5. Səbu-sɩŋa min-zwǝn-zɩgʋ taanɩ
4
Malɛka kalʋ ya na ŋɔɔnɩ dɩ amʋ tɩn ma ba ka sisigi-nɩ, nɩnɛɛnɩ a ya yɔɔrɩ a dɔ mʋ tɩn. 2 Ka ma bwe-nɩ ka wɩ: «Bɛɛ mʋ nmʋ nɛa?» A ma ləri a wɩ: «A nɛ min-zwǝn-zɩgʋ ba na mɛ səbu-sɩŋa ba mɔ kʋ maama tɩn mʋ. Zʋŋa mʋ wʋ kʋ yuu kʋm seeni dɩ ka wʋ nugə. Min-zwǝǝnu tɩrpɛ maa wʋ zɩgʋ kʋm baŋa nɩ. Tɩ maama dɩdʋa dɩdʋa maa jɩgɩ niə yarpɛ. 3 A nan ta nɛ Olivi tweeru tɩle, pa dɩdʋa zɩgɩ zʋŋa kam jazɩm seeni, yɩ kʋkʋm kʋm dɩ zɩgɩ ka jagwiə seeni.»a4 A ma bwe malɛka kam na zɩgɩ ka ŋɔɔnɩ dɩ amʋ tɩn a wɩ: «Amʋ tu, wǝǝnu tɩntʋ kuri yɩ bɛɛ mʋ?» 5 Malɛka kam dɩ ma joori ka bwe-nɩ ka wɩ: «Nmʋ yǝri wǝǝnu tɩntʋ kuri na?» A ma ləri a wɩ: «Awo.»
6 O laan ma ta dɩ amʋ o wɩ: «Baŋa-Wɛ na jɩgɩ kwǝrǝ kalʋ sɩ DƖ pa Zorobabɛlɩ tɩn mʋ tɩntʋ: ‹Kʋ daɩ nmʋ bara tɩtʋŋa yam ŋwaanɩ, naa n dam ŋwaanɩ mʋ n lagɩ n na yigə-vəŋə, sɩ kʋ yɩ amʋ tɩtɩ Joro ŋwaanɩ mʋ.› Paŋwa Tu Baŋa-Wɛ na tagɩ kʋlʋ tɩn mʋ kʋntʋ.
7 Pi-kamunu kʋm na cɩgɩ Zorobabɛlɩ yigə tɩn, n brɩ nɩ n yɩ bɛɛ mʋ? Zorobabɛlɩ yigə nɩ n maŋɩ sɩ n palɩsɩ mʋ n ji pɔgɔ tɩga. O laan maa wʋ́ ja kandwɛ dɩlʋ na wʋ́ guri Wɛ diga kam tɩn o ja o nuŋi o kɩ da, sɩ nɔɔna bam maama taa bagɩ ba yaga ba wɩ: ‹Wɛ yu-yoŋo dɩm ŋwaanɩ! Wɛ yu-yoŋo dɩm ŋwaanɩ!› »
8 Baŋa-Wɛ laan ma pa-nɩ DƖ kwǝrǝ DƖ wɩ:
9 «Zorobabɛlɩ mʋ nii pa ba puli Wɛ diga kantʋ kuri ba cwi ka biri-bərə kam. Wʋntʋ nan ta mʋ wʋ́ pa ba lɔ-ka ba guri. Abam laan wʋ́ lwarɩ nɩ kʋ sɩɩnɩ kʋ yɩ Paŋwa Tu Baŋa-Wɛ mʋ tʋŋɩ-nɩ abam tee nɩ. 10 Wʋlʋ maama na nɛ Wɛ diga kam lɔɔm na puli mɛmɛ te tɩn yɩ o gooni tɩtʋŋɩ dɩm, kʋ tu wʋ́ ba o taa caka dɩ Zorobabɛlɩ na ze lwara ŋʋna yɩ digə kam lɔɔm kɛ yigə te tɩn.»
Malɛka kam ta ma ləri-nɩ ka wɩ:b
«Min-zwǝǝnu tɩrpɛ tɩm nan zɩgɩ tɩ paɩ Baŋa-Wɛ yiǝ yam na dʋlɩ ya kaagɩ tɩga baŋa ni maama tɩn mʋ.»
11 Amʋ daa ma bwe malɛka kam a wɩ: «Olivi tweeru tɩle dɩm na zɩgɩ min-zwǝn-zɩgʋ kʋm jazɩm seeni dɩ kʋ jagwiə seeni tɩn kuri yɩ bɛɛ mʋ?» 12 A ta ma bwe a wɩ: «Sɩ kʋ na yɩ Olivi tweeru nɛ sɩle sɩm na wʋ səbu-sɩŋa wo-wəəru tɩle tɩm nugə kam na tɔgɩ tɩ wʋnɩ ka lo ka yagɩ tɩn saŋa nɩ tɩn, sɩ kuri yɩ bɛɛ mʋ?» 13 O dɩ ma joori o bwe-nɩ o wɩ: «Nmʋ yǝri wǝǝnu tɩntʋ kuri na?» A ma ləri a wɩ: «Awo.»
14 O laan ma ta o wɩ: «Nɛ sɩle sɩm kʋntʋ zɩgɩ sɩ paɩ yigǝ tiinǝ bale balʋ ba na tiŋi sɩ ba taa tʋŋɩ ba pa ba Tu Wɛ dɩm na te lʋgʋ baŋa ni maama tɩn mʋ.»