Baŋa-Wɛ wʋ́ kɩ DƖ nɔɔna bam yu-yoŋo
«Amʋ yigə tiini ka wʋ Siyɔn tɩʋ kʋm wʋnɩ. A yi na pagɩ ba baŋa nɩ tɩn ŋwaanɩ mʋ pa a ban-lʋm zaŋɩ dɩ ba dʋna bam.»
3 Baŋa-Wɛ na tagɩ te tɩn mʋ tɩntʋ:
«Amʋ lagɩ a joori a ba Siyɔn tɩʋ sɩ a taa zʋʋrɩ Zeruzalɛm tɩʋ kʋm wʋnɩ. Nɔɔna laan maa wʋ́ taa jɩgɩ Zeruzalɛm tɩʋ kʋm ba bǝi nɩ: ‹Cɩga tɔgɩm tɩʋ,› yɩ ba daarɩ ba bǝi Paŋwa Tu Baŋa-Wɛ piu kʋm wɩ: ‹Piu kʋlʋ na yɩ lanyɩranɩ fasɩ tɩn›.»
4 Paŋwa Tu Baŋa-Wɛ na tagɩ te tɩn mʋ tɩntʋ:
«Baara dɩ kaana na tiini ba kwɩn yɩ ba zi nace mʋ ba ve tɩn daa wʋ́ taa tʋlɩ Zeruzalɛm tɩʋ pɩmpala yam yuu nɩ falalala, yɩ ba je ba lara. 5 Tɩʋ kʋm ta wʋ́ su dɩ bəkəri dɩ bɩsankam mʋ na kaagɩ kʋ cwe sɩm yuu nɩ ba kwɛɛra.»
6 Paŋwa Tu Baŋa-Wɛ na tagɩ te tɩn mʋ tɩntʋ:
«Amʋ nɔɔna balʋ fɩnfɩɩn ta na daarɩ da yam kʋntʋ wʋnɩ tɩn ga wʋ́ nii kǝm dɩm kʋntʋ nɩ dɩ wʋ́ taa camma mʋ dɩ gaalɩ kǝm. Kʋ nan na yɩ amʋ, dɩ wʋ́ taa camma dɩ pa-nɩ sɩ a kɩ na?» Paŋwa Tu Baŋa-Wɛ na tagɩ kʋlʋ tɩn mʋ kʋntʋ.
7 Paŋwa Tu Baŋa-Wɛ na tagɩ te tɩn mʋ tɩntʋ:
«Kʋ na yɩ a nɔɔna balʋ na jagɩ ba vu ba zʋʋrɩ wa-puli je sɩm nɩ, dɩ wa-zʋʋrɩ je sɩm nɩ tɩn, amʋ lagɩ a joŋi-ba mʋ a yagɩ. 8 A maa wʋ́ ja-ba a joori sɩ ba taa zʋʋrɩ Zeruzalɛm tɩʋ kʋm wʋnɩ. Ba maa wʋ́ taa yɩ amʋ tɩtɩ nɔɔna, sɩ amʋ dɩ taa yɩ ba Wɛ. Dɩ́ ta wʋ́ taa jɩgɩ cɩga dɩ́ pa daanɩ.»
9 Paŋwa Tu Baŋa-Wɛ na tagɩ te tɩn mʋ tɩntʋ:
«Abam laan ni taana yalʋ amʋ nijoŋnǝ bam dɛɛn na jɩgɩ ba ta maŋa kalʋ nɔɔna na puli sɩ ba cwi amʋ digə kam kuri sɩ ba fɔgɩ ba lɔ-ka tɩn. Nan kɩ-na dam á kɩ á tɩtɩ kuri nɩ.a 10 Sɩ kʋ na loori maŋa kam kʋntʋ tɩn, nabiinǝ dɩ vara ya ba naɩ ba tɩtʋŋa yam nyɔɔrɩ. Nɔɔna nan warɩ sɩ ba nuŋi ba vu je je ba tʋŋɩ tɩtʋŋa, ba dʋna bam ŋwaanɩ. Amʋ ta mʋ pɛ nɔɔna vaɩ daanɩ. 11 Kʋ nan na yɩ te tɩn, a daa bá kɩ dɩ a nɔɔna balʋ na daarɩ tɩn nɩ a ya na waarɩ a nɔɔna bam te faŋa tɩn.» Paŋwa Tu Baŋa-Wɛ na tagɩ kʋlʋ tɩn mʋ kʋntʋ.
12 «Amʋ nɔɔna balʋ ta na daarɩ tɩn na dugi wʋdiiru tɩlʋ maama, tɩ wʋ́ kɩ sɩ yazurə taa wʋra. Ba vinyə tweeru tɩm maa wʋ́ kɩ biə lanyɩranɩ. Tɩga kam wʋ́ taa kɩ wʋdiiru, yɩ wɛyuu nyɔnɔ dɩ taa tʋɩ kʋ pa-ba. 13 Zuda dɩ Yisɩrayɛlɩ dwi tiinə bam, nɩ dwi-gɛ tiinə bam dɛɛn na mɛ á yɩra ba sɔɔlɩ lwarɩm ba pa daanɩ te tɩn, kʋntʋ mʋ a lagɩ joŋi abam a yagɩ sɩ á lɛɛrɩ á ja Wɛ yu-yoŋo á ba á pa-ba. Kʋntʋ tɩn, yɩ taá fʋna. Nan kɩ-na dam á kɩ á tɩtɩ kuri nɩ.»
14 Bɛŋwaanɩ, Paŋwa Tu Baŋa-Wɛ na tagɩ te tɩn mʋ tɩntʋ:
«Á kwə bam dɛɛn na pɛ a banɩ zaŋɩ tɩn, a kɩ a wʋbʋŋa nɩ sɩ a waarɩ abam mʋ yɩ a wʋbʋŋa wʋ ləni. 15 Kʋntʋ doŋ mʋ a nan daa kɩ a wʋbʋŋa nɩ sɩ a fɔgɩ a kɩ Zeruzalɛm tɩʋ kʋm dɩ Zuda dwi tiinə bam lanyɩranɩ. Kʋntʋ ŋwaanɩ, yɩ pa-na fʋʋnɩ ta jɩga-abam. 16 Nan ta taá kɩ-na wǝǝnu tɩntʋ: Taá tɛ-na cɩga á brɩ daanɩ, sɩ á daarɩ á taá bʋrɩ cɩga bʋra taanɩ dim baŋa nɩ, sɩ yazurə taa wʋra.b 17 Nan yɩ jeeli-na lwarɩm á bɩcara nɩ sɩ á kɩ á ma á cɔgɩ á donnǝ. Ta yɩ du-na durə vwan cwǝŋǝ nɩ. Amʋ yɔɔrɩ a culi kənə yam kʋntʋ maama mʋ.» Baŋa-Wɛ na tagɩ kʋlʋ tɩn mʋ kʋntʋ.
«Abam dɛɛn na vɔgɩ á niə amʋ ŋwaanɩ canɩ sɩna cana kam wʋnɩ, dɩ canɩ sɩnu cana kam wʋnɩ, dɩ canɩ sɩrpɛ cana kam wʋnɩ, dɩ canɩ fugə cana kam wʋnɩ te tɩn laan wʋ́ ji candi yalʋ Zuda dwi tiinə bam maama na wʋ́ di ywəəni yɩ ba caka ya baŋa nɩ tɩn mʋ. Nan taá soe-na sɩ cɩga dɩ bɩcar-zuru jǝni á tɩtarɩ nɩ.»
20 Paŋwa Tu Baŋa-Wɛ na tagɩ te tɩn mʋ tɩntʋ:
«Dwi-gɛ tiinə zanzan jwa wʋ́ nuŋi ba tɩɩnɩ dɩm nɩ ba ba yo seeni. 21 Balʋ na zʋʋrɩ tɩʋ dɩdʋa wʋnɩ tɩn wʋ́ vu ba ta dɩ tɩʋ kʋdoŋ nɔɔna wɩ: ‹Nan pa-na dɩ́ tɔgɩ daanɩ dɩ́ vu Zeruzalɛm sɩ dɩ́ fʋfɔ dɩ́ yi Paŋwa Tu Baŋa-Wɛ wʋm te sɩ dɩ́ daarɩ dɩ́ loori‑DƖ sɩ DƖ kɩ dɩbam yu-yoŋo. Amʋ wʋbʋŋa jaanɩ mʋ sɩ a vu da.› 22 Kʋntʋ tɩn, dwi-gɛ tiinə zanzan na nuŋi tʋ-kamunə tɩn laan wʋ́ ba Paŋwa Tu Baŋa-Wɛ te Zeruzalɛm nɩ sɩ ba loori yu-yoŋo DƖ tee nɩ.»
23 Paŋwa Tu Baŋa-Wɛ na tagɩ te tɩn mʋ tɩntʋ:
«Maŋa kam kʋntʋ na yiǝ, dwi-gɛ nɔɔna fugə na ŋɔɔnɩ taanɩ dwi dwi tɩn wʋ́ vu ba tʋ ba gʋrɩgɩ Zwifǝ tu dɩdʋa. Ba maa wʋ́ ta dɩd-o wɩ: ‹Popo pa dɩbam cwǝŋǝ sɩ dɩ́ tɔgɩ-m dɩ́ vu, bɛŋwaanɩ dɩ́ ni nɩ Wɛ mʋ wʋ abam tee nɩ.› »