Wɛ Nijoŋnu
Mise tɔnɔ
1
Baŋa-Wɛ na ŋɔɔnɩ taanɩ dɩlʋ DƖ brɩ Mise, o na nuŋi Moresɛtɩ tɩʋ tɩn mʋ tɩntʋ. Kʋ maa yɩ maŋa kalʋ Yotam, dɩ Ahazɩ, dɩ Ezekɩasɩ dɛɛn na saŋɩ daanɩ ba yɩ pwa Zuda tɩʋ kʋm nɩ tɩn.a Samari dɩdaanɩ Zeruzalɛm nɔɔna bam na tʋŋɩ te tɩn mʋ Wɛ vɩɩrɩ o brɩ Mise.Samari dɩ Zeruzalɛm borem taanɩ
2 Abam balʋ maama na zʋʋrɩ tɩga baŋa nɩ tɩn, pʋrɩ-na á zwa á cəgi taanɩ dɩntʋ lanyɩranɩ. Yuutu Baŋa-Wɛ mʋ je DƖ wɛyuu sɔŋɔ kʋm nɩ yɩ DƖ lagɩ o saŋɩ abam. 3 Nii-na! Baŋa-Wɛ zɩgɩ DƖ jǝŋǝ je sɩm nɩ DƖ tu DƖ bɩɩna! DƖ lagɩ DƖ ba DƖ nɔ lʋgʋ baŋa pweeru tɩm yuu nɩ mʋ. 4 Pweeru tɩm tɩtɩ wʋ́ nyɩɩnɩ, nɩ ba na saŋɩ nugə mim nɩ te tɩn mʋ. Pweeru tɩm dɩ wʋ́ jagɩ tɩ je, nɩnɛɛnɩ na na cuuri ba kɛ te tɩn. 5 Kʋ yɩ Zakɔbɩ dwi tiinə bam na sɛ lwarɩm tɩtʋŋa tɩn ŋwaanɩ mʋ kʋntʋ maama wʋ́ kɩ. Cɩga tɩn, Yisɩrayɛlɩ tiinə bam lɔgɩ Wɛ kwaga nɩ! Bra mʋ pɛ ba cɔgɩ kʋntʋ doŋ? Kʋ yɩ ba tʋ-fɔrɔ Samari tiinə tɩtɩ ŋwaanɩ mʋ! Bra mʋ pɛ Zuda tiinə bam zuli jwǝnǝ? Kʋ maa yɩ ba tɩʋ kamunu Zeruzalɛm tiinə tɩtɩ ŋwaanɩ!
Baŋa-Wɛ maa wɩ:
6 «Kʋntʋ ŋwaanɩ amʋ lagɩ a cɔgɩ Samari tɩʋ kʋm maama pa kʋ ji di-dwəənu nɔɔna na wʋ́ cɩ gaarɩ yɩ ba du vinyə tweeru da tɩn. A wʋ́ pa na cuuri tɩʋ kʋm kalankulə baŋa nɩ. Na bam wʋ́ ja-ya ba jagɩ pa tɩʋ kʋm dɩ kʋ kugu maama saarɩ. 7 Amʋ ta wʋ́ cɩcʋgɩ ba jwǝnǝ yam, yɩ a daarɩ a ma mim a zwɛ pɛɛra yalʋ maama ba na kwe ba ma zuli-ya tɩn. Cɩga tɩn, a wʋ́ cɔgɩ kamwarʋ tɩlʋ maama ba na jɩgɩ ba kaanɩ tɩn mʋ. Ba nɛ ba jwǝnǝ jɩjɩgɩrʋ tɩm ka-tʋlɩ tɩtʋŋa baŋa nɩ mʋ. Kʋntʋ ŋwaanɩ amʋ wʋ́ pa ba dʋna bam joŋi-tɩ ba ja vu tɩʋ kʋdoŋ ba ma ba ŋwɩ ka-tʋlɩ daanɩ.»
Zuda bá lu lɛɛrʋ tɩm wʋnɩ
8 Lɛɛrʋ na wʋ́ ba kʋntʋ tɩn, amʋ wʋʋ cɔgɩ zanzan yɩ a keeri kʋ ŋwaanɩ. Amʋ laan wʋ́ taa ve kalambolo dɩ a napra yɩranɩ mʋ.b A ta wʋ́ suuri nɩ nywənkurə mʋ te, yɩ a coosi nɩ zuŋ-kamunə na keeri te tɩn. 9 Samari tiinə bam na nɛ zʋnnɩ dɩlʋ tɩn ba jɩgɩ soonim. Ba yawɩʋ kʋm loŋi kʋ ja Zuda tiinə bam dɩ, yɩ kʋ lagɩ kʋ yi Zeruzalɛm tɩʋ kʋm, amʋ cʋrrʋ tɩm na zʋʋrɩ mɛ tɩn.
10 Yɩ zaŋɩ-na á ta taanɩ dɩntʋ sɩ Gatɩ tiinə bam maanɩ dɩ́ cam dɩm ni nɩ! Yɩ keeri-na dɩ fɩnfɩɩn dɩ! Kʋ daarɩ abam balʋ na zʋʋrɩ Bɛt-Leafa nɩ tɩn, kwe-na fogo á ma á taagɩ á yɩra á wʋ-cɔgɔ kʋm ŋwaanɩ. 11 Baá kalɩ abam Safiri tiinə bam ba viiri sɩ á nuŋi á tɩʋ kʋm wʋnɩ bwəri dɩ á cavɩɩra á taá veǝ. Zaanan tiinə bam nan warɩ ba nuŋi ba tɩʋ kʋm wʋnɩ. Bɛt-Esɛlɩ tiinə bam maa kaasɩ zanzan, ba daa bá wanɩ abam ba wǝli. 12 Marɔtɩ tiinə bam maama yɔɔrɩ ba yaarɩ mʋ ba tɩɩnɩ vrɩm, Baŋa-Wɛ na tʋŋɩ lɛɛrʋ yɩ tɩ ga fɩɩn sɩ tɩ yi Zeruzalɛm tɩʋ tɩn ŋwaanɩ.
13 Abam balʋ na zʋʋrɩ Lakisi nɩ tɩn, kwɛ-na á jara-kǝm tərikooru tɩm sɩ siseŋ-nɔɔna vaŋɩ-tɩ yɩ á duri á kɛ! Kʋ yɩ abam mʋ puli á tɔgɩ Yisɩrayɛlɩ tiinə lwarɩm yam doŋ, pa Zeruzalɛm tiinə bamc dɩ tʋ kəm-balwaarʋ wʋnɩ. 14 Zuda tiinə bam, ve-na á kɩ bana dɩ Moresɛtɩ-Gatɩ tiinə bam. Á daa bá na-ba. Akisiba tɩʋ kʋm nan lagɩ kʋ lɔ Yisɩrayɛlɩ tiinə pwa bam kwaga nɩ mʋ. 15 Abam balʋ na zʋʋrɩ Maresa nɩ tɩn, Baŋa-Wɛ lagɩ DƖ pa á dʋna bam wanɩ á tɩʋ kʋm ba di mʋ. Wʋlʋ na jɩgɩ yɩrɩ Yisɩrayɛlɩ tiinə bam wʋnɩ tɩn wʋ́ duri o vu o səgi Adulamɩ piu bɔɔnɩ dɩm wʋnɩ.
16 Zuda tiinə bam, ceeri-na á yum sɩ á daarɩ á taá laara, ba na lagɩ ba ja á bu-sonnu tɩm ba kalɩ ba vu sa-tɩʋ tɩn ŋwaanɩ. Cɩga tɩn, á ceeri-na á yum nɩnɛɛnɩ duurə yum na yɩ te tɩn.