Wɛ wʋ́ vrɩ Zeruzalɛm tiinə bam DƖ yagɩ
12
Kwǝrǝ kalʋ Baŋa-Wɛ na tʋŋɩ sɩ ka vu Yisɩrayɛlɩ tiinə bam seeni tɩn mʋ tɩntʋ: Baŋa-Wɛ yɩ dɩlʋ na lwarɩ wɛyuu kʋm pa kʋ tigi palalala, yɩ DƖ daarɩ DƖ cwi tɩga kam kuri tɩn. DƖ ta daarɩ kɩ joro DƖ yagɩ nabiinǝ wʋnɩ. Dɩntʋ tagɩ DƖ wɩ:2 «Nii-na! Amʋ wʋ́ pa Zeruzalɛm tɩʋ ji nɩnɛɛnɩ zʋŋa dɩ ka wʋ sana. Dwi-gɛ tiinə balʋ na bwələ da tɩn wʋ́ nyɔ ka wʋnɩ yɩ ba bəri. Kʋ ta wʋ́ kɩ kʋntʋ doŋ kʋ pa Zuda tiinə bam mʋ dɩ ba na tɔgɩ ba zaŋɩ najara dɩ Zeruzalɛm te tɩn. 3 Maŋa kam kʋntʋ nɩ, dwi tiinə bam maama na jeeri sɩ ba kɩ najara dɩ Zeruzalɛm tɩʋ kʋm, amʋ wʋ́ pa kʋ ji nɩnɛɛnɩ kandwɛ-pulɔrɔ mʋ kʋ pa-ba. Wʋlʋ maama na kwaanɩ sɩ o guri-kʋ, kʋʋ́ tiini kʋ kɩ kʋ tu zʋnnɩ.»
4 Baŋa-Wɛ ta na tagɩ kʋlʋ tɩn mʋ tɩntʋ: «Ka maŋa nɩ, a lagɩ a pa siseŋ-nɔɔna bam maama fʋm mʋ, sɩ sɩ diinǝ bam maama dɩ yirisi. A laan maa wʋ́ taa fɔgɩ a nii Zuda tiinə bam baŋa nɩ. Kʋ nan na yɩ dwi-gɛ tiinə sise sɩm dɩ, a wʋ́ pa sɩ yiǝ dwe. 5 Zuda yigǝ tiinǝ bam laan wʋ́ ta ba tɩtɩ nɩ ba wɩ: ‹Zeruzalɛm tɩʋ nɔn-biə bam nɛ dam, Paŋwa Tu Baŋa-Wɛ na yɩ ba Wɛ tɩn ŋwaanɩ.›
6 Maŋa kam kʋntʋ nɩ, amʋ wʋ́ pa Zuda yigǝ tiinǝ bam taa nyɩ dɩ min-zʋŋa na tʋ dɛ wʋnɩ te tɩn mʋ. Ba ta wʋ́ taa yɩ nɩ min-vʋgʋ na tʋ mɩn-zwarʋ wʋnɩ. Kʋntʋ tɩn, baá pa tɩɩnɩ dɩlʋ maama na bwələ da tɩn cɔgɩ fasɩ. Kʋ daarɩ Zeruzalɛm tɩʋ kʋm tɩtɩ taa zɩgɩ cɛpɩ dɩ kʋ nɔn-biə bam maama. 7 Amʋ Baŋa-Wɛ nan lagɩ a pa Zuda jar-kərə bam mʋ da yigə ba na wɔnɔ, sɩ Pɛ Davidi dwi tiinə bam dɩ Zeruzalɛm nɔn-biə bam maama yɩ na zulə ba dwǝni Zuda tiinə bam.
8 Maŋa kam kʋntʋ nɩ, amʋ Baŋa-Wɛ tɩtɩ mʋ lagɩ a taa kwǝli balʋ na zʋʋrɩ Zeruzalɛm tɩʋ kʋm wʋnɩ tɩn. Wʋlʋ na yɩ nabwəm ba maama wʋnɩ tɩn wʋ́ joŋi dam nɩ Davidi na dana te tɩn mʋ. Davidi dwi tiinə bam wʋ́ taa nii ba baŋa nɩ, nɩ kʋ yɩ Baŋa-Wɛ malɛka kam tɩtɩ mʋ wʋ ba yigə nɩ. 9 Maŋa kam kʋntʋ nɩ, amʋ yiǝ wʋ́ sɩɩnɩ dwi tiinə balʋ maama na zaŋɩ najara dɩ Zeruzalɛm tɩn baŋa nɩ, sɩ a yɔɔrɩ a cɔgɩ-ba.»
Ba keeri ba pa wʋlʋ nɔɔna na zɔgɩ tɩn
10 «Amʋ Baŋa-Wɛ nan lagɩ a kwe wɛ-loro joro dɩ ka-duri-nɔɔna-ŋwaŋa mʋ a kɩ Davidi dwi dɩm, dɩ Zeruzalɛm nɔn-biə bam maama wʋnɩ. Kʋ maa wʋ́ pa ba kwǝni ba nii amʋ yɩ ba keeri ba pa wʋlʋ wʋm ba na zɔgɩ tɩn. Baá taa tiini ba keeri wʋntʋ luə yɩ ba coosǝ, nɩ nɔɔna na gɛ ba bu-dʋa, naa ba bu-kwɩan te tɩn mʋ.a 11 Maŋa kam kʋntʋ nɩ, Zeruzalɛm tiinə wʋ́ keeri bugi-bugi, nɩ nɔɔna dɛɛn na keeri te Hadadrimɔnɩ nɩ, tɩʋ kʋlʋ na wʋ Megido pɔgɔ tɩga kam nɩ tɩn mʋ. 12 Balʋ na zʋʋrɩ tɩga kam je maama nɩ tɩn wʋ́ taa keeri mʋ bugi-bugi, dwi dɩ dwi maama, sɩ kaana bam kərə taa yɩ ka yɩra dɩ baara bam kərə. Davidi digə kam wʋ́ keeri luə kam ba yɩranɩ, yɩ ba kaana bam dɩ keeri ba yɩranɩ. Natan digə kam dɩ wʋ́ keeri ba yɩranɩ, yɩ ba kaana bam dɩ keeri ba yɩranɩ. 13 Levi digə tiinə bam, dɩ ba kaana dɩ wʋ́ keeri ba yɩranɩ. Simeyi digə kam dɩ ba kaana wʋ́ da ba keeri ba yɩranɩ, 14 kʋ wǝli dɩ sɔ-yuni tɩlʋ maama ta na daarɩ tɩn, dɩ ba kaana.