Yisɩrayɛlɩ yigǝ tiinǝ na tiini ba cɔgɩ te tɩn
3
Amʋ dɛɛn tagɩ a wɩ:«Abam balʋ na yɩ yigǝ tiinǝ Zakɔbɩ dwi tiinə bam wʋnɩ tɩn, cəgi-na taanɩ dɩntʋ! Abam yɩ Yisɩrayɛlɩ tiinə bam dɩdɛɛra, yɩ á kənə maama ya maŋɩ sɩ ya taa tɔgɩ cɩga mʋ. 2 Abam nan culi kʋlʋ maama na jɩgɩ lam tɩn yɩ á daarɩ á tɔgɩ tɩtʋŋ-balwaarʋ kwaga. Á yǝni á ja amʋ nɔɔna bam á lɔɔrɩ ba yatana yam á daarɩ ba kwi sɩm yɩranɩ. 3 A nɔɔna bam laan mʋ jigi nwana ba pa abam. Á yǝni á ca ba ya-nwana yam á kɩ kambiə wʋnɩ sɩ á saŋɩ, yɩ á daarɩ á bwəri bwəri ba kwi dɩ. Á laan wʋ́ twǝri nwan-saŋa yam wʋnɩ á di.»
4 Maŋa bɩɩnɩ, sɩ nɔn-balwaarʋ tɩm kʋntʋ ba ba loori zənə Baŋa-Wɛ tee nɩ. DƖ nan bá sɛ ba wɛ-loro kʋm. DƖ wʋ́ ma DƖ kwaga DƖ ya-ba, ba na tʋŋɩ lwarɩm kənə tɩn ŋwaanɩ.a
5 Baŋa-Wɛ ni-taanɩ dɩm mʋ tɩntʋ:
«A lagɩ a ta woŋo dɩ nijoŋnə balʋ na ganɩ a nɔɔna bam tɩn. Nɔɔnʋ wʋlʋ na pɛ-ba ba ni-wʋdiu, baá ta dɩ kʋ tu ba wɩ: ‹Yazurə taa wʋ n tee nɩ.› Wʋlʋ nan na wʋ pɛ-ba kʋlʋkʋlʋ, baá fugi kʋ tu o wɩ tigurə bɩɩnɩ o baŋa. 6 Á maŋa kam ti. Lim wʋ́ ba dɩ kwǝli abam, sɩ á daa yɩ taá naɩ kʋlʋkʋlʋ á ta á brɩ nɔɔna bam. Amʋ daa bá vɩɩrɩ a tɩtɩ dɩ abam. Wɛ dɩm wʋ́ zʋ dɩ digə pa á jǝni lim wʋnɩ. 7 Nijoŋnǝ bam dɩ sampwəri sɩm maama wʋ́ kwǝli ba yibiyə dɩ cavɩɩra. Baá pu ba niə, Wɛ na vɩn sɩ DƖ ləri ba bwiə yam tɩn ŋwaanɩ.»
8 Kʋ nan na yɩ amʋ, Baŋa-Wɛ mʋ kɩ DƖ Joro kʋm a bɩcarɩ nɩ pa a jɩgɩ dam. Kʋntʋ ŋwaanɩ mʋ a wanɩ a lwarɩ cwǝŋǝ kalʋ na lana tɩn, yɩ a na baarɩ sɩ a ta cɩga dɩ Yisɩrayɛlɩ tiinə bam sɩ ba lwarɩ ba na cɔgɩ te tɩn.
9 Abam balʋ na yɩ yigǝ tiinǝ Zakɔbɩ dwi tiinə bam wʋnɩ tɩn, cəgi-na taanɩ dɩntʋ! Cɩga tɩn, abam balʋ na yɩ Yisɩrayɛlɩ tiinə dɩdɛɛra bam tɩn yǝni á culi cɩga kam yɩ á cɔgɩ kʋlʋ maama na lana tɩn. 10 Á tɔgɩ pu-sɩŋa tɩtʋŋa dɩ nɔn-gʋra kənə baŋa nɩ á fɔgɩ á lɔ á sam Zeruzalɛm nɩ, yɩ kʋ yɩ Wɛ tɩtɩ tɩʋ mʋ. 11 Tɩʋ kʋm dɩdɛɛra bam yǝni ba joŋi dim mʋ yɩ ba daarɩ ba bʋrɩ nɔɔnʋ bʋra. Kaanɩm tiinə bam dɩ maa joŋi ŋwɩɩrʋ sɩ ba daarɩ ba brɩ Wɛ taanɩ dɩm. Nijoŋnǝ bam dɩ joŋi səbu ba vɩɩra yam ŋwaanɩ mʋ. Kʋntʋ maama, ba nan ta brɩ ba tɩtɩ ba wɩ ba salɩ Wɛ mʋ. Ba maa kaagɩ ba ta ba wɩ: «Cam bá yi dɩbam, sɩ Baŋa-Wɛ wʋ dɩbam tee nɩ.» 12 Abam kənə yam kʋntʋ ŋwaanɩ Wɛ tɩtɩ tɩʋ Zeruzalɛm wʋ́ tʋ kʋ saarɩ kʋ ji di-dwəənu yɩranɩ. Nɔɔna wʋ́ ba ba va Siyɔn tɩga kam kʋntʋ ba tiŋi. Tweeru wʋ́ li zoŋo kʋlʋ Wɛ diga kam ya na zɩgɩ da tɩn.b