Wɛ paarɩ-zulǝ yam taanɩ
43
Nɔɔnʋ wʋm ma ja-nɩ pa dɩ́ vu Wɛ diga kam ni dɩlʋ na jeeri wa-puli seeni tɩn. 2 A ma nii a na nɩ Yisɩrayɛlɩ tiinə Wɛ paarɩ-zulǝ yam zɩgɩ wa-puli seeni mʋ kʋ maa bɩɩna. Wɛ na dwanɩ DƖ kwǝri te tɩn, kʋ nyɩ dɩ nɩnɩʋ dʋ-fara na cuuri yɩ tɩ wuuri te tɩn mʋ. Tɩga baŋa je maama dɛɛn ma li dɩ DƖ paarɩ-zulǝ yam pooni. 3 Wɛ na lɩ wǝǝnu tɩlʋ DƖ brɩ-nɩ tɩn yɔɔrɩ tɩ nyɩ dɩ vɩɩra yalʋ a ya na nɛ yɩ DƖ ba sɩ DƖ cɔgɩ Zeruzalɛm tɩʋ kʋm tɩn mʋ. Tɩ maa nyɩ dɩ yalʋ a ya na nɛ Kebarɩ bugə kam ni nɩ tɩn. Amʋ ma tɩn a vin a yibiyə tɩga nɩ.a 4 Baŋa-Wɛ paarɩ-zulǝ yam ma tɔgɩ ni dɩlʋ na jeeri wa-puli seeni tɩn nɩ kʋ zʋ Wɛ diga kam wʋnɩ. 5 Viub laan ma fuli kʋ gɔ-nɩ kʋ zɩgɩ wɛɛnɩ. Kʋ ma ja-nɩ kʋ ja zʋ Wɛ diga kam tɩtarɩ kʋnkɔlɔ kʋm nɩ, yɩ amʋ dɩ na nɩ Baŋa-Wɛ paarɩ-zulǝ yam mʋ yɔɔrɩ kʋ su Wɛ diga kam ni maama.c6 Nɔɔnʋ wʋm na zɩgɩ a saŋa nɩ kʋntʋ tɩn, mʋ a ni nɔɔnʋ wʋdoŋ na zɩgɩ Wɛ diga kam wʋnɩ o ŋɔɔnɩ dɩ amʋ. 7 Kʋ tu ma ta o wɩ: «Nabiinu, jǝgǝ kantʋ mʋ yɩ amʋ paarɩ jangɔŋɔ na wʋ́ cwi mɛ tɩn. Ka wʋ́ taa yɩ amʋ jǝŋǝ je. Amʋ wʋ́ maŋɩ yo seeni mʋ sɩ a dɩ Yisɩrayɛlɩ tiinə bam taa zʋʋrɩ daanɩ sɩ kʋ taa ve maŋa kalʋ na ba ti tɩn. Yisɩrayɛlɩ dwi tiinə bam, dɩ ba pwa bam maama daa bá tʋŋɩ ba cɔgɩ amʋ yɩrɩ dɩm na yɩ lanyɩranɩ fasɩ tɩn, dɩ ba na kaagɩ ba zuli jwə-yɔɔrʋ dɩ ba pwa balʋ na tɩgɩ tɩn yibeelǝ yam. 8 Ba pwa bam dɛɛn lɔgɩ ba sɔ-fwaarʋ mʋ pa tɩ yǝri amʋ tɩtɩ digə kam kəbrə nɩ. Kʋ nyɩ dɩ kəbrə yɩranɩ mʋ cɩgɩ amʋ dɩ bantʋ daanɩ. Ba ma tɔgɩ ba kəm-balwaarʋ yam ŋwaanɩ ba cɔgɩ amʋ yɩrɩ dɩm na yɩ lanyɩranɩ fasɩ tɩn. Kʋntʋ ma pa a tɔgɩ a ban-lʋm dɩm baŋa nɩ a yɔɔrɩ a cɔgɩ-ba. 9 Ba nan maŋɩ sɩ ba yagɩ jwə-yɔɔrʋ kaanɩm, sɩ ba daarɩ ba yagɩ ba pwa yibeelǝ yam zulə. Ba na kɩ kʋntʋ, amʋ laan wʋ́ taa zʋʋrɩ ba tɩtarɩ nɩ maŋa maama.
10 Nabiinu, fɔgɩ n maŋɩ Wɛ diga kam yɩra cɩbarɩ na yɩ te tɩn n brɩ Yisɩrayɛlɩ tiinə bam. Kʋ maa wʋ́ pa cavɩɩra ja-ba ba lwarɩm kikiǝ ŋwaanɩ. Pa ba na ka zɩga kam maŋɩm na yɩ te tɩn. 11 Cavɩɩra maa na jaanɩ-ba ba kikiə yam maama ŋwaanɩ, sɩ n pa ba lwarɩ Wɛ diga kam na zɩga te, dɩ ka niə yam, dɩ ka maŋɩm dɩm maama na yɩ te tɩn. Ta pa ba lwarɩ ka di sɩm na kikili sɩ lɔ te tɩn, sɩ n daarɩ n ta dɩ ba ka cullu tɩm na brɩ kʋlʋ tɩn. Nan pʋpʋnɩ wǝǝnu tɩm kʋntʋ maama n tiŋi sɩ ba maanɩ Wɛ diga kam nyɩnyʋgʋ na yɩ te tɩn, yɩ ba daarɩ ba taa tɔgɩ ka cullu tɩm.
12 Wɛ ni dɩlʋ na wʋra DƖ digə kam ŋwaanɩ tɩn mʋ tɩntʋ: Piu yuu je sɩlʋ ka na lɔgɩ tɩn dɩ pwələ kalʋ maama na kaagɩ da tɩn tiini ka yɩ lanyɩranɩ fasɩ mʋ Wɛ ŋwaanɩ. Cɩga tɩn, Wɛ ni dɩlʋ na wʋra o digə kam ŋwaanɩ tɩn mʋ kʋntʋ.»
Kaanɩm bimbim dɩm
13 Kaanɩm bimbim dɩm maŋɩm na yɩ te tɩn mʋ tɩntʋ, nɩ kʋ na tɔgɩ kantɩa ni maŋɩm lanyɩranɩ. Kʋ nan yɩ dayigǝ nʋa maŋɩm mʋ toŋi kantɩa ni maŋɩm dɩm wʋnɩ. Bimbim dɩm kuri seeni goŋo mʋ tigi da, kʋ na luunə kʋ yi kantɩa ni maŋɩm, yɩ kʋ ta yalma sɩ kʋ yi kantɩa ni maŋɩm. Dɩ maa jɩgɩ niə na kaagɩ dɩ maama pa ya yalma sɩ kʋ maŋɩ dɩ dayigǝ nʋa maŋɩm kuni bɩtɔ. Bimbim dɩm wɛ-baŋa maŋɩm na yɩ te tɩn mʋ tɩntʋ: 14 Kʋ na zɩgɩ dɩ kuri seeni goŋo kʋm nɩ sɩ kʋ taa diini kʋ yi dɩ tɩtarɩ fra kam tɩn, bimbim dɩm yɩ kantɩa ni maŋɩm kuni bɩle mʋ Wɛ jazɩm baŋa seeni. Fra kam tɩtɩ yalɩm baŋa maŋɩm maa yɩ kantɩa ni maŋɩm dɩdʋa. Kʋ maa na zɩgɩ tɩtarɩ fra kam nɩ sɩ kʋ taa diini kʋ yi jazɩm baŋa seeni fra kam tɩn, kʋ yɩ kantɩa ni maŋɩm kuni bɩna mʋ Wɛ baŋa nɩ, yɩ fra kam kʋntʋ dɩ yɩ kantɩa ni maŋɩm dɩdʋa ka yalɩm baŋa nɩ. 15 Bimbim dɩm baŋa kam mɛ seeni ba na zwɛ kaanɩm dɩm tɩn maa yɩ kantɩa ni maŋɩm kuni bɩna Wɛ baŋa nɩ sɩ kʋ wǝli da. Nyɩa yana ta maa zɩgɩ dɩ niə yam sɛn sɩna sɩm nɩ. 16 Bimbim dɩm baŋa kam mɛ ba na zwɛ kaanɩm dɩm tɩn sɛn sɩm maama maɩ da sɩ maɩ da. Kʋ maa yɩ kantɩa ni maŋɩm fugə-bɩle dɩdwarɩm baŋa nɩ dɩ kʋ yalɩm baŋa nɩ. 17 Bimbim dɩm tɩtarɩ seeni maa yɩ kantɩa ni maŋɩm kuni fugə-bɩna dɩ dɩdwarɩm baŋa nɩ, dɩ dɩ yalɩm baŋa nɩ. Dɩ maa jɩgɩ ni na yɩ kantɩa ni maŋɩm cicoro yalɩm baŋa nɩ. Dɩ fra kam yalɩm nan maŋɩ dɩ kantɩa ni maŋɩm dɩdʋa kʋ ja kaagɩ ka maama. Natən-yiə dɛɛn diini bimbim dɩm wa-puli seeni ya yi dɩ jazɩm baŋa seeni.
18 Baŋa-Wɛ ma ta dɩ amʋ DƖ wɩ: «Nabiinu, Yuutu Baŋa-Wɛ na tagɩ te tɩn mʋ tɩntʋ: Ba na lɔgɩ kaanɩm bimbim dɩm, cullu tɩlʋ ba na wʋ́ tɔgɩ sɩ ba zwɛ vara, ba daarɩ ba kwe ba jana bam ba miisi bimbim dɩm yɩra nɩ tɩn mʋ tɩntʋ: 19 Nmʋ wʋ́ kwe na-bɩa n pa kaanɩm tiinə bam sɩ ba ma ba kɩ lwarɩm saarɩm kaanɩm. Bantʋ yɩ Sadoki digə kam tiinə mʋ na jɩgɩ cwǝŋǝ sɩ ba fʋfɔ ba twɛ amʋ te sɩ ba taa tʋŋa ba pa-nɩ tɩn. Yuutu Baŋa-Wɛ na tagɩ kʋlʋ tɩn mʋ kʋntʋ. 20 Nmʋ laan ma n wʋ́ pwəri jana bam wʋnɩ sɩ n kwe-ba n taagɩ bimbim dɩm nyɩa yana yam nɩ, dɩdaanɩ dɩ tɩtarɩ seeni niə yana yam nɩ, dɩ fra kalʋ na kaagɩ bimbim dɩm maama tɩn nɩ. Nmʋ wʋ́ tɔgɩ cwǝŋǝ kam kʋntʋ mʋ sɩ n fɔgɩ n kwɛ bimbim dɩm kaanɩm tɩtʋŋa yam ŋwaanɩ. 21 Nmʋ ta ma n wʋ́ ja na-bɩa kam n na mɛ n kɩ lwarɩm saarɩm kaanɩm dɩm tɩn nwana n vu n zwɛ jǝgǝ kalʋ na maŋɩ yɩ ka wʋ dáa dáa dɩ Wɛ diga kam tɩtɩ tɩn nɩ.
22 Tɩga na pʋʋrɩ, n ta wʋ́ ja bʋbɔlɔ kalʋ na ba jɩgɩ gɛɛrɩ ka yɩra nɩ tɩn mʋ n ba sɩ n kwe-ka n kɩ lwarɩm saarɩm kaanɩm. Kɩ kʋntʋ n ma n fɔgɩ n kwɛ bimbim dɩm Wɛ ŋwaanɩ, nɩ n na kɩ te dɩ na-bɩa kam tɩn. 23 Nmʋ na kwɛ-dɩ n ti, n laan wʋ́ lɩ na-bɩa dɩ pi-bɩa mʋ n vara bam wʋnɩ, tɩ na ba jɩgɩ gɛɛrɩ tɩ yɩra nɩ tɩn. 24 Nmʋ wʋ́ kwe-tɩ n kaanɩ Baŋa-Wɛ yigə nɩ mʋ. Wɛ kaanɩm tiinə bam dɩ wʋ́ kwe yɛ ba zɩzagɩ vara bam nwana yam baŋa nɩ, yɩ ba daarɩ ba zwɛ-ya ba pa Baŋa-Wɛ.
25 Kwe da yarpɛ sɩ dɛ maama nɩ, n ja bʋbɔlɔ n ba n ma n kɩ lwarɩm saarɩm kaanɩm. Nmʋ ta wʋ́ beeri na-bɩa dɩ pi-bɩa mʋ sɩ n ma tɩntʋ dɩ n kɩ kaanɩm dɩm. Tɩ nan ba maŋɩ sɩ tɩ taa jɩgɩ gɛɛrɩ tɩ yɩra yam nɩ. 26 Ba nan wʋ́ kwe da yarpɛ mʋ ba ma ba kwɛ bimbim dɩm Wɛ ŋwaanɩ. Ba maa wʋ́ tɔgɩ cwǝŋǝ kam kʋntʋ ba pɔɔrɩ-dɩ ba zɩgɩ dáa nɩ kaanɩm tɩtʋŋa yam ŋwaanɩ. 27 Da yam kʋntʋ na lagɩ ya ti, pa da nana dɛ dɩm yi sɩ kʋ taa veǝ, kaanɩm tiinə bam maŋɩ sɩ ba kwe abam zwɛɛm pɛɛra yam, dɩ á wəl-dɔnɔ pɛɛra yam ba ma kɩ kaanɩm ba pa-nɩ bimbim dɩm baŋa nɩ. Amʋ laan maa wʋ́ sɛ sɩ á taá yɩ a nɔɔna bam. Amʋ Yuutu Baŋa-Wɛ na tagɩ kʋlʋ tɩn mʋ kʋntʋ.»