Pʋpʋnɩm tu dɩ tigi kəbrə yɩra nɩ
5
Maŋa wʋdoŋ nɩ mʋ, Pɛ Bɛlesaza dɛɛn bəŋi o tɩʋ kʋm dɩdɛɛra mʋrʋ, sɩ ba jeeri ba di wʋdi-fɔrɔ dɩd-o. Pɛ wʋm maa tɔgɩ dɩ ba o nyɔ sana zanzan. 2 Sana bam na tu o yiǝ nɩ tɩn, mʋ Pɛ wʋm pɛ ni sɩ ba kwe səbu-sɩŋa dɩ səbu-poŋo zwɩ sɩlʋ o ko Nebukadnɛtsarɩ dɛɛn na jaanɩ o nuŋi Zeruzalɛm Wɛ diga kam nɩ tɩn ba ba.a Pɛ wʋm ma kuri sɩ o dɩdɛɛra, dɩ o kaana, dɩ o bɔɔla bam kwe-sɩ, sɩ ba nyɔ sana sɩ wʋnɩ. 3 Ba ma vu ba kwe Wɛ diga səbu-sɩŋa zwɩ sɩm Nebukadnɛtsarɩ na jaanɩ o nuŋi Zeruzalɛm tɩʋ nɩ tɩn, ba ba o te. Pɛ wʋm, dɩ o dɩdɛɛra bam, dɩ o kaana dɩ o bɔɔla bam maama ma sɩŋɩ sɩ ba taa nyɔ sana na-zwɩ sɩm kʋntʋ wʋnɩ. 4 Ba jɩgɩ sana bam ba nyɔ kʋntʋ mʋ, yɩ ba daarɩ ba zuli ba wa yalʋ ba na mɛ səbu-sɩŋa, dɩ səbu-poŋo, dɩ canna, dɩ luuru, dɩ dɛ, dɩ kandwa ba ma kɩ-ya tɩn.5 Ba na je da ba di ywəəni pɛ sɔŋɔ kʋm nɩ kʋntʋ tɩn, mʋ nɔɔnʋ jɩŋa da ka ba digə kam kəbrə yɩra nɩ, ka wʋra ka pʋpʋnɩ ka tɩtɩ nɩ. Pɛ wʋm ma yɔɔrɩ o na jɩŋa kam na wʋra ka pʋpʋnɩ tɩn, min-zoŋo mʋ na zɩgɩ da kʋ paɩ pooni tɩn ŋwaanɩ. 6 Bɩdwɩ baŋa nɩ pɛ wʋm ma kʋ dɩ fʋʋnɩ, yɩ o yibiyə da ka ləni. O nadoonə ma puli sɩ ya taa magɩ daanɩ yɩ o yɩra maama da ya tɩ. 7 O ma pa ni sɩ ba bəŋi o sampwəri sɩm, dɩ o liri mwaanʋ tiinə, dɩ o yi-pʋrɩ-nyɩna bam ba pa‑o.
Pɛ wʋm ma ta dɩ ba o wɩ: «Abam wʋlʋ na wanɩ o karɩmɩ pʋpʋnɩm dɩntʋ, yɩ o maŋɩ dɩ kuri o brɩ-nɩ, amʋ wʋ́ pa kʋ tu na zulə lanyɩranɩ yɩ a zʋ-o nɩnwaŋa paarɩ gwaarʋ. A ta wʋ́ kwe səbu-sɩŋa zambili a dɩ o ba nɩ yɩ a daarɩ a pa o ji dɩdɛɛra batɔ tu a tɩʋ kʋm dam seeni.»
8 Pɛ wʋm swan tiinə bam maama dɛɛn ma ba o te, yɩ ba wʋlʋwʋlʋ warɩ pʋpʋnɩm dɩm sɩ o karɩmɩ. Ba maa yǝri dɩ kuri dɩ, sɩ ba ta ba brɩ pɛ wʋm. 9 Kʋ ma pa Pɛ Bɛlesaza wʋbʋŋa maama je, yɩ o yibiyə da ka ləni. O dɩdɛɛra bam dɩ yu-punnu maama ma vugimi.
10 Pɛ nu wʋm ma ni pɛ wʋm dɩ o tɩʋ dɩdɛɛra bam sɔɔ kʋm na zaŋɩ te tɩn. O ma zʋ ba te yɩ o ta dɩ pɛ wʋm o wɩ: «Pɛ, Wɛ wʋ́ pa‑m mʋmwɛ-dɛɛrɩ. Nan yɩ pa n wʋbʋŋa je, naa n yibiyə dɩ ləni. 11 Nɔɔnʋ dɩdʋa wʋ nmʋ paarɩ laŋa kantʋ nɩ, yɩ wa yalʋ na yɩ ya yɩra tɩn joro tɔg-o lanyɩranɩ. Nmʋ ko Nebukadnɛtsarɩ dɛɛn na yɩ pɛ tɩn, o lwarɩ nɩ nɔɔnʋ wʋm kʋntʋ tiini o jɩgɩ yi-pʋrʋ, dɩ yǝno, dɩ swan, nɩ wa yam tɩtɩ swan na yɩ te tɩn. Nmʋ ko ma ja‑o o zɩgɩ o sampwəri, dɩ o liri mwaanʋ tiinə, dɩ o swan tiinə, dɩ o yi-pʋrɩ-nyɩna bam maama yigə nɩ. 12 Nɔɔnʋ wʋm yɩrɩ mʋ yɩ Daniyɛlɩ. Nmʋ ko dɛɛn ma ləni o yɩrɩ sɩ dɩ taa yɩ Bɛlɩtesaza. O jɩgɩ wʋbʋŋa lanyɩranɩ pa o yǝno dɩ o swan gaalɩ. O maa ye sɩ o lwarɩ dɩndwɩa kuri, dɩ dɩndɩ kuri, sɩ o daarɩ o maŋɩ wo-sisəgiru kuri jaja. Nan tʋŋɩ sɩ ba bǝŋ-o sɩ o ba yo seeni, sɩ oó wanɩ o maŋɩ kǝm dɩntʋ kuri maama o brɩ-m.»
13 Ba ma sɩɩnɩ ba ja Daniyɛlɩ ba ba pɛ wʋm te. Pɛ wʋm ma bwe‑o o wɩ: «Nmʋ mʋ sɩɩnɩ n yɩ Daniyɛlɩ wʋlʋ amʋ ko Nebukadnɛtsarɩ dɛɛn na kalɩ o wǝli da o ja o nuŋi Zuda tɩʋ nɩ o ba yo tɩn na? 14 Amʋ ni nɩ dɩ́ wa yam joro mʋ tɔgɩ-m lanyɩranɩ pa n jɩgɩ yi-pʋrʋ, dɩ yǝno, dɩ swan zanzan. 15 Amʋ nan ya tagɩ a tɩʋ swan tiinə dɩ sampwəri sɩm sɩ ba karɩmɩ pʋpʋnɩm dɩntʋ, ba daarɩ ba ta dɩ kuri ba brɩ-nɩ. Ba wʋlʋwʋlʋ nan warɩ pʋpʋnɩm dɩm kuri sɩ o ta o brɩ-nɩ. 16 A nan ni nɩ nmʋ waɩ n lwarɩ wǝǝnu tɩlʋ na səgi tɩn kuri, n daarɩ n kwɛ wəənu tɩlʋ kwɛɛm na cana tɩn. Nmʋ nan na karɩmɩ pʋpʋnɩm dɩntʋ n brɩ-nɩ, yɩ n daarɩ n ta dɩ kuri, amʋ wʋ́ pa n na zulə lanyɩranɩ yɩ n zʋ nɩnwaŋa paarɩ gwaarʋ mʋ. A ta wʋ́ kwe səbu-sɩŋa zambili a dɩ n ba nɩ yɩ a daarɩ a pa n ji dɩdɛɛra batɔ tu a tɩʋ kʋm dam seeni.»
17 Daniyɛlɩ ma ləri pɛ wʋm o wɩ: «Amʋ wʋ́ sɩɩnɩ a karɩmɩ pʋpʋnɩm dɩm, yɩ a daarɩ a ta dɩ kuri a brɩ-m. Sɩ kʋ na yɩ pɛɛra yalʋ n na bʋŋɩ sɩ n pa-nɩ tɩn, a kɩ nmʋ le ya ŋwaanɩ. Dɩ kʋ dɩ, Pɛ, ta n jɩgɩ-ya, naa n kwe n pa nɔn-gaa. 18 Pɛ, Yuutu Wɛ dɩm dɛɛn kwe paarɩ, dɩ kamunni, dɩ zulə, dɩ nɩnɔŋ-fɔrɔ mʋ o pa nmʋ ko Nebukadnɛtsarɩ. 19 N ko dam dɩm dɛɛn tiini dɩ gaalɩ pa balʋ maama na wʋ lʋgʋ baŋa nɩ, ba na maŋɩ ba nuŋi dwi dɩlʋ maama nɩ, dɩ tɩʋ kʋlʋ maama nɩ, yɩ ba na ŋɔɔnɩ taanɩ dɩlʋ maama tɩn kwar-o zanzan yɩ ba yɩra saɩ. Nmʋ ko dɛɛn na bʋŋɩ sɩ o gʋ wʋlʋ, oó gʋ kʋ tu mwalɩ mʋ. O maa na wɩ wʋlʋ taa ŋwɩ: kʋ tu wʋ́ taa ŋwɩ mʋ. O ta na lagɩ wʋlʋ tɩn, oó zul‑o mʋ, Kʋ daarɩ o na bʋŋɩ sɩ o kɩ wʋlʋ cavɩɩra, kʋ tu wʋ́ sɩɩnɩ o na o cavɩɩra mʋ. 20 O maa na puli sɩ o taa brɩ o tɩtɩ, pa o wʋʋ kɩ dam yɩ o bɛɛsɩ nɔɔna tɩn, mʋ ba joŋi o paarɩ dɩm ba daarɩ‑o, yɩ o nɩnwaŋa maama je. 21 Ba ta ma zǝl-o pa o nuŋi nabiinǝ tɩtarɩ nɩ yɩ o wʋbʋŋa ji nɩ ga-vara wʋbʋŋa. O ma vu o zʋʋrɩ dɩ gaa wʋ bɩnɛ sɩm. Nmʋ ko dɛɛn jɩgɩ gaa o dʋnɩ nɩ na-bɩa na kɩ te tɩn mʋ. Nyɔnɔ dɩ ma tʋ o yɩra nɩ sɩ o laan ba o lwarɩ nɩ Yuutu Wɛ dɩm mʋ jɩgɩ dam nabiinǝ paarɩ maama baŋa nɩ yɩ Dɩntʋ mʋ yǝni DƖ paɩ balʋ DƖ na kuri tɩn di paarɩ.
22 Kʋ daarɩ nmʋ Bɛlesaza, nmʋ yɩ wʋntʋ bu mʋ yɩ n ye wǝǝnu tɩntʋ maama ni nɩ. Dɩ kʋ dɩ, nmʋ wʋ sɛ sɩ n tu n tɩtɩ n kwarɩ Wɛ. 23 Nmʋ nan zǝŋi n tɩtɩ sɩ n dwǝni dɩ Wɛ dɩlʋ na yɩ wɛyuu Tu tɩn mʋ. N ma n pa ba ja Wɛ dɩm kʋntʋ tɩtɩ digə zwɩ sɩm ba ba ba pa‑m. Nmʋ dɩ n dɩdɛɛra, dɩ n kaana, dɩdaanɩ n bɔɔla bam laan ma nyɔ sana sɩ wʋnɩ. Á ma daarɩ á zuli wa yalʋ ba na mɛ səbu-sɩŋa, dɩ səbu-poŋo, dɩ canna, dɩ luuru, dɩ dɛ, dɩ kandwa ba kɩ-ya tɩn. Wa yam kʋntʋ nan ba ni-taanɩ. Ya maa ba naɩ yɩ ya ta ba jɩgɩ wʋbʋŋa. Kʋ nan na yɩ Wɛ dɩlʋ na jɩgɩ dam n ŋwɩa kam baŋa nɩ, yɩ DƖ tiŋi cwe sɩlʋ n na wʋ́ tɔgɩ tɩn, nmʋ vɩn sɩ n zuli Dɩntʋ. 24 Jɩŋa kantʋ nan nuŋi Dɩntʋ tee nɩ mʋ yɩ ka ba ka pʋpʋnɩ bɩtarɩ sɩntʋ kəbrə kam yɩra nɩ. 25 Pʋpʋnɩm dɩm nan na brɩ te tɩn mʋ tɩntʋ:
‹MENE, MENE, TEKƐL, PARASIN›.
26 Pʋpʋnɩm dɩm kuri mʋ tɩntʋ:
‹MENE› kuri mʋ yɩ jeelim: kʋ brɩ nɩ Wɛ jeeli nmʋ paarɩ da yam maama DƖ ja. Ya nan ti.
27 ‹TEKƐL› kuri mʋ yɩ duuni: kʋ brɩ nɩ Wɛ kwe nmʋ mʋ DƖ maŋɩ n duuni. Nmʋ nan wʋ maŋɩ n yi DƖ wʋbʋŋa yam.
28 ‹PARASIN,› kuri mʋ yɩ pɔɔrɩm: kʋ brɩ nɩ Wɛ kwe nmʋ paarɩ laŋa kam DƖ pɔɔrɩ DƖ pa Mɛdɩ tiinə bam dɩdaanɩ Pɛrsɩ tiinə bam mʋ.»b
29 Bɛlesaza na ni kʋntʋ tɩn, o ma pa ni sɩ ba kwe nɩnwaŋa paarɩ gwaarʋ ba zʋ Daniyɛlɩ, sɩ ba daarɩ ba kwe səbu-sɩŋa zambili ba dɩ o ba nɩ. Ba ta ma tɔɔlɩ ba wɩ Daniyɛlɩ laan mʋ yɩ dɩdɛɛrʋ batɔ tu Babilɔnɩ tɩʋ kʋm dam seeni.