Baŋa-Wɛ wʋ́ bʋrɩ dwi tiinə maama taanɩ
3
«Nii-na! Maŋa kam kʋntʋ nɩ,amʋ wʋ́ pa Zeruzalɛm dɩ Zuda tiinə bam
joori ba taa jɩgɩ yu-yoŋo lanyɩranɩ.
2 Amʋ wʋ́ pa dwi-gɛ tiinə bam maama ba
ba jeeri bolo kʋlʋ ba na bǝi wɩ: ‹Zʋzafatɩa bolo› tɩn nɩ.
Ba na tu ba wʋra, a laan wʋ́ di ba taanɩ,
dɩ ba na kɩ amʋ nɔɔna Yisɩrayɛlɩ tiinə bam te tɩn.
Bɛŋwaanɩ ba ya jaanɩ-ba
ba jagɩ ba vu tɩɩnɩ dɩdonnǝ nɩ,
yɩ ba daarɩ ba joŋi ba tɩga kam ba te.
3 Dwi-gɛ tiinə bam tagɩ jɔrɔ mʋ a nɔɔna bam ŋwaanɩ
sɩ ba nii wɔɔ mʋ wʋ́ joŋi-ba.
Ba ma yǝni ba kwe bəkəri sɩm
ba yəgi ba ma tɔgɩ ka-boro kwaga,
yɩ ba daarɩ ba kwe bɩsankam sɩm ba yəgi
sɩ ba joŋi sana ba taa nyɔa.
4 Tiiri tiinə, dɩ Sidɔn tiinə, dɩdaanɩ Filisi tiinə na wʋ je sɩlʋ maama nɩ tɩn, abam bʋŋɩ sɩ á kɩ amʋ tɩta mʋ? Á lagɩ sɩ á yiri á jɩnɩ mʋ amʋ baŋa nɩ na? Kʋntʋ nan na yɩ á bʋbʋŋɩ dɩm, lwarɩ-na nɩ amʋ wʋ́ kɩ lɩla a joori a ŋwɩ kʋlʋ á na kɩ amʋ baŋa nɩ tɩn. 5 Abam vrɩ səbu dɩ səbu-sɩŋa jɩjɩgɩrʋ tɩm na yɩ amʋ tɩtɩ lʋnnɩ nyɩm tɩn á ja á vu á tiŋi á jwǝnǝ di sɩm wʋnɩ. 6 Abam ta ma kwe Zeruzalɛm dɩ Zuda tiinə bam á ja á vu á yəgi á pa Grɛkɩ tiinə. Á kɩ kʋntʋ sɩ ba vu yigə yigə mʋ ba daarɩ ba tɩtɩ tɩʋ kʋm sɩ á taá te.
7 Nan nii-na! Amʋ laan lagɩ a joori a ja a nɔɔna bam mʋ sɩ ba nuŋi je sɩlʋ maama nɩ á na yəgi-ba tɩn a ja a ba sɔŋɔ. A ta maa wʋ́ pipiri kʋlʋ á na tʋŋɩ ba baŋa nɩ tɩn, sɩ kʋ joori kʋ ba abam tɩtɩ yuu nɩ. 8 A lagɩ a kwe abam biə mʋ a yəgi a pa Zuda tiinə bam. Bantʋ laan wʋ́ kwe á biə bam ba yəgi ba pa Sabiɛn tiinə bam na zʋʋrɩ sa-tɩʋ nɩ yigə yigə tɩn.»
Baŋa-Wɛ mʋ tagɩ tɩntʋ maama.
9 Tɔɔlɩ-na kwǝrǝ kantʋ sɩ ka yi dwi tiinə maama:
«Ti-na á yigə jara-kǝm ŋwaanɩ!
Bəŋi-na á babɛ sɩm dɩ á jar-kərə bam maama
sɩ ba zaŋɩ ba la daanɩ,
ba daarɩ ba vu ba zaŋɩ najara dɩ ba dʋna bam.
10 Kwe-na á vaanɩ dɩm sɩ á ma‑á lu jara-kǝm sʋ-lwaanʋ,
sɩ á kwe á larɩ sɩm á pa ji cicwə.b
Pa-na sɩ nabwənə maama taa ta wɩ: ‹A yɩ babɩa!›
11 Dwi maama tiinə, kɩ-na lɩla á nuŋi á tɩɩnɩ dɩm nɩ
á ba á jeeri tɩntʋ sɩ á kɩ najara!»
Baŋa-Wɛ, nmʋ dɩ ja n jar-kərə bam n nuŋi n jeeri!
12 Dwi-gɛ tiinə bam maama maŋɩ sɩ ba zaŋɩ
ba vu ba jeeri Zʋzafatɩ bolo kʋm nɩ mʋ.
Dáanɩ mʋ amʋ Baŋa-Wɛ lagɩ a jǝni
a di dwi-gɛ tiinə balʋ maama na gilimi abam tɩn taanɩ.
13 Nɔn-balwaarʋ tɩm maŋa yiǝ sɩ ba na cɔgɩm!
Kʋntʋ tɩn, kwe-na á sʋkwaarʋ
á ja á zʋ ba wʋnɩ á ma á gaanɩ-ba,
nɩnɛɛnɩ ba na yǝni ba gwe mɩna yalʋ na bɩgɩ te tɩn.
Nan ta nɔnɩ-na ba baŋa nɩ,
nɩnɛɛnɩ ba na kɩ te ba ŋokɩ vinyə tweeru biə tɩn.
Maŋa kam yiǝ! Sana bam su ba pɛɛlɩ!
14 Nɔn-kɔgɔ mʋ jeeri Sarɩya bolo kʋm nɩ,
kɔgɔ kʋlʋ na tiini kʋ gaalɩ zanzan tɩn.
Cɩga tɩn, Baŋa-Wɛ dɛ-kamunu kʋm lagɩ dɩ ba lɩla mʋ,
sɩ DƖ bʋrɩ ba bʋra dáanɩ.
15 Wɩa kam dɩdaanɩ cana kam maama wʋ́ ji lim.
Calɩcwɩ sɩm pooni dɩ daa bá taa nyɩɩna.c
16 Baŋa-Wɛ kwǝrǝ mʋ zaŋɩ Siyɔn piu kʋm yuu nɩ ka suurə.
DƖ kwǝr-dɩa maa bagɩ Zeruzalɛm tɩʋ kʋm wʋnɩ,
pa tɩga baŋa dɩdaanɩ wɛyuu maama ziziŋi.
Kʋ nan na yɩ DƖ tɩtɩ nɔɔna Yisɩrayɛlɩ tiinə bam,
Baŋa-Wɛ mʋ yɩ ba dalɩm je,
sɩ ba salɩ DƖ yɩra nɩ.
Baŋa-Wɛ wʋ́ kɩ DƖ nɔɔna bam yu-yoŋo
Baŋa-Wɛ ma ta DƖ wɩ:
17 «Abam Yisɩrayɛlɩ tiinə bam laan wʋ́ lwarɩ nɩ amʋ mʋ yɩ á Tu Baŋa-Wɛ dɩm.
A maa zʋʋrɩ a tɩtɩ piu Siyɔn yuu nɩ mʋ.
Amʋ ta ma pɔɔrɩ Zeruzalɛm sɩ kʋ taa yɩ a tɩtɩ tɩʋ kʋm.
Vərə daa bá wanɩ-kʋ ba di maŋa dɩ maŋa.
18 Maŋa kam kʋntʋ na yiǝ,
vinyə tweeru tɩlʋ á na wʋ́ jəri pweeru je sɩm nɩ tɩn
wʋ́ pa á na dɩvɛn sana zanzan.
Á vara dɩ maa wʋ́ puli ba su pweeru laŋa kam maama,
pa nayɩla dɩ gaalɩ.
Zuda wʋ bwi sɩm maama dɩ maa wʋ́ su sɩ pɛɛlɩ.
Na-woro wʋ́ zɩgɩ Baŋa-Wɛ digə kam nɩ
ka duri ka vu ka yi Sitimd bolo kʋm ka bugi tɩga kam.
19 Ezipi tɩʋ kʋm nan lagɩ kʋ ji di-dwəənu je mʋ,
sɩ Edɔm dɩ taa yɩ kagʋa yɩranɩ.
Bɛŋwaanɩ ba dɛɛn tiini ba tʋŋɩ wo-balɔrɔ tɩtʋŋɩ Zuda tiinə bam yɩra nɩ.
Ba ma zʋ ba tɩga kam ba gʋ balʋ na wʋ maŋɩ sɩ ba tɩ tɩn.
20 Kʋ nan na yɩ Zeruzalɛm tɩʋ kʋm dɩdaanɩ Zuda laŋa kam maama,
nɔɔna wʋ́ taa zʋʋrɩ da maŋa maama mʋ sɩ kʋ taa zamaanɩ dɩ zamaanɩ maama.
21 Amʋ laan maa wʋ́ joori a ŋwɩ nɔn-gʋra kəm-balwaarʋ dɩm jɩnɩ,
amʋ na wʋ ŋwɩ-dɩ tɩn ŋwaanɩ.
Cɩga tɩn, amʋ Baŋa-Wɛ zʋʋrɩ Siyɔn wʋnɩ.»