6. Tɔnɔ kʋlʋ na jaanɩ wɛɛnɩ tɩn taanɩ
5
Amʋ daa ta ma kwǝni a yuu wɛɛnɩ yɩ a nii a na tɔnɔ mʋ na yɔɔrɩ kʋ jaanɩ wɛɛnɩ kʋ tɩtɩ nɩ.2 Malɛka kam ma bwe-nɩ ka wɩ: «Bɛɛ mʋ n nii n na?» Amʋ dɩ ma ləri a wɩ: «A nɛ tɔnɔ mʋ na jaanɩ wɛɛnɩ. Kʋ saŋ-dɩdɔrɔ maa yɩ kantɩa ni maŋɩm kuni fiinle. Kʋ saŋ-kukugə maŋɩm dɩ maa yɩ kantɩa ni kuni fugə.»
3 O laan ma ta dɩ amʋ o wɩ: «Tɔnɔ kʋntʋ jɩgɩ kampwəl-balɔrɔ mʋ sɩ kʋ ja vu kʋ yi tɩga baŋa ni maama. Tɔnɔ kʋm saŋa dɩdʋa wʋnɩ, ba sɔɔlɩ lwarɩm mʋ ba yagɩ balʋ na ŋɔnɩ tɩn yuu nɩ wɩ: Wɛ wʋ́ saarɩ-ba tɩga kam wʋnɩ. Saŋa wʋdoŋ kam wʋnɩ, ba sɔɔlɩ lwarɩm ba yagɩ balʋ na bʋrɩ vwan bʋra ba ma ba vanɩ ba donnǝ tɩn yuu nɩ wɩ: Wɛ wʋ́ saarɩ ba dɩ tɩga kam wʋnɩ. 4 Paŋwa Tu Baŋa-Wɛ nan na pɛ ni dɩlʋ tɩn mʋ tɩntʋ: Amʋ wʋ́ tʋŋɩ tɔnɔ kʋntʋ sɩ kʋ zʋ ŋwɩɩnʋ sɔŋɔ, dɩ wʋlʋ na maɩ amʋ yɩrɩ o bʋrɩ vwan bʋra tɩn dɩ sɔŋɔ. Kʋ nan na yi da, kʋʋ́ maŋɩ kʋ tu sɔŋɔ nɩ mʋ kʋ cɔgɩ wǝǝnu maama, sɩ kʋ kabri tɩtɩ, dɩ kʋ be sɩm dɩ da tɩ cɔgɩ.»
7. Kaanɩ wʋlʋ na je garɩwaa wʋnɩ tɩn taanɩ
5 Malɛka kalʋ na ŋɔɔnɩ dɩ amʋ tɩn laan ma fʋfɔ ka yi a te yɩ ka ta dɩ amʋ ka wɩ: «Nan daa n kwǝni n yuu wɛɛnɩ n nii kʋlʋ na zɩgɩ da kʋ bɩɩnɩ tɩn.» 6 Amʋ dɩ ma bwe‑o a wɩ: «Woŋo kʋm kʋntʋ nan yɩ bɛɛ mʋ?» Malɛka kam ma ləri ka wɩ: «Woŋo kʋlʋ na bɩɩnɩ tɩn yɩ tɩtɔgɔa mʋ.» O daa ta maa wɩ: «Kʋ zɩgɩ kʋ paɩ lwarɩm kikiǝ yalʋ nɔɔna na kɩ tɩga kam maama wʋnɩ tɩn mʋ.»
7 A ma nii a na nɩ ba dwanɩ luu kʋlʋ ya na pugi tɩtɔgɔ kʋm ni tɩn. A laan ma na nɩ kaanɩ mʋ je ka wʋnɩ. 8 Malɛka kam ma maŋɩ kʋ kuri ka brɩ-nɩ ka wɩ: «Kaanɩ wʋntʋ mʋ brɩ kǝm-balwaarʋ na yɩ te tɩn.» Ka laan ma yigi kaanɩ wʋm lɩla ka joori ka yagɩ tɩtɔgɔ kʋm wʋnɩ, yɩ ka daarɩ ka kwe nipugu kʋm ka pu ni dɩm da.
9 A ta na kwǝni a yuu a nii wɛɛnɩ kʋntʋ tɩn mʋ a daa nɛ kaana bale na zɩgɩ wɛyuu kʋm nɩ ba jaanɩ ba maa bɩɩna. Ba maa yaarɩ ba vwana viu yigə nɩ nɩ bugə ni zunə na kɩ te tɩn. Ba ma vu ba gɔ tɩtɔgɔ kʋm wɛɛnɩ ba ja ba di wɛyuu baŋa.