Daniyɛlɩ loori Wɛ Yisɩrayɛlɩ tiinə ŋwaanɩ
9
Pɛ Asuerusi bu Dariusi dɛɛn yɩ Mɛdɩ tu mʋ yɩ o laan di Babilɔnɩ tɩʋ kʋm maama paarɩ.a 2 O paarɩ dim pulim bɩnɩ dɩm wʋnɩ, amʋ Daniyɛlɩ maa wʋra a zaasɩ twannʋ tɩlʋ Wɛ tɩntʋŋna na pʋpʋnɩ ba tiŋi tɩn. A na zaasɩ tɩn, mʋ a nɛ Baŋa-Wɛ na tagɩ kʋlʋ dɩ DƖ nijoŋnu Zeremi sɩ kʋ vu Zeruzalɛm tɩʋ kʋm cɔgɩm seeni tɩn. A dɛɛn maanɩ nɩ Zeruzalɛm tɩʋ kʋm wʋ́ taa tigi di-dwəənu yɩranɩ bɩna fusɩrpɛ laŋa nɩ.b 3 Amʋ ma vu a warɩ a Yuutu Baŋa-Wɛ yɩ a magɩ a japoori a loori DƖ yigə nɩ. A ta ma vɔ ni, a daarɩ a zʋ gwar-zɩnzwara yɩ a je tɩntwarɩm wʋnɩ wʋ-cɔgɔ ŋwaanɩ. 4 A dɛɛn loori amʋ Tu Baŋa-Wɛ Yisɩrayɛlɩ tiinə bam lwarɩm ŋwaanɩ yɩ a wɩ:c«Dɩ́ Yuutu Wɛ, nmʋ yɩ kamunu mʋ, yɩ dɩ́ tiini dɩ́ kwarɩ-m. N zɩgɩ dɩ cɩga mʋ n sono kʋm baŋa nɩ n soe balʋ na soe-m yɩ ba tɔgɩ n niə yam tɩn, nɩ n na goni ni sɩ n kɩ n pa-ba te tɩn. 5 Sɩ kʋ na yɩ dɩbam, dɩ́ yɔɔrɩ dɩ́ kɩ lwarɩm mʋ, yɩ dɩ́ tiini dɩ́ cɔgɩ. Dɩ́ tʋŋɩ lwarɩm yɩ dɩ́ lɔ nmʋ kwaga nɩ, yɩ dɩ́ daarɩ dɩ́ vɩn n zaasɩm dɩm dɩ n niə yam.d 6 Dɩ́ nan wʋ sɛ nmʋ nijoŋnə balʋ na yɩ n tɩntʋŋna tɩn. Ba dɛɛn mɛ n yɩrɩ mʋ ba ŋɔɔnɩ dɩdaanɩ dɩbam pwa bam, dɩ dɩ́ nakwa bam, dɩ dɩ́ nabaara bam, dɩ dɩ́ nɔɔna bam maama. Dɩbam ma vɩn sɩ dɩ́ cəgi.
7 Dɩ́ Yuutu Wɛ, nmʋ wʋ n cɩga wʋnɩ mʋ. Dɩbam nan ta jɩgɩ dɩ́ cavɩɩra dɩ́ di mʋ dɩ zɩm maama. Dɩbam Yisɩrayɛlɩ tiinə bam maama mʋ nuŋi n kwaga nɩ. Kʋ na yɩ balʋ na zʋʋrɩ Zeruzalɛm tɩʋ wʋnɩ, dɩ Zuda provɛnsɩ dɩm maama nɩ tɩn, dɩ balʋ na jagɩ ba wʋ dwi-gɛ tiinə tɩɩnɩ dɩm wʋnɩ na yɩ bwələ bwələ tɩn, dɩdaanɩ dɩlʋ na yɩ yigə yigə tɩn dɩ, dɩ́ maama cɔgɩ nmʋ yigə nɩ. 8 Dɩ́ Tu Baŋa-Wɛ, dɩbam pwa bam, dɩ dɩ́ nakwa bam, dɩ dɩ́ nabaara bam mʋ jɩgɩ dɩ́ cavɩɩra dɩ́ di, dɩ́ na kɩ lwarɩm dɩ́ cɔgɩ n yigə tɩn ŋwaanɩ. 9 Dɩ́ Yuutu Baŋa-Wɛ, nmʋ nan yɩ ŋwaŋa tu mʋ, yɩ n kwe nɔɔna lwarɩm n ma n cɛ-ba. Dɩbam nan lɔgɩ nmʋ kwaga nɩ. 10 Dɩbam wʋ sɛ dɩ́ Tu Baŋa-Wɛ ni yɩ dɩ́ ywəri DƖ cwe sɩm wʋnɩ. Dɩ́ vɩn sɩ dɩ́ tɔgɩ niə yalʋ DƖ na tɔgɩ DƖ nijoŋnǝ bam baŋa nɩ DƖ ta dɩ dɩbam tɩn mʋ. 11 Yisɩrayɛlɩ tiinə bam maama mʋ kɩ zwabaniə, pa ba cɔgɩ nmʋ yigə nɩ yɩ ba vɩn nmʋ niə yam.
Kʋ na yɩ cɔgɩm dɩlʋ nmʋ Wɛ na tɔgɩ n tɩntʋŋnʋ Moyisi baŋa nɩ n du durə n wɩ dɩ wʋ́ yi dɩbam tɩn, kʋ laan yɔɔrɩ kʋ ba dɩbam baŋa nɩ mʋ, dɩ́ na kɩ lwarɩm dɩ́ cɔgɩ nmʋ yigə tɩn ŋwaanɩ.e 12 Nmʋ dɛɛn na tagɩ nɩ nń pa kʋlʋ yi dɩbam dɩ dɩ́ yigǝ tiinǝ tɩn mʋ yi dɩbam tɩntʋ. Tɩga baŋa maama nɩ, tɩʋ kʋdoŋ tǝrǝ kʋ na nɛ Zeruzalɛm tɩʋ lɛɛrʋ tɩm dwi. 13 Lɛɛrʋ tɩntʋ maama mʋ tu dɩ́ baŋa, nɩ kʋ na pʋpʋnɩ kʋ tiŋi Moyisi niə yam wʋnɩ te tɩn. Dɩ kʋ dɩ, dɩ́ ta wʋ jaanɩ wʋbʋŋa sɩ dɩ́ yagɩ lwarɩm kǝm, sɩ dɩ́ daarɩ dɩ́ loori dɩ́ Tu Baŋa-Wɛ sɩ DƖ kɩ dɩbam yu-yoŋo. Dɩ́ maa ta wʋ sɛ sɩ nmʋ cɩga kam pa dɩbam yi-pʋrʋ. 14 Kʋntʋ ŋwaanɩ nmʋ Baŋa-Wɛ laan ti n yigə sɩ n pa cɔgɩm dɩntʋ yi dɩbam. N yɔɔrɩ n wʋ n cɩga wʋnɩ mʋ dɩ n na yǝni n kɩ kʋlʋ maama tɩn. Kʋ sɩɩnɩ kʋ maŋɩ sɩ dɩ́ na cam mʋ dɩ lwarɩm dɩm ŋwaanɩ. 15 Dɩ́ Yuutu Wɛ, nmʋ tɩtɩ mʋ kwe n dam-fɔrɔ kʋm n vrɩ n nɔɔna bam n ja n nuŋi Ezipi tɩʋ nɩ. Kʋ ma pa n na yɩrɩ zanzan sɩ kʋ ba kʋ yi zɩm. Cɩga tɩn, dɩbam mʋ kɩ lwarɩm, yɩ dɩ́ yɔɔrɩ dɩ́ tʋŋɩ wo-lɔŋɔ.
16 Dɩ́ Yuutu Wɛ, n yǝni n zɩgɩ n cɩga wʋnɩ dɩ n na kɩ kʋlʋ maama tɩn. Kʋntʋ ŋwaanɩ dɩ́ loori‑m sɩ n zuri n ban-lʋm n na jɩgɩ dɩ n tɩʋ Zeruzalɛm na yɩ n tɩtɩ piu kʋlʋ na yɩ lanyɩranɩ fasɩ tɩn. Dɩbam tɩtɩ dɩ dɩ́ nabaara bam lwarɩm ŋwaanɩ, dwi-gɛ tiinə balʋ na gilimi dɩbam tɩn laan tiini ba gooni Zeruzalɛm mʋ, yɩ ba ta jɩgɩ n nɔɔna bam ba lwɛa. 17 Dɩbam Tu Wɛ, nan cəgi n tɩntʋŋnʋ wɛ-loro kʋntʋ a na jɩgɩ a kɩ tɩn. Sɛ a na magɩ a japoori a loori n yigə nɩ te tɩn. Dɩ́ Yuutu, nmʋ tɩtɩ yɩrɩ ŋwaanɩ, pa n yigə joori ka taa wʋ n digə kam nɩ, ka na jigi di-doŋə tɩn ŋwaanɩ. 18 Amʋ Tu Wɛ, pʋrɩ n zwa sɩ n cəgi, n daarɩ n puri n yiǝ n nii cam dɩlʋ na yi dɩbam tɩn. Kʋ na yɩ tɩʋ kʋlʋ ba na jɩgɩ n yɩrɩ ba bəi-kʋ tɩn, fɔgɩ n nii kʋ na nɛ lɛɛrʋ te tɩn! Kʋ nan daɩ dɩbam tɩtʋŋ-ŋʋna ŋwaanɩ mʋ dɩ́ magɩ a japoori a loori n yigə nɩ, sɩ kʋ yɩ n na tiini n jɩgɩ nɔɔna ŋwaŋa tɩn ŋwaanɩ mʋ. 19 Dɩ́ Yuutu Wɛ, cəgi dɩbam wɛ-loro kʋm, sɩ n kwe dɩ́ lwarɩm dɩm n cɛ dɩbam. Dɩ́ Yuutu Wɛ, cəgi dɩ́ wɛ-loro kʋm sɩ n tʋŋɩ! N tɩtɩ zulə ŋwaanɩ, yɩ daanɩ sɩ n ba n wǝli dɩbam ba na jɩgɩ n yɩrɩ ba bǝi tɩʋ kʋntʋ dɩ kʋ nɔɔna bam tɩn ŋwaanɩ.»
Wɛ malɛka Gabrɩyɛlɩ ŋɔɔnɩ dɩ Daniyɛlɩ
20 Amʋ maa yɔɔrɩ a ta amʋ tɩtɩ dɩ a nɔɔna Yisɩrayɛlɩ tiinə bam lwarɩm a brɩ Wɛ, yɩ a ta loori‑o ya ŋwaanɩ. A ta maa ŋwana a Tu Baŋa-Wɛ yigə nɩ, sɩ DƖ joori DƖ pa DƖ digə kam na wʋ DƖ tɩtɩ piu yuu nɩ tɩn fɔgɩ ka kwɛ. 21 A ta na wʋ wɛ-loro kʋm wʋnɩ kʋntʋ tɩn, mʋ Gabrɩyɛlɩ jaanɩ dɩ baarɩ o tu o yi amʋ te maŋa kalʋ ba na yǝni ba kɩ dɩdaan-ni kaanɩm dɩm tɩn. A nan ya maŋɩ a na wʋntʋ mʋ a dayigə vɩɩra yam wʋnɩ. 22 O ma ta wǝǝnu kuri o brɩ-nɩ yɩ o wɩ:
«Daniyɛlɩ, a tu sɩ a pa n lwarɩ kʋlʋ na wʋra tɩn mʋ, sɩ n ni taanɩ dɩm kuri lanyɩranɩ. 23 Nmʋ na yɔɔrɩ n puli sɩ n magɩ n japoori n loori Wɛ yigə nɩ tɩn, mʋ DƖ tʋŋɩ kwǝrǝ sɩ DƖ ləri n loro kʋm. Amʋ laan nan tuǝ sɩ a maŋɩ taanɩ dɩm kuri a brɩ-m mʋ, nmʋ na tiini n jɩgɩ kuri Wɛ tee nɩ tɩn ŋwaanɩ. Nan cəgi lanyɩranɩ sɩ n wanɩ n lwarɩ vɩɩra yam kuri lanyɩranɩ.
24 Wɛ wʋbʋŋa jaanɩ sɩ DƖ pa nmʋ nɔɔna Yisɩrayɛlɩ tiinə bam, dɩ ba tɩʋ kʋm yaarɩ da yarpɛ yarpɛ kuni fusɩrpɛf mʋ. Bɩna yam kʋntʋ ni na diə, mʋ ba zwabaniə kam wʋ́ yagɩ. Ba maa wʋ́ yagɩ lwarɩm kənə, yɩ Wɛ yagɩ ba tɩtʋŋ-lwaannʋ DƖ cɛ-ba, sɩ nɔɔna taa tɔgɩ cwə-laarʋ. Wɛ nijoŋnǝ bam vɩɩra yam dɩ maama laan wʋ́ kɩ. Ba maa wʋ́ joori ba pɔɔrɩ Wɛ digə kam ba pa‑DƖ.
25 Nan lwarɩ lanyɩranɩ nɩ: kʋ zɩgɩ maŋa kalʋ ba na wʋ́ pa ni sɩ nɔɔna joori ba fɔgɩ ba lɔ Zeruzalɛm tɩʋ tɩn, sɩ kʋ vu kʋ yi Wɛ na tʋŋɩ dam tu wʋlʋ na wʋ́ ba tɩn, da yarpɛ yarpɛ kuni bɩrpɛ mʋ wʋ́ kɛ. Da yarpɛ yarpɛ kuni fusɩrdʋ-yale dɩ wʋ́ kɛ ya wǝli da. Maŋa kam kʋntʋ nɩ, baá fɔgɩ ba kwɛ Zeruzalɛm cwe sɩm, yɩ ba daarɩ ba kʋ goŋo ba kaagɩ tɩʋ kʋm maama. Kʋ nan lagɩ kʋ taa yɩ cam maŋa mʋ. 26 Da yarpɛ kuni fusɩrdʋ-yale maŋa kam na kɛ, baá vanɩ Wɛ na tʋŋɩ wʋlʋ tɩn o bʋra mʋ, yɩ ba gʋ-o ba daarɩ‑o bwəri. Pa-dɩdɛɛrʋ wʋdoŋ maa wʋ́ ba dɩ o kɔgɔ, pa ba cɔgɩ tɩʋ kʋm dɩdaanɩ Wɛ digə kam maama. Tɩ lagɩ tɩ cɔgɩ tɩ ti lɩla nɩ na na coori wǝǝnu pa tɩ cɔgɩ te tɩn mʋ. Najara dɩ lɛɛrʋ wʋ́ taa wʋra sɩ kʋ yi kweelim maŋa, nɩ Wɛ wʋbʋŋa na jaanɩ sɩ kʋ kɩ te tɩn. 27 Pa-dɩdɛɛrʋ wʋm kʋntʋ wʋ́ kwe da yarpɛg mʋ sɩ o dɩ nɔɔna zanzan fɔgɩ ba kɩ ni-mɔrɔ daanɩ. Kʋ nan na maŋɩ dɩ da yarpɛ yam cicoro, oó cɩ sɩ ba yɩ kɩ kaanɩm dɩ wʋdiu pɛɛra ba pa Wɛ. Ba laan maa wʋ́ kwe wo-zɔɔnɩ dɩlʋ na cɔgɩ Wɛ yɩrɩ tɩn ba zʋ Wɛ digə kam wʋnɩ ba zɩgɩ da jaja.h Kʋ dɩ maa wʋ́ taa wʋra taan, sɩ kʋ yi maŋa kalʋ na maŋɩ sɩ ba cɔgɩ cɔgɩnʋ wʋm tɩtɩ tɩn, nɩ Wɛ wʋbʋŋa na jaanɩ sɩ kʋ kɩ te tɩn.»