Tɩga kam pʋpwarɩ sɩm
48
«Yisɩrayɛlɩ dwiə yam dɩ tɩga kalʋ ba maama na wʋ́ joŋi tɩn mʋ tɩntʋ:Kʋ na zɩgɩ tɩga kam maama jazɩm baŋa seeni sisəm dɩm nɩ tɩn, Dan dwi dɩm wʋ́ na pʋpwara dɩdʋa mʋ. Ka jazɩm baŋa seeni sisəm dɩm wʋ́ tʋlɩ dɩ vu Hɩtelon seeni, sɩ dɩ laan yi Lebo-Hamatɩ. Dɩ maa wʋ́ vu dɩ kweeli Hazara-Enan nɩ. Damasɩ jazɩm baŋa seeni sisəm dɩm na yǝri Hamatɩ tɩn mʋ kʋntʋ. Dan dwi dɩm sisəm mʋ kʋntʋ, kʋ na zɩgɩ Yisɩrayɛlɩ tɩga kam wa-puli seeni sɩ kʋ yi ka wa-zʋʋrɩ seeni tɩn.
2 Asɛɛrɩ dwi dɩm dɩ wʋ́ na pʋpwara dɩdʋa mʋ. Ba tɩga kam wʋ́ lɔ sisəm dɩ Dan dwi dɩm mʋ, kʋ zɩgɩ wa-puli seeni sɩ kʋ kɛ kʋ yi ka wa-zʋʋrɩ seeni.
3 Nɛfitali dwi dɩm dɩ wʋ́ na pʋpwara dɩdʋa mʋ. Ba tɩga kam wʋ́ lɔ sisəm dɩ Asɛɛrɩ dwi dɩm mʋ, kʋ zɩgɩ wa-puli seeni sɩ kʋ yi ka wa-zʋʋrɩ seeni.
4 Manasɩ dwi dɩm dɩ wʋ́ na pʋpwara dɩdʋa mʋ. Ba tɩga kam wʋ́ lɔ sisəm dɩ Nɛfitali dwi dɩm mʋ, kʋ zɩgɩ wa-puli seeni sɩ kʋ yi ka wa-zʋʋrɩ seeni.
5 Efrayim dwi dɩm dɩ wʋ́ na pʋpwara dɩdʋa mʋ. Ba tɩga kam wʋ́ lɔ sisəm dɩ Manasɩ dwi dɩm mʋ, kʋ zɩgɩ wa-puli seeni sɩ kʋ yi ka wa-zʋʋrɩ seeni.
6 Ruban dwi dɩm dɩ wʋ́ na pʋpwara dɩdʋa mʋ. Ba tɩga kam wʋ́ lɔ sisəm dɩ Efrayim dwi dɩm mʋ, kʋ zɩgɩ wa-puli seeni sɩ kʋ kɛ kʋ yi ka wa-zʋʋrɩ seeni.
7 Zuda dwi dɩm dɩ wʋ́ na pʋpwara dɩdʋa mʋ. Ba tɩga kam wʋ́ lɔ sisəm dɩ Ruban dwi dɩm mʋ, kʋ zɩgɩ wa-puli seeni sɩ kʋ kɛ kʋ yi ka wa-zʋʋrɩ seeni.
8 Nan pɔɔrɩ-na tɩga kalʋ na wʋ́ taa yɩ ka yɩra tɩn. Tɩga kam kʋntʋ wʋ́ lɔ sisəm dɩ Zuda dwi dɩm mʋ, kʋ zɩgɩ wa-puli seeni sɩ kʋ kɛ kʋ yi ka wa-zʋʋrɩ seeni. Maŋɩ-na je sɩm kʋntʋ sɩ kʋ taa yɩ kantɩ 25 000 yalɩm baŋa nɩ. Ka dɩdwarɩm dɩm nan wʋ́ zɩgɩ wa-puli seeni sɩ kʋ yi wa-zʋʋrɩ seeni sɩ kʋ taa maɩ dɩ dwiə yadonnə yam tɩga ni na wʋ́ taa yɩ te tɩn. Wɛ tɩtɩ digə kam nan wʋ́ zɩgɩ tɩga kam kʋntʋ tɩtarɩ nɩ mʋ.
9 Pwələ kalʋ abam na wʋ́ pɔɔrɩ sɩ ka taa yɩ Baŋa-Wɛ tɩtɩ nyɩm tɩn maŋɩ sɩ á maŋɩ-ka kantɩ 25 000 dɩdwarɩm baŋa nɩ. Ka yalɩm baŋa maŋɩm dɩ wʋ́ taa yɩ kantɩ 20 000. 10 Tɩga kam kʋntʋ wʋ́ taa yɩ ka yɩra ka paɩ kaanɩm tiinə bam mʋ. Ka jazɩm baŋa seeni sisəm maŋɩm wʋ́ taa yɩ kantɩ 25 000 mʋ. Ka yalɩm seeni maŋɩm maa wʋ́ taa yɩ kantɩ 10 000 ka wa-zʋʋrɩ seeni, dɩ ka wa-puli seeni. Jagwiə seeni sisəm dɩm maa wʋ́ taa yɩ kantɩ 25 000 dɩdwarɩm baŋa nɩ. Baŋa-Wɛ digə kam maa wʋ́ taa zɩgɩ pwələ kam kʋntʋ tɩtarɩ dɩm nɩ. 11 Ka wʋ́ taa yɩ Sadoki tiinə bam na yɩ kaanɩm tiinə tɩn nyɩm mʋ. Bantʋ yɔɔrɩ ba nii amʋ tɩtʋŋa baŋa nɩ mʋ yɩ ba wʋ yagɩ. Ba wʋ sɛ sɩ ba tɔgɩ dɩ Yisɩrayɛlɩ tiinə bam ba ywəri ba cwǝŋǝ, nɩ Levi dwi tiinə badaara bam na kɩ te tɩn. 12 Abam na pɔɔrɩ tɩga kam, pwələ kam kʋntʋ wʋ́ taa yɩ ka yɩra ka pa-ba. Ka wʋ́ tiini ka taa yɩ lanyɩranɩ fasɩ mʋ. Ka maa wʋ́ yǝri dɩ Levi dwi tiinə bam tɩga kam.
13 Kʋ na yǝri kaanɩm tiinə bam tɩga kam kʋntʋ tɩn, Levi dwi tiinə bam wʋ́ taa jɩgɩ ba dɩ pʋpwara. Ka wʋ́ taa yɩ kantɩ 25 000 mʋ dɩdwarɩm baŋa nɩ. Ka yalɩm baŋa maŋɩm maa wʋ́ taa yɩ kantɩ 10 000. Ba tɩga kam ni maama wʋ́ taa yɩ kantɩ 25 000 mʋ dɩdwarɩm baŋa nɩ, dɩ kantɩ 10 000 yalɩm baŋa nɩ. 14 Kʋ daɩ sɩ ba kwe tɩga kam ba yəgi ba pa nɔɔn-nɔɔnʋ, naa sɩ ba kwe-ka ba ma ba ləni woŋo kʋdoŋ, ka na yɩ lanyɩranɩ fasɩ ka pa Baŋa-Wɛ tɩn ŋwaanɩ.
15 Pwələ kam tɩga kalʋ ta na daarɩ tɩn wʋ́ yi kantɩ 5 000 ka yalɩm baŋa nɩ, dɩ kantɩ 25 000 ka dɩdwarɩm baŋa nɩ. Kantʋ daɩ ka yɩra Wɛ ŋwaanɩ, yɩ Zeruzalɛm tɩʋ tiinə wʋ́ wanɩ ba taa jɩgɩ-ka ba tʋŋa. Ba waɩ ba lɔ ba sam yɩ ba kɔnɩ ba vara je sɩm kʋntʋ nɩ. Ba nan wʋ́ lɔ tɩʋ kʋm tɩtɩ tɩga kam tɩtarɩ nɩ mʋ. 16 Kʋ sɛn sɩna sɩm maama wʋ́ taa maɩ daanɩ mʋ: kantɩ 4 500 kʋ jazɩm baŋa seeni, dɩ jagwiə seeni, dɩ wa-puli seeni, dɩdaanɩ wa-zʋʋrɩ seeni. 17 Pwələ maa wʋ́ taa tigi tɩʋ kʋm sɛn sɩna sɩm maama nɩ, ka yalɩm baŋa maŋɩm na yɩ kantɩ 250 ka jazɩm baŋa seeni, dɩ jagwiə seeni, dɩ wa-puli seeni, dɩdaanɩ wa-zʋʋrɩ seeni tɩn. 18 Tɩga kalʋ ta na daarɩ yɩ ka yǝri pwələ kalʋ na yɩ lanyɩranɩ fasɩ tɩn nɩ mʋ ba waɩ ba kwe-ka ba du wʋdiu sɩ Zeruzalɛm tɩʋ nɔn-biə bam taa di. Tɩga kam kadoŋ wʋ́ yi kantɩ 10 000 tɩʋ kʋm wa-puli seeni, yɩ ka kadoŋ yi kantɩ 10 000 tɩʋ kʋm wa-zʋʋrɩ seeni. 19 Tɩʋ kʋm nɔn-biə balʋ na nuŋi Yisɩrayɛlɩ dwiə yam maama wʋnɩ tɩn mʋ wʋ́ taa varɩ tɩga kam kʋntʋ. 20 Kʋ na yɩ te tɩn, tɩga kalʋ maama na pɔɔrɩ sɩ ka taa yɩ ka yɩra tɩn sɛn sɩm maama maɩ daanɩ mʋ. Ka maŋɩm dɩm maa yɩ kantɩ 25 000 saŋa maama nɩ. Tɩga kalʋ na yɩ lanyɩranɩ fasɩ Wɛ ŋwaanɩ tɩn na wǝli dɩ Zeruzalɛm tɩʋ laŋa kam, kʋ maama wʋ́ maŋɩ kʋntʋ mʋ.
21 Tɩga kalʋ ta na daarɩ pwələ kam kʋntʋ wa-puli seeni dɩdaanɩ ka wa-zʋʋrɩ seeni tɩn wʋ́ taa yɩ tɩʋ dɩdɛɛrʋ wʋm nyɩm mʋ. Ka yalɩm maŋɩm maa wʋ́ taa yɩ kantɩ 25 000. O tɩga kam wʋ́ tʋlɩ wa-puli seeni ka yi Zʋrdɛn bugə kam, yɩ ka daarɩ ka tʋlɩ wa-zʋʋrɩ seeni ka yi Mediterane nɩnɩʋ kʋm. Tɩga kalʋ ba na wʋ́ pɔɔrɩ ba pa-nɩ tɩn, dɩ amʋ digə kam na wʋ́ taa wʋ ka wʋnɩ tɩn laan maa wʋ́ taa tigi dɩdɛɛrʋ wʋm tɩga kam tɩtarɩ nɩ. 22 Kʋntʋ tɩn, Levi dwi tiinə tɩga kam, dɩ kalʋ na wʋra tɩʋ kʋm ŋwaanɩ tɩn maama wʋ́ taa tigi dɩdɛɛrʋ wʋm tɩɩ sɩle sɩm tɩtarɩ laŋa nɩ mʋ. O tɩga kam dɩ maa wʋ́ lɔ sisəm dɩ Zuda dwi tɩga kam na wʋ jazɩm baŋa seeni tɩn. Ka ta wʋ́ lɔ sisəm dɩ Bɛnzamɛn dwi tɩga kam na wʋ jagwiə seeni tɩn.
23 Kʋ ta na daarɩ dwiə yalʋ na daarɩ tɩn:
Bɛnzamɛn dwi dɩm wʋ́ na pʋpwara dɩdʋa mʋ. Ba tɩga kam nan wʋ́ zɩgɩ Yisɩrayɛlɩ tɩga kam wa-puli seeni mʋ ka tʋlɩ ka yi ka wa-zʋʋrɩ seeni.
24 Simeyon dwi dɩm dɩ wʋ́ na pʋpwara dɩdʋa mʋ. Ba tɩga kam wʋ́ lɔ sisəm dɩ Bɛnzamɛn dwi dɩm mʋ, kʋ zɩgɩ wa-puli seeni sɩ kʋ yi ka wa-zʋʋrɩ seeni.
25 Yisakaarɩ dwi dɩm dɩ wʋ́ na pʋpwara dɩdʋa mʋ. Ba tɩga kam wʋ́ lɔ sisəm dɩ Simeyon dwi dɩm mʋ, kʋ zɩgɩ wa-puli seeni sɩ kʋ yi ka wa-zʋʋrɩ seeni.
26 Zabulɔn dwi dɩm dɩ wʋ́ na pʋpwara dɩdʋa mʋ. Ba tɩga kam wʋ́ lɔ sisəm dɩ Yisakaarɩ dwi dɩm mʋ, kʋ zɩgɩ wa-puli seeni sɩ kʋ yi ka wa-zʋʋrɩ seeni.
27 Gadɩ dwi dɩm dɩ wʋ́ na pʋpwara dɩdʋa mʋ. Ba tɩga kam wʋ́ lɔ sisəm dɩ Zabulɔn dwi dɩm mʋ, kʋ zɩgɩ wa-puli seeni sɩ kʋ yi ka wa-zʋʋrɩ seeni.
28 Gadɩ dwi dɩm jagwiə seeni sisəm maa wʋ́ zɩgɩ Tamaarɩ nɩ mʋ dɩ tʋlɩ dɩ taa ve dɩ yi Meriba-Kadesɩ buli-yiə yam nɩ. Dɩ daa ta wʋ́ tɔgɩ Ezipi bugə kam nɩ dɩ tʋlɩ dɩ vu dɩ kweeli Mediterane nɩnɩʋ kʋm ni nɩ.
29 Tɩga kam kʋntʋ mʋ nmʋ wʋ́ pɔɔrɩ n pa Yisɩrayɛlɩ dwiə yam maama sɩ ba taa te. Dwi dɩ dwi maama pʋpwara na wʋ́ taa yɩ te tɩn mʋ kʋntʋ. Yuutu Baŋa-Wɛ na tagɩ kʋlʋ tɩn mʋ kʋntʋ.
Tɩʋ kʋm manco-pɩʋ niə taanɩ
30 Niə yantʋ mʋ nɔɔna wʋ́ yǝni ba tɔgɩ da ba nuŋi tɩʋ kʋm wʋnɩ: Tɩʋ kʋm jazɩm baŋa seeni kəbrə maŋɩm wʋ́ taa yɩ kantɩ 4 500 mʋ. 31 Ba maa wʋ́ pʋrɩ niə yatɔ jazɩm baŋa seeni kəbrə kam nɩ, ya yɩra na yɩ Ruban ni dɩm, dɩ Zuda ni dɩm, dɩ Levi ni dɩm tɩn. Baá taa jɩgɩ Yisɩrayɛlɩ dwiə yam yɩra mʋ ba bǝi tɩʋ kʋm niə yam.
32 Wa-puli seeni kəbrə kam maŋɩm dɩ wʋ́ taa yɩ naba-laara kantɩ 4 500, yɩ ka dɩ jɩgɩ niə yatɔ. Kʋ maa yɩ Zʋzɛfʋ ni dɩm, dɩ Bɛnzamɛn ni dɩm, dɩ Dan ni dɩm.
33 Jagwiə seeni kəbrə kam maŋɩm dɩ wʋ́ taa yɩ kantɩ 4 500, yɩ ka dɩ jɩgɩ niə yatɔ. Kʋ maa yɩ Simeyon ni dɩm, dɩ Yisakaarɩ ni dɩm, dɩ Zabulɔn ni dɩm.
34 Wa-zʋʋrɩ seeni kəbrə kam maŋɩm dɩ wʋ́ taa yɩ kantɩ 4 500, yɩ ka dɩ jɩgɩ niə yatɔ. Kʋ maa yɩ Gadɩ ni dɩm, dɩ Asɛɛrɩ ni dɩm, dɩ Nɛfitali ni dɩm.
35 Kʋntʋ tɩn, laŋa kalʋ na tigi ka kaagɩ tɩʋ kʋm sɛn sɩna sɩm maama tɩn yɩ kantɩ 18 000 mʋ. Kʋ nan na zɩgɩ maŋa kam kʋntʋ nɩ sɩ kʋ taa ve tɩn, baá taa bǝi tɩʋ kʋm yɩrɩ nɩ: ‹Baŋa-Wɛ wʋ kʋ wʋnɩ.› »a