Daniyɛlɩ nɛ pi-bɩa dɩdaanɩ bʋbɔlɔ vɩɩra
8
Pɛ Bɛlesaza paarɩ dim bɩna yatɔ maŋa nɩ mʋ amʋ Daniyɛlɩ daa nɛ vɩɩra yadonnə na saŋɩ pulim vɩɩra yam kwaga nɩ tɩn. 2 A vɩɩra yam wʋnɩ, a nɛ nɩ a wʋ Suzi tʋ-fɔrɔ kʋm nɩ.a Elam provɛnsɩ dɩm nɩ mʋ kʋntʋ. Kʋ kɩ nɩ a ve a zɩgɩ mɛ na bwələ dɩ Yulayi bugə kam tɩn mʋ. 3 Amʋ na kwǝni a yuu sɩ a nii tɩn, a nɛ pi-bɩa mʋ na zɩgɩ bugə kam ni nɩ dɩ ka yuu nyɩa yale na dwara. Nyɩŋa dɩdʋa maa dwara ka dwe kadoŋ kam yɩ ka saŋɩ kadoŋ kam ka nuŋi. 4 Pi-bɩa kam ma yɔɔrɩ wa-zʋʋrɩ seeni, dɩ jagwiə seeni, dɩ jazɩm seeni ka duri dɩ dam ka cu vara babam bam maama. Ba wʋlʋwʋlʋ maa warɩ pi-bɩa kam yigə sɩ o cɩ. Nɔɔn-nɔɔnʋ tǝrǝ o na waɩ o joŋi nɔɔna o yaga ka jɩŋa nɩ. Ka yɔɔrɩ ka kɩ ka na lagɩ te maama tɩn mʋ, pa ka brɩ ka tɩtɩ kamunni.5 A ta na zɩgɩ a maanɩ kǝm dɩm tɩn, mʋ a nɛ bʋbɔlɔ dɩ na ba kʋ nuŋi wa-zʋʋrɩ seeni kʋ bɩɩna. Kʋ yɔɔrɩ kʋ duri dɩ baarɩ mʋ. Kʋ vəŋə dɩm kɩ nɩ ka nɛ sɩm ba yi sɩ dwe tɩga mʋ. Bʋbɔlɔ kʋm maa jɩgɩ nyɩŋa dɩdʋa na dana yɩ kʋ jǝni bʋbɔlɔ kʋm yiǝ yam tɩtarɩ nɩ. 6 Bʋbɔlɔ kʋm ma vu kʋ jeeri pi-bɩa kam a ya na nɛ bugə kam ni nɩ tɩn. Ka yɔɔrɩ pi-bɩa kam mʋ dɩ ban-lʋm, dɩdaanɩ ka dam maama. 7 A nɛ wɩ bʋbɔlɔ kʋm banɩ dɩm tiini dɩ zaŋɩ zanzan. Ka ma yɔɔrɩ ka dʋlɩ pi-bɩa kam ka dɩ tɩga nɩ, pa ka nyɩa yale yam bwəri. Ka ta ma nɔnɩ pi-bɩa kam pa kʋ tiini kʋ zʋ ka yɩra. Pi-bɩa kam ma warɩ ka tɩtɩ sɩ ka joŋi ka yagɩ, yɩ nɔɔn-nɔɔnʋ dɩ warɩ-ka sɩ o joŋi o yagɩ.
8 Amʋ ta nɛ nɩ bʋbɔlɔ kʋm laan tiini kʋ brɩ kʋ tɩtɩ kamunni. Maŋa kalʋ kʋ dam dɩm na tiini dɩ gaalɩ kʋntʋ tɩn, mʋ kʋ nyɩŋa kam bwəri. Nyɩ sɩna na dana tɩn ma ləri nyɩŋa kam kʋntʋ yuu nɩ sɩ nuŋi. Sɩ dɩdʋa dɩdʋa ma jeeri tɩga baŋa sapala yana yam.
9 Nyɩŋ-balaŋa dɩ daa ma zɩgɩ nyɩ sɩna sɩm dɩdʋa yɩra nɩ ka nuŋi. Nyɩŋa kam kʋntʋ ma tiini ka ji kamunu. Ka dam dɩm ve dɩ yi jagwiə seeni mʋ, dɩdaanɩ wa-puli seeni. Dɩ ta ma vu dɩ yi tɩ-ŋʋŋa kam tɩtɩ. 10 Nyɩŋa kam dam dɩm yɔɔrɩ dɩ gaalɩ mʋ dɩ vu dɩ yi wɛyuu kʋm seeni pa ka zaŋɩ najara dɩ wɛyuu kɔgɔ kʋm jar-kərə. Ka dɛɛn ma wanɩ bantʋ badonnǝ, dɩ calɩcwɩ sɩdonnǝ ka dʋlɩ ka dɩ tɩga nɩ, yɩ ka daarɩ ka nɔnɩ ba baŋa nɩ. 11 Ka ma brɩ ka tɩtɩ kamunni ka dwǝni dɩ wɛyuu kɔgɔ kʋm Yuutu wʋm tɩtɩ. Ka ma cɩ dɛ maama kaanɩm kǝm dɩm, yɩ ka daarɩ ka pa Wɛ digə kam cɔgɩ. 12 Wɛ nɔɔna bam maa wʋ ka jɩŋa nɩ pa Wɛ kaanɩm daa tǝrǝ dɛ dɩ dɛ wʋnɩ, ba na nuŋi Wɛ kwaga nɩ tɩn ŋwaanɩ. Ka ma kwɩɩlɩ cɩga yɩ ka daarɩ ka kɩ te maama ka na lagɩ tɩn.
13 Amʋ laan ma ni malɛka dɩdʋa na ŋɔɔnɩ dɩdaanɩ ka doŋ te tɩn. Wʋdoŋ kam ma bwe ka wɩ: «Kʋʋ́ kwe maŋa tɩta mʋ sɩ wǝǝnu tɩntʋ maama na lɩ tɩ brɩ tɩn kɩ tɩ ti? Kʋʋ́ kwe maŋa tɩta mʋ sɩ wo-zɔɔnɩ dɩntʋ ləri dɛ maama wʋnɩ kaanɩm dɩm? Kʋʋ́ kwe maŋa tɩta mʋ sɩ ba nɔnɩ wɛyuu kɔgɔ kʋm dɩ Wɛ diga kam baŋa nɩ ba ti?» 14 Malɛka kam ma ləri ka wɩ: «Da mʋrrʋ tɩle dɩ biə-yatɔ (2,300) mʋ wʋ́ kɛ, dɩdaan-ni maŋa dɩ tɩtɩɩtɩ maama wʋnɩ, sɩ ba laan wanɩ ba fɔgɩ ba kwɛ Wɛ diga kam pa ka taa yɩ lanyɩranɩ.»
Ba tagɩ vɩɩra yam kuri na yɩ te tɩn
15 Amʋ Daniyɛlɩ na nɛ vɩɩra yam tɩn mʋ a kwaanɩ sɩ a lwarɩ ya kuri. Wʋlʋ na nyɩ dɩ nabiinu tɩn laan ma da o nuŋi o zɩgɩ a yigə nɩ. 16 A daa ta ma ni nabiinu kwǝrǝ na nuŋi Yulayi bugə kam ni nɩ ka ta wɩ: «Gabrɩyɛlɩ, pa nɔɔnʋ wʋntʋ lwarɩ vɩɩra yalʋ o na nɛ tɩn kuri.»b
17 Gabrɩyɛlɩ ma ba o zɩgɩ amʋ tee nɩ. Fʋʋnɩ ma tiini dɩ ja-nɩ yɩ a tʋ a vin a yibiyə tɩga nɩ. O ma ta dɩ amʋ o wɩ: «Nabiinu bu, lwarɩ lanyɩranɩ nɩ vɩɩra yantʋ wʋra kweelim maŋa kam ŋwaanɩ mʋ.»
18 O ta wʋra o ŋɔɔnɩ dɩ amʋ mʋ yɩ a dɔ a bəri. A yibiyə ta ma vin tɩga nɩ. Gabrɩyɛlɩ ma dwe a yɩra, yɩ o gɔ-nɩ wɛɛnɩ pa a zaŋɩ a zɩgɩ a nɛ baŋa nɩ. 19 O ma ta o wɩ:
«A lagɩ a pa n lwarɩ Wɛ banɩ na wʋ́ ba dɩ zaŋɩ sɩ kʋ taa yɩ te kwaga nɩ tɩn mʋ. Bɛŋwaanɩ, vɩɩra yam n na nɛ tɩn lagɩ ya kɩ kweelim maŋa nɩ mʋ. 20 Pi-bɩa kam nmʋ na nɛ dɩ ka nyɩa yale tɩn zɩgɩ ka paɩ Mɛdɩ tɩʋ kʋm, dɩ Pɛrsɩ tɩʋ kʋm pwa mʋ. 21 Bʋbɔlɔ kʋm n na nɛ tɩn, zɩgɩ ka paɩ Grɛkɩ tɩʋ kʋm mʋ. Nyɩŋa kalʋ na dana yɩ ka wʋ bʋbɔlɔ kʋm yiǝ yam tɩtarɩ nɩ tɩn, maa zɩgɩ ka paɩ tɩʋ kʋm kʋntʋ dayigə pɛ wʋm. 22 Nyɩŋa kam kʋntʋ na bwəri te tɩn brɩ nɩ Grɛkɩ tɩʋ paarɩ dɩm wʋ́ pɔɔrɩ kuni bɩna sɩ pwa bana mʋ taa jɩgɩ-ya ba di. Bantʋ paarɩ tɩɩnɩ yam nan bá taa dana nɩ dayigə pɛ wʋm paarɩ dɩm na yɩ te tɩn.
23 Pwa bam kʋntʋ paarɩ dim na gɛ fɩɩn sɩ dɩ ti yɩ ba lwarɩm kikiǝ na puli ya su, pɛ wʋlʋ kǝm na cana yɩ o jɩgɩ niə yale tɩn wʋ́ ba. 24 Wʋntʋ wʋ́ taa tiini o dana, yɩ kʋ nan bá taa yɩ o tɩtɩ dam mʋ o jɩga. O ta wʋ́ tiini o cɔgɩ wǝǝnu zanzan, pa o na yigə-vəŋə dɩ kʋlʋ maama o na jɩgɩ o kɩ tɩn. O nan ta wʋ́ wanɩ babɛ dɩdaanɩ Wɛ tɩtɩ nɔɔna bam o cɔgɩ. 25 Pɛ wʋm kʋntʋ wʋ́ kɩ swan pa vwan taa daga zanzan o tee nɩ. Oó brɩ o tɩtɩ kamunni, yɩ o da o cɔgɩ nɔɔna zanzan. O ta wʋ́ dwǝni dɩ Pɛ wʋlʋ na dwe pwa maama tɩn. O nan wʋ́ na cɔgɩm, yɩ kʋ daɩ nabiinu dam ŋwaanɩ.
26 Vɩɩra yalʋ na ta dɩdaan-ni maŋa kaanɩm, dɩ tɩtɩɩtɩ maŋa kaanɩm taanɩ tɩn sɩɩnɩ ya yɩ cɩga mʋ. Kʋ nan wʋ́ daanɩ zanzan sɩ wǝǝnu tɩntʋ maama laan kɩ. Kʋntʋ ŋwaanɩ, səgi vɩɩra yam, sɩ nɔɔn-nɔɔnʋ yɩ ni ya ŋwa.»
27 Amʋ Daniyɛlɩ dɛɛn tiini a bwəni mʋ dɩ a na nɛ wǝǝnu tɩlʋ maama tɩn, pa a ba jɩgɩ yazurə da zanzan wʋnɩ. Kʋ kwaga nɩ mʋ a zaŋɩ wɛɛnɩ a daa vu a tʋŋɩ tɩtʋŋa yalʋ pɛ wʋm na pɛ-nɩ sɩ a kɩ tɩn. A na nɛ vɩɩra yalʋ tɩn tiini ya daanɩ-nɩ zanzan, a na wʋ wanɩ sɩ a lwarɩ ya kuri tɩn ŋwaanɩ.