Ni-vɔɔm taanɩ
7
Pɛ Dariusi paarɩ bɩna yana bɩnɩ dɩm canɩ nʋgʋ cana kam da yana dɛ dɩm nɩ mʋ Baŋa-Wɛ kwǝrǝ dɛɛn tu ka yi Zakari. Kisilu cana kam nɩ mʋ kʋntʋ. 2 Kʋ na yɩ te tɩn, Betɛlɩ tɩʋ tiinə ya tʋŋɩ Saresɛrɩ, dɩ Reguɛm-Melɛkɩ dɩ ba kwaga nɔɔna bam mʋ sɩ ba vu ba loori Baŋa-Wɛ sɩ DƖ kɩ ba yu-yoŋo. 3 Ba ma vu Paŋwa Tu Baŋa-Wɛ digə kam ba bwe DƖ kaanɩm tiinə bam, dɩ DƖ nijoŋnǝ bam ba wɩ: «Kʋ yɩ kʋ cwǝŋǝ nɩ sɩ dɩ́ ta taa vɔ ni wʋ-cɔgɔ ŋwaanɩ canɩ sɩnu cana kam wʋnɩa, nɩ dɩ́ na maŋɩ dɩ́ kɩ tɩte bɩna zanzan wʋnɩ tɩn na?»b4 Paŋwa Tu Baŋa-Wɛ ma pa-nɩ DƖ kwǝrǝ DƖ wɩ: 5 «Bwe tɩʋ kʋm nɔɔna bam dɩ ba kaanɩm tiinə bam nɩ: ‹Bɩna fusɩrpɛ yam maama wʋnɩ á na yǝni á vɔ ni wʋ-cɔgɔ ŋwaanɩ canɩ sɩnu canɩ sɩm wʋnɩ, dɩ canɩ sɩrpɛ canɩ sɩm wʋnɩ tɩn, kʋ sɩɩnɩ kʋ yɩ amʋ ŋwaanɩ mʋ á vɔ na? 6 Kʋ nan na yi sɩ á di wʋdiu, sɩ á daarɩ á nyɔ sana, abam ba kɩ kʋntʋ á tɩtɩ ywəəni ŋwaanɩ mʋ na?› »c 7 DƖ kwǝrǝ kam kʋntʋ ta yɩ nɩ DƖ dɛɛn na pɛ DƖ faŋa faŋa nijoŋnǝ bam tɔɔlɩ kwǝrǝ kalʋ Zeruzalɛm tɩʋ nɩ tɩn mʋ. Maŋa kam kʋntʋ nɩ nɔɔna zanzan zʋʋrɩ Zeruzalɛm tɩʋ dɩ kʋ nawuurə yam wʋnɩ yɩ ba na nyɔɔrɩ ba tɩtʋŋa baŋa nɩ. Negɛbɩ seeni kagʋa kam, dɩ wa-zʋʋrɩ seeni bwəəlu tɩm dɩ dɛɛn su dɩ nɔɔna mʋ.
8 Baŋa-Wɛ daa ma pa DƖ kwǝrǝ yi Zakari DƖ wɩ: 9 «Paŋwa Tu Baŋa-Wɛ na tagɩ te tɩn mʋ tɩntʋ: Taá bʋrɩ-na cɩga bʋra á pa daanɩ, sɩ á daarɩ á taá jɩgɩ-na da-sono yɩ á duri da-ŋwaŋa. 10 Yɩ bɛɛsɩ-na kadənə, dɩ bɩtara, dɩ vərə, dɩ yinigə tiinə. Yɩ jeeli-na lwarɩm á bɩcara nɩ sɩ á kɩ á ma á cɔgɩ á donnǝ.»d
11 Á nabaara bam nan yɔɔrɩ ba vɩn mʋ sɩ ba cəgi Wɛ nijoŋnǝ bam taanɩ. Ba dɛɛn kwe ba kwaga ba ya Baŋa-Wɛ yɩ ba daarɩ ba sɩn ba zwa mʋ sɩ ba yɩ taa cəgi-DƖ. 12 Ba pɛ ba wʋ kɩ dam mʋ kʋ dwǝni piu na yɩ te tɩn, sɩ ba yɩ wanɩ ba cəgi Paŋwa Tu Baŋa-Wɛ niə yam dɩ zaasɩm dɩlʋ DƖ na dɛ DƖ Joro kʋm ŋwaanɩ DƖ pa faŋa faŋa nijoŋnǝ bam tɩn. Kʋntʋ ŋwaanɩ mʋ Baŋa-Wɛ banɩ dɛɛn yɔɔrɩ dɩ zaŋɩ ba baŋa nɩ.
13 Paŋwa Tu Baŋa-Wɛ na tagɩ te tɩn mʋ tɩntʋ: «Amʋ ya na ŋɔnɩ dɩ bantʋ tɩn, ba wʋ sɛ ba cəgi-nɩ. Kʋntʋ ŋwaanɩ, ba dɩ na ŋɔɔnɩ a yigə nɩ tɩn, amʋ dɩ wʋ cəgi. 14 A nan kwe viu a ma a kalɩ-ba a yagɩ dwi-gɛ tiinə maama wʋnɩ sɩ ba taa yɩ vərə sa-tɩʋ nɩ. Ba na viiri ba daarɩ tɩga kalʋ tɩn ma ji di-dwəənu yɩranɩ, yɩ nɔɔn-nɔɔnʋ tǝri ka wʋnɩ. Kʋntʋ baŋa nɩ mʋ ba tɩ-ywəŋə kam dɛɛn jigi kagʋa.»