13
Maŋa kam kʋntʋ nɩ amʋ wʋ́ pa buli-yi puri dɩ taa burǝ dɩ pa Davidi dwi tiinə bam, dɩ Zeruzalɛm nɔn-biə bam, pa ba lwarɩm dɩ ba digiru tɩm saarɩ tɩ yagɩ.»Jwǝnǝ dɩ sampwəri taanɩ
2 Paŋwa Tu Baŋa-Wɛ na tagɩ te tɩn mʋ tɩntʋ: «Dɛ dɩm kʋntʋ na yiǝ, amʋ wʋ́ pa jwǝnǝ yɩra yam saarɩ tɩga kam maama nɩ, sɩ nɔɔna daa yɩ taa guli ya gulə maŋa dɩ maŋa! A nan ta wʋ́ zəli sampwəri sɩm dɩ ba ciciri-lwaanʋ tɩga kam nɩ. 3 Ba wʋlʋ ta na zaŋɩ o pwərisi o brɩ nɔɔna, o tɩtɩ tiinə balʋ na lʋg-o tɩn mʋ wʋ́ ta dɩd-o ba wɩ: ‹Nmʋ maŋɩ sɩ n tɩ mʋ, dɩ n na mɛ Baŋa-Wɛ yɩrɩ n pwərisi vwan tɩn.› Ba laan wʋ́ zɔ‑o ba gʋ, o na ŋɔɔnɩ tɩn ŋwaanɩ.
4 Dɛ dɩm kʋntʋ na yiǝ, sampwərə kalʋ maama na lagɩ o pwərisi, cavɩɩra wʋ́ ja kʋ tu dɩ vɩɩra yalʋ o na nɛ tɩn. O daa bá kwe gwar-zɩnzwara tɩlʋ dwi Wɛ nijoŋnǝ bam na zʋʋrɩ tɩn o zʋ, o na lagɩ sɩ o ganɩ nɔɔna tɩn ŋwaanɩ. 5 Kʋ tu maa wʋ́ ta wɩ: ‹Kʋ zɩgɩ a nɔn-dʋnnɩ maŋa nɩ varɩm yɩranɩ mʋ yɩ a tɩtʋŋɩ. Amʋ daɩ Wɛ nijoŋnu.› 6 Nɔɔna maa na bwe‑o ba wɩ: ‹Bɛɛ mʋ kɩ yɩ n na fufwələ yantʋ doŋ n nyɔɔnɩ nɩ?› O ta wʋ́ lǝri-ba wɩ: ‹A nɛ fufwələ yam a ciloŋ sɔŋɔ nɩ mʋ.› »
Nayɩrʋ dɩ peeni taanɩ
7 Paŋwa Tu Baŋa-Wɛ na tagɩ te tɩn mʋ tɩntʋ:
«Sʋ-lɔŋɔ, zaŋɩ dɔɔnɩ wʋnɩ
sɩ n jeeri a nayɩrʋ wʋm
na bwələ dɩ amʋ tɩn.
Yɔɔrɩ n magɩ nayɩrʋ wʋm,
sɩ peeni sɩm maama jagɩ sɩ je.a
Amʋ tɩtɩ jɩŋa nan mʋ wʋ́ zʋ sɩ biə bam.»
8 Baŋa-Wɛ na tagɩ te tɩn mʋ tɩntʋ:
«Tɩga kam ni je maama nɩ,
nɔɔna bam pɔɔrɩm bɩtɔ wʋnɩ,
kuni bɩle mʋ lagɩ ba tɩ,
sɩ pɔɔrɩm dɩdʋa daarɩ ba taa ŋwɩ.
9 Pɔɔrɩm dɩdʋa kalʋ na daarɩ tɩn,
a lagɩ a maŋɩ ba sɩ a nii mʋ,
sɩ a daarɩ a fɔgɩ a kwɛ-ba.
Kʋʋ́ taa nyɩ dɩ nɔɔnʋ na kwe
səbu naa səbu-sɩŋa
o dɩ mim wʋnɩ
sɩ o pa tɩ taa lana fasɩ te tɩn mʋ.
Nɔɔna bam kʋntʋ laan maa wʋ́ ma
amʋ yɩrɩ dɩm ba loori-nɩ,
yɩ amʋ dɩ lǝri-ba.
Amʋ wʋ́ ta ba taanɩ nɩ:
‹Ba yɩ a nɔɔna mʋ,›
yɩ ba dɩ ta nɩ:
‹Baŋa-Wɛ mʋ yɩ dɩbam Wɛ.› »