Kayɩra kɔgɔ na brɩ Baŋa-Wɛ dɛ-kamunu kʋm te tɩn
2
Zaŋɩ-na á wu tigurə nabɔnɔ kʋm,sɩ kʋ sɔɔ kʋm zaŋɩ Wɛ tɩtɩ piu Siyɔn yuu nɩ.
Kʋ maŋɩ sɩ fʋʋnɩ tiini dɩ ja balʋ maama na zʋʋrɩ tɩga kam baŋa nɩ tɩn,
Bɛŋwaanɩ, Baŋa-Wɛ dɛ-kamunu kʋm lagɩ dɩ yi lɩla mʋ.
Dɩ tiini dɩ bwələ zanzan.
2 Dɩntʋ dɛ dɩm wʋ́ taa yɩ lim yɩranɩ mʋ.
Kunkwǝǝnu tɩm wʋ́ zwəri
tɩ li tɩga kam maama!
Bɛŋwaanɩ, nɔn-kɔgɔ zanzan mʋ maa bɩɩna,
yɩ ba kwǝli pweeru laŋa kam maama.
Kʋ zɩgɩ faŋa faŋa, lɛɛrʋ kʋntʋ doŋ ta wʋ yi lʋgʋ kʋm,
yɩ kʋ doŋ dɩ nan ta bá fɔgɩ kʋ kɩ.
3 Ba nyɩ dɩ min-vʋgʋ na di yigə dɩ kwaga maama te tɩn mʋ.
Ba yigə nɩ tɩn, tɩga kam nyɩ dɩ Edɛn wɛyuu kʋm mʋ.
Ba kwaga seeni tɩn, ka maa nyɩ dɩ kagʋa wʋ kasʋlʋ kʋm.
Kʋlʋkʋlʋ bá wanɩ kʋ lu ba tee nɩ.
4 Ba ta nyɩ dɩ siseŋ-nɔɔna mʋ,
yɩ ba yɔɔrɩ ba duri lɩla,
nɩnɛɛnɩ sise sɩlʋ ba na ma ba kɩ najara tɩn.
5 Ba na diini pweeru tɩm yupara tɩn,
ba tiini ba duri zanzan.
Ba sɔɔ kʋm nyɩ dɩ sise-tərikooru sɔɔ mʋ.
Ba nɛ sɩm na dwanɩ te tɩn
nyɩ dɩ mim na yǝni dɩ zwɛ ga-kʋrrʋ
pa kʋ dwanɩ te tɩn mʋ.
Ba ta saŋɩ da-kwaga mʋ
nɩnɛɛnɩ jar-kərə na lagɩ sɩ ba kɩ najara te.
6 Nɔɔna dwi maama na nɛ-ba,
fʋʋnɩ mʋ yǝni dɩ tiini dɩ zʋ-ba,
yɩ ba yigə maama nywanɩ!
7 Nɔɔna bam na yi mɛ maama,
ba yǝni ba yɔɔrɩ yigə kam mʋ
nɩnɛɛnɩ pamaŋna na zaŋɩ najara te tɩn.
Ba ta waɩ ba faŋɩ ba gaalɩ kabri sɩm
ba zʋʋrɩ tɩɩnɩ dɩm ba jaana.
Ba maama tɔgɩ ba cwǝŋǝ mʋ,
yɩ ba ba fɔgɩ ba ywəri ba daarɩ-ka.
8 Ba ba yǝni ba pɩɩnɩ daanɩ.
Nɔɔnʋ maama tɔgɩ o cwǝŋǝ mʋ.
Kʋlʋkʋlʋ warɩ ba yigə sɩ kʋ cɩ,
kʋ na maŋɩ kʋ yɩ cicwə dɩ cɩna maama dɩ.
9 Ba na yi tɩʋ kʋlʋ maama,
baá məəli-kʋ mʋ,
yɩ ba tɔgɩ kʋ kabri sɩm baŋa nɩ.
Ba maa yǝni ba ŋɔ ba zʋ kʋ di sɩm wʋnɩ,
nɩnɛɛnɩ ŋwɩɩna na kɩ te tɩn.
10 Tɩga kam baŋa maa ziziŋi ba yigə nɩ.
Wɛyuu kʋm dɩ maa suə.
Wɩa kam dɩ cana kam maama ma ji lim.
Calɩcwɩ sɩm pooni dɩ daa maa tǝrǝ.
11 Baŋa-Wɛ di DƖ jar-kərə bam yigə.
DƖ kwǝrǝ kam maa tiini ka zaŋa dɩ baarɩ!
Kʋ na yɩ kɔ-fɔrɔ kʋlʋ na tɔgɩ DƖ kwaga yɩ ba sɛ DƖ ni tɩn,
n bá wanɩ n jeeli n lwarɩ ba ni.
Baŋa-Wɛ dɛ-kamunu kʋm jɩgɩ fʋʋnɩ zanzan!
Wɔɔ mʋ wʋ́ wanɩ o zɩgɩ dɩ wʋnɩ?a
Lǝni-na á bɩcara yam
12 Baŋa-Wɛ nan tagɩ tɩntʋ mʋ DƖ wɩ:
«Dɩ kʋntʋ maama, maŋa ta wʋ kɛ.
Joori-na á ba amʋ tee nɩ dɩdaanɩ á wʋ maama.
Taá vɔ-na á niə yɩ á keerǝ,
sɩ á ba amʋ yigə nɩ dɩ á wʋ-cɔgɔ.
13 Pa-na sɩ á wʋrʋ tɩm sɩɩnɩ tɩ cɔgɩ,
yɩ kʋ daɩ á na vaŋɩ á gwaarʋ á kaarɩ kaarɩ te tɩn yɩranɩ.»
Joori-na á Tu Baŋa-Wɛ dɩm te,
Bɛŋwaanɩ DƖ yu-yoŋo dɩm gaalɩ,
yɩ DƖ jɩgɩ nɔɔna yibwənə.
DƖ maa yǝni DƖ pɩɩnɩ DƖ banɩ,
yɩ DƖ sono gaalɩ.
DƖ ba soe sɩ DƖ taa tʋŋɩ cam nɔɔna baŋa nɩ.
14 Wɔɔ mʋ wʋ́ wanɩ o lwarɩ?
Dɛ dɩlʋ abam Tu Baŋa-Wɛ dɩm wʋ́ ləri DƖ wʋbʋŋa,
sɩ DƖ daarɩ DƖ duri abam ŋwaŋa,
yɩ DƖ kɩ á yu-yoŋo.
Abam laan maa wʋ́ nɩɩnɩ dɩ wʋdiiru dɩdaanɩ sana,
sɩ á ma‑á kɩ kaanɩm á pa Baŋa-Wɛ.b
15 Wu-na nabɔnɔ kʋm Siyɔn piu kʋm yuu nɩ.
Ta-na sɩ nɔɔna bam jeeri ba vɔ ni Wɛ ŋwaanɩ!
Bəŋi-na ba maama sɩ ba la daanɩ ba zuli Wɛ.
16 Pa-na sɩ á kɔgɔ kʋm maama kwɛ ba tɩtɩ Wɛ ŋwaanɩ,
sɩ ba daarɩ ba jeeri Wɛ yigə nɩ.
Bəŋi-na nankwɩn sɩ ba nuŋi ba ba,
kʋ ta wǝli dɩ biə dɩ bu-sɩsɩn sɩlʋ ta na ŋɔgɩ ba niinə yɩla tɩn dɩ.
Kam-bar-dʋʋrʋ dɩ nan nuŋi o di-pənə wʋnɩ,
Kʋ daarɩ sɩ ka-dʋʋrʋ dɩ nuŋi o tantɩ digə kam wʋnɩ!
17 Sɩ kʋ na yɩ kaanɩm tiinə bam na tʋŋɩ ba paɩ Baŋa-Wɛ tɩn,
bantʋ maŋɩ sɩ ba zʋ Wɛ diga kam nɩ mʋ.
Ba laan maa wʋ́ taa zɩgɩ digə kam ni dɩm dɩdaanɩ kaanɩm bimbim dɩm tɩtarɩ laŋa nɩ mʋ,
ba keerǝ yɩ ba loori Wɛ ba wɩ:
«Amʋ Tu Baŋa-Wɛ, duri n nɔɔna bam ŋwaŋa sɩ n yɩ vaŋɩ ba zwa.
Yɩ sɛ sɩ dwi-gɛ tiinə bam taa jɩgɩ n nɔɔna bam ba twɩa,
yɩ ba mwanɩ-ba sɩ ba taa ta ba wɩ: ‹Abam Wɛ dɩm nan bɛ?› »
Baŋa-Wɛ joori DƖ kɩ ba yu-yoŋo
18 Baŋa-Wɛ nan brɩ nɩ DƖ yigə wʋ DƖ tɩga kam wʋnɩ mʋ.
DƖ ma duri DƖ nɔɔna bam ŋwaŋa.
19 DƖ ma lǝri-ba DƖ ta DƖ wɩ:
«A lagɩ a pa á na wʋdiiru mʋ, dɩ sa-nyoŋo, dɩdaanɩ nugə.
Abam laan ma‑á wʋ́ di á wʋbʋŋa á su.
Amʋ daa bá sɛ sɩ dwi-gɛ tiinə bam taa kɩ abam ba mwana.
20 Kʋ na yɩ nɔn-kɔgɔ kʋlʋ na nuŋi baŋa seeni kʋ ba á baŋa nɩ tɩn,
amʋ wʋ́ zəli-ba a ja vu a yagɩ kagʋa yuu nɩ,
sɩ ba daa yɩ daanɩ abam.
A lagɩ a kalɩ balʋ na wʋ kɔgɔ kʋm yigə nɩ ba maa ve tɩn
a ja vu sɩ ba tʋ Yɛ nɩnɩʋ kʋmc wʋnɩ mʋ.
Kʋ ta na yɩ balʋ na maŋɩ kwaga nɩ ba ve tɩn,
a lagɩ a ja-ba a vu sɩ ba tʋ Mediterane nɩnɩʋ kʋm nɩ mʋ.
Ba kɔgɔ kʋm laan maa wʋ́ pɔ,
sɩ ba lwəm taa zaŋɩ je maama nɩ.»
Baŋa-Wɛ sɩɩnɩ DƖ tʋŋɩ wo-kɩnkagɩla!
21 Tɩga kam yɩ taa kwarɩ fʋʋnɩ
sɩ ka daarɩ ka taa cakɩ dɩ wʋpolo.
Cɩga tɩn, Baŋa-Wɛ sɩɩnɩ DƖ tʋŋɩ wo-kɩnkagɩla!
22 Ga-vara bam dɩ yɩ taa kwarɩ fʋʋnɩ,
bɛŋwaanɩ pwələ kam maama su mʋ dɩdaanɩ ga-lɛɛrʋ.
Tweeru tɩm dɩ maa lə biə zanzan!
Swan dɩdaanɩ vinyə tweeru biə wʋra mʋ yɔɔ!
23 Siyɔn tiinə bam, taá jɩgɩ-na wʋpolo!
Taá di-na ywəəni dɩdaanɩ Baŋa-Wɛ na kɩ kʋlʋ DƖ pa abam tɩn.
Bɛŋwaanɩ, Dɩntʋ mʋ tɔgɩ DƖ yu-yoŋo dɩm baŋa nɩ
DƖ pa dʋa taa nɩ zanzan ka pa abam.
DƖ ma pa abam duum dʋa, dɩ faa ni dʋa kam dɩ
sɩ kʋ maŋɩ dɩdaanɩ DƖ ya na yǝni DƖ kɩ te tɩn mʋ.
24 Mɩna twɩ sɩm lagɩ sɩ su dɩdaanɩ wʋdiiru mʋ,
sɩ sana dɩ nugə dɩ taa daga sɩ gaalɩ.
Baŋa-Wɛ mʋ wɩ:
25 «A nan wʋ́ joori a ŋwɩ á wʋdiiru tɩlʋ kayɩra sɩm ya na cɔgɩ
bɩna yalʋ wʋnɩ sɩ kɔgɔ dɩ kɔgɔ na tu abam baŋa nɩ tɩn.
Kʋ yɩ amʋ mʋ dɛɛn tʋŋɩ-sɩ abam tɩtarɩ nɩ,
nɩ jar-kərə te.
26 Abam laan wʋ́ taá di á sui,
á wʋdiiru na wʋ́ gaalɩ tɩn ŋwaanɩ.
Abam laan maa wʋ́ zuli á Tu Baŋa-Wɛ dɩm yɩrɩ,
dɩ amʋ na tʋŋɩ wo-kɩnkagɩla a pa abam te tɩn.
Amʋ nɔɔna bam daa bá di ba cavɩɩra.
27 Abam Yisɩrayɛlɩ tiinə bam laan wʋ́ lwarɩ nɩ amʋ mʋ wʋ abam tɩtarɩ nɩ.
Amʋ mʋ yɩ abam Tu Baŋa-Wɛ dɩm,
yɩ Wɛ dɩdoŋ daa tǝrǝ sɩ dɩ dwǝni dɩ amʋ.
Cɩga tɩn, a nɔɔna bam daa bá di ba cavɩɩra.»
Baŋa-Wɛ dɛ-kamunu kʋm taanɩ
28 «Kʋ maama kwaga nɩ,
amʋ wʋ́ lo a Joro nabiinǝ maama baŋa nɩ.
Kʋntʋ nan wʋ́ pa á bu-baara dɩ á bukwa taa ŋɔɔnɩ amʋ yiyiu-ŋwɛ,
sɩ á nankwɩn dɩ dwɛ dɩndwɩa amʋ ŋwaanɩ,
Kʋ daarɩ sɩ abam nɔn-dʋnnʋ na wo-kɩnkagɩla yalʋ a na wʋ́ vɩɩrɩ a brɩ-ba tɩn.d
29 Cɩga tɩn, da yam kʋntʋ nɩ a lagɩ a lo a Joro mʋ a tɩntʋŋna baŋa nɩ,
baara dɩ kaana dɩ.
30 Amʋ ta wʋ́ pa wo-kɩnkagɩla taa naɩ wɛyuu nɩ
dɩdaanɩ tɩga baŋa nɩ.
Kantʋ maŋa kam nɩ jana wʋ́ taa wʋra, dɩ mim,
dɩ nyʋa kalʋ na tiini ka zwərə tɩn.
31 Wɩa kam wʋ́ ba ka vaŋɩ ka li lim,
yɩ cana kam dɩ ji nasʋŋʋ nɩ jana te.
Kʋ laan daarɩ sɩ Baŋa-Wɛ dɛ-kamunu kʋm ba kʋ yi,
sɩ DƖ nɩnwaŋa kam dɩ brɩ jaja.
32 Dɛ dɩm kʋntʋ nɩ,
wʋlʋ maama na wʋ́ bəŋi Baŋa-Wɛ yɩrɩ
o ma loori zǝnǝ tɩn wʋ́ na vrɩm.
Siyɔn piu kʋm yuu nɩ dɩ Zeruzalɛm tɩʋ kʋm maama wʋnɩ mʋ
nɔɔna badaara wʋ́ lu cam dɩm wʋnɩ,
nɩ Baŋa-Wɛ na maŋɩ DƖ ta te tɩn.
Kʋ na yɩ balʋ na wʋ́ wəri tɩn,
balʋ Baŋa-Wɛ na bəŋi sɩ ba taa yɩ DƖ nyɩm tɩn
wʋ́ taa wʋ ba wʋnɩ.»