Baŋa-Wɛ na lɩ wǝǝnu tɩlʋ DƖ brɩ Daniyɛlɩ tɩn
Daniyɛlɩ dwɛ o na jurru tɩna
7
Pɛ Bɛlesaza pulim bɩnɩ dɩm o na di Babilɔnɩ tɩʋ paarɩ tɩn wʋnɩ, mʋ Daniyɛlɩ pəni o sara nɩ o dwɛ. O ta ma na vɩɩra, yɩ o pʋpʋnɩ ya maama o tiŋi.a2 Daniyɛlɩ ma ta o wɩ:
«A na tigi a dɔa tɩtɩɩ dɩdoŋ nɩ tɩn, mʋ a dɛɛn nɛ vɩɩra nɩ vu-dɩʋ tiini kʋ zaŋɩ je maama nɩ kʋ dʋlɩ na-fara na bam kʋ pɔgɩlɩ-ba. 3 Jurru kamunnu tɩna ma zɩgɩ na bam wʋnɩ tɩ nuŋi pooni nɩ. Juru maama nan yɔɔrɩ kʋ yɩ kʋ yɩra mʋ dɩdaanɩ tɩdonnǝ tɩm.
4 Pulim varɩm wʋm nyɩ nɩ nyoŋo mʋ, yɩ kʋ jɩgɩ kaloŋ-zɔŋɔ vwana. Amʋ na zɩgɩ a Nii-kʋ maŋa kalʋ tɩn, mʋ kʋ vwana yam gwəri ya tʋ. Ba laan ma ja varɩm wʋm ba pa kʋ zɩgɩ kʋ nɛ sɩle baŋa nɩ, nɩ nabiinu zɩga na yɩ te tɩn. Ba ma daarɩ ba kwe nabiinu wʋbʋŋa ba kɩ kʋ yuu nɩ.
5 A ma nii a na varɩm bɩle tu wʋm na nyɩ dɩ faab na yɩ te tɩn. Kʋ dɛɛn goori kʋ zɩga kʋ saŋa dɩdʋa baŋa nɩ mʋ. Kʋ maa jɩgɩ saŋa-kwi sɩtɔ yɩ sɩ garɩ kʋ ni nɩ. Ba ma pa-kʋ ni ba wɩ: ‹Nan zaŋɩ n dʋnɩ nwana zanzan nɩ n na lagɩ te tɩn.›
6 A ta na wʋra a nii tɩn, a ma na varɩm bɩtɔ tu wʋm na nyɩ dɩ gweeru na yɩ te tɩn. Kʋ maa jɩgɩ vwana yana kʋ kwaga kam nɩ, nɩ zuŋə vwana yɩ te tɩn. Kʋ ta maa jɩgɩ yum tɩna. Ba ma kwe paarɩ dam ba pa-kʋ sɩ kʋ taa jɩgɩ kʋ di.c
7 Tɩtɩɩ dɩm kʋntʋ nɩ a na nɛ vɩɩra yam kʋntʋ tɩn, mʋ a ta nɛ varɩm bɩna tu wʋm kʋ dɩ na nuŋi. Kʋntʋ kǝm yɔɔrɩ dɩ tiini dɩ camma mʋ yɩ kʋ dam gaalɩ pa kʋ jɩgɩ fʋʋnɩ zanzan. Kʋ ta jɩgɩ yəli kamunə na yɩ luuru tɩn mʋ, yɩ kʋ jɩgɩ-ya kʋ yarɩ wǝǝnu kʋ dʋna. Kʋ maa nɔnɩ tɩlʋ maama na daarɩ tɩn. Varɩm wʋm kʋntʋ dɛɛn yɩ kʋ yɩra dɩ tɩdonnǝ tɩm mʋ, bɛŋwaanɩ, kʋ jɩgɩ nyɩa fugə mʋ kʋ yuu nɩ.
8 Amʋ na zɩgɩ da yɩ a nii nyɩa yam tɩn, mʋ a nɛ nyɩŋ-balaŋa kadoŋ na tagɩ ka nuŋi ka wʋ ya tɩtarɩ nɩ. Nyɩ sɩdonnǝ sɩm sɩtɔ ma gɔ sɩ kuri dɩm seeni, sɩ kantʋ ləri ka zɩgɩ sɩntʋ ya na wʋ mɛ tɩn. Nyɩŋa kam kʋntʋ dɛɛn jɩgɩ yiǝ mʋ na nyɩ dɩ nabiinu yiǝ, yɩ ka ta jɩgɩ ni sɩ ka taa ma ka ŋɔɔnɩ kamun-ŋwɛ taanɩ.
9 A dɛɛn ta na zɩgɩ a nii tɩn, mʋ a nɛ tɩntʋ:
Ba ma kwe paarɩ yitunnu ba zɩgɩ,
yɩ wʋlʋ na maŋɩ o wʋra
faŋa faŋa tɩn ma vu o jǝni
o yituŋu baŋa nɩ.
ɡwaarʋ tɩlʋ o dɛɛn na zʋ tɩn
tiini tɩ pɩɩrɩ mʋ ca.
O yuuywe dɩ maa pɩɩrɩ
nɩ lɔŋɔ na yɩ te tɩn.
O yituŋu kʋm maama dɛɛn yɩ mim yɩranɩ mʋ.
Kʋ nɛ sɩm dɩ maa jɩgɩ wo-gugullu,
yɩ tɩ dɩ jaanɩ mim.
10 Mim-bu-tʋla maa tigi o yigə nɩ ka soe.
Nɔɔna mʋrrʋ zanzan maa zɩgɩ
sɩ ba kɩ o na lagɩ te tɩn.
Kɔgɔ kuni mʋrrʋ fugə laŋa nɩ
dɩ maa wʋ o yigə nɩ.
Sarɩya maŋa kam
dɛɛn ma yi,
yɩ ba laan puri twannʋ sɩ ba nii.d
11 Amʋ dɛɛn ta zɩgɩ a nii mʋ, nyɩŋ-balaŋa kam ta na kaagɩ ka ŋɔɔnɩ kamun-ŋwɛ taanɩ tɩn ŋwaanɩ. A na zɩgɩ a nii kʋntʋ tɩn, mʋ ba jaanɩ varɩm bɩna tu wʋm ba gʋ, yɩ ba daarɩ ba dʋlɩ o yɩra yam ba yagɩ mim wʋnɩ sɩ ya cɔgɩ. 12 Ba dɛɛn nan joŋi vara batɔ badonnə bam dam dɩm mʋ ba daarɩ-ba. Dɩ kʋ dɩ, ba pɛ-ba cwǝŋǝ sɩ ba ta taa wʋ ŋwɩa wʋnɩ sɩ ba maŋa kam ba yi.
13 Amʋ ta na nɛ kʋlʋ tɩtɩɩ dɩm vɩɩra yam wʋnɩ tɩn mʋ tɩntʋ:
A nii a na nɔɔnʋ na nyɩ
nɩ nabiinu bu tɩn.
O tɔgɩ dɩ wɛyuu kunkwǝǝnu tɩm mʋ o ve o bɩɩnɩ.
O ma vu o yi wʋlʋ na maŋɩ
o wʋra faŋa faŋa tɩn te,
yɩ ba ja-o ba vu ba zɩgɩ
wʋntʋ yigə nɩ.
14 Ba ma kwe dam, dɩ paarɩ-zulǝ, dɩ paarɩ ba pa‑o,
sɩ nɔɔna maama sɛ ba pa‑o,
ba na nuŋi dwi dɩlʋ maama nɩ,
dɩ tɩʋ kʋlʋ maama nɩ,
yɩ ba na ŋɔɔnɩ taanɩ dɩlʋ maama dɩ.
O maa jɩgɩ dam sɩ o taa te nɔɔna maŋa dɩ maŋa.
O paarɩ dɩm maa wʋ́ taa wʋra taa
dɩ daa bá cɔgɩ!»e
Daniyɛlɩ vɩɩra yam kuri na yɩ te tɩn
15 «Amʋ Daniyɛlɩ na nɛ vɩɩra yalʋ tɩn yɔɔrɩ ya sʋ-nɩ mʋ, pa a wʋbʋŋa vugimi. 16 Amʋ ma fʋfɔ a yi balʋ na gilimi ba zɩgɩ da tɩn wʋnɩ dɩdʋa yɩ a bwe‑o sɩ a lwarɩ kǝm dɩm kʋntʋ maama kuri cɩga cɩga. O dɩ ma tʋlɩ wǝǝnu tɩm maama kuri o brɩ-nɩ, 17 yɩ o wɩ: ‹Varɩ-kamunə bana bam maama zɩgɩ ba paɩ pwa bana mʋ dɩ ba na wʋ́ di paarɩ tɩga baŋa nɩ te tɩn. 18 Kʋ nan na yɩ Yuutu Wɛ dɩm nɔn-ŋʋna tɩm, bantʋ wʋ́ joŋi o paarɩ dɩm ba taa te sɩ kʋ taa ve maŋa kalʋ na ba ti tɩn.›
19 Amʋ nan yɔɔrɩ a lagɩ sɩ a fɔgɩ a lwarɩ varɩm bɩna tu wʋm laŋa kam mʋ cɩga cɩga, wʋntʋ na yɩ o yɩra dɩ babam bam tɩn ŋwaanɩ. O tiini o jɩgɩ fʋʋnɩ mʋ. O yələ yɩ luuru. O jafwɩ sɩm dɩ maa yɩ canna. O maa yarɩ woŋo maama o dʋnɩ o cɔga, Kʋ daarɩ o jɩgɩ o nɛ o nɔnɩ wǝǝnu tɩlʋ ta na daarɩ tɩn. 20 A ta lagɩ sɩ a lwarɩ varɩm wʋm yuu nyɩa fugə kam kuri, dɩdaanɩ nyɩŋa kalʋ na saŋɩ ya kwaga ka ba tɩn kuri dɩ na yɩ te tɩn mʋ. Kantʋ kam pɛ nyɩa yadonnə yam yatɔ gɔ sɩ kuri dɩm seeni, sɩ kantʋ ləri ka zɩgɩ ya je sɩm nɩ. Nyɩŋ-balaŋa kam kʋntʋ dɛɛn jɩgɩ yiǝ mʋ, yɩ ka ta jɩgɩ ni ka tiini ka ŋɔɔnɩ kamun-ŋwɛ taanɩ. Ka maa nyɩ dɩ ka jɩgɩ dam ka dwe nyɩa yadonnə yam. 21 A na zɩgɩ a nii tɩn mʋ a nɛ nyɩŋ-balaŋa kam na puli sɩ ka zaŋɩ najara dɩ Wɛ nɔɔna bam, yɩ ka wanɩ-ba. 22 Wʋlʋ na maŋɩ o wʋra faŋa faŋa tɩn mʋ laan tu o bʋrɩ bʋra o pa Yuutu Wɛ dɩm nɔɔna bam, yɩ maŋa laan yi ka pa-ba sɩ ba joŋi paarɩ dɩm ba taa jɩgɩ ba di.
23 Nɔɔnʋ wʋm ma ta o brɩ nɩ o wɩ kʋ kuri dɩm mʋ tɩntʋ: ‹Varɩm bɩna tu wʋm brɩ nɩ tɩʋ wʋ́ saŋɩ kʋ kɩ tɩna kʋ ba kʋ taa wʋ lʋgʋ baŋa nɩ. Paarɩ dɩm kʋntʋ nan wʋ́ taa yɩ dɩ yɩra dɩ paara yadonnə yam. Dɩntʋ dɩm lagɩ dɩ yarɩ tɩga kam baŋa maama mʋ kʋ dʋnɩ kʋ cɔgɩ, yɩ Kʋ daarɩ kʋ nɔnɩ wǝǝnu maama kʋ sɩn tɩga nɩ. 24 Nyɩa fugə yam nan zɩgɩ ya paɩ pwa fugə mʋ na wʋ́ nuŋi paarɩ dɩm kʋntʋ wʋnɩ. Pwa bam kʋntʋ kwaga nɩ, pɛ wʋdoŋ dɩ wʋ́ ba, o na yɩ o yɩra dɩ pwa badonnǝ bam. Oó di dam pwa batɔ bam baŋa nɩ. 25 Pɛ wʋm kʋntʋ wʋ́ ŋɔɔnɩ kamun-ŋwɛ taanɩ o ma o lwɛ Yuutu Wɛ dɩm, yɩ o daarɩ o bɛɛsɩ Wɛ tɩtɩ nɔɔna bam. O ta wʋ́ kwaanɩ sɩ o ləni candi dim da yam sɩ o daarɩ o pipiri Wɛ niə yam dɩ. Wɛ nɔɔna bam wʋ́ taa wʋ o dam kuri nɩ, maŋa kadoŋ laŋa nɩ, dɩ maŋa kuni bɩle laŋa nɩ, kʋ wǝli dɩ maŋa cicoro laŋa nɩ.f
26 Maŋa laan wʋ́ yi sɩ ba di pɛ wʋm kʋntʋ taanɩ, yɩ ba daarɩ ba lɩ o paarɩ dɩm dam maama ba cɔgɩ-dɩ sɩ dɩ ti fasɩ. 27 Ba laan maa wʋ́ kwe tɩɩnɩ dɩlʋ maama na wʋ tɩga kam baŋa nɩ tɩn paarɩ, dɩdaanɩ dɩ dam, dɩ dɩ kamunni maama ba pa nɔn-ŋʋna bam na yɩ Yuutu Wɛ dɩm nɔɔna bam tɩn. Bantʋ dɩ maa wʋ́ di paarɩ maŋa maama. Tɩɩnɩ maama wʋ́ sɛ ba pa-ba yɩ ba daarɩ ba taa tɔgɩ ba ni.›
28 Tɔ, mʋ a na nɛ kʋlʋ tɩn maama. Kʋ na yɩ amʋ Daniyɛlɩ, a wʋbʋŋa dɛɛn daanɩ-nɩ zanzan, yɩ a yibiyə dɩ da ka ləni. Dɩ kʋ dɩ, a wanɩ a tɩtɩ a ja dɩ vɩɩra yam, sɩ ya taa wʋ a wʋbʋŋa nɩ.»