Baŋa-Wɛ wʋ́ ba sɩ DƖ di paarɩ
14
Nii-na! Baŋa-Wɛ jɩgɩ dɛ dɩ na bɩɩnɩ. Dɛ dɩm kʋntʋ na yiǝ, á dʋna bam wʋ́ ba ba vrɩ á jɩjɩgɩrʋ ba daarɩ ba cɛ-tɩ ba pa daanɩ yɩ á zɩgɩ á niə. 2 Kʋ na wʋ́ kɩ te tɩn, amʋ Baŋa-Wɛ wʋ́ pa dwi-gɛ tiinə maama kɩ daanɩ ba ba ba jeeri Zeruzalɛm tɩʋ kʋm dɩ najara. Baá wanɩ tɩʋ kʋm ba di. Ba maa wʋ́ zʋ sam wʋnɩ ba vrɩ nɔɔna jɩjɩgɩrʋ, yɩ ba zi ba kaana. Ba ta wʋ́ kalɩ kʋ nɔn-biə bam cicoro ba ja ba vu sa-tɩʋ yigə yigə. Ba cicoro kʋlʋ na daarɩ tɩn nan wʋ́ na cwǝŋǝ sɩ ba maŋɩ tɩʋ kʋm wʋnɩ. 3 Baŋa-Wɛ tɩtɩ nan mʋ lagɩ DƖ nuŋi DƖ vu DƖ jeeri dwi tiinə bam kʋntʋ, nɩ DƖ dɛɛn na kɩ najara te tɩn. 4 Maŋa kam kʋntʋ nɩ, DƖ lagɩ DƖ zɩgɩ Olivi piu kʋm yuu nɩ mʋ, kʋ na jeeri Zeruzalɛm wa-puli seeni tɩn. Piu kʋm maa wʋ́ yarɩ kuni bɩle, sɩ lɔŋɔ kamunu taa tigi tɩ tɩtarɩ laŋa nɩ, kʋ na zɩgɩ wa-puli seeni kʋ vu wa-zʋʋrɩ seeni tɩn. Piu kʋm cicoro dɩdʋa wʋ́ fʋfɔ kʋ vu jazɩm seeni, sɩ kʋdoŋ kʋm dɩ vu jagwiə seeni. 5 Abam laan maa wʋ́ tɔgɩ Baŋa-Wɛ bolo kʋm kʋntʋ á duri á lu, bolo kʋm na wʋ́ kɛ kʋ yi Atɩsalɩ tɩn ŋwaanɩ. Á na wʋ́ duri á lu te tɩn nyɩ dɩ á nabaara dɛɛn na kɩ te yɩ ba lu cam wʋnɩ maŋa kalʋ Zuda tɩʋ pɛ Ozɩasɩ na di paarɩ yɩ tɩga kam sisiŋi tɩn mʋ. Kʋntʋ kwaga nɩ, amʋ Tu Baŋa-Wɛ laan wʋ́ ba DƖ nuŋi, yɩ DƖ malɛksɩ sɩm maama dɩ tɔgɩ dɩ DƖ.a6 Dɛ dɩm kʋntʋ na yiǝ, wɩa pooni bá taa wʋra. Waarʋ, dɩ zurim dɩ bá taa wʋra. 7 Maŋa kam kʋntʋ wʋ́ taa yɩ ka yɩra. Baŋa-Wɛ nan yɔɔrɩ DƖ ye ka ni nɩ. Tɩga daa bá yi sɩ ka daarɩ ka pʋʋrɩ. Wa-zʋʋrɩ maŋa nɩ wɩa pooni wʋ́ taa wʋra.
8 Dɛ dɩm kʋntʋ na yiǝ, na-ŋʋna wʋ́ ta ba nuŋi Zeruzalɛm tɩʋ kʋm wʋnɩ ba taa durǝ maŋa maama, yadɛ dɩ tɩ-pwəŋə maama. Na bam cicoro wʋ́ duri ba vu ba zʋ wa-puli seeni nɩnɩʋ kʋm. Ba badonnǝ dɩ maa wʋ́ duri ba vu ba zʋ wa-zʋʋrɩ seeni nɩnɩʋ kʋm.b 9 Baŋa-Wɛ maa wʋ́ taa yɩ lʋgʋ baŋa je maama pɛ. Maŋa kam kʋntʋ nɩ, Baŋa-Wɛ wʋ́ taa yɩ DƖ yɩranɩ dɩdʋa mʋ, pa nɔɔna taa zuli‑DƖ DƖ yɩrɩ dɩm na yɩ dɩdʋa tɩn ŋwaanɩ. 10 Tɩga kam ni maama wʋ́ taa yɩ tɩ-kamparɩ mʋ, kʋ zɩgɩ Geba nɩ sɩ kʋ vu kʋ yi Rimɔn na wʋ Zeruzalɛm jagwiə seeni tɩn. Zeruzalɛm tɩʋ kʋm tɩtɩ maa wʋ́ taa wʋ wɛ wɛ, nɩ kʋ na maŋɩ kʋ yɩ te tɩn. Tɩʋ kʋm wʋ́ taa yalma, kʋ zɩgɩ Bɛnzamɛn ni dɩm nɩ, sɩ kʋ yi je sɩlʋ Pulim ni dɩm na wʋra tɩn, yɩ kʋ kɛ kʋ yi Gugoro ni dɩm. Kʋ ta maa zɩgɩ Hananɛlɩ di-dɩdɔrɔ kʋm nɩ, sɩ kʋ vu kʋ yi je sɩlʋ ba na kan vinyə tiu biə ba pa pɛ wʋm tɩn. 11 Nɔɔna laan maa wʋ́ taa zʋʋrɩ Zeruzalɛm tɩʋ kʋm wʋnɩ. Kʋ daa bá taa maŋɩ sɩ nɔɔna yɔɔrɩ ba cɔgɩ-kʋ. Tɩʋ kʋm wʋ́ fɔgɩ kʋ zɩgɩ dɩ yazurə mʋ. 12 Kʋ na yɩ tɩɩnɩ dɩlʋ maama na jeeri Zeruzalɛm tɩʋ kʋm dɩ najara tɩn, Baŋa-Wɛ na wʋ́ waarɩ-ba dɩ yawɩ-cɛɛrʋ tɩlʋ tɩn mʋ tɩntʋ: DƖ wʋ́ pa ba ya-nwana yam mʋʋrɩ yɩ ba ta zɩgɩ wɛɛnɩ. Ba yicilbiə dɩ maa wʋ́ cɔgɩ ya gwəənu tɩm nɩ, yɩ ba dindəlimə dɩ maŋɩ ba niə nɩ ya pɔ.
13 Dɛ dɩm kʋntʋ na yiǝ, Baŋa-Wɛ maa wʋ́ pa ba wʋbʋŋa tiini ya vugimi sɩ fʋʋnɩ zʋ-ba. Ba wʋnɩ nɔɔnʋ maama wʋ́ zi o doŋ pa ba magɩ najara. 14 Zuda tiinə bam dɩ wʋ́ zaŋɩ najara Zeruzalɛm tɩʋ kʋm nɩ. Zeruzalɛm tiinə bam laan maa wʋ́ la tɩɩnɩ dɩlʋ na gilimi-ba tɩn jɩjɩgɩrʋ ba kɩ daanɩ, kʋ na maŋɩ kʋ yɩ səbu-sɩŋa, dɩ səbu, dɩ gwaarʋ zanzan dɩ. 15 Yawɩ-cɛɔ kʋntʋ doŋ dɩ maa wʋ́ ja siseŋ-nɔɔna bam, dɩ bɩna-sise sɩm, dɩ yogondə yam, dɩ bɩnɛ sɩm, dɩdaanɩ vara balʋ maama na wʋ ba dʋna bam jiləjugu kapwəəru je sɩm wʋnɩ tɩn.
16 Kʋ kwaga seeni, tɩɩnɩ dɩlʋ nɔɔna ya na zaŋɩ najara dɩ Zeruzalɛm tɩʋ kʋm yɩ ba wəri tɩn maama laan wʋ́ yǝni ba vu Zeruzalɛm bɩnɩ maama nɩ, sɩ ba zuli Pɛ wʋm na yɩ Paŋwa Tu Baŋa-Wɛ tɩn, yɩ ba daarɩ ba di Vwə cwiim candiə kam.c 17 Dwi dɩlʋ maama na wʋ lʋgʋ baŋa nɩ tɩn nan na vɩn sɩ ba vu Zeruzalɛm ba zuli Pɛ wʋm na yɩ Paŋwa Tu Baŋa-Wɛ tɩn, dʋa bá nɩ ka pa-ba. 18 Ezipi dwi tiinə bam dɩ na vɩn sɩ ba vu da sɩ ba tɔgɩ ba zuli‑DƖ, dʋa bá nɩ ka pa bantʋ dɩ. Baŋa-Wɛ nan wʋ́ pa yawɩ-cɛɔ mʋ ja-ba, nɩ kʋlʋ o na pɛ kʋ ja dwiə yalʋ maama na vɩn sɩ ba vu Zeruzalɛm ba di Vwə cwiim candiə kam tɩn. 19 Lɛɛrʋ tɩntʋ doŋ mʋ wʋ́ yi Ezipi tiinə bam dɩ dwiə yalʋ maama na vɩn sɩ ba vu ba tɔgɩ ba di Vwə cwiim candiə kam tɩn.
20 Maŋa kam kʋntʋ nɩ baá pʋpʋnɩ bɩtarɩ sɩntʋ mʋ ba kɩ siseŋ-nɔɔna bam loŋnə yɩra nɩ: «Lanyɩranɩ fasɩ mʋ Baŋa-Wɛ ŋwaanɩ». Kambi dwi maama maa na wʋ Wɛ digə kam nɩ tɩn dɩ maa wʋ́ taa jɩgɩ kuri sɩ maŋɩ dɩ kabǝli sɩlʋ na kɩ Wɛ bimbim dɩm kaanɩm tɩtʋŋa tɩn. 21 Cɩga tɩn, kambi sɩlʋ maama na wʋ Zeruzalɛm nɩ dɩ Zuda tɩɩnɩ dɩm maama nɩ tɩn wʋ́ taa yɩ lanyɩranɩ fasɩ mʋ Paŋwa Tu Baŋa-Wɛ ŋwaanɩ. Nɔɔna balʋ maama na lagɩ ba kɩ kaanɩm ba pa Wɛ tɩn maa wʋ́ wanɩ ba kwe kambiə kalʋ maama ba na lagɩ tɩn ba saŋɩ kaanɩm dɩm nwana ka wʋnɩ. Maŋa kam kʋntʋ nɩ, pipimpiinu daa bá vu o jǝni Dam-fɔrɔ Tu Baŋa-Wɛ digə kam wʋnɩ.