46
Yuutu Baŋa-Wɛ na tagɩ te tɩn mʋ tɩntʋ: Wɛ-di-kamunu tɩtarɩ kʋnkɔlɔ kʋm ni dɩlʋ na jeeri wa-puli seeni tɩn maŋɩ sɩ á pɩ-dɩ mʋ á tɩtʋŋa da yardʋ maama wʋnɩ. Kʋ maa na yi siun dɛ dɩm, dɩdaanɩ can-dʋŋa dɛ dɩm nɩ, sɩ á laan pʋrɩ-dɩ á yagɩ. 2 Tɩʋ kʋm dɩdɛɛrʋ wʋm maa wʋ́ zɩgɩ dayigǝ kʋnkɔlɔ kʋm nɩ o vu o zʋ ni dɩm kʋntʋ napɔrɔ kʋm wʋnɩ sɩ o taa zɩgɩ manchoŋo ni dɩm nɩ. Kaanɩm tiinə bam maa wʋ́ kwe o zwɛɛm pɛɛra, dɩ o yazurə pɛɛra ba ma ba kɩ kaanɩm. Dɩdɛɛrʋ wʋm ta na zɩgɩ manchoŋo ni dɩm nɩ, oó cɔɔlɩ o yibiyə tɩga nɩ sɩ o zuli-nɩ, yɩ o daarɩ o nuŋi da o viiri. Ba nan bá pɩ ni dɩm, sɩ tɩga na tu ka yi, sɩ ba laan pɩ-dɩ. 3 Siun da yam dɩ can-dʋŋa da yam maama nɩ, tɩʋ kʋm nɔɔna bam nan maŋɩ sɩ ba gilimi daanɩ ni dɩm kʋntʋ yigə nɩ mʋ, sɩ ba zuli Baŋa-Wɛ. 4 Dɩdɛɛrʋ wʋm na maŋɩ sɩ o ja zwɛɛm pɛɛrɩ dɩlʋ siun dɛ maama nɩ o ba o kɩ o pa Baŋa-Wɛ tɩn nan wʋ́ taa yɩ pi-balɩ sɩrdʋ, dɩ pi-bɩa dɩdʋa mʋ. Tɩntʋ maama nan bá taa jɩgɩ gɛɛrɩ tɩ yɩra nɩ. 5 Wʋdiu pɛɛrɩ dɩlʋ o na wǝli pi-bɩa kam wʋnɩ sɩ o ma o kɩ kaanɩm dɩm tɩn wʋ́ taa yɩ kʋrɩwaa bu dɩdʋa mʋ. Muni dɩlʋ o na wʋ́ kwe o wǝli pi-balɩ sɩm nɩ tɩn nan wʋ́ maŋɩ dɩ o na lagɩ te tɩn mʋ. O nan wʋ́ wǝli nugə bwɛn sɩna mʋ muni kʋrɩwaa maama ŋwaanɩ. 6 Can-dʋŋa dɛ dɩm nɩ dɩdɛɛrʋ wʋm ta wʋ́ kwe na-bɩa dɩdʋa, dɩ pi-balɩ sɩrdʋ, dɩ pi-bɩa dɩdʋa sɩ o ma o kɩ kaanɩm, tɩ maama na ba jɩgɩ gɛɛrɩ tɩ yɩra nɩ tɩn. 7 O ta wʋ́ ja wʋdiu pɛɛrɩ kʋrɩwaa bu dɩdʋa na-bɩa kam ŋwaanɩ, dɩ wʋdiu pɛɛrɩ kʋrɩwaa bu dɩdʋa pi-bɩa kam ŋwaanɩ. Kʋ nan na yɩ pi-balɩ sɩm, oó wǝli wʋdiu pɛɛrɩ sɩ kʋ maŋɩ dɩ o na lagɩ te tɩn mʋ. O ta wʋ́ wǝli nugə bwɛn sɩna mʋ kʋrɩwaa maama ŋwaanɩ. 8 Dɩdɛɛrʋ wʋm na yǝni o zʋ manchoŋo ni dɩm, oó tɔgɩ napɔrɔ kʋm nɩ mʋ o zʋ da. O ta na lagɩ o nuŋi, kʋ maŋɩ sɩ o joori o tɔgɩ cwǝŋǝ kam kʋntʋ mʋ.9 Tɩʋ kʋm nɔɔna na yǝni ba jeeri Baŋa-Wɛ yigə nɩ sɩ ba di ba candi yam, sɩ ba na tɔgɩ ni dɩlʋ ba zʋ tɩn, ba da ni dɩdoŋ nɩ ba nuŋi Wɛ-digə kam wʋnɩ. Ba wʋlʋ na dɛ jazɩm baŋa seeni ni dɩm o zʋ, kʋ tu wʋ́ tɔgɩ jagwiə seeni ni dɩm nɩ mʋ o nuŋi. Wʋlʋ nan na tɔgɩ jagwiə seeni ni dɩm o zʋ, kʋ tu dɩ wʋ́ da jazɩm baŋa seeni ni dɩm nɩ mʋ o nuŋi. 10 Ba na yǝni ba zʋ da, dɩdɛɛrʋ wʋm dɩ maa wʋ́ gwaanɩ ba wʋnɩ, yɩ o ta tɔgɩ dɩ ba o nuŋi.
11 Ba na yǝni ba jɩgɩ ba candi yam dwi maama ba di, wʋdiu pɛɛrɩ dɩm wʋ́ taa yɩ muni kʋrɩwaa bu dɩdʋa mʋ na-bɩa maama ŋwaanɩ, dɩ kʋrɩwaa bu dɩdʋa pi-bɩa maama ŋwaanɩ. Kʋ daarɩ kʋ na yɩ pəlbiə bam, wʋdiu pɛɛrɩ dɩm na wǝli da tɩn wʋ́ maŋɩ dɩ nɔɔnʋ wʋbʋŋa na lagɩ te tɩn mʋ. Ba ta wʋ́ wǝli nugə bwɛn sɩna mʋ kʋrɩwaa maama ŋwaanɩ. 12 Dɩdɛɛrʋ wʋm na bʋŋɩ sɩ o kɩ wʋ-yoŋo pɛɛrɩ o pa Baŋa-Wɛ, nɩ kʋ na yɩ zwɛɛm pɛɛrɩ naa wəl-dɔnɔ pɛɛrɩ mʋ, sɩ ba pʋrɩ ni dɩlʋ na jeeri wa-puli seeni tɩn ba pa‑o. O maa wʋ́ kɩ o zwɛɛm pɛɛrɩ dɩm, naa o wəl-dɔnɔ pɛɛrɩ dɩm, nɩ kʋ na maŋɩ kʋ kɩ te siun dɛ dɩm nɩ tɩn mʋ. Kʋ kwaga seeni o na nuŋi sɩ o viiri, ba laan wʋ́ wanɩ ni dɩm ba pɩ.
13 Dɛ maama wʋnɩ nmʋ maŋɩ sɩ n beeri pəlbu na yi bɩnɩ yɩ o ba jɩgɩ gɛɛrɩ o yɩra nɩ tɩn sɩ n ma-o n kɩ zwɛɛm pɛɛrɩ n pa Baŋa-Wɛ. Kʋ nan yɩ zɩzɩŋa maama mʋ nmʋ wʋ́ ta n kɩ kʋntʋ. 14 Zɩzɩŋa maama sɩ n yǝni n kɩ wʋdiu pɛɛrɩ n wǝli da. Pɛɛrɩ dɩm n na wʋ́ kɩ n pa Baŋa-Wɛ tɩn yɩ muni bwɛn sɩtɔ mʋ, yɩ n guugi nugə bwaŋa dɩdʋa dɩ wʋnɩ. Ni dɩntʋ ba maŋɩ sɩ dɩ ləni maŋa dɩ maŋa. 15 Kʋ maa na yɩ te tɩn, pəlbu wʋm, dɩ wʋdiu pɛɛrɩ dɩm, dɩ nugə kalʋ na wǝli dɩ wʋnɩ tɩn maŋɩ sɩ á taá beeri-tɩ mʋ zɩzɩŋa maama sɩ á yǝni á ma-tɩ á kɩ zwɛɛm kaanɩm maŋa maama nɩ.
16 Yuutu Baŋa-Wɛ nan na tagɩ te tɩn mʋ tɩntʋ: Tɩʋ dɩdɛɛrʋ wʋm na pɔɔrɩ ba dwi tɩga kam wʋnɩ sɩ kʋ ji pɛɛrɩ kʋ pa o bu, ka laan wʋ́ lɛɛrɩ ka taa yɩ bu wʋm dɩ o dɩ kwaga nyɩm mʋ. 17 Kʋ daarɩ, o na kwe-ka o ji pɛɛrɩ mʋ o pa o tɩntʋŋnʋ wʋlʋ, o tɩntʋŋnʋ wʋm wʋ́ taa jɩgɩ-ka o tʋŋɩ mʋ sɩ kʋ taa nii wǝǝnu yirim bɩnɩ dɩm. Maŋa kam kʋntʋ na yiǝ, sɩ o tɩntʋŋnʋ wʋm joori o kwe tɩga kam o pa dɩdɛɛrʋ wʋm, dɩdɛɛrʋ wʋm dwi dɩm mʋ na te tɩga kam tɩn ŋwaanɩ. Kʋ yɩ wʋntʋ biə yɩranɩ mʋ jɩgɩ cwǝŋǝ sɩ ba taa te o tɩga sɩ ka ji ba nyɩm. 18 Tɩʋ dɩdɛɛrʋ wʋm nan ba jɩgɩ cwǝŋǝ sɩ o zəli nɔɔna ba tɩga nɩ sɩ o daarɩ-ba o zɩgɩ bwəri. O nan wʋ́ nii o tɩtɩ tɩga wʋnɩ o pɔɔrɩ o pa o biə, sɩ ba dɩ ba dwi dɩm taa te. Kʋ daɩ sɩ a nɔɔna bam tɩga nuŋi ba jɩŋa nɩ ka daarɩ-ba.› »
Kaanɩm tiinə bam kaligoŋo
19 Nɔɔnʋ wʋm daa ma ja-nɩ pa dɩ́ tɔgɩ Wɛ-digə kʋnkɔlɔ manco-ni dɩm dɩ́ vu dɩ́ yi di sɩlʋ na pɔɔrɩ sɩ zɩga Wɛ kaanɩm tiinə bam ŋwaanɩ yɩ sɩ jeeri jazɩm baŋa seeni tɩn. O ma brɩ-nɩ je sɩlʋ na yǝri di sɩm kʋntʋ wa-zʋʋrɩ seeni tɩn. 20 O laan ma ta dɩ amʋ o wɩ: «Je sɩntʋ yɩ kaligoŋo mʋ kʋ pa kaanɩm tiinə bam. Dáanɩ mʋ baá yǝni ba taa saŋa lwarɩm jɩnɩ kaanɩm dɩm, dɩ lwarɩm saarɩm kaanɩm dɩm, yɩ ba daarɩ ba wɔ wʋdiu pɛɛra yam, sɩ ba yɩ ja-ya ba zʋ dayigǝ kʋnkɔlɔ kʋm wʋnɩ. Ba ya na kɩ kʋntʋ, kʋʋ́ wanɩ nɔɔna bam dɩ mʋ kʋ pwɛ Wɛ ŋwaanɩ.»
21 O daa ma ja-nɩ o nuŋi pa dɩ́ zʋ dayigǝ kʋnkɔlɔ kʋm wʋnɩ, yɩ o ja-nɩ o kaagɩ kʋ gugwəəru tɩna tɩm. A ma na nɩ gugoro maama jɩgɩ kʋ kʋnkɔlɔ mʋ. 22 Dayigǝ kʋnkɔlɔ kʋm gugwəəru tɩna tɩm maa jɩgɩ kʋnkwallʋ tɩlʋ maama na maɩ daanɩ yɩ kabri cɩ-tɩ tɩn. Tɩ maa yɩ kantɩa ni maŋɩm fiinna dɩdwarɩm baŋa nɩ, dɩ kantɩa ni maŋɩm fiintɔ yalɩm baŋa nɩ. 23 Ba dɛɛn kwe kandwa mʋ ba lɔ taala ba kaagɩ kʋnkwallʋ tɩm kʋntʋ, yɩ ba lɔ mim kurə kabri sɩm tɩga kuri seeni. 24 O ma ta dɩ amʋ o wɩ: «Kaligwəənu tɩntʋ wʋnɩ mʋ balʋ na yǝni ba tʋŋɩ Wɛ-digə kam tɩtʋŋa tɩn wʋ́ taa saŋɩ nwana yalʋ nɔɔna bam na yǝni ba ja ba ba sɩ ba maa kɩ kaanɩm tɩn.»