Baŋa-Wɛ na bwe Yisɩrayɛlɩ tiinə bam te tɩn
6
Cəgi-na Baŋa-Wɛ na lagɩ DƖ ta kʋlʋ tɩn:«Yisɩrayɛlɩ tiinə bam, zaŋɩ-na sɩ á tʋlɩ á taanɩ dɩm sɩ pweeru tɩm dɩ pu-kum sɩm maama ni. 2 Amʋ, Baŋa-Wɛ mʋ jɩgɩ taanɩ sɩ a ja a jeeri abam balʋ na yɩ a tɩtɩ nɔɔna bam tɩn. Lʋgʋ baŋa pweeru tɩm dɩdaanɩ tɩga kuri dɩm maama wʋ́ zɩgɩ amʋ cɩga kam kwaga nɩ.
3 A nɔɔna bam, a brɩ a kɩ bɛɛ mʋ a ma cɔgɩ abam? A bɛɛsɩ abam tɩta mʋ? Á jɩgɩ taanɩ sɩ á ta na?a 4 Amʋ nan jaanɩ abam a nuŋi Ezipi tɩʋ kʋm nɩ a ma vrɩ abam á gabɛɛm dɩm nɩ a yagɩ. A dɛɛn pɛ Moyisi dɩ Arɔn dɩ Miriyam mʋ tɔgɩ abam yigə.b 5 Yɩ swe-na Moabɩ tiinə pɛ Balakɩ dɛɛn na bʋŋɩ sɩ o kɩ abam te tɩn, sɩ á daarɩ á guli Bewɔrɩ bu Balam na joori o kɩ abam yu-yoŋo te tɩn.c Daa ta á guli-na á na beeri kagʋa kam nɩ yɩ a nii abam baŋa nɩ, kʋ zɩgɩ Sitim nɩ sɩ kʋ vu kʋ yi Giligalɩ nɩ te tɩn. Kʋntʋ wʋ́ pa á wanɩ á maanɩ amʋ na sɩɩnɩ a kɩ abam lanyɩranɩ te tɩn.»
Baŋa-Wɛ cwe sɩm tɔgɩm
6 Amʋ na tu Baŋa-Wɛ yigə nɩ sɩ a zuli‑DƖ, a nan wʋ́ ja pɛɛrɩ dwi dɔɔ mʋ a ba a pa‑DƖ, dɩ DƖ na yɩ dɩlʋ na te wɛyuu maama tɩn? Kʋ maŋɩ sɩ a ja na-balɩ sɩlʋ na yi bɩnɩ tɩn a zwɛ a ma kɩ kaanɩm a pa‑DƖ na? 7 Amʋ na jaanɩ pi-balɩ mʋrrʋ mʋrrʋ a ma kɩ kaanɩm a pa‑DƖ, naa a kwe nugə kalʋ na su kʋnkɔŋɔ mʋrrʋ fugə tɩn a pa‑DƖ, Baŋa-Wɛ yi wʋ́ su a pɛɛra yam na? Amʋ na maŋɩ a kwe a bu-kwɩan kam a kɩ DƖ jɩŋa nɩ, kʋntʋ wʋ́ wanɩ kʋ ŋwɩ a lwarɩm yam jɩnɩ na? Amʋ yɩra yam wʋ́ yagɩ a lwarɩm kənə na?d
8 A cʋrʋ, kʋ nan na yɩ te tɩn, Baŋa-Wɛ maŋɩ DƖ pa nmʋ lwarɩ cwe sɩlʋ na lana sɩ n ta n tɔgɩ tɩn. DƖ na laga sɩ DƖ na kənə yalʋ n tee nɩ tɩn mʋ tɩntʋ: Nmʋ maŋɩ sɩ n ta n tɔgɩ cɩga n ŋwɩa maama wʋnɩ, yɩ n jɩgɩ n donnǝ sono, sɩ n daarɩ n tu n tɩtɩ sɩ n ta n tɔgɩ nmʋ Tu Wɛ cwe sɩm.e
Yisɩrayɛlɩ tiinə maŋɩ cam
9 Baŋa-Wɛ ŋɔɔnɩ dɩ tɩʋ kʋm nɔɔna bam. Wʋlʋ maama na jɩgɩ swan cɩga cɩga tɩn wʋ́ taa kwarɩ-DƖ mʋ. DƖ maa wɩ:
«Cəgi-na, abam balʋ na gilimi daanɩ tɩʋ kʋm nɩ tɩn dɩ á dwi dɩm maama. 10 Kʋ na yɩ Jɩjɩgɩrʋ tɩlʋ á na kwalɩmɩ á sam nɩ tɩn mʋ, á ganɩ nɔɔna mʋ á joŋi-tɩ. Amʋ culi lwarɩm kənə yantʋ doŋ. 11 Kʋ na yɩ wʋlʋ na kwe bwɛ sɩlʋ na muri o ma pini o yəllə bam tɩn, a bá yagɩ kʋ tu lwarɩm yam a ma cɛ-o. 12 Tɩʋ kʋm nadunə bam bɛɛsɩ balʋ na yɩ zʋra tɩn. Abam balʋ maama na zʋʋrɩ tɩʋ kʋm nɩ tɩn maa yɩ vwa-nyɩna. Á ni-taanɩ ba jɩgɩ cɩga.
13 Á tɩtʋŋ-balwaarʋ tɩm kʋntʋ ŋwaanɩ mʋ a lagɩ a yaarɩ abam lɩla. Á daa bá taá jɩgɩ dam. 14 Cɩga na ba culi taanɩ tɩn, abam wʋ́ di wʋdiu yɩ á bá fɔgɩ á su. Á wʋ́ taá wʋ kana wʋnɩ mʋ taa. Wǝǝnu tɩlʋ maama na wʋ́ zʋ á jɩa wʋnɩ tɩn, á bá na cwǝŋǝ sɩ á tiŋi-tɩ jwa ŋwaanɩ. Amʋ nan wʋ́ pa á dʋna bam ba ba vrɩ á na wʋ́ tiŋi fɩnfɩɩn kʋlʋ tɩn najara baŋa nɩ. 15 Abam wʋ́ du mɩna yɩ á bá zagɩ-ya. Á ta wʋ́ kan Olivi tiu biə yɩ á bá ma nugə kam á turi á yɩra. Á maa wʋ́ kan vinyə tiu biə yɩ á bá nyɔ ba sana bam.
16 Cɩga ŋwaanɩ tɩn, abam tɔgɩ cwe sɩlʋ Pɛ Omiri dɩ o bu Pɛ Akabɩ dɩ ba dwi dɩm maama dɛɛn na tɔgɩ tɩn mʋ.f Á na lwǝni bantʋ tɩtʋŋ-balwaarʋ tɩm tɩn ŋwaanɩ mʋ pɛ á zʋ cam dɩntʋ wʋnɩ. Amʋ wʋ́ cɔgɩ á tɩʋ kʋm maama pa cavɩɩra di abam fasɩ. Dwi-gɛ tiinə wʋ́ taa jɩgɩ abam ba mwana, yɩ ba twɩ abam zanzan.»