Yisɩrayɛlɩ tiinə lwarɩm kənə daga
7
A wʋʋ cɔgɩ zanzan. Amʋ gɛa, nɩnɛɛnɩ nɔɔnʋ wʋlʋ na beeri tiu biə sɩ o di yɩ o ga te tɩn. Kʋ nyɩ dɩ mɔɔla yalʋ a fra na zʋ tɩn daa wʋ daarɩ kapʋrrʋ tɩm yuu nɩ, yɩ nɔɔna maŋɩ ba gwəri vinyə tiu biə bam maama. 2 Nɔɔna daa tǝrǝ tɩga kam baŋa nɩ ba na jɩgɩ Wɛ cɩga kam tɩn. Nɔn-ŋʋna wʋ daarɩ, dɩ dɩdʋa dɩ. Nɔɔna bam maama yɔɔrɩ ba je ba pɔɩ mʋ sɩ ba na nɛ pwələ sɩ ba zi daanɩ ba gʋ. Nɔɔnʋ maama je dɩ o doŋ banɩ mʋ, yɩ ba gwaarɩ gwəənu ba tiŋi da-ŋwaanɩ. 3 Ba jagwiə dɩ jazɩm maama ye lwarɩm kǝm. Dɩdɛɛra bam yǝni ba joŋi dim mʋ yɩ ba daarɩ ba bʋrɩ nɔɔnʋ bʋra. Nadunə dɩ maa pa nɔɔna kɩ ba wʋbʋŋa na lagɩ te tɩn. Ba maama sɔgɩ ni mʋ daanɩ sɩ ba taa tʋŋɩ lwarɩm. 4 Kʋ na maŋɩ kʋ yɩ ba wʋnɩ balʋ na kwaanɩ sɩ ba taa tɔgɩ cwǝŋǝ tɩn, bantʋ dɩ nyɩ dɩ sabarɩ dɩ ga-balwaarʋ mʋ.Maŋa mʋ tɩntʋ sɩ nɔɔna bam na cam nɩ Wɛ nijoŋnǝ bam na taga te tɩn. Ba wʋbʋŋa wʋ́ tiini ya vugimi kʋ ŋwaanɩ. 5 Yɩ pa n doŋ cɩga, nɩ o na maŋɩ o yɩ n ciloŋ-sono mʋ dɩ. Nmʋ dɩ n kaanɩ wʋlʋ na tigi daanɩ tɩn, ta n ye n ni lara dɩd-o. 6 Maŋa kam kʋntʋ nɩ, bu-baara bá taa nɩgɩ ba kwə, yɩ bukwa dɩ wʋ́ lɔ ba niinə kwaga nɩ. Kaanɩ maa bá sɛ o nɩgɩ o barʋ nu. Nmʋ tɩtɩ digə tiinə mʋ wʋ́ zaŋɩ ba dʋnɩ‑m.a
7 Kʋ nan na yɩ amʋ, amʋ tɩɩna wʋ Baŋa-Wɛ tee nɩ mʋ. Amʋ Tu Wɛ mʋ yɩ amʋ Vɩrnʋ. Amʋ wʋ́ taa cǝg-o mʋ sɩ o ba o zəni-nɩ, nɩ amʋ na loori‑o te tɩn.
Wɛ wʋ́ zǝŋi DƖ nɔɔna bam
8 A dʋna bam, yɩ taá jɩgɩ-nɩ á mwana. Amʋ na zʋ yaara yalʋ wʋnɩ tɩn, a daa ta wʋ́ zaŋɩ a yagɩ-ya. A je lim-nyɔrɩsɩ wʋnɩ mʋ tɩntʋ. Baŋa-Wɛ nan wʋ́ zǝŋi DƖ pooni dɩm DƖ pa-nɩ. 9 Amʋ sɩɩnɩ a tʋŋɩ lwarɩm Baŋa-Wɛ yigə nɩ. Kʋntʋ ŋwaanɩ kʋ maŋɩ sɩ DƖ banɩ zaŋɩ amʋ baŋa nɩ. DƖ na yaarɩ-nɩ DƖ ti, DƖ laan wʋ́ ba DƖ zɩgɩ amʋ kwaga nɩ sɩ a zɩgɩ dɩ cɩga. DƖ ta wʋ́ joŋi-nɩ DƖ ja DƖ zʋ DƖ pooni dɩm wʋnɩ sɩ a taa tɔgɩ DƖ cwǝŋǝ kam. 10 A dʋna bam yǝni ba ta ba wɩ: «Nmʋ Tu Baŋa-Wɛ wʋm bɛ?» Ba nan na nɛ nɩ Baŋa-Wɛ joŋi-nɩ, cavɩɩra wʋ́ ja-ba zanzan. Amʋ yi wʋ́ na ba na tʋa te tɩn. Nɔɔna wʋ́ ba ba nɔ ba baŋa nɩ, nɩnɛɛnɩ ba yɩ cwǝŋǝ ni bwəru mʋ te.
11 Zeruzalɛm tiinə bam, maŋa wʋ́ ba sɩ á joori á lɔ á tɩʋ kʋm kabri sɩm. Abam na wʋ́ taá te je sɩlʋ maama tɩn wʋ́ yalɩ sɩ gaalɩ. 12 Maŋa kam kʋntʋ nɩ, á nɔɔna balʋ dɛɛn na jagɩ ba vu mɛ maama tɩn wʋ́ joori ba taa zʋʋrɩ á tɩʋ kʋm nɩ. Ba badonnǝ wʋ́ nuŋi Asiiri mʋ ba ba á te, sɩ badaara dɩ nuŋi Ezipi seeni dɩdaanɩ Efratɩ bugə kam seeni ba ba. Ba daa ta wʋ́ nuŋi nanɩɩrʋ tɩm je sɩm, dɩdaanɩ pweeru tɩm laŋa kam maama ba joori ba ba abam te. 13 Tɩga baŋa kalʋ maama na daarɩ tɩn laan wʋ́ ji kafɛ, dwi-gɛ tiinə balʋ na zʋʋrɩ da tɩn tɩtʋŋ-balwaarʋ tɩm ŋwaanɩ.
Baŋa-Wɛ na duri DƖ nɔɔna ŋwaŋa te tɩn
14 Baŋa-Wɛ, ta n nii n nɔɔna bam baŋa nɩ, nɩ nayɩrʋ na yɩrɩ o peeni te tɩn. Ba yɩ nmʋ tɩtɩ nyɩm yɩ ba zʋʋrɩ kagʋa wʋnɩ mʋ ba yɩranɩ. Nan kalɩ-ba n vu tɩ-ywəŋə je sɩlʋ na gilimi-ba tɩn. Pa-ba cwǝŋǝ sɩ ba vu Basan dɩ Galadɩ yɩ ba di ga-lɛɛrʋ nɩ kʋ dɛɛn na maŋɩ kʋ yɩ te tɩn. 15 Daa ta n tʋŋɩ wo-kɩnkagɩla n pa dɩbam, nɩ n dɛɛn na tʋŋɩ te n ma n ja dɩbam n nuŋi Ezipi nɩ tɩn. 16 Dwi-gɛ tiinə bam na nɛ tɩntʋ, cavɩɩra wʋ́ ja-ba dɩ ba na maŋɩ ba jɩgɩ dam yɩ dɩ ti te tɩn. Kʋʋ́ sʋ-ba pa ba ja ba niə yɩ ba daarɩ ba sɩn ba zwa kʋ ŋwaanɩ. 17 Ba ta wʋ́ ma ba pwi ba fɛɛlɩ tɩga nɩ nɩ tɩga wo-vəəlu te, pa kasʋlʋ yɩranɩ mʋ wʋ́ taa yɩ ba ni-wʋdiu. Baá nuŋi ba gugwəəru wʋnɩ ba ba nmʋ yigə nɩ yɩ ba yɩra saɩ, ba na kwarɩ fʋʋnɩ dɩ nmʋ wʋlʋ na yɩ dɩbam Tu Baŋa-Wɛ tɩn ŋwaanɩ.
18 Dɩbam Tu Wɛ, Wɛ dɩdoŋ daa tǝrǝ dɩ na maŋɩ dɩ nmʋ tɩn. Nmʋ yɩranɩ mʋ kwe dɩ́ lwarɩm n ma n cɛ dɩbam. Dɩbam mʋ yɩ balʋ yɩranɩ na daarɩ n tɩtɩ nɔɔna bam wʋnɩ tɩn. Nmʋ banɩ na zaŋɩ dɩbam baŋa nɩ, kʋ bá daanɩ yɩ dɩ joori dɩ tʋ, nmʋ na jɩgɩ dɩbam sono tɩn ŋwaanɩ. 19 Nmʋ ta wʋ́ ba n duri dɩ́ yibwənə, sɩ n daarɩ n ma n dam dɩm n yagɩ dɩ́ lwarɩm yam. Nmʋ wʋ́ kwe-ya n dʋlɩ n yagɩ pa ya kɛ nɩnɩʋ kʋm tɩga kuri kuri nɩ.b 20 Nmʋ wʋ́ zɩgɩ n cɩga kam baŋa nɩ n pa Zakɔbɩ dwi tiinə bam, yɩ n daarɩ n ta n jɩgɩ Abraham dwi tiinə bam ŋwaŋa. Nmʋ wʋ́ ta n so-ba sɩ kʋ maŋɩ dɩ n na goni ni te dɩdaanɩ dɩ́ nabaara bam faŋa faŋa tɩn.