Daniyɛlɩ nɛ vɩɩra Tigri bugə ni nɩ
10
Bɩnɩ dɩlʋ wʋnɩ Pɛrsɩ tɩʋ pɛ Sirusi na di paarɩ o kɩ bɩna yatɔ tɩn, mʋ Daniyɛlɩ dɛɛn nɛ vɩɩra yadonnə. Daniyɛlɩ yɩrɩ dɩdoŋ maa yɩ Bɛlɩtesaza. Vɩɩra yam brɩ taanɩ dɩlʋ na yɩ cɩga yɩ dɩ ve tigurə na tiini ka cana tɩn seeni mʋ. Daniyɛlɩ na nɛ vɩɩra yam kʋntʋ tɩn, o ma lwarɩ taanɩ dɩm kuri lanyɩranɩ.2 Maŋa kam kʋntʋ ni nɩ, amʋ Daniyɛlɩ wʋʋ dɛɛn tiini kʋ cɔgɩ mʋ. A ma kwe da fuinle dɩdʋa a yɔɔrɩ a kɩ nɩ nɔɔnʋ na keeri luə te tɩn. 3 Da yam kʋntʋ maama wʋnɩ, a yɔɔrɩ a vɩn wʋdi-yoŋo dim, dɩ nwana dʋnɩm mʋ, yɩ a ta vɩn sɩ a nyɔ sana. A wʋ mɛ nugə a kwɛ a yatana kam.
4 Pulim cana kam da fiinle-yana dɛ dɩm nɩ, a dɛɛn maa zɩgɩ Tigri bu-tʋlɩ-zaŋa kam bubɛ baŋa nɩ. 5 Amʋ na kwǝni a yuu sɩ a nii tɩn, mʋ a nɛ nɔɔnʋ na zʋ gar-fɩfalɩ, yɩ səbu-sɩŋa na yɩ cɩga cɩga tɩn kilə vɔ o təŋə nɩ. 6 O yɩra yɔɔrɩ ya nyɩɩnɩ mʋ, nɩ kandwa-ŋʋna na yɩ te tɩn. O yibiyə dɩ maa pɩpɩla nɩ dʋa pɩpɩlɩm te. Min-vʋgʋ dɩ maa zɩgɩ o yiǝ nɩ dɩ tarɩga. O jɩn sɩm, dɩ o nɛ sɩm nyɩɩnɩ zanzan nɩ ba na jɩgɩ canna ba titigə sɩ ba kwɛ-ka te tɩn. O kwǝrǝ dɩ maa yɔɔrɩ ka dwana nɩ kɔ-fɔrɔ na jeeri daanɩ yɩ sɔɔ kɩ te tɩn.
7 Amʋ Daniyɛlɩ yɩranɩ dɛɛn mʋ nɛ vɩɩra yam. Kʋ na yɩ balʋ maama ya na zɩgɩ amʋ tee nɩ tɩn, ba wʋ nɛ kʋlʋkʋlʋ. Vɩɩra yam ma tiini ya pa fʋʋnɩ zʋ-ba, yɩ ba duri ba səgi. 8 Kʋntʋ ŋwaanɩ amʋ yɩranɩ daarɩ a zɩgɩ da a nii vɩɩra-kɩnkagɩla yam. A na nɛ-ya tɩn, mʋ a dam maama ti, yɩ a yɩra yam dɩ tɩ. A yibiyə yɔɔrɩ ya da ya ləni mʋ. 9 Amʋ ma ni o kwǝrǝ. A na ni tɩn mʋ a tʋ tɩga nɩ, yɩ a yibiyə jeeri tɩga kam. Amʋ ma maŋɩ da a dɔ a bəri.
10 Nɔɔnʋ jɩŋa ma dwe-nɩ. O ma gɔ-nɩ pa a zaŋɩ a nadoonə baŋa nɩ yɩ a jataala ja tɩga. A yɩra maama dɩ maa saɩ vagɩ vagɩ. 11 O ma ta dɩ amʋ o wɩ: «Daniyɛlɩ, nmʋ tiini n jɩgɩ kuri Wɛ tee nɩ. Kʋntʋ tɩn, zaŋɩ wɛɛnɩ, sɩ n pʋrɩ n zwa n fɔgɩ n cəgi kʋlʋ maama a na wʋ́ ta a brɩ-m tɩn. Bɛŋwaanɩ, ba tʋŋɩ-nɩ mʋ nmʋ tee nɩ.» O taanɩ dɩm kʋntʋ ma pa a zaŋɩ wɛɛnɩ, yɩ a yɩra ta saɩ.
12 O daa maa wɩ: «Daniyɛlɩ, yɩ ta n kwarɩ fʋʋnɩ. Nan lwarɩ nɩ kʋ zɩgɩ dɛ dɩm nmʋ na yɔɔrɩ n ja wʋbʋŋa sɩ n ni wǝǝnu kuri, yɩ n tiini n gooni n tɩtɩ n Tu Wɛ yigə nɩ kʋ ŋwaanɩ tɩn, mʋ Wɛ maŋɩ DƖ ni n wɛ-loro kʋm. DƖ nan tʋŋɩ amʋ mʋ sɩ a ja lərə yam a ba a pa‑m. 13 Kʋ na yɩ te tɩn, da fiinle-dɩdʋa mʋ tɩntʋ, yɩ malɛka kalʋ na te Pɛrsɩ tɩʋ kʋm tɩn cɩ a cwǝŋǝ sɩ a yɩ yi n te. Wɛ malɛsɩ dɩdɛɛra bam dɩdʋa yɩrɩ na yɩ Misɛɛlɩ tɩn mʋ laan tu o wǝli-nɩ, Pɛrsɩ dɩdɛɛra bam na pɛ a daanɩ tɩn ŋwaanɩ.a 14 Amʋ nan tu sɩ a pa n lwarɩ kʋlʋ na wʋ́ yi nmʋ nɔɔna bam jwa seeni tɩn mʋ. Bɛŋwaanɩ, vɩɩra yam na wʋ́ kɩ maŋa kalʋ tɩn ta wʋ yi.»
15 Malɛka kam na wʋra ka ŋɔɔnɩ dɩ amʋ kʋntʋ tɩn, a yiǝ wʋ tɩga nɩ mʋ. A ni dɩ ma məəri yɩ a warɩ kʋlʋkʋlʋ sɩ a ta. 16 Wʋlʋ na nyɩ dɩ nabiinu tɩn laan ma dwe amʋ ni pa dɩ puri. A ma ta dɩd-o a wɩ: «Amʋ Tu, vɩɩra yam mʋ tiini ya pa fʋʋnɩ zʋ-nɩ, yɩ a yɩra maama dɩ tɩ. 17 A yɩ nmʋ tɩntʋŋnʋ mʋ. A nan wʋ́ kɩ tɩta mʋ sɩ a wanɩ a ŋɔɔnɩ dɩ nmʋ wʋlʋ na yɩ a yuutu tɩn? Nii amʋ dam dɩm maama na ti, yɩ a siun vaŋɩ kʋ kɔɩ te!»
18 Wʋlʋ na nyɩ dɩ nabiinu tɩn daa ma dwe-nɩ pa a joori a na dam. 19 O laan ma ta dɩ amʋ o wɩ: «Yɩ ta n kwarɩ fʋʋnɩ, n na tiini n jɩgɩ kuri n pa Wɛ tɩn ŋwaanɩ. Yazurə ta wʋ n tee nɩ! Kɩ n tɩtɩ n kɩ daanɩ sɩ n na baarɩ.»
O taanɩ dɩm ma pa-nɩ dam, yɩ a ta dɩd-o a wɩ: «Amʋ tu, nan ta kʋlʋ na wʋra tɩn, sɩ n taanɩ dɩm pɛ a dam joori.»
20 O ma ləri o wɩ: «Nmʋ laan lwarɩ bɛŋwaanɩ a na tu n tee nɩ tɩn na? Kʋ na kɩ fɩɩn, amʋ wʋ́ joori a vu a zaŋɩ najara dɩ Pɛrsɩ tɩʋ dɩdɛɛrʋ wʋm. A nan na wan‑o a ti, Grɛkɩ tɩʋ dɩdɛɛrʋ wʋm dɩ wʋ́ nuŋi o ba. 21 Nan ta n yɩ kʋntʋ cɩmm, sɩ a ta kʋlʋ maama na pʋpʋnɩ kʋ tiŋi cɩga tɔnɔ kʋm wʋnɩ tɩn a brɩ-m. Nan lwarɩ lanyɩranɩ nɩ nɔɔn-nɔɔnʋ tǝrǝ sɩ o wǝli-nɩ najara kǝm baŋa nɩ, kʋ na daɩ Misɛɛlɩ yɩranɩ mʋ. Wʋntʋ nan mʋ yɩ malɛka kalʋ na nii á nɔɔna bam baŋa nɩ tɩn.