Wɛ Nijoŋnu
Zowɛlɩ Tɔnɔ
1
Baŋa-Wɛ mʋ kwe taanɩ dɩntʋ o pa Petuwɛlɩ bu Zowɛlɩ:Kayɩra kɔgɔ na yʋ tɩga kam te tɩn
2 Abam balʋ na yɩ nakwa tɩn, cəgi-na!
Balʋ maama dɩ na zʋʋrɩ tɩga kam wʋnɩ tɩn,
cəgi-na taanɩ dɩntʋ.
Abam na zaŋɩ pa á ŋwɩ tɩn,
á ta nɛ kʋntʋ woŋo doŋ na kɩ á yibiyə nɩ na?
Á kwə bam dɩ dɛɛn nɛ kʋ doŋ na?
3 Ta-na taanɩ dɩntʋ á brɩ á biə,
sɩ bantʋ dɩ ta-dɩ sɩ ba dɩ biə ni dɩ ŋwa,
yɩ bantʋ dɩ daa wʋ́ lwǝni ba brɩ ba dɩ biə.
4 Kayɩra kɔgɔ kɔgɔ tu sɩ saŋɩ da-kwaga nɩ mʋ.
Sɩ kɔgɔ kʋm kʋdoŋ na dəlimi sɩ daarɩ kʋlʋ maŋɩ sɩ kɛ tɩn,
mʋ kayɩra kwarʋ tɩlʋ na saŋɩ tɩn tu sɩ di maama nyɔ!
5 Sa-nyɔra bam, zaŋɩ-na dɔɔm wʋnɩ sɩ á taá keerǝ,
bɛŋwaanɩ sa-nyoŋo daa tǝrǝ sɩ á nyɔ.
6 Kayɩra sɩm nyɩ dɩ jar-kərə na magɩ kɔgɔ te tɩn mʋ,
yɩ sɩ tiini sɩ yʋ tɩga kam ni maama nɩ.
Sɩ tiini sɩ daga,
yɩ sɩ ta dana sɩ kʋ gaalɩ.
Sɩ yələ yam di mʋ filam filam,
nɩnɛɛnɩ nyoŋo yələ na yɩ te tɩn.
7 Sɩ yɔɔrɩ sɩ cɔgɩ vinyə tweeru tɩm,
dɩdaanɩ kapʋrrʋ tɩm maama.
Sɩ lɩ tweeru tɩm kwaga mʋ,
yɩ sɩ laan daarɩ tweeru tɩm fɩm yɩranɩ,
pa tɩ zɩga ponə ponə.
8 Taá keeri-na nɩnɛɛnɩ bɩsankana
kalʋ na gɛ ka barʋ tɩn na wʋ́ taa keeri o luə te tɩn.
9 Bɛŋwaanɩ, wʋdiu dɩ sana daa tǝrǝ
sɩ ba ma ba kɩ pɛɛra Baŋa-Wɛ yigə nɩ.
Wɛ kaanɩm tiinə bam keeri mʋ ga bɔgɩ-bɔgɩ
bɛŋwaanɩ pɛɛra daa tǝrǝ sɩ ba ma zuli Baŋa-Wɛ.
10 Karɩ sɩm maama cɔgɩ,
yɩ tɩga kam baŋa maama yɩ yinigə mʋ punə.
Wʋdiiru tɩm maama ti.
Sa-nyoŋo ti, yɩ nugə dɩ daa tǝrǝ.
11 Vala bam, abam dɩ pa á wʋ cɔgɩ!
Taá keeri-na sɩ kʋ zaŋɩ wɛɛnɩ bɔgɩ bɔgɩ,
bɛŋwaanɩ, mɩna yam maama cɔgɩ.
Faa kʋm wʋ jaanɩ kuri.
12 vinyə tweeru tɩm dɩdaanɩ kapʋrrʋ tɩm maama kwaarɩ kwaarɩ mʋ tɩ zɩga.
Tweeru tɩm maama kʋga pa tɩ ba ləri biə:
grɩnadɩnɩ tweeru, dɩ kalɩgwənnu,
dɩ kʋrrʋ tɩm maama yɔɔrɩ tɩ tɩ mʋ.
Nɔɔna bam tɩɩna maama dɩ ma ti.a
Kʋ maŋɩ sɩ nɔɔna bam mʋ culi ba lwarɩm
13 Wɛ kaanɩm tiinə bam,
abam balʋ na yǝni á tʋŋɩ Baŋa-Wɛ bimbim dɩm ŋwaanɩ tɩn,
lɛ-na gwar-zɩnzwara sɩ á daarɩ á taá keerǝ.
Kʋ yɩ sɩ á zʋ Wɛ diga mʋ tɩtɩ nɩ,
yɩ á laan keeri sɩ kʋ taa nii tɩ-pʋra maŋa,
bɛŋwaanɩ wʋdiiru dɩ sana tǝrǝ
sɩ á kaanɩ á pa á Tu Wɛ dɩm.
14 Ta-na sɩ nɔɔna bam jeeri ba vɔ ni Wɛ ŋwaanɩ!
Bəŋi-na ba maama sɩ ba la daanɩ ba zuli Wɛ.
Kʋ na yɩ nakwa bam,
dɩdaanɩ balʋ maama na zʋʋrɩ tɩga kam nɩ tɩn,
pa-na sɩ ba ba ba jeeri Wɛ diga kam nɩ,
sɩ ba maama keeri ba loori-DƖ dáanɩ.b
15 Baŋa-Wɛ dɛ-kamunu kʋm tiini kʋ bwələ zanzan!
Dɩ na yiǝ,
kʋʋ́ taa yɩ Dam-fɔrɔ Tu Wɛ dɩm mʋ pɛ cɔgɩm ba.
Dɛ dɩm wʋ́ tiini dɩ taa yɩ lɛɛrʋ na!c
16 Dɩ́ yɔɔrɩ dɩ́ zɩgɩ dɩ́ nii mʋ,
yɩ dɩ́ wʋdiiru jɩgɩ tɩ cɔga.
Dɩbam Tu Wɛ zulə digə kam ywəəni maama ti.
17 Wo-dwə bam maama maŋɩ tɩga nɩ mʋ ba pɔ.
Dɩ́ tuli sɩm maama laan cɔgɩ mʋ sɩ zɩga,
wʋdiu na tǝrǝ sɩ dɩ́ tiŋi tɩn ŋwaanɩ.
18 Vara bam maama keeri kana mʋ.
Ba maa beeri yɔɔ yɩranɩ, ba tɔgɩ wʋdiu kwaga.
Bʋnɩ dɩ peeni sɩm maama yɔɔrɩ sɩ yaarɩ mʋ.
19 Baŋa-Wɛ, amʋ nan wʋ́ keeri a loori nmʋ mʋ!
Bɛŋwaanɩ, kʋ nyɩ dɩ mim mʋ zwɛ gaa maama kulə!
Tweeru tɩm maama dɩ maa kwaarɩ tɩ zɩga.
20 Ga-vara tɩtɩ dɩ keeri mʋ ba loori nmʋ,
Bɛŋwaanɩ, bwi sɩm kʋgɩ mʋ
yɩ na daa tǝrǝ sɩ ba nyɔ.
Cɩga tɩn, mim zwɛ gaa kʋm maama mʋ kulə!