Balʋ na bɛɛsɩ nabwənə tɩn wʋ́ na lɛɛrʋ
2
Kʋ na yɩ balʋ na jɩgɩ lwarɩm wʋbʋŋa tɩn, lɛɛrʋ wʋ ba yuu nɩ! Ba yǝni ba pəni tɩtɩɩ nɩ ba bʋŋɩ wʋbʋŋ-balwaarʋ mʋ. Tɩga na pʋʋrɩ, baá sɩɩnɩ ba kɩ kʋlʋ na su ba yiǝ tɩn, ba na jɩgɩ kʋ dam tɩn ŋwaanɩ. 2 Ba yǝni ba vrɩ karɩ sɩlʋ maama ba yiǝ na su tɩn sɩ ba va. Ba ta maa vrɩ sɔŋɔ kʋlʋ maama ba na lagɩ tɩn sɩ ba taa zʋʋrɩ kʋ wʋnɩ. Ba yǝni ba kɩ kʋntʋ mʋ, yɩ ba ma dam ba joŋi nɔɔna jɩŋa wǝǝnu maama.3 Baŋa-Wɛ nan na tagɩ kʋlʋ tɩn mʋ tɩntʋ:
«Amʋ tɩtɩ jɩgɩ wʋbʋŋa sɩ a pa cam mʋ ba abam baŋa nɩ. Nɔɔnʋ tǝrǝ á wʋnɩ o na wʋ́ wanɩ o joŋi o tɩtɩ o yagɩ. Maŋa kam kʋntʋ nɩ, á wʋ́ na lɛɛrʋ pa á dɩ á kamunni dɩm maama tɩga nɩ. 4 Nɔɔna wʋ́ taa jɩgɩ abam ba mwana yɩ ba leeni wʋ-cɔgɔ ləŋə ba wɩ:
‹Lɛɛrʋ wʋ dɩ́ yum nɩ!
Ba vrɩ dɩ́ tɩga kam ba daarɩ dɩbam.
Ka laan wʋ dɩ́ dʋna bam jɩŋa nɩ mʋ!› »
5 Kʋntʋ tɩn, ba na joori ba pɔɔrɩ tɩga kam ba pa Wɛ kɔgɔ kʋm nɔɔna bam, abam balʋ na vrɩ nɔɔna tɩga tɩn daa bá joŋi á nyɩm á taá te.
6 Nɔɔna bam kʋntʋ yǝni ba ŋɔɔnɩ ba ta dɩ amʋ ba wɩ: «Yɩ ta n ŋɔɔnɩ kʋntʋ doŋ! Dɩbam brɩ dɩ́ bá na dɩ́ cavɩɩra!»a
7 Kʋ wʋ maŋɩ sɩ Zakɔbɩ dwi tiinə bam taa ŋɔɔnɩ kʋntʋ doŋ. Á bʋŋɩ nɩ Baŋa-Wɛ wʋ́ pɩɩnɩ DƖ banɩ dɩ abam, sɩ DƖ yɩ kɩ abam kʋlʋkʋlʋ mʋ na? Kʋ nan na yɩ balʋ na tɔgɩ cwǝŋǝ tɩn, amʋ ni-taanɩ dɩm wʋ́ fɔgɩ-ba lanyɩranɩ.
Baŋa-Wɛ maa wɩ:
8 «Abam na kɩ te tɩn, á tiini á pa kʋ zʋ amʋ nɔɔna bam yɩra, nɩ á yɩ a dʋna mʋ te. Á yǝni á zi á donnǝ balʋ na nuŋi najara je ba joori ba sam tɩn, yɩ á daarɩ á vrɩ ba gwaarʋ tɩm. 9 Abam mʋ zəli amʋ nɔn-kɔgɔ kʋm kaana bam pa ba nuŋi sam dɩlʋ na yɩ ba kugu je sɩm tɩn wʋnɩ. Kʋ ta na yɩ ba biə bam, á ma vrɩ wo-laarʋ tɩlʋ amʋ na kɩ ba jɩŋa nɩ sɩ ba taa te tɩn.
10 Zaŋɩ-na á lagɩ je! Á daa bá taá zʋʋrɩ je sɩm kʋntʋ nɩ sɩ á na siun. Abam lwarɩm tɩtʋŋa mʋ pɛ tɩʋ kʋm maama cɔgɩ. 11 Nɔɔna bam kʋntʋ wʋ́ taa lagɩ nijoŋnu wʋlʋ ni na su dɩ vwan taanɩ tɩn mʋ. Kʋntʋ tu na tu o ŋɔɔnɩ dɩ ba o wɩ: ‹Á wʋ́ na sa-dɛɛra zanzan sɩ á taá nyɔ á sui!›, baá tɔgɩ o kwaga dɩ wʋpolo.
Baŋa-Wɛ nɔɔna bam wʋ́ na fɔgɩm
12 Zakɔbɩ dwi tiinə bam, amʋ wʋ́ joori a la abam a kɩ daanɩ. Cɩga tɩn, a wʋ́ kalɩ balʋ maama na daarɩ Yisɩrayɛlɩ tiinə kɔgɔ kʋm wʋnɩ tɩn, nɩ nayɩrʋ na kalɩ o peeni o pa sɩ joori sɩ zʋ sɩ pwəgə je te tɩn. Kʋntʋ tɩn, tɩga kam wʋ́ ba ka su dɩ kɔgɔ zanzan.»
13 Wʋlʋ na jɩgɩ dam sɩ o pʋrɩ cwǝŋǝ o pa-ba tɩn mʋ wʋ́ tɔgɩ ba yigə. Baá pi ba nuŋi tɩʋ kʋlʋ ba dʋna bam na pɩɩnɩ-ba tɩn wʋnɩ. Ba Pɛ wʋm mʋ wʋ́ tʋ ba yigə nɩ, yɩ ba da ba nuŋi. Wʋntʋ yɩ ba Yuutu Baŋa-Wɛ mʋ.