5
Zeruzalɛm tiinə bam, la-na á jar-kərə bam á kɩ jǝgǝ dɩdʋa. Dɩ́ dʋna bam tu ba gilimi dɩ́ tɩʋ kʋm sɩ ba zaŋɩ najara dɩ dɩbam. Ba lagɩ ba ma da-lɔŋɔ ba magɩ Yisɩrayɛlɩ tiinə yuutu wʋm.
Yuutu wʋdoŋ wʋ́ nuŋi Betelɩhɛm nɩ
Baŋa-Wɛ maa wɩ:
2 «Kʋ nan na yɩ nmʋ, Betelɩhɛm Efrata, nmʋ muri Zuda dwi tiinə sɔ-yuni tɩm maama wʋnɩ. Dɩ kʋ dɩ, amʋ lagɩ a lɩ dɩdɛɛrʋ abam wʋnɩ sɩ o taa te Yisɩrayɛlɩ tiinə bam o pa-nɩ. Oó taa yɩ wʋlʋ dwi dɩm na zɩgɩ faŋa faŋa tɩn mʋ.»a
 
3 Wɛ nan wʋ́ yagɩ DƖ nɔɔna bam ba yɩra sɩ kʋ taa ve maŋa kalʋ ka-puə kam na wʋ́ ba o lʋ bu tɩn. Bu wʋm cʋrrʋ tɩm laan wʋ́ na cwǝŋǝ sɩ ba nuŋi sa-tɩʋ ba joori ba sam ba wǝli dɩ ba donnǝ Yisɩrayɛlɩ tiinə bam. 4 Dɩdɛɛrʋ wʋm wʋ́ zaŋɩ o taa te o nɔɔna bam nɩ nayɩrʋ na nii o peeni baŋa nɩ te tɩn.b Baŋa-Wɛ wʋ́ pa‑o dam sɩ o kɩ kʋntʋ wʋm Tu Wɛ tɩtɩ yɩrɩ kamunu kʋm ŋwaanɩ. Lʋgʋ baŋa je sɩm maama wʋ́ ni o kamunni dɩm ŋwa pa nɔɔna bam taa zʋʋrɩ dɩ yazurə. 5 Wʋntʋ wʋ́ ja wʋ-zuru o ba o pa-ba.
Yisɩrayɛlɩ tiinə bam wʋ́ taa te ba tɩtɩ
Asiiri tiinə jar-kərə bam wʋ́ wanɩ ba ba ba nɔ dɩ́ tɩga kam sɩ ba daarɩ ba cɔgɩ dɩ́ sɔ-fwaarʋ tɩm. Dɩ́ nan wʋ́ pa dɩdɛɛra zanzan zaŋɩ dɩ́ wʋnɩ ba zəli-ba.c 6 Baá wanɩ Asiiri tiinə bam ba kɩ-ba ba dam kuri nɩ. Ba ta wʋ́ zʋ Nɩmrɔdɩ tɩʋ kʋm ba di kʋ nɔn-biə bam. Cɩga tɩn, Asiiri tiinə bam na zaŋɩ najara dɩ dɩbam, dɩ́ dɩdɛɛra bam wʋ́ joŋi dɩbam ba jɩŋa nɩ ba yagɩ.
7 Maŋa kam kʋntʋ nɩ, Zakɔbɩ dwi tiinə balʋ na daarɩ tɩn wʋ́ taa zʋʋrɩ dwi-gɛ tiinə tɩtarɩ nɩ. Baŋa-Wɛ nan wʋ́ pa ba taa nyɩ dɩ nyɔnɔ dɩ dʋa kalʋ na li tɩga kam pa ka zuri tɩn mʋ. Kʋ daɩ nabiinǝ mʋ ba daŋɩ ba tɩɩna ba baŋa nɩ, sɩ kʋ yɩ Wɛ yɩranɩ mʋ. 8 Nɔɔna balʋ na daarɩ Zakɔbɩ dwi tiinə bam wʋnɩ tɩn wʋ́ gwaanɩ dɩdaanɩ dwi-gɛ tiinə. Ba na zʋʋrɩ ba tɩɩnɩ wʋnɩ kʋntʋ tɩn, baá taa nyɩ dɩ nyoŋo kʋlʋ na beeri gaa wʋnɩ kʋ lagɩ kʋ ni-wʋdiu tɩn mʋ. Baá di ba dʋna bam, nɩnɛɛnɩ nyoŋo na zʋ pe-kɔgɔ wʋnɩ kʋ ja-sɩ kʋ tʋrɩ yɩra yɩra kʋ di te tɩn mʋ. Nɔɔn-nɔɔnʋ bá wanɩ o joŋi-ba o yagɩ. 9 Yisɩrayɛlɩ tiinə bam, á wʋ́ wanɩ á dʋna bam pa ba yagɩ tɩga kam baŋa nɩ!
10 Baŋa-Wɛ ma ta DƖ wɩ:
«Maŋa kam kʋntʋ nɩ amʋ wʋ́ caalɩ á siseŋ-nɔɔna bam yɩ a daarɩ a cɔgɩ á jara-kǝm tərikooru tɩm maama. 11 A ta wʋ́ cɔgɩ tɩɩnɩ dɩlʋ á na zʋʋrɩ dɩ wʋnɩ tɩn, dɩ á sɔ-fwaarʋ tɩm maama. 12 A ta maa wʋ́ cɔgɩ á liri mwaanʋ kənə yam, yɩ sampwəri sɩm daa bá wanɩ ba taa tʋŋa ba tɩtʋŋa. 13-14 Kʋ na yɩ jwǝnǝ yalʋ á na mɔɔnɩ tɩn, dɩdaanɩ kandwa yalʋ á na cwi yɩ á zuli-ya tɩn, amʋ wʋ́ cɔgɩ ya maama, kʋ ta wǝli dɩ Asera nyɩnyʋgʋ dɛ sɩm. Abam dáa bá kuni donnǝ wǝǝnu tɩlʋ á jɩa na mɔɔnɩ tɩn yigə nɩ á zuli-tɩ. Cɩga tɩn, amʋ wʋ́ cɔgɩ á jwǝnǝ yam maama.
15 Amʋ wʋ́ tɔgɩ a ban-zɔŋɔ kʋm baŋa nɩ a yaarɩ dwi-gɛ tiinə balʋ na wʋ sɛ sɩ ba tɔgɩ amʋ ni tɩn.»