Lɛɛrʋ wʋ́ yi Wɛ nɔɔna bam dʋna
11
Liban, pʋrɩ n tɩʋ kʋm ni,sɩ mim na cwǝŋǝ dɩ zʋ
dɩ di n Sɛdrɩ tweeru tɩm.
2 Tu-ŋʋnnʋa dɩ, taá coosi-na,
Sɛdrɩ tweeru tɩm na tʋa tɩn ŋwaanɩ.
Tu-kamunnu tɩm maama tɩn tɩ pɔ mʋ!
Basan tu-dɩdwaarʋb tɩm,
keeri-na zanzan!
Kʋ na yɩ gaa kalʋ ya na li
dɩ tweeru tɩn,
ba laan goni ka tweeru tɩm maama mʋ ba dɩ tɩga nɩ!
3 Cəgi-na sɩ á wʋ́ ni nayɩra bam na kaasɩ te tɩn,
ba vara pwəli sɩm maama laan na cɔgɩ tɩn ŋwaanɩ.
Cəgi-na sɩ á wʋ́ ni
nywəənu tɩm na suurə,
Zʋrdɛn bugə ni gaa kam tɩtɩ
dɩ na cɔgɩ tɩn ŋwaanɩ.
Nayɩra bale taanɩ
4 Amʋ Tu Baŋa-Wɛ na tagɩ te tɩn mʋ tɩntʋ: «Fɔgɩ n kɔnɩ peeni sɩlʋ ba na lagɩ ba gʋ tɩn. 5 Balʋ na yəgi peeni sɩm tɩn mʋ kwe-sɩ ba gʋ, yɩ ba ba bʋŋɩ nɩ ba cɔgɩ. Balʋ na jɩgɩ peeni sɩm ba yəgi tɩn dɩ maa ta ba wɩ: ‹Dɩ́ kɩ-na Baŋa-Wɛ le, sɩ dɩ́ nɛ nyɔɔrɩ zanzan.› Peeni sɩm nayɩra tɩtɩ dɩ yigə tǝri sɩ wʋnɩ. 6 A nan daa bá duri tɩʋ kʋm kʋntʋ nɔɔna bam ŋwaŋa.» Baŋa-Wɛ na tagɩ kʋlʋ tɩn mʋ kʋntʋ. «Nii-na. Amʋ wʋ́ kwe nɔɔnʋ maama a kɩ o doŋ jɩŋa nɩ, dɩ o pɛ wʋm jɩŋa nɩ. Bantʋ laan maa wʋ́ cɔgɩ tɩga kam maama fasɩ. A nan bá joŋi nɔɔn-nɔɔnʋ ba jɩŋa nɩ a yagɩ.»
7 Kʋntʋ ŋwaanɩ a jɩgɩ peeni sɩlʋ ba na lagɩ ba gʋ tɩn a kɔna a pa balʋ na jɩgɩ-sɩ ba yəgi tɩn. A nan jɩgɩ gwələ yale mʋ. A ma pa dɩdʋa yɩrɩ yɩ ‹Yu-yoŋo›. Dɩdoŋ dɩm yɩrɩ yɩ ‹Ni-mɔrɔ›. A maa jɩgɩ-ya a maɩ a nii a peeni sɩm baŋa nɩ. 8 Cana dɩdʋa wʋnɩ, a ma zəli nayɩra batɔ bam, a na wʋ wanɩ a ja a tɩtɩ dɩ ba tɩn ŋwaanɩ. Pipimpiinə bam tɩtɩ dɩ maa vaɩ a ni-taanɩ. 9 A ma ta a wɩ: «Amʋ daa bá taa kɔnɩ peeni sɩm a pa abam. Sɩlʋ na maŋɩ sɩ sɩ tɩ tɩn wʋ́ tɩ, sɩ sɩlʋ na maŋɩ sɩ sɩ je tɩn dɩ je. Sɩlʋ maa na daarɩ tɩn dɩ wʋ́ taa di da ya-nwana.»
10 Amʋ ma ja a gwəli dɩlʋ yɩrɩ na yɩ Yu-yoŋo tɩn a bwəri, sɩ kʋ brɩ nɩ a yiri ni dɩlʋ a ya na goni dɩ nɔɔna bam maama tɩn. 11 Dɛ dɩm kʋntʋ nɩ nɔ́ɔ mʋ ni-gonim dɩm sɩɩnɩ dɩ cɔgɩ. Pipimpiinə bam nɛ-nɩ, yɩ ba lwarɩ nɩ kwǝrǝ kam kʋntʋ yɔɔrɩ ka nuŋi Baŋa-Wɛ tee nɩ mʋ.
12 A ma ta dɩ ba a wɩ: «Abam na nii nɩ kʋ maŋɩ, sɩ á pa-nɩ a ŋwɩɩrʋ. Kʋ nan daa na daɩ kʋntʋ, sɩ á taá jɩgɩ-tɩ.» Ba ma jeeli a ŋwɩɩrʋ, yɩ ba kwe səbu səbu-dala fiintɔ ba pa-nɩ.
13 Baŋa-Wɛ ma ta dɩ amʋ DƖ wɩ: «Kwe sǝbiǝ bam n kɩ səbu tiŋim daka kam wʋnɩc.» Mʋ bantʋ səbu-yɩrɩ dɩlʋ ba na jeeli sɩ kʋ taa yɩ amʋ ŋwɩɩrʋ tɩn mʋ kʋntʋ. A ma sɩɩnɩ a kwe sǝbiǝ bam kʋntʋ a ja a vu Wɛ diga kam a dʋlɩ a dɩ səbu tiŋim daka kam wʋnɩ.d
14 A laan ma bwəri a gwəli dɩdoŋ dɩm, dɩ yɩrɩ na yɩ Ni-mɔrɔ tɩn, sɩ kʋ brɩ nɩ Zuda tiinə bam dɩ Yisɩrayɛlɩ tiinə bam wəl-dɔnɔ kʋm cɔgɩ.
15 Baŋa-Wɛ daa ma ta dɩ amʋ o wɩ: «Daa ta kwe nayɩrʋ zɩla sɩ n kɩ nɩ n yɩ nayɩrɩ-joro mʋ tɩn. 16 Nii-na, a lagɩ a pa nayɩrʋ wʋdoŋ mʋ ba o taa nii tɩga kam nɔɔna baŋa nɩ. Wʋntʋ yigə bá taa wʋ peeni sɩlʋ na lagɩ sɩ je tɩn wʋnɩ, dɩ peeni sɩlʋ na beeri yɔɔ tɩn wʋnɩ. O nan bá taa nii sɩlʋ na nɛ zʋnnɩ tɩn sɩ o sooni-sɩ, naa sɩ o kɔnɩ peeni sɩlʋ na dana tɩn. O nan wʋ́ di sɩlʋ na jɩgɩ nugə tɩn mʋ, yɩ o tʋrɩ sɩ napɔɔna yam.
17 Lɛɛrʋ nan lagɩ tɩ yi
nayɩrɩ-joro kʋm mʋ,
o na kwe peeni sɩm o yagɩ tɩn ŋwaanɩ!
Sʋ-lɔŋɔ mʋ lagɩ kʋ zɔ o vɔŋɔ
dɩ o jazɩm yi dɩm!
O vɔŋɔ kʋm maama maŋɩ
sɩ kʋ kwaarɩ mʋ,
yɩ o jazɩm yi dɩm dɩ dwe
dɩ daa ta ba naɩ!»