Baŋa-Wɛ na wʋ́ fɔgɩ DƖ kwɛ DƖ nɔɔna te tɩn
10
Loori-na Baŋa-Wɛ sɩ DƖ pa dʋa nɩ duum maŋa nɩ. Wʋntʋ mʋ paɩ dʋ-viu kalɩ kunkwǝǝnu, yɩ DƖ ta paɩ dʋ-na tui sɩ tɩga kam kɩ wʋdiiru lanyɩranɩ.2 Jwǝnǝ yam jɩgɩ nɔɔna mʋ ya gana. Vʋra bam dɩ maa tɔgɩ yi-nɛɛrɩ ŋwaanɩ ba fɔɩ vwan. Ba yǝni ba maŋɩ dɩndwɩa kuri ba brɩ nɔɔna yɩ kʋ daɩ cɩga. Ba ta na pa zǝnǝ dɩlʋ tɩn maa yɩ kafɛ. Kʋntʋ ŋwaanɩ, nɔɔna bam maa beeri yɔɔ yɩranɩ yɩ ba naɩ yaara zanzan, nɩ peeni sɩlʋ na ba jɩgɩ nayɩrʋ sɩ o taa nii-sɩ tɩn.
Baŋa-Wɛ maa wɩ:
3 «A banɩ mʋ yɔɔrɩ dɩ wiirə dɩ nayɩra bam. A maa wʋ́ waarɩ dɩdɛɛra bam. Bɛŋwaanɩ, amʋ Paŋwa Tu Baŋa-Wɛ wʋ́ taa nii a nɔn-kɔgɔ kʋm na yɩ Zuda dwi tiinə tɩn baŋa nɩ mʋ. A laan maa wʋ́ pa ba ləri ba taa jɩgɩ dam nɩnɛɛnɩ siseŋ-nɔɔna balʋ na faŋɩ ba cwi ba ve najara wʋnɩ te tɩn.
4 Zuda dwi dɩm wʋnɩ mʋ dɩdɛɛrʋ wʋ́ ba o nuŋi.
Digə kuri kandwɛ kamunu mʋ wʋ́ nuŋi ba wʋnɩ.
Paarɩ dɩlʋ na jaanɩ vwe tɩn dɩ wʋ́ nuŋi ba wʋnɩ.
Jara-kǝm taŋa maa wʋ́ nuŋi ba wʋnɩ.
Cɩga tɩn, dɩdɛɛra dwi maama wʋ́ nuŋi ba wʋnɩ mʋ.
5 Ba maama na kɩ daanɩ, baá ji babɛ mʋ yɩ ba nɔnɩ ba dʋna bam ba sɩn cwǝŋǝ ni bwəru wʋnɩ. Ba ta wʋ́ zaŋɩ najara ba wanɩ ba dʋna sise diinə bam ba dɩ tɩga nɩ, Baŋa-Wɛ na wʋ ba tee nɩ tɩn ŋwaanɩ.
6 Amʋ nan wʋ́ pa Zuda dwi dɩm taa jɩgɩ baarɩ, yɩ a daarɩ a joŋi Zʋzɛfʋ dwi tiinə bama a yagɩ. A wʋ́ pa ba joori ba zɩgɩ ba faŋa zɩga je sɩm nɩ, a na jɩgɩ ba ŋwaŋa tɩn ŋwaanɩ. Kʋʋ́ taa nyɩ dɩ a ya maŋɩ a wʋ vɩ-ba mʋ tɩn, bɛŋwaanɩ amʋ mʋ yɩ ba Tu Baŋa-Wɛ dɩm, yɩ a nan wʋ́ sɛ ba wɛ-loro kʋm.
7 Efrayim dwi tiinə bamb wʋ́ ji jara-kǝm pamaŋna mʋ. Ba maa wʋ́ taa jɩgɩ wʋpolo lanyɩranɩ, nɩ nɔɔna na nyɔgɩ sana yɩ ba wʋʋ poli te tɩn. Ba biə bam dɩ wʋ́ na kʋntʋ maama pa ba dɩ taa jɩgɩ wʋpolo. Ba maa wʋ́ di ywəəni Baŋa-Wɛ zǝnǝ ŋwaanɩ.
8 Amʋ wʋ́ bəŋi a nɔɔna bam sɩ ba ba ba jeeri ba kɩ daanɩ mʋ. Bɛŋwaanɩ, amʋ lagɩ a vrɩ-ba mʋ a yagɩ. Ba maa wʋ́ puli dɩ kɔgɔ nɩ ba dɛɛn na daga te tɩn. 9 Amʋ ya sɩɩnɩ a jagɩ-ba a yagɩ dwi-gɛ tiinə tɩɩnɩ nɩ yigə yigə. Dɩ kʋ dɩ, ba na wʋ je sɩlʋ maama nɩ tɩn ba bá swe amʋ swiə. Ba dɩ ba biə bam wʋ́ wəri yɩ ba laan joori ba tɩtɩ tɩʋ kʋm. 10 Amʋ wʋ́ pa ba badonnǝ zɩgɩ Ezipi tɩʋ nɩ ba joori, yɩ a daarɩ a la ba badonnǝ a kɩ daanɩ sɩ ba zɩgɩ Asiiri nɩ ba ba.c A wʋ́ pa ba zɩgɩ je sɩm kʋntʋ nɩ ba ba ba jǝni Galadɩ laŋa kam nɩ, dɩ Liban nɩ. Ba maa wʋ́ taa daga ba su ba gaalɩ tɩga kam. 11 A nɔɔna bam wʋ́ bɛ nɩnɩʋ kʋm dɩ kʋ cam dɩm ba kɛ. Baá pa bugə kam na-ŋʋnɩ sɩm pəni tɩga nɩ. Nili bugə kam maama dɩ wʋ́ wɩ ba ŋwaanɩ. Asiiri tiinə kamunni dɩm wʋ́ tu tɩga. Ezipi tɩʋ paarɩ dam dɩm dɩ maa wʋ́ ti.
12 Amʋ Baŋa-Wɛ wʋ́ pa ba fɔgɩ ba zɩgɩ amʋ dam dɩm ŋwaanɩ. Ba maa wʋ́ taa kwarɩ-nɩ ba kənə maama wʋnɩ.»
Baŋa-Wɛ na tagɩ kʋlʋ tɩn mʋ kʋntʋ.