Wɛ wʋ́ waarɩ Yisɩrayɛlɩ tiinə bam dʋna
Tɩɩnɩ dɩlʋ na bwələ dɩ Yisɩrayɛlɩ tɩn taanɩ
9
Baŋa-Wɛ kwǝrǝ mʋ tɩntʋ. Ka nan maŋɩ sɩ ka vu Haderakɩ laŋa kam seeni, kʋ fɔgɩ kʋ daɩ Damasɩ tɩʋ kʋm mʋ. Yisɩrayɛlɩ dwiə yam maama, kʋ wǝli dɩ nabiinǝ maama yiǝ pagɩ Baŋa-Wɛ baŋa nɩa mʋ.2 Hamatɩ tɩʋ kʋlʋ na bwələ da tɩn tiinə yiǝ dɩ pagɩ DƖ baŋa nɩ, kʋ wǝli dɩ Tiiri tɩʋ tiinə, dɩ Sidɔn tɩʋ tiinə, dɩ ba yiyiu kʋm na yɩ te tɩn dɩ.
3 Tiiri tiinə bam lɔgɩ dam je mʋ ba pa ba tɩtɩ. Ba ma kwalɩmɩ səbu wǝǝnu, pa tɩ daga nɩ tɩga kasʋlʋ te tɩn. Ba ta ma la səbu-sɩŋa jɩjɩgɩrʋ zanzan ba tiŋi nɩ tɩ yɩ cwǝŋǝ yuu weeru mʋ te. 4 Baŋa-Wɛ nan wʋ́ vrɩ ba jɩjɩgɩrʋ tɩm, DƖ daarɩ DƖ dʋlɩ ba dam maama DƖ dɩ nɩnɩʋ kʋm wʋnɩ. Mim mʋ wʋ́ zwɛ tɩʋ kʋm maama.
5 Asekelon tɩʋ tiinə wʋ́ na kʋntʋ yɩ fʋʋnɩ yɔɔrɩ dɩ ja-ba.
Gaza tɩʋ tiinə dɩ yɩra maa wʋ́ cɛ, nɩ ba ga vri pugə mʋ tɩn.
Ekoron tɩʋ tiinə bam dɩ wʋ́ na kʋ na kɩ te, pa ba tɩɩna maama ti.
Gaza tɩʋ pɛ wʋm wʋ́ je, yɩ Asekelon tɩʋ dɩ ji di-dwəənu yɩranɩ.
6 Dwi-gʋngwaaga mʋ wʋ́ joŋi Asedodi tɩʋ ba taa te.
Amʋ Baŋa-Wɛ lagɩ a pa Filisi tiinə bam kamunni dɩm ti mʋ.
7 Amʋ nan wʋ́ pa ba daa bá dʋ nwana dɩ ya yɩra jana, sɩ wʋdi-zɔɔna daa yɩ taa wʋ ba niə nɩ.
Ba nɔɔna balʋ na daarɩ tɩn wʋ́ wǝli amʋ tɩtɩ nɔɔna bam wʋnɩ mʋ, pa ba ji nɩnɛɛnɩ Zuda dwi tiinə dwi kʋdoŋ. Kʋntʋ tɩn, Ekoron tɩʋ tiinə wʋ́ gwaanɩ dɩ a nɔɔna bam, nɩ Yebusi tiinə bam dɩ dɛɛn na kɩ te tɩn.
8 Kʋ nan na yɩ a tɩtɩ tɩʋ kʋm, a lagɩ a cɩ-kʋ mʋ sɩ kʋ dʋna bam daa yɩ tɔgɩ da ba kɛ. Nɔɔn-nɔɔnʋ daa bá na cwǝŋǝ sɩ o bɛɛsɩ a nɔɔna bam. Amʋ tɩtɩ yi laan mʋ wʋ́ taa pagɩ ba baŋa nɩ.
Wɛ Dam Tu wʋm na wʋ́ ba te tɩn taanɩ
9 Siyɔn tiinə bam,
taá di-na ywəəni lanyɩranɩ!
Zeruzalɛm tɩʋ tiinə bam,
taá caka dɩ kwǝr-dɩa!
Nii-na á pɛ wʋm na ve o bɩɩnɩ á te!
O yɩ cɩga tu mʋ yɩ o di wɔnɔ.
O nan tu o tɩtɩ mʋ
yɩ o di bɩnaga o bɩɩnɩ.
Cɩga tɩn, o dɔgɩ bɩna-pwala baŋa nɩ mʋ o veǝ.b
10 Amʋ wʋ́ pa jara-kǝm tərikooru ti
Efrayim laŋa kam nɩ,
sɩ jara-kǝm siseŋ-nɔɔna dɩ ti
Zeruzalɛm tɩʋ nɩ.
Taŋa kalʋ maama ba na maɩ
ba kɩ najara tɩn dɩ wʋ́ bwəri.
Pɛ wʋm wʋ́ tɔɔlɩ wɩ:
yazurə taa wʋ dwi tiinə maama tee nɩ falalala.
O paarɩ wʋ́ di dɩ zɩgɩ
nɩnɩʋ dɩdʋa ni nɩ,
sɩ kʋ yi kʋdoŋ ni.
Dɩ ta wʋ́ zɩgɩ Efratɩ bugə kam nɩ mʋ,
sɩ dɩ vu dɩ yi tɩga baŋa ni maama.c
11 Kʋ nan na yɩ abam Siyɔn tiinə bam, amʋ na tɔgɩ jana baŋa nɩ a kɩ ni-gonim dɩ abam tɩn ŋwaanɩ mʋ a lagɩ a liiri balʋ ba na jaanɩ á wʋnɩ ba pɩɩnɩ tɩn a ja a nuŋi ba vʋl-kɔgɔ kʋm wʋnɩ.
12 Pipiri á Joori-na á dalɩm je sɩm nɩ, abam pɩɩna balʋ tɩɩna na daga tɩn. Amʋ ta dɩ abam nɩ: a wʋ́ pa á joori á na kʋlʋ á na gɛ tɩn kuni bɩle. 13 A lagɩ a kɩ dɩ Zuda nɩ a taŋa mʋ a saŋɩ tɩn, sɩ a daarɩ a kwe Efrayim a kɩ da, nɩ kʋ yɩ a cɩna mʋ te tɩn.
Siyɔn tiinə bam, a lagɩ a kwe abam mʋ a pa á zaŋɩ á zaŋɩ najara dɩ Grɛkɩ tiinə bam. Á wʋ́ taá nyɩ dɩ jara-kǝm sʋ-lɔŋɔ mʋ a jɩŋa nɩ.
14 Baŋa-Wɛ wʋ́ pi DƖ nuŋi DƖ nɔɔna bam baŋa nɩ sɩ DƖ wǝli-ba. DƖ taŋa cɩna yam lagɩ ya taa ve mʋ dɩ fʋra nɩ dʋa na pɩpɩlɩ te tɩn.
Yuutu Baŋa-Wɛ wʋ́ wu DƖ nabɔnɔ. DƖ maa wʋ́ tɔgɩ jagwiə seeni vu-dɩʋ baŋa nɩ DƖ vu DƖ zʋ najara yam wʋnɩ.
15 Paŋwa Tu Baŋa-Wɛ tɩtɩ wʋ́ kwǝli DƖ nɔɔna bam. Ba dʋna bam na dʋlɩ-ba dɩ kandwa te maama, baá nɔnɩ-ba ba sɩn tɩga nɩ.
Ba maa wʋ́ nyɔ sana yɩ ba bagɩ dɩ dam, nɩ sa-nyɔra na kɩ te tɩn.
Baá di ywəəni ba su, nɩ zʋŋa na su dɩ jana yɩ ba kwe-ba ba miisi kaanɩm bimbim dɩm yɩra nɩ te tɩn.
16 Dɛ dɩm kʋntʋ nɩ mʋ ba Tu Baŋa-Wɛ dɩm wʋ́ joŋi-ba DƖ yagɩ, nɩ nayɩrʋ na nii o pe-kɔgɔ baŋa nɩ te tɩn, ba na yɩ o nɔɔna tɩn ŋwaanɩ.
Ba na zʋʋrɩ wʋntʋ tɩtɩ tɩga kam wʋnɩ, baá taa nyɩɩnɩ mʋ nɩ kandwa-ŋʋna na nyɩɩnɩ paarɩ yupugə yɩra nɩ te tɩn.
17 Nii ba lam na tiini dɩ jɩgɩ fra te! Nɔn-dʋnnʋ, dɩ bukwa wʋ́ di tɩga kam wʋdiiru mʋ, yɩ ba nyɔ ka dɩvɛn sɩ ba ma na dam.