8. Tərikooru tɩna taanɩ
6
Amʋ daa ma kwǝni a yuu wɛɛnɩ a nii a na sise-tərikooru tɩna na nuŋi pweeru tɩle tɩtarɩ laŋa nɩ tɩ maa bɩɩna. Pweeru tɩm maama yɔɔrɩ tɩ yɩ canna yɩranɩ mʋ. 2 Siseŋ-nɔɔna balʋ na vaŋɩ dayigə təriko kʋm tɩn yɩ nasʋnnʋ mʋ. Siseŋ-nɔɔna balʋ dɩ na vaŋɩ tərikooru tɩle tu wʋm tɩn maa yɩ nazwəənu. 3 Sɩlʋ na vaŋɩ tərikooru tɩtɔ tu wʋm tɩn yɩ napwəənu, Kʋ daarɩ sɩlʋ na vaŋɩ tərikooru tɩna tu wʋm tɩn yɩ pupweeru. Sɩ maama nan yɔɔrɩ sɩ dana mʋ cɩga cɩga. 4 A ma bwe malɛka kam na zɩgɩ ka ŋɔɔnɩ dɩ amʋ tɩn a wɩ: «Amʋ tu, wǝǝnu tɩntʋ dɩ kuri nan daa mʋ yɩ bɛ?»5 Ka dɩ ma ləri-nɩ ka wɩ: «Tɩntʋ lagɩ tɩ jagɩ tɩ yi lʋgʋ baŋa sapala yana yam maama. Tɩ nan yɔɔrɩ tɩ nuŋi Wɛ dɩm na te lʋgʋ baŋa ni maama tɩn yigə nɩ mʋ. 6 Sise-zwəənu tɩm vaŋɩ sɩ təriko kʋm sɩ yɔɔrɩ jazɩm seeni laŋa kam mʋ. Kʋlʋ sise-pwəənu tɩm na vaŋɩ tɩn ma yɔɔrɩ wa-zʋʋrɩ seeni, yɩ kʋlʋ sise-pupweeru tɩm na vaŋɩ tɩn dɩ ma yɔɔrɩ jagwiə seeni.»
7 Sise-sʋnnʋ tɩm kʋntʋ na yɔɔrɩ sɩ nuŋi tɩn, sɩ yɩra nyaarɩ mʋ sɩ sɩ vu sɩ kaagɩ sɩ beeri lʋgʋ baŋa je maama. Malɛka kama dɩ ma pa-sɩ ni ka wɩ: «Ve-na tɩga baŋa je maama sɩ á nii.» Sɩ ma nuŋi sɩ vu sɩ kaagɩ tɩga baŋa ni maama sɩ pu. 8 O laan ma tɔɔlɩ o ta dɩ amʋ o wɩ: «Nii mʋ. Sise sɩlʋ na maa ve jazɩm baŋa seeni laŋa kam nɩ tɩn mʋ pɛ Baŋa-Wɛ banɩ dɩm zuri je sɩm kʋntʋ nɩ.»
Paarɩ yupugə wʋ́ pu Zozwe yuu nɩ
9 Baŋa-Wɛ kwǝrǝ dɛɛn tu ka yi amʋ ka wɩ:
10 «Hɛldayi, dɩ Tobiya, dɩ Yedaya zɩgɩ Babilɔnɩ tɩʋ nɩ ba ba yo seeni. Nan ve n jeeri-ba n daarɩ n joŋi pɛɛra yalʋ ba na jaanɩ ba ba tɩn ba tee nɩ. Dɩntʋ dɛ dɩm nɩ nɔ́ɔ sɩ n kwe ba pɛɛra yam kʋntʋ n ja n vu Sofoni bu Zʋzɩasɩ sɔŋɔ. 11 Nmʋ laan wʋ́ kwe ba səbu, dɩ ba səbu-sɩŋa pɛɛra yam n ma n kɩ paarɩ yupugə, sɩ n kwe-ka n pu Yosadakɩ bu Zozwe na yɩ Wɛ kaanɩm nakwɩ tu tɩn yuu nɩ. 12 Laan ta dɩd-o nɩ: ‹Paŋwa Tu Baŋa-Wɛ na tagɩ te tɩn mʋ tɩntʋ: Nii wʋlʋ ba na bǝ-o wɩ «Tiu naga» tɩn.b O nan wʋ́ zɩgɩ yo seeni mʋ o puli je maama nɩ yɩ o fɔgɩ o lɔ Baŋa-Wɛ digə kam. 13 Cɩga tɩn, wʋntʋ mʋ wʋ́ lɔ-ka o zɩgɩ. Wʋntʋ wʋ́ taa jɩgɩ paarɩ nɩnwaŋa mʋ yɩ o je o paarɩ jangɔŋɔ kʋm baŋa nɩ o te o nɔɔna bam. Wɛ kaanɩm tu mʋ wʋ́ taa wʋ o paarɩ jangɔŋɔ kʋm saŋa nɩ. Bantʋ bale wʋ́ taa tʋŋɩ daanɩ dɩ ni-mɔrɔ.› 14 Paarɩ yupugə kam wʋ́ maŋɩ Wɛ diga kam nɩ mʋ sɩ nɔɔna taa guli Hɛldayic, dɩ Tobiya, dɩ Yedaya, dɩ Sofoni bu Zʋzɩasɩd gulə.
15 Nɔɔna balʋ na wʋ sa-tɩʋ wʋnɩ tɩn wʋ́ ba ba wǝli sɩ Baŋa-Wɛ digə kam fɔgɩ ka lɔ. Abam laan wʋ́ lwarɩ nɩ kʋ sɩɩnɩ kʋ yɩ Paŋwa Tu Baŋa-Wɛ mʋ tʋŋɩ-nɩ abam tee nɩ. Tɩntʋ nan wʋ́ sɩɩnɩ kʋ kɩ, nɩ abam na yɔɔrɩ á sɛ á Tu Baŋa-Wɛ ni dɩm cɩga cɩga.»