Səbu-sɩŋa nyɩnyʋgʋ dɩ min-vʋgʋ kʋm
3
Pɛ Nebukadnɛtsarɩ dɛɛn ma pa ba kwe səbu-sɩŋa ba ma ba mɔ nyɩnyʋgʋ ba zɩgɩ Durǝ bolo kʋm nɩ. Je sɩm kʋntʋ dɩ dɛɛn wʋ Babilɔnɩ provɛnsɩ dɩm wʋnɩ mʋ. Nyɩnyʋgʋ kʋm dɩdwarɩm baŋa dɛɛn yɩ kantɩ maŋɩm kuni fusɩrdʋ mʋ. Kʋ saŋ-kukugə baŋa maa yɩ kantɩ maŋɩm kuni bɩrdʋ. 2 Pɛ wʋm ma tʋŋɩ o bəŋi o tɩʋ kʋm dɩdɛɛra maama, dɩ kʋ yigǝ tiinǝ, dɩ balʋ na yɩ yuutiinə tɩʋ kʋm tɩɩnɩ yam nɩ tɩn, dɩ kʋ nakwa, dɩ kʋ swan tiinə, dɩ yi-pʋrɩ-nyɩna bam, kʋ ta wǝli dɩ balʋ na di nɔɔna taanɩ tɩn, dɩdaanɩ balʋ maama na nii tɩɩnɩ yam baŋa nɩ tɩn sɩ ba ba o te. O dɛɛn bəŋi bantʋ maama sɩ ba ba ba zuli nyɩnyʋgʋ kʋlʋ o na pɛ ba kɩ ba pa‑o tɩn mʋ. 3 Nɔn-kamunə bam kʋntʋ maama dɩ dɩdɛɛra bam maama laan ma jeeri daanɩ ba zɩgɩ səbu-sɩŋa nyɩnyʋgʋ kʋm yigə nɩ sɩ ba zuli-kʋ.4 Kwər-tɔɔlʋ ma bagɩ baŋa baŋa o wɩ: «Abam balʋ na nuŋi dwi maama nɩ, dɩ tɩʋ kʋlʋ maama nɩ, yɩ á ŋɔɔnɩ taanɩ dɩlʋ maama tɩn, fɔgɩ á cəgi-na ni dɩlʋ dɩ́ pɛ wʋm na pɛ tɩn! 5 Á wʋ́ ni nɔɔna na wʋ́ wu nabwaanʋ, dɩ wi, dɩ namunnu. Badonnǝ dɩ maa wʋ́ ta kwaanʋ yɩ badaara dɩ jɩgɩ gullu ba maga. Abam nan na ni sɔɔ kʋntʋ doŋ, sɩ á kɩ lɩla á vin á yibi tɩga nɩ á zuli səbu-sɩŋa nyɩnyʋgʋ kʋm Pɛ Nebukadnɛtsarɩ na cwi tɩn. 6 Wʋlʋ maama nan na vɩn sɩ o tiiri o jɔɔnɩ nyɩnyʋgʋ kʋm, baá ja kʋ tu mʋ ba dʋlɩ ba dɩ goŋo kʋlʋ wʋnɩ min-vʋgʋ na di bilǝm-biləm tɩn nɩ.»
7 Nɔɔna bam na yɔɔrɩ ba ni nabwaanʋ tɩm, dɩ wi sɩm, dɩ kwaanʋ tɩm, dɩ gullu tɩm, dɩ namunnu tɩm kwǝri tɩn mʋ ba maama vin ba yibi sɩm tɩga nɩ. Ba maama ma sɩŋɩ sɩ ba taa jɔɔnɩ nyɩnyʋgʋ kʋm Pɛ Nebukadnɛtsarɩ na kɩ tɩn. Ba na maŋɩ ba yɩ dwi dɩlʋ maama tiinə mʋ, naa ba na ŋɔɔnɩ taanɩ dɩlʋ maama dɩ, ba maama kɩ kʋntʋ mʋ.
8 Babilɔnɩ tɩʋ swan tiinə badonnǝ ma tɔgɩ kǝm dɩm baŋa nɩ ba vu ba ba Zwifǝ tiinə bam bɩbara dɩ pɛ wʋm. 9 Ba dɛɛn ma ta dɩd-o ba wɩ: «Pɛ, Wɛ wʋ́ pa‑m mʋmwɛ-dɛɛrɩ! 10 Nmʋ pɛ ni n wɩ: ‹Nɔɔnʋ maama na ni wi sɩm wum, dɩ kwaanʋ tɩm tam, dɩ sɔɔ dwi maama, sɩ ba maama vin ba yibi tɩga nɩ ba jɔɔnɩ səbu-sɩŋa nyɩnyʋgʋ kʋm. 11 N ni dɩm ta brɩ nɩ wʋlʋ nan na vɩn sɩ o tiiri o jɔɔnɩ nyɩnyʋgʋ kʋm, sɩ ba dʋlɩ kʋ tu ba dɩ min-vʋgʋ wʋnɩ.› 12 Zwifǝ tiinə badonnǝ nan ba nɩgɩ‑m maŋa dɩ maŋa. Bantʋ maa yɩ balʋ nmʋ na kuri yɩ n pa-ba dam sɩ ba taa nii Babilɔnɩ tɩʋ tɩɩnɩ yam maama baŋa nɩ tɩn mʋ. Saderakɩ, dɩ Mesakɩ, dɩ Abɛd-Nego mʋ kʋntʋ. Ba ba zuli nmʋ tɩʋ wa yam. Ba ta ba sɛ sɩ ba tiiri ba zuli nyɩnyʋgʋ kʋm n na kɩ n zɩgɩ tɩn.»
13 Pɛ Nebukadnɛtsarɩ na ni kʋntʋ tɩn, o banɩ ma tiini dɩ zaŋɩ dɩ nɔɔna batɔ bam kʋntʋ. O ma pa ni sɩ ba ja-ba ba ba o te. Ba na jaanɩ-ba ba yi pɛ wʋm te tɩn, 14 o ma bwe-ba o wɩ: «Saderakɩ, dɩ Mesakɩ, dɩ Abɛd-Nego, abam mʋ sɩɩnɩ á ta nɩ á bá tɔgɩ á zuli amʋ wa yam, yɩ á ta bá jɔɔnɩ səbu-sɩŋa nyɩnyʋgʋ kʋlʋ a na cwi tɩn na? 15 Tɔ! Bʋŋɩ-na á nii á na wʋ́ kɩ te. Abam daa na ni wi sɩm wum, dɩ kwaanʋ tɩm tam, dɩ sɔɔ dwi maama, sɩ á vin á yibi tɩga nɩ á jɔɔnɩ səbu-sɩŋa nyɩnyʋgʋ kʋm. Á nan na yɔɔrɩ á vɩn sɩ á jɔɔnɩ-kʋ, ba laan wʋ́ dʋlɩ abam mʋ ba dɩ min-vʋgʋ kʋm wʋnɩ. Á bʋŋɩ nɩ Wɛ dɩdoŋ wʋra DƖ na wʋ́ wanɩ DƖ joŋi abam amʋ jɩŋa nɩ DƖ yagɩ na?»
16 Nɔɔna batɔ bam dɩ ma lǝr-o ba wɩ: «Pɛ Nebukadnɛtsarɩ, kʋ daɩ sɩ dɩ́ ŋɔɔnɩ dɩ́ joŋi dɩ́ tɩtɩ dɩ́ yagɩ taanɩ dɩntʋ baŋa nɩ. 17 Dɩ́ nan ye nɩ: n na pɛ ba dʋlɩ dɩbam ba dɩ min-vʋgʋ kʋntʋ wʋnɩ, dɩbam Wɛ dɩlʋ dɩ́ na zuli tɩn wʋ́ wanɩ DƖ liiri dɩbam dɩ wʋnɩ, yɩ DƖ daarɩ DƖ vrɩ dɩbam n jɩŋa nɩ DƖ yagɩ. 18 DƖ nan na wʋ joŋi dɩbam DƖ yagɩ mʋ dɩ, dɩ́ wʋ́ ta zwa-pʋʋra mʋ sɩ n lwarɩ nɩ: dɩbam bá fɔgɩ dɩ́ zuli nmʋ wa yam, dɩ́ nan bá jɔɔnɩ səbu-sɩŋa nyɩnyʋgʋ kʋntʋ n na kɩ n zɩgɩ tɩn.»
19 Ba taanɩ dɩm ma gɔ Nebukadnɛtsarɩ dɩ fǝri. O banɩ ma tiini dɩ zaŋɩ Saderakɩ, dɩ Mesakɩ, dɩ Abɛd-Nego baŋa nɩ, pa o yibiə ləni kʋ ŋwaanɩ. O ma pa ni sɩ ba pa mim dɩm taa dana kuni bɩrpɛ. 20 Pɛ wʋm laan ma ta o jar-kərə nɔn-wagɩla bam badonnǝ sɩ ba ja Saderakɩ, dɩ Mesakɩ, dɩ Abɛd-Nego ba vɔ sɩ ba dʋlɩ-ba ba yagɩ min-vʋgʋ kʋm wʋnɩ. 21 Ba yɔɔrɩ ba vɔ nɔɔna batɔ bam kʋntʋ dɩ gwaarʋ tɩlʋ maama ba na zʋ tɩn mʋ. Kʋ maa yɩ ba gar-bwəri, dɩ ba gar-kuri, dɩ ba yuu garyiə, dɩ ba gwaarʋ maama. Ba ma dʋlɩ-ba kʋntʋ ba dɩ min-vʋgʋ kʋm wʋnɩ. 22 Pɛ wʋm ni dɩm na tu dɩ yi-sɩɩna pa mim dɩm fʋnyʋgʋ daga te tɩn ŋwaanɩ, mim dɩm dɛɛn nuŋi digə kam nɩ dɩ gʋ jar-kərə balʋ na zɩŋɩ Saderakɩ, dɩ Mesakɩ dɩdaanɩ Abɛd-Nego ba yi dɩ yɩra sɩ ba dʋlɩ-ba ba dɩ dɩ wʋnɩ tɩn mʋ. 23 Sɩ kʋ na yɩ nɔɔna batɔ bam kʋntʋ, ba yɔɔrɩ ba tʋ min-vʋgʋ kʋm na tiini kʋ di tɩn tɩtarɩ nɩ yɩ ba yɩra ta vɔgɩ dɩ ŋʋnɩ mʋ.
24 Kʋ na kɩ fɩɩn tɩn, mʋ pɛ wʋm pɛ o zaŋɩ yɩ kʋ kɩ-o yəəu. O ma bwe o tɩʋ dɩdɛɛra bam o wɩ: «Kʋ daɩ nɔɔna batɔ mʋ dɩ́ dʋlɩ dɩ́ dɩ mim dɩm wʋnɩ na?» Ba ma lǝr-o ba wɩ: «Ɛɛn, Pɛ, kʋ sɩɩnɩ kʋ yɩ kʋntʋ mʋ.»
25 O daa maa wɩ: «Kʋ nan kɩ ta mʋ yɩ a na nɔɔna bana na kaagɩ mim dɩm wʋnɩ ba veǝ? Ba yɩra yam daa wʋ vɔgɩ, yɩ kʋlʋkʋlʋ ba daanɩ-ba.» O ta ma ta o wǝli da wɩ: «Nɔɔnʋ wʋlʋ na kɩ bana tu tɩn nan nyɩ dɩ o yɩ Wɛ dɩdoŋ mʋ!»
26 Pɛ Nebukadnɛtsarɩ ma fʋfɔ o yi min-vʋgʋ goŋo kʋm ni dɩm seeni, yɩ o bagɩ dɩ kwǝr-dɩa o wɩ: «Abam balʋ na yɩ Yuutu Wɛ dɩm tɩntʋŋna bam tɩn, Saderakɩ, dɩ Mesakɩ, dɩdaanɩ Abɛd-Nego, nuŋi-na á ba yo seeni!»
Saderakɩ, dɩ Mesakɩ, dɩ Abɛd-Nego ma sɩɩnɩ ba nuŋi mim dɩm wʋnɩ ba yi o te. 27 Tɩʋ kʋm dɩdɛɛra bam, dɩ kʋ yigǝ tiinǝ, dɩ balʋ na yɩ dɩdɛɛra tɩʋ kʋm tɩɩnɩ yam nɩ tɩn, dɩ kʋ nakwa bam ma fʋfɔ ba yi ba yɩra. Ba na fɔgɩ ba nii-ba tɩn, ba nɛ nɩ mim dɩm wʋ kɩ-ba zʋnnɩ. Ba yɩra kʋrʋ dɩ ba yuuywe dɩ nan wʋ zwɛ mim dɩm wʋnɩ. Mim wʋ zwɛ ba gwaarʋ tɩm dɩ. Ba ta ma na nɩ nyʋa lwəm maŋɩ dɩ tǝri ba yɩra yam nɩ.
28 Pɛ Nebukadnɛtsarɩ laan ma ta o wɩ: «Kʋ na yɩ Wɛ dɩlʋ Saderakɩ, dɩ Mesakɩ, dɩdaanɩ Abɛd-Nego na zuli tɩn, Dɩntʋ maŋɩ dɩ tiə mʋ. Bɛŋwaanɩ, DƖ tʋŋɩ DƖ malɛka mʋ sɩ ka ba ka joŋi DƖ tɩntʋŋna bam kʋntʋ ka yagɩ.a Ba nan kɩ ba wʋ-dɩdʋa dɩ DƖ, pa ba vɩn amʋ ni dɩm. Ba sɛ sɩ kʋ na yɩ tʋʋnɩ dɩ, sɩ ba tɩ, bɛŋwaanɩ ba kɩ ba wʋbʋŋa nɩ ba wɩ: ba bá sɛ ba zuli wa yadonnə ba ləri ba tɩtɩ Wɛ dɩm yuu nɩ. 29 Amʋ zɩm mʋ nan pɛ ni nɩ: nɔɔnʋ na nuŋi tɩʋ kʋlʋ maama nɩ, naa dwi dɩlʋ maama nɩ, yɩ o na ŋɔɔnɩ taanɩ dɩlʋ maama, kʋ tu na ŋɔɔnɩ Saderakɩ, dɩ Mesakɩ, dɩ Abɛd-Nego Wɛ dɩm o ja o cɔgɩ, sɩ ba tʋrɩ kʋ tu yɩra yɩra. O sɔŋɔ dɩ nan wʋ́ ji di-doŋo mʋ. Bɛŋwaanɩ, Wɛ dɩdoŋ daa tǝrǝ, yɩ dɩ wʋ́ wanɩ dɩ joŋi dɩ nɔɔna dɩ yagɩ nɩnɛɛnɩ bantʋ Wɛ dɩm na kɩ te tɩntʋ tɩn.»
30 Pɛ wʋm daa ma joori o zǝŋi Saderakɩ, dɩ Mesakɩ, dɩ Abɛd-Nego sɩ ba taa tiini ba jɩgɩ dam ba nii Babilɔnɩ laŋa kam ni maama baŋa nɩ.