Wɛ diga kam cullu tɩdonnǝ
44
Nɔɔnʋ wʋm daa ma ja-nɩ pa dɩ́ vu dɩ́ yi Wɛ diga kam kʋnkɔlɔ ni dɩlʋ na jeeri wa-puli seeni tɩn. Dɩ nan ya pɩ mʋ. 2 Baŋa-Wɛ ma ta dɩ amʋ DƖ wɩ: «Ni dɩntʋ wʋ́ yɔɔrɩ dɩ pɩ mʋ dɩ taa zɩga. Ba daa bá pʋrɩ-dɩ. Nɔɔn-nɔɔnʋ daa bá tɔgɩ da o zʋ digə kam wʋnɩ, bɛŋwaanɩ, Baŋa-Wɛ dɩm na yɩ Yisɩrayɛlɩ tiinə Wɛ tɩn mʋ tɔgɩ ni dɩm kʋntʋ DƖ zʋ da. Kʋntʋ ŋwaanɩ mʋ dɩ wʋ́ pɩ dɩ taa zɩga maŋa maama. 3 Yisɩrayɛlɩ tɩʋ dɩdɛɛrʋ wʋm yɩranɩ mʋ jɩgɩ cwǝŋǝ sɩ o vu o jǝni ni dɩm digə dɩdʋa nɩ o di wʋdiu amʋ Baŋa-Wɛ yigə nɩ. O nan maŋɩ sɩ o tɔgɩ ni dɩm napɔrɔ kʋm nɩ mʋ o zʋ da, yɩ o daarɩ o tɔgɩ cwǝŋǝ kam kʋntʋ o nuŋi.»4 Nɔɔnʋ wʋm ma ja-nɩ pa dɩ́ tɔgɩ jazɩm baŋa seeni ni dɩm nɩ dɩ́ vu dɩ́ zaŋɩ Wɛ diga kam yigə nɩ. Amʋ ma nii a na Baŋa-Wɛ paarɩ-zulǝ yam na su Wɛ diga kam ni maama te tɩn. A ma tɩn a vi a yigə tɩga nɩ.
5 Baŋa-Wɛ ta ma ta dɩ amʋ DƖ wɩ: «Nabiinu, fɔgɩ n nii lanyɩranɩ, sɩ n cəgi kʋlʋ maama a na lagɩ a brɩ-m Baŋa-Wɛ digə kam cullu tɩm seeni tɩn sɩ n kwe-tɩ n kɩ n yuu nɩ. Ta maanɩ ka niə yam na yɩ te tɩn dɩ balʋ na jɩgɩ cwǝŋǝ sɩ ba taa tɔgɩ-ya ba zʋʋrɩ Wɛ digə kam ba daarɩ ba nuŋi tɩn. 6 Nan ta dɩ Yisɩrayɛlɩ dwi zwabani-nyɩna bam nɩ: ‹Yuutu Baŋa-Wɛ na tagɩ te tɩn mʋ tɩntʋ: Abam Yisɩrayɛlɩ dwi tiinə bam, yagɩ-na á kəm-balwaarʋ yam! 7 Abam jaanɩ vərə balʋ na yɔɔrɩ ba yǝri amʋ yɩ ba wʋbʋŋa kwaalɩ tɩn mʋ á ja á zʋ amʋ digə kam nɩ, nɩ á na yǝni á kwe wʋdiu pɛɛra, dɩ vara lara, dɩ ba jana á ma á kɩ kaanɩm á pa amʋ. Á ma da kʋ ŋwaanɩ á digimi amʋ Wɛ diga kam, yɩ á cɔgɩ ni dɩlʋ amʋ na goni dɩ abam tɩn. Á yǝni á kɩ kʋntʋ doŋ mʋ á wǝli á kəm-balwaarʋ yadonnə yam wʋnɩ. 8 Kʋ na yɩ pɛɛra yalʋ na yɩ lanyɩranɩ fasɩ amʋ ŋwaanɩ tɩn, abam wʋ fɔgɩ á nii ya baŋa nɩ. Á nan kwe vərə mʋ á pa ba jɩgɩ amʋ digə kam tɩtʋŋa ba tʋŋa ba pa abam. 9 Yuutu Baŋa-Wɛ nan na tagɩ te tɩn mʋ tɩntʋ: Vərə balʋ na yǝri amʋ tɩn ba jɩgɩ cwǝŋǝ sɩ ba zʋ amʋ digə kam nɩ, dɩ balʋ na zʋʋrɩ Yisɩrayɛlɩ tiinə bam tɩtarɩ nɩ tɩn dɩ.
10 Levi dwi tiinə bam badonnǝ dɛɛn yagɩ amʋ. Ba ma gwaanɩ Yisɩrayɛlɩ tiinə badaara bam wʋnɩ pa ba ywəri cwǝŋǝ ba daarɩ amʋ yɩ ba zuli jwǝnǝ. Ba lwarɩm dɩm kʋntʋ wʋ́ taa wʋ ba yuu nɩ sɩ ba na waarɩm. 11 Amʋ nan wʋ́ pa-ba cwǝŋǝ sɩ ba taa tʋŋɩ amʋ digə kam nɩ. Baá taa yɩrɩ Wɛ diga kam niə yam. Ba ta wʋ́ taa gʋɩ vara balʋ nɔɔna na jaanɩ ba tui sɩ ba maa kɩ zwɛɛm kaanɩm dɩ kaanɩm dwi maama tɩn, yɩ ba daarɩ ba taa zɩgɩ nɔɔna bam yigə nɩ ba wǝli-ba Wɛ zulə seeni. 12 Ba nan na tʋŋɩ ba pa Yisɩrayɛlɩ dwi tiinə bam jwǝnǝ kaanɩm baŋa nɩ mʋ yɩ ba pa ba cɔgɩ tɩn ŋwaanɩ, amʋ nan dugi dɩ a tɩtɩ yɩrɩ nɩ a wʋ́ waarɩ-ba ba lwarɩm dɩm ŋwaanɩ. Yuutu Baŋa-Wɛ na tagɩ kʋlʋ tɩn mʋ kʋntʋ. 13 A nan bá pa-ba cwǝŋǝ sɩ ba fʋfɔ ba twɛ amʋ sɩ ba taa tʋŋa kaanɩm tiinə tɩtʋŋa ba pa-nɩ. Ba ta yɩ twɛ wǝǝnu tɩlʋ a na pɔɔrɩ-tɩ sɩ tɩ taa yɩ lanyɩranɩ fasɩ amʋ ŋwaanɩ tɩn. Ba nan wʋ́ di ba cavɩɩra mʋ tɩtʋŋ-zɔɔna yalʋ ba na kɩ tɩn ŋwaanɩ. 14 Dɩ kʋ dɩ, a lagɩ a kwe Wɛ diga kam tɩtʋŋa dwi maama mʋ a kɩ bantʋ jɩŋa nɩ sɩ ba taa nii ya baŋa nɩ.
15 Kʋ daarɩ Levi dwi tiinə balʋ na yɩ kaanɩm tiinə yɩ ba nuŋi Sadoki digə kam nɩ tɩn, bantʋ mʋ yɔɔrɩ ba nii amʋ digə kam tɩtʋŋa baŋa nɩ ba pa-nɩ maŋa kalʋ Yisɩrayɛlɩ tiinə badaara bam na ywəri ba cwǝŋǝ nɩ tɩn. Bantʋ mʋ wʋ́ fʋfɔ ba twɛ amʋ sɩ ba taa tʋŋɩ a kaanɩm tɩtʋŋa yam, yɩ ba yǝni ba kwe vara lara, dɩ jana ba kɩ kaanɩm ba pa-nɩ. Yuutu Baŋa-Wɛ na tagɩ kʋlʋ tɩn mʋ kʋntʋ. 16 Bantʋ ta wʋ́ wanɩ ba zʋ amʋ digə kam wʋnɩ, sɩ ba kɩ kaanɩm amʋ bimbim dɩm baŋa nɩ, yɩ ba tʋŋɩ ba pa-nɩ. Bantʋ nan mʋ wʋ́ kɩ amʋ wʋbʋŋa yam na lagɩ te tɩn.
17 Ba na yǝni ba zʋ Wɛ-digə tɩtarɩ kʋnkɔlɔ kʋm wʋnɩ, ba maŋɩ sɩ ba kwe gar-fɩfalɩ mʋ ba zʋ. Kʋ daɩ sɩ ba zʋ peeni kʋrʋ gwaarʋ sɩ ba ma-tɩ ba tʋŋɩ Wɛ-digə kʋnkɔlɔ kʋm wʋnɩ, naa Wɛ-digə kam tɩtɩ wʋnɩ. 18 Ba maŋɩ sɩ ba yǝni ba kwe gar-fɩfalɩ mʋ ba ban ba yum tɩm, yɩ ba daarɩ ba vɔ gar-kuri ba tee nɩ. Kʋ nan daɩ sɩ ba vɔ ba tɩtɩ dɩ gwaarʋ tɩlʋ na wʋ́ pa ba taa cuuri dɩ luluŋu tɩn. 19 Ba nan na nuŋi Wɛ-digə kam nɩ sɩ ba vu ba yi dayigǝ kʋnkɔlɔ kʋm mɛ nɔɔna bam na gilimi tɩn, baá lɩ gwaarʋ tɩlʋ ba na zʋ ba maa tʋŋɩ Wɛ-digə kam tɩtʋŋa tɩn mʋ ba tiŋi di sɩlʋ na pɔɔrɩ Wɛ ŋwaanɩ tɩn wʋnɩ, sɩ ba laan joori ba kwe gwaarʋ tɩdonnǝ ba zʋ. Ba na kɩ kʋntʋ, nɔɔna bam bá wanɩ ba dwe ba gwaarʋ tɩm sɩ kʋ pa ba dɩ ji lanyɩranɩ fasɩ.
20 Wɛ kaanɩm tiinə bam nan daɩ sɩ ba ceeri ba yum, naa sɩ ba yagɩ ba yuuywe sɩ sɩ kɩ dɩdwaarʋ. Ba nan wʋ́ wanɩ ba dɔɔrɩ ba yuuywe sɩm ba yagɩ. 21 Ba wʋlʋwʋlʋ nan yɩ nyɔ sana yɩ o daarɩ o zʋ Wɛ-digə tɩtarɩ kʋnkɔlɔ kʋm wʋnɩ. 22 Ba daɩ sɩ ba di kadənə ba ma kɩ ba kaana, naa kaana balʋ dɩ ba banna na yagɩ daanɩ tɩn. Bantʋ nan maŋɩ sɩ ba di Yisɩrayɛlɩ tiinə bukwa balʋ na yǝri baara tɩn yɩranɩ mʋ, naa kaanɩm tiinə badonnǝ kadənə. 23 Bantʋ tɩtʋŋɩ mʋ maŋɩ sɩ ba brɩ a nɔɔna bam sɩ ba taa waɩ ba pɔɔrɩ wǝǝnu tɩlʋ na yɩ lanyɩranɩ fasɩ tɩn, dɩ tɩlʋ na wʋra dɛ maama tɩtʋŋa ŋwaanɩ tɩn daanɩ. Ba ta wʋ́ pa ba taa waɩ ba pɔɔrɩ wǝǝnu tɩlʋ na maŋɩ dɩ Wɛ cullu tɩm tɩn, dɩ tɩlʋ na jɩgɩ digiru cullu tɩm seeni tɩn daanɩ.
24 Taanɩ na wʋ amʋ nɔɔna bam laŋa nɩ, kʋ yɩ kaanɩm tiinə bam mʋ wʋ́ kwe amʋ niə yam ba ma bʋrɩ cɩga ba tɩtarɩ nɩ. Ba ta wʋ́ nii sɩ a niə yam na brɩ sɩ nɔɔna bam taa di candi yalʋ tɩn sɩɩnɩ ya taa tʋŋa. Ba ta wʋ́ taa nɩgɩ a siun da yam, sɩ nɔɔna taa paɩ ya yɩ ya yɩra.
25 Kaanɩm tu daɩ sɩ o twɛ tʋ yɩra, bɛŋwaanɩ, o na dwe tʋʋ yɩra, kʋʋ́ pa o digimi o tɩtɩ cullu tɩm seeni mʋ. Kʋ nan na yɩ o ko naa o nu mʋ tɩga, naa o biə wʋnɩ dɩdʋa, naa o zɩmbaarʋ, naa o nyaanɩ, naa o nakɔ ta na wʋ zʋ barʋ mʋ na tɩga, o jɩgɩ cwǝŋǝ sɩ o dwe kʋ tu yɩra yam. 26 O nan na dwe tʋʋ yɩra, o laan wʋ́ kwɛ o tɩtɩ sɩ o joori o maŋɩ dɩ cullu tɩm. O na kɩ kʋntʋ o ti, sɩ o daarɩ o pa da yarpɛ kɛ. 27 O laan jɩgɩ cwǝŋǝ sɩ o zʋ Wɛ-digə kam tɩtarɩ kʋnkɔlɔ kʋm wʋnɩ sɩ o tʋŋɩ digə kam nɩ. Dɛ dɩm kʋntʋ nɩ oó kɩ lwarɩm saarɩm kaanɩm o tɩtɩ ŋwaanɩ. Yuutu Baŋa-Wɛ na tagɩ kʋlʋ tɩn mʋ kʋntʋ.
28 Yɩ pɔɔrɩ-na Yisɩrayɛlɩ tɩga kam wʋnɩ á pa kaanɩm tiinə bam sɩ ba taa te. Amʋ Baŋa-Wɛ tɩtɩ mʋ wʋ́ taa yɩ ba təri. Amʋ tɩtɩ mʋ yɩ wʋlʋ na maŋɩ a pa-baa. 29 Kʋ na yɩ te tɩn, wʋdiu pɛɛra, dɩ lwarɩm saarɩm pɛɛra, dɩ lwarɩm jɩnɩ pɛɛra, dɩ wǝǝnu tɩlʋ maama Yisɩrayɛlɩ tiinə bam na jaanɩ ba tui ba kɩ amʋ jɩŋa nɩ tɩn yɩ bantʋ nyɩm mʋ. 30 Abam wʋdiiru tɩlʋ na loori yigə tɩ kɩ yɩ tɩ lamma tɩn, dɩdaanɩ á Wɛ-təri pɛɛra dwi dwi wʋ́ taa yɩ kaanɩm tiinə bam nyɩm mʋ.b Á ta wʋ́ kwe mun-bwe dɩlʋ á na sɩŋɩ á pɔɔrɩ sɩ á ma á fɔgɩ dɩpɛ tɩn á pa kaanɩm tiinə bam, sɩ Wɛ yu-yoŋo taa wʋ á sam dɩm baŋa nɩ. 31 Kaanɩm tiinə ba jɩgɩ cwǝŋǝ sɩ ba di woŋo kʋlʋ na tɩgɩ kʋ tɩtɩ tʋʋnɩ, naa vara na jaanɩ-kʋ ba tʋrɩ tɩn. Kʋ na maŋɩ kʋ yɩ zuŋə mʋ, naa varɩm mʋ dɩ, ba yɩ di-tɩ.