3. Nɔɔnʋ wʋlʋ na ze lwara ŋʋna o jɩŋa nɩ tɩn taanɩ
2
Amʋ ma kwǝni a yuu wɛɛnɩ a nii a na nɔn-dʋŋʋ na zɩgɩ da yɩ kʋ tu ze lwara ŋʋna o jɩŋa nɩ. 2 A ma bwe‑o a wɩ: «Nmʋ ma n ve yən mʋ?» O ma ləri o wɩ: «A maa ve sɩ a maŋɩ Zeruzalɛm tɩʋ kʋm ni mʋ, sɩ a lwarɩ kʋ saŋ-dɩdɔrɔ, dɩ kʋ saŋ-kukugə maŋɩm na yɩ te tɩn.» 3 A daa ma na nɩ malɛka kalʋ ya na zɩgɩ ka ŋɔɔnɩ dɩ amʋ tɩn fʋfɔ ka kɛ dáa, yɩ malɛka kadoŋ dɩ fʋfɔ ka yi kantʋ dɩ te. 4 Ka maa wɩ: «Kɩ lɩla n vu n ta dɩ nɔn-dʋŋʋ kʋm nɩ: ‹Zeruzalɛm wʋ́ tiini kʋ taa yalma sɩ kʋ daa yɩ taa jɩgɩ sisəm. Kʋ nɔn-biə dɩ kʋ vara dɩ nan wʋ́ gaalɩ pa ba bá wanɩ ba lɔ kabri ba cɩ-kʋ. 5 Amʋ Baŋa-Wɛ tɩtɩ mʋ wʋ́ ji kəbrə kalʋ na yɩ mim yɩranɩ tɩn, yɩ a kaagɩ tɩʋ kʋm maama a pu. A paarɩ-zulǝ yam dɩ wʋ́ taa wʋ tɩʋ kʋm tɩtarɩ nɩ ya brɩ a dam jaja. Amʋ Baŋa-Wɛ na tagɩ kʋlʋ tɩn mʋ kʋntʋ.› »Balʋ na wʋ sa-tɩʋ nɩ tɩn taanɩ
6 Baŋa-Wɛ na tagɩ te tɩn mʋ tɩntʋ: «Hei! Duri-na á nuŋi baŋa seeni tɩʋ kʋlʋ wʋnɩ ba na pɩɩnɩ abam tɩn! Bɛŋwaanɩ, amʋ mʋ ya sɩɩnɩ a jagɩ abam a yagɩ lʋgʋ baŋa sapala yana yam maama seeni.a 7 Abam balʋ na yɩ a nɔɔna yɩ á zʋʋrɩ Babilɔnɩ tɩʋ tiinə bam tee nɩ tɩn, duri-na á lu sɩ á joori Siyɔn seeni!» 8 Bɛŋwaanɩ, Paŋwa Tu Baŋa-Wɛ pɛ-nɩ ni mʋ sɩ a da DƖ paarɩ-zulǝ yam ŋwaanɩ a vu a kaanɩ dwi-gɛ tiinə balʋ na bɛɛsɩ abam tɩn, DƖ yi na pagɩ abam baŋa nɩ tɩn ŋwaanɩ. Wʋlʋ na kɩ abam zʋnnɩ, kʋ nyɩ dɩ kʋ tu kɩ Wɛ tɩtɩ yicilbu mʋ zʋnnɩ. 9 Kʋntʋ ŋwaanɩ, Baŋa-Wɛ ta dwi-gɛ tiinə bam taanɩ DƖ wɩ: «A lagɩ a kwe a dam mʋ a cɩcʋgɩ-ba, sɩ a daarɩ a pa ba gambɛ sɩlʋ ya na tʋŋɩ sɩ pa-ba tɩn laan zi-ba ba daarɩ ba vrɩ ba wǝǝnu.» Abam laan maa wʋ́ lwarɩ nɩ Paŋwa Tu Baŋa-Wɛ mʋ sɩɩnɩ DƖ tʋŋɩ-nɩ.
10 Dam-fɔrɔ Tu Baŋa-Wɛ na tagɩ te tɩn mʋ tɩntʋ: «Siyɔn tiinə bam, leeni-na wʋpolo le! Bɛŋwaanɩ, a lagɩ a ba a taa zʋʋrɩ á tɩtarɩ nɩ mʋ. 11 Dɛ dɩm kʋntʋ na yiǝ, dwi-gɛ tiinə zanzan wʋ́ pipiri ba ba ba sɛ amʋ Baŋa-Wɛ yɩ ba daarɩ ba ji a nɔɔna. A maa wʋ́ taa zʋʋrɩ á tɩtarɩ nɩ.» Kʋ na kɩ kʋntʋ, abam dɩ laan wʋ́ lwarɩ nɩ Paŋwa Tu Baŋa-Wɛ mʋ sɩɩnɩ DƖ tʋŋɩ-nɩ abam tee nɩ.b 12 Baŋa-Wɛ wʋ́ pɔɔrɩ Zuda laŋa kam DƖ tɩtɩ tɩga kam maama wʋnɩ sɩ DƖ taa te-ka. DƖ daa ta wʋ́ lɩ Zeruzalɛm sɩ kʋ taa yɩ DƖ tɩtɩ nyɩm.
13 Nabiinǝ maama nan maŋɩ sɩ ba taa yɩ cɩmm Baŋa-Wɛ yigə nɩ mʋ! Bɛŋwaanɩ, DƖ dwanɩ DƖ tɩtɩ mʋ DƖ zaŋɩ wɛɛnɩ DƖ wɛyuu sɔŋɔ kʋm nɩ, yɩ DƖ lagɩ DƖ nuŋi DƖ taa tʋŋɩ tɩtʋŋa.