Wɛ Nijoŋnu
Zakari Tɔnɔ
Titwəni-na á twɛ Baŋa-Wɛ
1
Dariusi paarɩ dim bɩna yale bɩnɩ dɩm canɩ nana cana kam wʋnɩ mʋ Baŋa-Wɛ kwǝrǝ dɛɛn yi DƖ nijoŋnu Zakari. Wʋntʋ ko dɛɛn yɩ Ido bu Berekiya mʋ.a
2 Baŋa-Wɛ kwǝrǝ kam mʋ tɩntʋ:
A banɩ dɛɛn zaŋɩ dɩ abam kwə bam. 3 Nan ta dɩ nɔɔna bam nɩ: Paŋwa Tu Baŋa-Wɛ na tagɩ te tɩn mʋ tɩntʋ: «Joori-na á ba amʋ te, sɩ amʋ dɩ pipiri a jeeri abam. 4 Abam dɩ yɩ taá kɩ nɩ á nabaara bam dɛɛn na kɩ te tɩn. Faŋa tɩn, Wɛ nijoŋnə sɩdonnǝ dɛɛn tagɩ dɩ ba mʋ ba wɩ: ‹Paŋwa Tu Baŋa-Wɛ tagɩ tɩntʋ mʋ dɩ abam: Yagɩ-na á tɩtʋŋ-balwaarʋ tɩm sɩ á pipiri á joori amʋ tee nɩ.› Ba nan wʋ cəgi amʋ kwǝrǝ kam.» Amʋ Baŋa-Wɛ na tagɩ kʋlʋ tɩn mʋ kʋntʋ. 5 Á nabaara bam kʋntʋ laan wʋ yən nɩ mʋ? Sɩ Wɛ nijoŋnǝ bam kʋntʋ dɩ, baá taa wʋra maŋa maama na? 6 Kʋ nan na yɩ amʋ niə yam dɩ a taanɩ dɩm a dɛɛn na pɛ a nijoŋnǝ bam kʋntʋ tɩn, dɩ wʋ sɩɩnɩ dɩ kɩ dɩ ja á kwə bam na? Bantʋ dɩ ma pipiri ba joori ba ba amʋ te, yɩ ba wɩ: «Paŋwa Tu Baŋa-Wɛ sɩɩnɩ DƖ waarɩ dɩbam mʋ dɩ́ kənə ŋwaanɩ, sɩ kʋ maŋɩ dɩ DƖ wʋbʋŋa na maŋɩ ya ja sɩ DƖ kɩ te tɩn.»
Wɛ vɩɩrɩ wǝǝnu DƖ brɩ Zakari
1. Sise diinə taanɩ
7 Canɩ fugə-dɩdʋa cana kam da fiinle-yana dɛ dɩm nɩ, Baŋa-Wɛ kwǝrǝ dɛɛn yi DƖ nijoŋnu Zakari, o ko na yɩ Ido bu Berekiya tɩn. Sebatɩ cana kam nɩ mʋ kʋntʋ. Kʋ maa yɩ Dariusi paarɩ dim bɩna yale bɩnɩ dɩm nɩ.
8 Tɩtɩɩ dɩm nɩ mʋ amʋ Zakari nii a na nɔɔnʋ na dɔgɩ sisəŋ-nɔɔnʋ baŋa nɩ, ka na yɩ nasʋŋʋ. Mɛ seeni o na zɩga da tɩn yɩ bolo mʋ yɩ Miriti tweeru su kʋ maama. O laan maa wʋ dɩ tɩtarɩ nɩ. A ta ma na nɩ siseŋ-nɔɔna sɩdonnǝ mʋ zɩga o kwaga nɩ, sɩ na yɩ nasʋnnʋ, dɩ nasʋn-pupweeru, dɩ napwəənu, yɩ nɔɔna dɩ dɔgɩ sɩ baŋa nɩ.b
9 Wɛ malɛka kadoŋ dɛɛn zɩgɩ da, ka na ŋɔɔnɩ dɩ-nɩ. A ma bwe‑ka a wɩ: «Amʋ tu, bɛɛ mʋ yɩ bantʋ maama zɩgɩ da?» Ka dɩ ma ləri-nɩ ka wɩ: «Amʋ wʋ́ ta kʋ kuri a brɩ-m.»
10 Nɔɔnʋ wʋlʋ na wʋ tweeru tɩm tɩtarɩ nɩ tɩn laan ma ta o wɩ: «Bantʋ yɩ balʋ Baŋa-Wɛ na tʋŋɩ sɩ ba taa kaagɩ lʋgʋ ni maama sɩ ba lwarɩ kʋlʋ na jɩgɩ kʋ kɩ da tɩn.» 11 Balʋ na dɔgɩ siseŋ-nɔɔna bam baŋa nɩ tɩn dɩ maa lwǝni ba kwǝri ba brɩ Baŋa-Wɛ malɛka kam na wʋ tweeru tɩm tɩtarɩ nɩ tɩn ba wɩ: «Dɩbam kaagɩ tɩga baŋa ni maama, yɩ dɩ́ maanɩ nɩ lʋgʋ kʋm maama maŋɩ dá yirr mʋ, yɩ kʋlʋkʋlʋ ba dwana.»
12 Baŋa-Wɛ malɛka kam laan ma ta ka wɩ: «Paŋwa Tu Baŋa-Wɛ, bɩna fusɩrpɛ mʋ tɩntʋ nmʋ banɩ na yɔɔrɩ dɩ wʋ Zeruzalɛm tɩʋ kʋm, dɩ Zuda tɩɩnɩ dɩm maama baŋa nɩ. Maŋa kɔɔ mʋ nmʋ banɩ dɩm wʋ́ tʋ sɩ n duri ba ŋwaŋa?»c 13 Baŋa-Wɛ ma ŋɔɔnɩ ta-laarʋ tɩlʋ na bwǝnǝ yɩ tɩ zuri bɩcara tɩn DƖ ma ləri malɛka kalʋ na zɩgɩ ka ŋɔɔnɩ dɩ amʋ tɩn. 14 Malɛka kam kʋntʋ ma ta dɩ amʋ ka wɩ: «Pa kwǝrǝ kantʋ zaŋɩ wɛɛnɩ wɩ: Paŋwa Tu Baŋa-Wɛ na tagɩ te tɩn mʋ tɩntʋ: ‹Amʋ yi pagɩ a tɩtɩ tɩʋ Zeruzalɛm baŋa nɩ. 15 A banɩ nan tiini dɩ zaŋɩ dɩ tɩɩnɩ dɩdonnǝ dɩm na bʋŋɩ nɩ kʋlʋkʋlʋ bá daanɩ-ba tɩn mʋ. Bɛŋwaanɩ, a banɩ ya zaŋɩ dɩ a nɔɔna bam fɩnfɩɩn yɩranɩ mʋ. Dwi-gɛ tiinə bam laan ma yɔɔrɩ ba pa kʋ zʋ ba yɩra sɩ kʋ dwǝni a ya na bʋŋɩ sɩ a kɩ-ba te tɩn.› 16 Kʋntʋ ŋwaanɩ, Baŋa-Wɛ tagɩ tɩntʋ mʋ DƖ wɩ: ‹Amʋ laan pipiri a joori a ba Zeruzalɛm sɩ a duri a nɔɔna bam ŋwaŋa. Amʋ digə kam wʋ́ joori ka lɔ ka zɩgɩ tɩʋ kʋm wʋnɩ. Ba ta wʋ́ kwe lwara ŋʋna kam ba maŋɩ Zeruzalɛm tɩʋ kʋm ni maama sɩ ba fɔgɩ ba lɔ-kʋ.› Paŋwa Tu Baŋa-Wɛ na tagɩ kʋlʋ tɩn mʋ kʋntʋ.
17 Nan ta pa n kwǝrǝ zaŋɩ wɛɛnɩ wɩ: Paŋwa Tu Baŋa-Wɛ na tagɩ te tɩn mʋ tɩntʋ: ‹Tɩɩnɩ dɩlʋ a nɔɔna bam na zʋʋrɩ dɩ wʋnɩ tɩn daa wʋ́ na jɩjɩgɩrʋ zanzan sɩ kʋ gaalɩ. Amʋ Baŋa-Wɛ daa ta wʋ́ pa Siyɔn nɔn-biə bam bɩcara zuri. A ta wʋ́ joori a lɩ Zeruzalɛm sɩ kʋ taa yɩ a tɩtɩ nyɩm.› »
2. Nyɩa yana dɩ yara bana taanɩ
18 Amʋ ma kwǝni a yuu wɛɛnɩ a nii a na nyɩa yana. 19 A ma bwe malɛka kalʋ na zɩgɩ ka ŋɔɔnɩ dɩ amʋ tɩn a wɩ: «Nyɩa yantʋ brɩ bɛɛ mʋ?» Ka dɩ ma ləri-nɩ ka wɩ: «Nyɩa yam zɩgɩ ya pa dwi-gɛ tiinə balʋ na mɛ ba dam ba wanɩ Zuda tiinə bam, dɩ Yisɩrayɛlɩ tiinə bam, dɩ Zeruzalɛm tɩʋ nɔɔna bam ba jagɩ je maama nɩ tɩn mʋ.»
20 Baŋa-Wɛ laan ma lɩ yara bana o brɩ-nɩ. 21 A ma bwe‑o a wɩ: «Bantʋ bɩɩnɩ yo sɩ ba kɩ bɛ tɩtʋŋɩ mʋ?» Ka ma ləri ka wɩ: «Nyɩa yam ya jagɩ Zuda tiinə bam mʋ sɩ nɔɔn-nɔɔnʋ yɩ wanɩ o lɩ o yuu o kɩ kǝm. Yara bantʋ nan mʋ lagɩ ba fugi nyɩa yam, sɩ ba daarɩ ba cɩcʋgɩ ya dam, sɩ tɩɩnɩ dɩlʋ na daanɩ a nɔɔna Zuda tiinə bam yɩ ba jagɩ-ba tɩn dam ti.»