuu nɩ! Bɛŋwaanɩ o jɩgɩ varɩ-ŋʋna o sɔŋɔ nɩ, varɩ-bɩa kalʋ o ya na goni ni sɩ o ma kɩ kaanɩm o pa-nɩ tɩn, yɩ o laan joori o ni dɩm kwaga nɩ sɩ o pa-nɩ varɩm wʋlʋ na wʋ su yi tɩn. Amʋ mʋ yɩ Pa-farʋ yɩ kʋ maŋɩ sɩ lʋgʋ baŋa tɩɩnɩ dɩm nɔn-biə bam maama mʋ taa kwarɩ amʋ yɩrɩ dɩm!»d
Paŋwa Tu Baŋa-Wɛ na tagɩ te tɩn mʋ kʋntʋ.