Bu-tʋla na zɩgɩ Wɛ-di-kamunu kʋm nɩ ka duri ka ve te tɩn
47
Nɔɔnʋ wʋm daa ma ja-nɩ o joori Wɛ-di-kamunu kʋm ni seeni. A ma nii a na na na burǝ ni dɩm kuri nɩ ba durǝ ba ve wa-puli seeni ba kɛa. Wɛ-digə kam yigə dɛɛn jeeri wa-puli seeni mʋ. Na bam nuŋi Wɛ-digə kam manco-pɩʋ jagwiə seeni mʋ, yɩ ba duri ba tɔgɩ kaanɩm bimbim dɩm jagwiə seeni.a 2 O ta ma pa dɩ́ tɔgɩ jazɩm baŋa seeni ni dɩm nɩ, dɩ́ bɩbarɩ dɩ́ da pooni yigə dɩ́ vu dɩ́ yi ni dɩlʋ na jeeri wa-puli seeni tɩn. A ma na nɩ na bam maa soe fɩnfɩɩn ba nuŋi ni dɩm jagwiə seeni ba duri ba kɛa.3 Nɔɔnʋ wʋm ma ja-nɩ o yɔɔrɩ wa-puli seeni yɩ o ze lwara ŋʋna. O ma kwe-ka o maŋɩ kantɩa ni maŋɩm kuni mʋrʋ. Dɩ́ na ve dɩ́ yi da tɩn, o ma tɔgɩ a yigə pa dɩ́ ve na bam wʋnɩ sɩ dɩ́ bɛ. Ba dɛɛn maŋɩ nakilə nɩ mʋ. 4 O daa ma maŋɩ sɩ dɩ́ vu dɩ́ yi kantɩa ni kuni mʋrʋ kʋdoŋ, yɩ o daa tɔgɩ a yigə pa dɩ́ ve na bam wʋnɩ. Ba laan ma maŋɩ nadoonə nɩ. O ta ma joori o maŋɩ sɩ dɩ́ vu kantɩa ni kuni mʋrʋ dɩ́ wǝli da. O daa ma pa dɩ́ ve na bam wʋnɩ, dɩ ba laan maŋɩ təŋə nɩ mʋ. 5 O daa ta maŋɩ sɩ dɩ́ vu dɩ́ yi kantɩa ni kuni mʋrʋ mʋ, dɩ ba laan jigi bu-tʋlɩ-zaŋa mʋ pa a warɩ sɩ a vu na bam wʋnɩ a bɛ. Bugə kam dɛɛn tiini ka luunə mʋ pa wʋlʋ na bʋŋɩ sɩ o bɛ-ka tɩn maŋɩ sɩ o dɩn na bam mʋ sɩ o wanɩ o bɛ bubɛ dɩdoŋ dɩm nɩ. 6 O ma bwe amʋ o wɩ: «Nabiinu, nmʋ nɛ kʋntʋ na?»
O ma pa dɩ́ joori bugə kam buburi-bɛ dɩm nɩ. 7 Dɩ́ na yi da tɩn, mʋ amʋ nɛ tweeru zanzan na zɩgɩ dɩ maŋɩ dɩ bugə kam bubɛ maama. 8 Nɔɔnʋ wʋm ma ta dɩ amʋ o wɩ: «Bu-tʋla kantʋ duri ka yɔɔrɩ wa-puli seeni mʋ, sɩ ka tɔgɩ bolo kʋlʋ na tigi Zʋrdɛn bugə kam seeni tɩn, yɩ ka laan vu ka kweeli Yɛ nɩnɩʋ kʋm wʋnɩ. Ka na bam na zʋ daanɩ, nɩnɩʋ kʋm na bam wʋ́ ji na-ŋʋna mʋ. 9 Bu-tʋla kantʋ maa na duri ka yi mɛ maama, wǝǝnu dwi dwi, dɩ kale zanzan mʋ wʋ́ taa wʋra. Bɛŋwaanɩ, nɩnɩʋ kʋm wʋʋ na bam laan kwɛ ba ji na-ŋʋna mʋ yɩ ba paɩ ŋwɩa. 10 Kalǝŋ-jara wʋ́ yǝni ba zɩgɩ nɩnɩʋ kʋm ni nɩ ba taa jaanɩ kale. Kʋ na zɩgɩ En-gedi nɩ, sɩ kʋ yi En-Egalayim tɩn, baá taa zɩgɩ nɩnɩʋ kʋm ni nɩ mʋ ba dʋlɩ ba bʋrɩ sɩm. Ba maa wʋ́ taa jaanɩ kale dwi maama, sɩ kʋ maŋɩ dɩ yalʋ na wʋ Mediterane nɩnɩʋ kʋm nɩ te tɩn. 11 Kʋ nan na yɩ cwarʋ dɩ bwəəlu tɩlʋ na bwələ dɩ nɩnɩʋ kʋm ni tɩn, tɩ na bam bá yɔɔrɩ ba ji na-ŋʋna. Nɔɔna ta wʋ́ taa naɩ yɛ tɩ wʋnɩ. 12 Tweeru tɩlʋ na ləri biə sɩ nɔɔna taa di tɩn dwi maama tɩ wʋ́ nuŋi tɩ taa zɩgɩ bu-tʋla kam bubɛ maama nɩ. Tweeru tɩm vɔɔrʋ bá kwaarɩ, yɩ tɩ bá lə biə tɩ ga. Tweeru tɩm wʋ́ taa ləri biə mʋ cana maama wʋnɩ. Bɛŋwaanɩ, na balʋ na nuŋi Wɛ-di-kamunu kʋm nɩ tɩn mʋ duri ba yi-tɩ pa tɩ nyɔ-ba tɩ sui. Tɩ biə bam wʋ́ taa yɩ wʋdiu mʋ tɩ paɩ nɔɔna, yɩ tɩ vɔɔrʋ tɩm dɩ pa-ba zurim.»b
Tɩga kam sisəm na maŋɩ mɛ tɩn
13 Yuutu Baŋa-Wɛ na tagɩ te tɩn mʋ tɩntʋ: «Abam na tu á pɔɔrɩ tɩga kam, sisənə yalʋ á na wʋ́ tiŋi á pa á tɩtɩ tɩn wʋ́ taa yɩ tɩntʋ mʋ. Á wʋ́ pɔɔrɩ-ka á pa Yisɩrayɛlɩ dwiə fugə-yale yam sɩ ba taa te. Á nan wʋ́ kwe pɔɔrɩm sɩle á pa Zʋzɛfʋ dwi dɩm. 14 Pɔɔrɩ-na tɩga kam á pa á dwiə yam maama sɩ kʋ taa maɩ daanɩ. Bɛŋwaanɩ, amʋ dɛɛn dugi durə nɩ a lagɩ a kwe-ka a pa á nabaara bam mʋ. Tɩga kam nan wʋ́ taa yɩ abam nyɩm mʋ sɩ á taá te-ka.
15 Tɩga kam sisəm na wʋ́ taa yɩ te mʋ tɩntʋ:
Jazɩm baŋa seeni sisəm dɩm wʋ́ puli Mediterane nɩnɩʋ kʋm ni nɩ mʋ dɩ tʋlɩ dɩ vu Hɩtelon seeni, sɩ dɩ laan tɔgɩ Lebo-Hamatɩ, yɩ dɩ daarɩ dɩ bɛ dɩ kɛ Zedadɩ, 16 dɩ Berota, dɩ Siberayim. Je sɩm kʋntʋ wʋ Damasɩ dɩ Hamatɩ tɩtarɩ laŋa nɩ mʋ. Sisəm dɩm ta wʋ́ kɛ dɩ yi Hazera Hatikon, dɩ na wʋ Hawuran sisəm dɩm nɩ tɩn. 17 Kʋntʋ tɩn, sisəm dɩm wʋ́ zɩgɩ nɩnɩʋ kʋm ni nɩ kʋ vu kʋ kweeli Hazara Enan nɩ. Dɩ maa wʋ́ tɔgɩ Damasɩ jazɩm baŋa seeni sisəm dɩm mʋ, yɩ Hamatɩ tɩʋ sisəm dɩm dɩ wʋ jazɩm baŋa seeni. Tɩga kam jazɩm baŋa seeni sisəm dɩm na wʋ́ taa yɩ te tɩn mʋ kʋntʋ.
18 Wa-puli seeni sisəm dɩm wʋ́ taa tigi Hawuran dɩ Damasɩ tɩtarɩ laŋa nɩ mʋ. Dɩ wʋ́ tʋlɩ Zʋrdɛn bugə kam, yɩ dɩ wʋ Galadɩ dɩ Yisɩrayɛlɩ tɩga kam tɩtarɩ nɩ tɩn. Ka maa wʋ́ vu ka yi Yɛ nɩnɩʋ kʋm, Tamaarɩ tɩʋ na zɩgɩ mɛ tɩn. Tɩga kam wa-puli seeni sisəm dɩm na wʋ́ taa yɩ te tɩn mʋ kʋntʋ.
19 Jagwiə seeni sisəm dɩm wʋ́ zɩgɩ Tamaarɩ nɩ mʋ dɩ tʋlɩ dɩ yi Meriba-Kadesɩ buli-yi dɩm seeni. Dɩ daa ta wʋ́ tɔgɩ Ezipi bugə kam nɩ dɩ tʋlɩ dɩ vu dɩ kweeli Mediterane nɩnɩʋ kʋm ni nɩ. Tɩga kam jagwiə seeni sisəm dɩm na wʋ́ taa yɩ te tɩn mʋ kʋntʋ.
20 Wa-zʋʋrɩ seeni sisəm dɩm wʋ́ tɔgɩ Mediterane nɩnɩʋ kʋm ni mʋ dɩ tʋlɩ dɩ vu dɩ yi je sɩlʋ na maŋɩ dɩ Lebo-Hamatɩ tɩn. Tɩga kam wa-zʋʋrɩ seeni sisəm dɩm na wʋ́ taa yɩ te tɩn mʋ kʋntʋ.
21 Nan pɔɔrɩ-na tɩga kam á pa daanɩ sɩ Yisɩrayɛlɩ dwiə yam maama wanɩ ba na ba dɩ nyɩm ka wʋnɩ. 22 Abam nan na lagɩ á pɔɔrɩ tɩga kam, á wʋ́ kwe-ka á pa á tɩtɩ dɩdaanɩ vərə balʋ na tu ba zʋʋrɩ dɩ abam yɩ ba jɩgɩ biə tɩn. Abam na wʋ́ kɩ te á pa Yisɩrayɛlɩ tɩmbiə tɩn, sɩ á kɩ kʋntʋ dɩ vərə bam dɩ. Ba dɩ jɩgɩ cwǝŋǝ sɩ ba tɔgɩ dɩ Yisɩrayɛlɩ dwi tiinə bam ba joŋi ba tɩga. 23 Yisɩrayɛlɩ tiinə dwi dɩlʋ wʋnɩ vəru na zʋʋrɩ da, kʋ tu wʋ́ joŋi tɩga dáanɩ mʋ sɩ o taa te.»
Yuutu Baŋa-Wɛ na tagɩ kʋlʋ tɩn mʋ kʋntʋ.