Ba dɩ Daniyɛlɩ nywəənu bɔɔnɩ wʋnɩ
6
Pɛ Dariusi wʋbʋŋa dɛɛn jaanɩ sɩ o pɔɔrɩ o paarɩ laŋa kam sɩ ka taa yɩ provɛnsa bi dɩ fiinle mʋ. O ma kwe dɩdɛɛrʋ o yagɩ provɛnsɩ maama wʋnɩ sɩ kʋ tu taa nii je sɩm kʋntʋ o pa‑o. 2 Pɛ wʋm na lagɩ sɩ woŋo maama kwe cwǝŋǝ lanyɩranɩ tɩ pa‑o tɩn ŋwaanɩ, o dɛɛn kuri nɔn-kamunə batɔ mʋ sɩ ba taa nii dɩdɛɛra bi dɩ fiinle bam maama baŋa nɩ. Daniyɛlɩ dɛɛn maa wʋ nɔɔna batɔ bam kʋntʋ wʋnɩ. 3 Daniyɛlɩ nan sɩɩnɩ yiǝ lanyɩranɩ mʋ dɩ o tɩtʋŋa. O wʋbʋŋa na yɔɔrɩ ya dana tɩn ŋwaanɩ, o tɩtʋŋa dɛɛn maa lana ya dwe nɔn-kamunə dɩ dɩdɛɛra bam maama na tʋŋɩ te tɩn. Kʋntʋ ŋwaanɩ, pɛ wʋm bʋŋɩ sɩ o kwe tɩʋ kʋm maama o pa Daniyɛlɩ sɩ o taa nii kʋ baŋa nɩ o pa‑o. 4 Nɔn-kamunə bam dɩ dɩdɛɛra bam maama ma kaagɩ ba beeri tusim dɩlʋ Daniyɛlɩ na wʋ́ kɩ o tɩtʋŋa yam wʋnɩ tɩn. Dɩ kʋ maama dɩ, ba wʋ nɛ woŋo kʋlʋ ba na wʋ́ tɔgɩ kʋ baŋa nɩ sɩ ba bwɛ‑o pɛ wʋm yigə nɩ tɩn. Bɛŋwaanɩ, Daniyɛlɩ dɛɛn yɔɔrɩ o tɔgɩ cwǝŋǝ mʋ dɩ tɩtʋŋa yalʋ maama o na kɩ o pa pɛ wʋm tɩn yɩ kəm-balwaarʋ tǝrǝ. 5 Ba ma bwɛ da-tee nɩ ba wɩ: «Dɩ́ na beeri cwǝŋǝ sɩ Daniyɛlɩ tɔgɩ da o cɔgɩ yɩ dɩ́ bwɛ‑o pɛ wʋm yigə nɩ, dɩ́ bá na-ka kʋlʋkʋlʋ baŋa nɩ, kʋ na daɩ o Wɛ cwǝŋǝ tɔgɩm seeni.»6 Ba ma zaŋɩ dɩ ba bʋbʋŋɩ dɩm kʋntʋ ba yi pɛ wʋm te yɩ ba ta dɩd-o ba wɩ: «Pɛ Dariusi, Wɛ wʋ́ pa‑m mʋmwɛ-dɛɛrɩ. 7 Dɩbam balʋ maama na yɩ n tɩʋ kʋm nɔn-kamunə, dɩ yigǝ tiinǝ, dɩ dɩdɛɛra balʋ na nii nmʋ tɩʋ kʋm tɩɩnɩ yam maama tɩn, dɩ n yi-pʋrɩ-nyɩna, dɩ n nakwa bam maama mʋ jɩgɩ ni-mɔrɔ nɩ nmʋ pa ni yi n paarɩ laŋa kam ni maama sɩ nɔɔnʋ maama yɔɔrɩ o tɔgɩ-dɩ. Nmʋ ni dɩm kʋntʋ wʋ́ brɩ nɩ da fiintɔ laŋa nɩ, nɔɔn-nɔɔnʋ ba jɩgɩ cwǝŋǝ sɩ o loori woŋo Wɛ naa nabiinu wʋlʋ dɩ wʋlʋ tee nɩ yɩ o wʋ loori-kʋ nmʋ yɩranɩ tee nɩ. Dɩ́ ta sɛ nɩ wʋlʋ nan na vɩn n ni dɩm kʋntʋ, sɩ ba dʋlɩ kʋ tu ba dɩ nywəənu bɔɔnɩ dɩm wʋnɩ. 8 Pɛ, nan pa ba pʋpʋnɩ ni dɩm kʋntʋ sɩ n daarɩ n zi n jɩŋa tɔnɔ kʋm baŋa nɩ, sɩ dɩ taa tʋŋa, yɩ dɩ ba gɔɩ maŋa dɩ maŋa, nɩ Mɛdɩ tiinə dɩ Pɛrsɩ tiinə niə yam na yɩ te yɩ ya ba lənə tɩn.»a 9 Pɛ wʋm ma sɛ pa ba kɩ ni dɩm tɔnɔ nɩ yɩ o daarɩ o zi o jɩŋa kʋ baŋa nɩ.
10 Daniyɛlɩ na ni nɩ ni dɩm pʋpʋnɩ dɩ tigi tɔnɔ baŋa nɩ tɩn, mʋ o joori o tɩtɩ sɔŋɔ nɩ. O ma din o nayuu digə o pʋrɩ o takoro kʋlʋ ni na jeeri Zeruzalɛm tɩʋ tɩn o yagɩ jaja. O laan maa kuni o nadoonə yɩ o loori Wɛ, nɩ o na yǝni o kɩ te tɩn. Dɛ maama wʋnɩ, Daniyɛlɩ dɛɛn yǝni o kuni nadoonə mʋ o warɩ Wɛ kuni bɩtɔ.b 11 Dɩdɛɛra bam ma kɩ ni daanɩ yɩ ba da ba vu ba jeeri Daniyɛlɩ sɔŋɔ nɩ. Ba ma na nɩ o wʋra o kɩ wɛ-loro mʋ o paɩ o Wɛ dɩm. 12 Ba laan ma vu pɛ wʋm te ba ta o ni dɩm taanɩ dɩd-o ba wɩ: «Pɛ, nmʋ wʋ zi n jɩŋa n pa ni nɩ: da fiintɔ laŋa nɩ cwǝŋǝ tǝrǝ sɩ nɔɔn-nɔɔnʋ loori woŋo Wɛ naa nabiinu wʋlʋ dɩ wʋlʋ tee nɩ, kʋ na daɩ nmʋ yɩranɩ tee nɩ na? Dɩ ta brɩ nɩ wʋlʋ na kɩ o cɔgɩ n ni dɩm, sɩ ba dʋlɩ kʋntʋ tu ba dɩ nywəənu bɔɔnɩ dɩm wʋnɩ. Kʋ daɩ kʋntʋ na?»
Pɛ wʋm dɩ ma ləri o wɩ: «Ɛɛn! Amʋ mʋ sɩɩnɩ a pa ni sɩ kʋ taa yɩ kʋntʋ. Dɩ nan bá gɔ, nɩ Mɛdɩ tiinə dɩ Pɛrsɩ tiinə niə yam na yɩ te yɩ ya ba lənə tɩn.»
13 Nɔɔna bam laan ma ləri pɛ wʋm ba wɩ: «Pɛ, kʋ na yɩ Daniyɛlɩ wʋlʋ ba dɛɛn na jaanɩ ba nuŋi Zuda tɩʋ kʋm nɩ ba ba yo seeni tɩn, wʋntʋ nan wʋ sɛ nmʋ ni dɩm, dɩ n na maŋɩ n pʋpʋnɩ-dɩ tɔnɔ nɩ tɩn dɩ. O ta yǝni o kɩ wɛ-loro mʋ kuni bɩtɔ dɛ maama wʋnɩ.» 14 Pɛ wʋm na ni kʋntʋ tɩn, kʋ ma tiini kʋ daan‑o. O ma kwe dɛ dɩm maama kʋ vu kʋ yi wa-zʋʋrɩ maŋa o kwaanɩ sɩ o beeri cwǝŋǝ o joŋi Daniyɛlɩ o yagɩ.
15 Dɩdɛɛra bam daa ma kɩ daanɩ ba jeeri pɛ tee nɩ yɩ ba ta dɩd-o ba wɩ: «Pɛ, guli nɩ Mɛdɩ tiinə dɩdaanɩ Pɛrsɩ tiinə tee nɩ, pɛ wʋm na zi o jɩŋa o ni dɩm baŋa nɩ, o ni dɩm kʋntʋ bá wanɩ dɩ kwanɩ.»c
16 Pɛ wʋm laan ma pa ni sɩ ba ja Daniyɛlɩ ba vu ba dʋlɩ ba dɩ nywəənu bɔɔnɩ dɩm wʋnɩ. Ba na sɩɩnɩ ba kɩ kʋntʋ tɩn, pɛ wʋm ma ta dɩ Daniyɛlɩ o wɩ: «Wɛ dɩm n na sɩɩnɩ yiǝ n zuli-dɩ maŋa maama tɩn mʋ wʋ́ joŋi‑m dɩ yagɩ.»
17 Ba dɛɛn ma kwe pulɔrɔ-kamunu ba kwǝli bɔɔnɩ dɩm ni. Pɛ wʋm ta ma pa ba tiini ba kwǝni ni dɩm, yɩ o daarɩ o kwe o jafʋlɩ dɩm o zi dɩ baŋa nɩ. O dɩdɛɛra bam dɩ kɩ kʋntʋ ba wǝli da, sɩ nɔɔn-nɔɔnʋ yɩ wanɩ o joŋi Daniyɛlɩ o yagɩ. 18 Tɩtɩɩ dɩm kʋntʋ nɩ, pɛ wʋm na joori sɔŋɔ tɩn, o vɔgɩ ni mʋ, o wʋʋ na tiini kʋ cɔgɩ tɩn ŋwaanɩ. O wʋ sɛ sɩ ba kɩ kwɛɛra ba ma gan‑o, yɩ o warɩ o dɔ tɩtɩɩ dɩm maama wʋnɩ.
19 Tɩga na jɩgɩ ka pʋʋrɩ tɩn, pɛ wʋm goni tɩga mʋ o vu nywəənu bɔɔnɩ dɩm ni. 20 O na fʋfɔ o maa yi da tɩn, mʋ o bəŋi Daniyɛlɩ dɩ liǝ o wɩ: «Daniyɛlɩ, nmʋ wʋlʋ na yɩ Ŋwɩa Tu Wɛ dɩm tɩntʋŋnʋ, yɩ n sɩɩnɩ yiǝ n zuli-DƖ maŋa maama tɩn, n Wɛ dɩm wanɩ dɩ joŋi‑m dɩ yagɩ nywəənu tɩm jɩŋa nɩ na?»
21 Daniyɛlɩ dɩ ma ləri pɛ wʋm o wɩ: «Pɛ, Wɛ wʋ́ pa‑m mʋmwɛ-dɛɛrɩ! 22 Wɛ mʋ tʋŋɩ DƖ malɛka sɩ ka ba ka pu nywəənu tɩm niə. Kʋ maa pa tɩ wʋ kɩ-nɩ zʋnnɩ. Bɛŋwaanɩ, Wɛ ye nɩ amʋ jɩgɩ bʋra DƖ yigə nɩ. A nan wʋ kɩ kʋlʋkʋlʋ a cɔgɩ nmʋ DƖ yigə.»
23 Pɛ wʋm wʋʋ ma tiini kʋ poli dɩ o na ni Daniyɛlɩ kwǝrǝ tɩn. O ma pa ni sɩ ba vaŋ-o ba lɩ nywəənu bɔɔnɩ dɩm wʋnɩ. O na nuŋi pooni tɩn, mʋ ba maanɩ nɩ fufwələ fɩnfɩɩn tɩtɩ dɩ tǝri o yɩra yam nɩ. Bɛŋwaanɩ, Daniyɛlɩ dɛɛn yɔɔrɩ o kɩ o wʋ-dɩdʋa mʋ dɩ Wɛ dɩlʋ o na zuli tɩn.
24 Pɛ wʋm ma pa ni sɩ ba ja nɔɔna balʋ maama dɛɛn na bagɩ Daniyɛlɩ bɩbara o tee nɩ tɩn ba ba. Ba laan ma ja-ba ba dʋlɩ ba dɩ nywəənu bɔɔnɩ dɩm wʋnɩ. Ba ma ja dɩdɛɛra bam kʋntʋ kaana, dɩ ba biə maama ba wǝli da ba dʋlɩ ba dɩ bɔɔnɩ dɩm wʋnɩ. Ba maama ta na wʋ yi bɔɔnɩ dɩm kuri tɩn, mʋ nywəənu tɩm faŋɩ tɩ zi-ba, yɩ tɩ daarɩ tɩ yarɩ ba kwi sɩm maama.
25 Pɛ Dariusi ma pʋpʋnɩ tɔnɔ sɩ kʋ yi balʋ maama na wʋ lʋgʋ baŋa nɩ, ba na maŋɩ ba nuŋi dwi dɩlʋ maama nɩ, dɩ tɩʋ kʋlʋ maama nɩ, yɩ ba na ŋɔɔnɩ taanɩ dɩlʋ maama dɩ wɩ: «Yazurə yɔɔrɩ ka taa wʋ á tee nɩ! 26 Amʋ pɛ ni mʋ wɩ a paarɩ dim je sɩm maama wʋnɩ, nɔɔna maama maŋɩ sɩ ba taa kwarɩ Wɛ dɩlʋ Daniyɛlɩ na zuli tɩn mʋ, sɩ ba daarɩ ba taa nɩgɩ-DƖ.
Bɛŋwaanɩ, dɩ yɩ Ŋwɩa Tu Wɛ dɩm mʋ,
DƖ maa wʋra mʋ maŋa maama!
O paarɩ dim dam dɩm bá je maŋa dɩ maŋa.
O maa wʋ́ taa jɩgɩ dam
sɩ o taa te nɔɔna maŋa maama.
27 Dɩntʋ mʋ joŋi nɔɔna DƖ yaga,
yɩ DƖ ta pa ba na vrɩm.
DƖ yǝni DƖ tʋŋɩ wo-kɩnkagɩla
dɩ wo-kamunnu mʋ,
tɩ na tʋŋɩ wɛyuu kʋm wʋnɩ,
dɩdaanɩ tɩga kam baŋa nɩ tɩn.
DƖ ma vrɩ Daniyɛlɩ nywəənu tɩm jɩŋa nɩ DƖ yagɩ.»
28 Kʋntʋ maama na kɩ tɩn, wǝǝnu kɩ lanyɩranɩ tɩ pa Daniyɛlɩ, maŋa kalʋ maama Dariusi na di paarɩ tɩn, sɩ kʋ yi Pɛrsɩ tu Sirusi dɩ paarɩ dim maŋa.d