Ba na wʋ́ pɔɔrɩ tɩga kam te tɩn
45
Abam na lagɩ á pɔɔrɩ tɩga kam á pa Yisɩrayɛlɩ dwiə yam sɩ ba taa te, á maŋɩ sɩ á lɩ pwələ sɩ ka taa yɩ ka yɩra amʋ Baŋa-Wɛ ŋwaanɩ. Ka wʋ́ taa yɩ kantɩ 25 000 mʋ dɩdwarɩm baŋa nɩ, dɩ kantɩ 20 000 ka yalɩm baŋa nɩ. Pwələ kam maama wʋ́ taa yɩ lanyɩranɩ fasɩ mʋ amʋ ŋwaanɩ. 2 Pwələ kam kʋntʋ nɩ á wʋ́ pɔɔrɩ kantɩ 500 mʋ dɩdwarɩm baŋa nɩ dɩ yalɩm baŋa nɩ sɩ á ma á lɔ Wɛ-digə kam da. Naboo wʋ́ taa tigi kʋ kaagɩ-ka, yɩ kʋ yalɩm baŋa maŋɩm yɩ kantɩ 50. 3 Ta pɔɔrɩ-na pwələ kalʋ na yɩ ka yɩra tɩn bɩle, sɩ á maŋɩ kantɩ 25 000 dɩdwarɩm baŋa nɩ, dɩ kantɩ 10 000 yalɩm baŋa nɩ. Je sɩm kʋntʋ á na wʋ́ maŋɩ tɩn mʋ á wʋ́ kɩ Wɛ-digə kam na tiini ka yɩ lanyɩranɩ fasɩ Wɛ ŋwaanɩ tɩn da. 4 Pwələ kam cicoro kʋm kʋntʋ wʋ́ taa yɩ tɩga kalʋ na pɔɔrɩ amʋ ŋwaanɩ tɩn. Dáanɩ mʋ kaanɩm tiinə bam wʋ́ taa te, dɩ ba na tʋŋɩ Wɛ-digə tɩtʋŋa yam yɩ ba fʋfɔ ba twɛ Baŋa-Wɛ te sɩ ba tʋŋɩ ba pa‑DƖ tɩn. Baá lɔ ba sam dɩm dáanɩ mʋ, yɩ dáanɩ mʋ Wɛ tɩtɩ digə kam dɩ maa wʋ́ taa wʋra. 5 Pwələ kam cicoro kʋlʋ na daarɩ tɩn dɩ wʋ́ taa yɩ kantɩ 25 000 dɩdwarɩm baŋa nɩ, dɩ naba-laara kantɩ 10 000 yalɩm baŋa nɩ. Tɩga kam kʋntʋ wʋ́ taa yɩ Levi dwi tiinə bam nyɩm mʋ, ba na tʋŋɩ Wɛ digə kam wʋnɩ tɩn ŋwaanɩ. Baá taa te-ka pa tɩɩnɩ taa wʋra sɩ ba taa zʋʋrɩ dɩ wʋnɩ.6 Kʋ ta na yɩ tɩga kalʋ abam na wʋ́ lɔ tɩʋ kʋm tɩtɩ ka baŋa nɩ tɩn, á wʋ́ maŋɩ laŋa kalʋ na yɩ kantɩ 5 000 yalɩm baŋa nɩ dɩ kantɩ 25 000 dɩdwarɩm baŋa nɩ tɩn, pa ka saŋɩ pwələ kalʋ na yɩ ka yɩra amʋ ŋwaanɩ tɩn. Laŋa kam kʋntʋ wʋ́ taa yɩ Yisɩrayɛlɩ tiinə bam maama nyɩm mʋ.
7 Yisɩrayɛlɩ tɩʋ dɩdɛɛrʋ wʋm nan mʋ wʋ́ taa te tɩga kadoŋ, ka na toŋi dɩ pwələ kalʋ na yɩ ka yɩra amʋ ŋwaanɩ tɩn, yɩ ka ta toŋi dɩ tɩga kalʋ na yɩ tɩʋ kʋm nyɩm tɩn. O laŋa kam maa wʋ́ zɩgɩ amʋ pwələ kam wa-zʋʋrɩ seeni ka vu ka yi tɩga kam maama wa-zʋʋrɩ seeni sisəm dɩm, yɩ ka zɩgɩ amʋ pwələ kam wa-puli seeni ka vu ka yi tɩga kam maama wa-puli seeni sisəm dɩm. Kʋ maa brɩ nɩ o tɩga kam wʋ́ taa dwara ka maɩ dɩ Yisɩrayɛlɩ dwiə yadonnə yam tɩga na maɩ te tɩn mʋ. 8 Tɩga kam kʋntʋ maa wʋ́ lɛɛrɩ ka taa yɩ dɩdɛɛrʋ wʋm nyɩm mʋ Yisɩrayɛlɩ tɩʋ kʋm nɩ. Kʋntʋ tɩn, a dɩdɛɛra bam daa bá taa jɩgɩ a nɔɔna bam ba bɛɛsa. Ba nan wʋ́ yagɩ Yisɩrayɛlɩ tiinə bam mʋ sɩ dwi maama joŋi dɩ tɩga dɩ taa te.
9 Yuutu Baŋa-Wɛ na tagɩ te tɩn mʋ tɩntʋ: Abam Yisɩrayɛlɩ tɩʋ dɩdɛɛra bam, á tiini á pini amʋ nɔɔna bam, yɩ á daarɩ á bɛɛsɩ-ba sɩ kʋ daanɩ. Nan yagɩ-na vuvugə tɩtʋŋa, sɩ á daarɩ á tʋŋɩ kʋlʋ na yɩ cɩga yɩ kʋ tɔgɩ cwǝŋǝ tɩn. Á daa yɩ vrɩ tɩga amʋ nɔɔna bam tee nɩ sɩ á daarɩ-ba á zɩgɩ bwəri. Yuutu Baŋa-Wɛ na tagɩ kʋlʋ tɩn mʋ kʋntʋ. 10 Abam na lagɩ á maŋɩ wǝǝnu á pa daanɩ, sɩ á kwe bwɛn sɩlʋ na yɩ cɩga cɩga tɩn á maŋɩ-tɩ. 11 Kʋrɩwɛ sɩlʋ á na wʋ́ taá maɩ á maŋɩ wəənu tɩn maŋɩ sɩ sɩ taa yɩ cɩga mʋ, nɩ kʋ na yɩ muni mʋ á jɩgɩ á maŋa, naa kʋ na yɩ na mʋ dɩ. Kʋrɩwaa biə fugə mʋ wʋ́ yi homɛɛrɩ dɩdʋa 12 Á nan na maŋɩ wǝǝnu sɩ á lwarɩ tɩ duuni na yɩ te tɩn, sɩ á maŋɩ gɛra kuni fiinle sɩ tɩ taa yɩ sɛkɛlɩ dɩdʋa. Sɛkɛla fusɩrdʋ (60) dɩ maa wʋ́ taa yɩ mine dɩdʋa.
Wɛ pɛɛra dɩ candi taanɩ
13 Pɛɛra yalʋ á na maŋɩ sɩ á kwe á pa Wɛ tɩn mʋ tɩntʋ: Maŋɩ-na á mɩnaa bwɛn fusɩrdʋ maama wʋnɩ sɩ á lɩ dɩdʋa. 14 Á ta wʋ́ ma kʋrɩwaa mʋ á maŋɩ á nugə kam, sɩ á lɩ bwɛn sɩle kʋrɩwaa biə fugə maama wʋnɩ. Kʋrɩwaa biə fugə yɩ bɩdwɩ mʋ dɩ homɛɛrɩ dɩdʋa 15 Kʋ ta na yɩ abam peeni sɩm na di gaa Yisɩrayɛlɩ tɩ-ywəŋə kam nɩ tɩn, á wʋ́ lɩ piə dɩdʋa mʋ sɩ biə-yale maama wʋnɩ. Ba maa wʋ́ kwe pɛɛra yam kʋntʋ ba ma ba kɩ wʋdiu pɛɛra, dɩ zwɛɛm pɛɛra, dɩ wəl-dɔnɔ pɛɛra kaanɩm, sɩ ba tɔgɩ ya ŋwaanɩ ba lɩ nɔɔna bam lwarɩm Wɛ yigə nɩ. Yuutu Baŋa-Wɛ na tagɩ kʋlʋ tɩn mʋ kʋntʋ. 16 Yisɩrayɛlɩ tiinə bam maama nan mʋ wʋ́ ja pɛɛra yam kʋntʋ ba ba ba kɩ ba tɩʋ kʋm dɩdɛɛrʋ wʋm jɩŋa nɩ. 17 Dɩdɛɛrʋ wʋm nan maŋɩ sɩ o beeri vara balʋ ba na wʋ́ kwe ba kɩ zwɛɛm pɛɛra, dɩ wʋdiu pɛɛra, dɩ wo-nyɔɔrʋ pɛɛra, nɩ nɔɔna bam na lagɩ ba di ba candi dwi dwi. Kʋ na yɩ ba can-dʋŋa candi, dɩ ba siun da yam, dɩdaanɩ candi yalʋ maama Yisɩrayɛlɩ dwi tiinə bam na maŋɩ sɩ ba di tɩn, wʋntʋ mʋ wʋ́ beeri lwarɩm saarɩm kaanɩm vara bam, dɩ wʋdiu pɛɛra yam, dɩ pɛɛra yalʋ ba na wʋ́ zwɛ ba pa Wɛ tɩn, dɩ wəl-dɔnɔ pɛɛra yam sɩ ba kwe ba maa kɩ kaanɩm ba pa Wɛ sɩ ba lɩ nɔɔna bam lwarɩm o yigə nɩ.
18 Yuutu Baŋa-Wɛ na tagɩ te tɩn mʋ tɩntʋ: Dayigə cana kam pulim dɛ dɩm nɩ, sɩ á kwe na-bɩa kalʋ na ba jɩgɩ gɛɛrɩ ka yɩra nɩ tɩn á ma á kwɛ Wɛ-digə kam. 19 Kaanɩm tu wʋm maa wʋ́ pwəri lwarɩm saarɩm kaanɩm varɩm wʋm jana wʋnɩ o ja o vu o taagɩ Wɛ-digə kam mancwəənu niə sɛn sɩm nɩ. O ta wʋ́ kwe-ba o kɩ bimbim dɩm tɩtarɩ seeni niə yana yam nɩ, dɩ Wɛ-digə tɩtarɩ kʋnkɔlɔ kʋm ni bwəəru tɩm dɩ yɩranɩ. 20 Kʋ ta na yǝni kʋ yi cana kam da yarpɛ dɛ dɩm, nmʋ nan ta wʋ́ kɩ kʋntʋ doŋ mʋ sɩ n ma n kwɛ wʋlʋ maama na cɔgɩ yɩ o wʋ paalɩ o kɩ lwarɩm, naa o wʋ lwarɩ kʋ ni nɩ tɩn. Kʋntʋ maa wʋ́ pa n fɔgɩ n kwɛ Wɛ-digə kam cullu tɩm seeni.
21 Pulim cana kam da fugə-yana dɛ dɩm nɩ, sɩ á di Pakɩ candiə kam. Kwe-na da yarpɛ á di-dɩ, sɩ da yam kʋntʋ nɩ á taá di dɩpɛ dɩlʋ na ba jɩgɩ dabɩlɩ dɩ wʋnɩ tɩn. 22 Candiə kam pulim dɛ dɩm nɩ, á tɩʋ dɩdɛɛrʋ wʋm wʋ́ beeri na-bɩa mʋ sɩ ba kwe-ka ba ma ba kɩ lwarɩm saarɩm kaanɩm o tɩtɩ ŋwaanɩ, dɩ tɩʋ kʋm nɔɔna bam maama ŋwaanɩ. 23 Da yarpɛ yam dɛ maama wʋnɩ o nan ta wʋ́ beeri nabɛ sɩrpɛ, dɩ pi-bɛ sɩrpɛ, tɩ maama na ba jɩgɩ gɛɛrɩ tɩ yɩra nɩ tɩn mʋ, sɩ ba kwe-tɩ ba kɩ zwɛɛm kaanɩm ba pa Baŋa-Wɛ. O ta maa wʋ́ beeri bʋbɔlɔ sɩ ba kwe-ka ba kɩ lwarɩm saarɩm kaanɩm. 24 O nan ta wʋ́ taa jɩgɩ muni mʋ o wǝli da sɩ ba ma ba kɩ wʋdiu pɛɛrɩ kaanɩm. Kʋʋ́ taa yɩ muni kʋrɩwaa bu dɩdʋa na-bɩa maama ŋwaanɩ, dɩ kʋrɩwaa bu dɩdʋa pi-bɛ maama ŋwaanɩ. Nugə bwɛn sɩna nan mʋ wʋ́ wǝli dɩ muni kʋrɩwaa maama.
25 Kʋ ta na yɩ candiǝ kalʋ na puli canɩ sɩrpɛ cana kam da fugə-yanu dɛ dɩm nɩ tɩnb, candiə kantʋ da yarpɛ yam dɛ maama wʋnɩ o daa wʋ́ beeri pɛɛra mʋ sɩ ba ma-ya ba kɩ lwarɩm saarɩm kaanɩm, dɩ zwɛɛm pɛɛrɩ kaanɩm, dɩ wʋdiu pɛɛrɩ kaanɩm, sɩ nugə dɩ wǝli tɩ wʋnɩ.