Nabiinǝ wʋ́ ba ba zuli Baŋa-Wɛ
4
Maŋa wʋ́ ba yɩ Baŋa-Wɛ digə kam na zɩgɩ piu kʋlʋ yuu nɩ tɩn na yɩrɩ kʋ dwǝni lʋgʋ baŋa je maama. Kʋʋ́ taa zɩgɩ wɛɛnɩ yuu navʋga nɩ sɩ kʋ dwǝni pweeru tɩm maama. Dwi zanzan tiinə wʋ́ taa nuŋi ba tɩɩnɩ dɩm nɩ ba toŋi daanɩ taa ba yɔɔrɩ da. 2 Lʋgʋ baŋa dwi tiinə bam kʋntʋ maa wʋ́ ba da yɩ ba ta ba brɩ daanɩ ba wɩ: «Pa-na dɩ́ vu dɩ́ din Baŋa-Wɛ piu kʋm yuu sɩ dɩ́ zuli Zakɔbɩ Wɛ dɩm DƖ digə kam nɩ. Dɩntʋ wʋ́ brɩ dɩbam DƖ cwe sɩm, sɩ dɩbam dɩ wanɩ dɩ́ taa tɔgɩ-sɩ.»aBɛŋwaanɩ, da yam kʋntʋ nɩ Wɛ zaasɩm dɩm wʋ́ zɩgɩ Siyɔn nɩ mʋ ya jagɩ je maama nɩ. Baŋa-Wɛ kwǝrǝ kam maa wʋ́ nuŋi Zeruzalɛm nɩ ka yi nɔɔna maama. 3 Dwi tiinə balʋ na zʋʋrɩ tɩɩnɩ dɩlʋ maama wʋnɩ tɩn na jɩgɩ daanɩ, Wɛ wʋ́ fɔgɩ-ba DƖ kɩ daanɩ yɩ DƖ lwɛ ba najara yam, dɩ ba na maŋɩ ba jɩgɩ dam te dɩ. Ba laan wʋ́ kwe ba jara-kǝm sʋ-lwaanʋ tɩm ba ma lu vaanɩ, sɩ ba cicwə yam dɩ pipiri ya ji sʋkwaarʋ ya pa-ba.b Tɩʋ daa bá zaŋɩ najara dɩ kʋ doŋ. Nɔɔna dɩ daa bá zaasɩ najara kǝm. 4 Nɔɔna bam maama laan wʋ́ taa zʋʋrɩ ba sam wʋnɩ yɩ liǝ tǝrǝ. Baá jǝni ba tɩtɩ tweeru tɩm woro nɩ ba sin. Nɔɔn-nɔɔnʋ bá wanɩ o fugi-ba. Paŋwa Tu Baŋa-Wɛ ni-taanɩ mʋ kʋntʋ.
5 Dwi-gɛ tiinə bʋŋɩ sɩ ba taa tɔgɩ ba tɩtɩ wa yam cwe mʋ. Dɩbam dwi dɩm nan wʋ́ taa tɔgɩ dɩ́ Tu Baŋa-Wɛ dɩm sɩ kʋ taa ve wuu.
Yisɩrayɛlɩ tiinə wʋ́ joori sɔŋɔ
6 Baŋa-Wɛ maa wɩ:
«Da yam kʋntʋ nɩ, amʋ wʋ́ la nɔɔna balʋ a na pɛ ba yaarɩ sa-tɩʋ nɩ tɩn a kɩ daanɩ. 7 Ba na wʋ yigə yigə dɩ ba tɩtɩ tɩʋ kʋm tɩn, ba nyɩ dɩ gwanɩ mʋ. Amʋ laan wʋ́ pa ba ji balʋ na daarɩ a nɔɔna bam wʋnɩ yɩ ba joori sɔŋɔ tɩn. Ba tɩʋ kʋm maa wʋ́ fɔgɩ kʋ kɩ dam. Kʋ zɩgɩ da yam kʋntʋ nɩ sɩ kʋ taa ve wuu, amʋ Baŋa-Wɛ wʋ́ taa wʋ Siyɔn piu kʋm yuu nɩ yɩ a nii ba baŋa nɩ.»
8 Zeruzalɛm, nmʋ wʋ́ taa yɩ tɩʋ kʋlʋ Wɛ na yɩrɩ DƖ nɔɔna bam nɩ nayɩrʋ te kʋ wʋnɩ tɩn. Nmʋ ta wʋ́ joori n ji tʋ-fɔrɔ mɛ pɛ wʋm na di o paarɩ da tɩn.
9 Bɛɛ mʋ kɩ yɩ á keeri dɩ baarɩ kʋntʋ? Kʋ yɩ á pɛ wʋm dɩ á nakwa bam ŋwaanɩ mʋ na? Ba daa ta tǝrǝ na? Kʋntʋ ŋwaanɩ mʋ pɛ á wʋ zʋnnɩ wʋnɩ nɩ ka-puə na yaarɩ sɩ o lʋ te tɩn na? 10 Ɛɛn, Zeruzalɛm tiinə bam! Taá suuri-na yɩ á kʋna nɩ kaanɩ na yaarɩ sɩ o lʋ te tɩn. Abam laan wʋ́ nuŋi á yagɩ á sam mʋ sɩ á vu á pu vwə gaa nɩ á pəni da. Á dʋna bam maa wʋ́ ja abam ba vu Babilɔnɩ sɩ ba pɩɩnɩ abam tɩʋ kʋm kʋntʋ nɩ. Baŋa-Wɛ nan wʋ́ ba DƖ vrɩ abam DƖ yagɩ á dʋna bam jɩŋa nɩ pa á joori á taá te á tɩtɩ.
11 Jar-kərə mʋ nuŋi tɩɩnɩ zanzan wʋnɩ ba la daanɩ sɩ ba zaŋɩ najara dɩ abam. Ba maa wɩ: «Pa-na dɩ́ yɔɔrɩ dɩ́ cɔgɩ Zeruzalɛm tɩʋ kʋm fasɩ, sɩ dɩ́ daarɩ dɩ́ pa cavɩɩra ja-kʋ!» 12 Nɔɔna bantʋ nan za wʋ lwarɩ Baŋa-Wɛ na kwe bʋbʋŋɩ dɩlʋ dɩ ba tɩn. Ba daa wʋ maanɩ nɩ Wɛ mʋ lagɩ-ba DƖ kɩ daanɩ sɩ DƖ magɩ-ba nɩ nɔɔnʋ na magɩ mumunə te tɩn.
Baŋa-Wɛ maa wɩ:
13 «Zeruzalɛm tiinə bam, zaŋɩ-na sɩ á magɩ á dʋna bam! Amʋ wʋ́ pa abam dam nɩnɛɛnɩ na-bɩa na dana yɩ ka jɩgɩ nyɩa yalʋ na yɩ luuru tɩn dɩdaanɩ napɔɔna yalʋ na yɩ canna tɩn. Kʋntʋ tɩn á wʋ́ nɔ dwiə yalʋ maama na wʋ́ jeeri abam tɩn. Á laan wʋ́ kwe jɩjɩgɩrʋ tɩlʋ maama ba na nɛ ba najara yam baŋa nɩ tɩn á kɩ amʋ Baŋa-Wɛ jɩŋa nɩ. Amʋ mʋ yɩ lʋgʋ baŋa tɩɩnɩ dɩm maama Yuutu wʋm.»