Kaanɩm tiinə bam di
42
Nɔɔnʋ wʋm daa ma ja-nɩ o vu jazɩm baŋa seeni sɩ dɩ́ zʋ dayigǝ kʋnkɔlɔ kʋm. O ma brɩ-nɩ digə kalʋ na lɔgɩ ka yǝri Wɛ diga tɩtarɩ kʋnkɔlɔ kəbrə kam na jeeri jazɩm baŋa seeni tɩn. 2 Digə kam ni dɛɛn wʋ jazɩm baŋa seeni mʋ. Ka maŋɩm dɩm maa yɩ kantɩa ni kuni bi dɩdwarɩm baŋa nɩ. Ka ta yɩ kantɩa ni maŋɩm fiinnu mʋ yalɩm baŋa nɩ. 3 Pwələ maa wʋ ka yigə nɩ, nɩ nɔɔnʋ na wʋ tɩtarɩ kʋnkɔlɔ kʋm seeni. Pwələ kam na yalma te tɩn yɩ kantɩa ni maŋɩm fiinle mʋ. Digə kam saŋa kadoŋ kam ma jeeri pwələ kalʋ na tigi dayigǝ kʋnkɔlɔ kʋm nɩ tɩn. Ka maa jɩgɩ di na lɔgɩ gɩnɩ sɩtɔ maŋɩ sɩ daŋɩ da-baŋa nɩ tɩn. 4 Di sɩm yigə nɩ tɩtarɩ cwǝŋǝ mʋ tigi da. Ka maa yɩ kantɩa ni maŋɩm fugə ka yalɩm baŋa nɩ, dɩ kantɩa ni maŋɩm kuni bi ka dɩdwarɩm baŋa nɩ. Di sɩm niə yam yɔɔrɩ ya jeeri jazɩm baŋa seeni mʋ. 5 Di sɩm na lɔgɩ te tɩn, sɩlʋ na wʋ jazɩm baŋa seeni tɩn muri sɩlʋ na wʋ tɩtarɩ dɩm seeni tɩn mʋ. Sɩlʋ dɩ maa na wʋ tɩtarɩ nɩ tɩn dɩ daa maa muri sɩlʋ na wʋ kuri dɩm seeni tɩn. 6 Di sɩm na lɔgɩ gɩnɩ sɩtɔ da-baŋa nɩ kʋntʋ tɩn, ba wʋ cwi ywə yalʋ na wʋ́ təli-sɩ tɩn, nɩ kʋnkwallʋ tɩm di sɩdonnǝ na jɩgɩ te tɩn. Kʋ ma pa di sɩlʋ na lɔgɩ sɩ zɩgɩ baŋa nɩ tɩn muri sɩlʋ na wʋ kuri dɩm nɩ tɩn. 7 Kəbrə wʋdoŋ maa zɩgɩ ka maŋɩ dɩ di sɩm, dɩ dayigǝ kʋnkɔlɔ kʋm. Ka yɩ kantɩa ni maŋɩm fiinnu mʋ dɩdwarɩm baŋa nɩ. 8 Di sɩlʋ gɩna na yǝri dayigǝ kʋnkɔlɔ kʋm tɩn maŋɩm yɩ kantɩa ni fiinnu mʋ dɩdwarɩm baŋa nɩ. Gɩna kalʋ na lɔgɩ Wɛ diga kam təŋə nɩ tɩn dɩdwarɩm maŋɩm maa yɩ kantɩa ni maŋɩm bi. 9 Di sɩlʋ na wʋ kuri seeni tɩn jɩgɩ ni na wʋ sɩ wa-puli seeni, nɩ nɔɔnʋ na nuŋi dayigǝ kʋnkɔlɔ je sɩm nɩ yɩ kʋ tu maa zʋʋrɩ sɩ wʋnɩ. 10 Ni dɩm kʋntʋ maa wʋ kʋnkɔlɔ kəbrə kam na puli mɛ tɩn nɩ.Di sɩdonnǝ maa wʋ Wɛ diga dayigǝ kʋnkɔlɔ kʋm jagwiə seeni, yɩ sɩ yɔɔrɩ sɩ jeeri digə kadoŋ kam. 11 Tɩtarɩ cwǝŋǝ mʋ tigi sɩ yigə nɩ. Di sɩm kʋntʋ nan yɔɔrɩ sɩ nyɩ dɩ sɩlʋ na wʋ jazɩm baŋa seeni tɩn mʋ. Sɩ maŋɩm dɩm maama yɔɔrɩ dɩ yɩ bɩdwɩ dɩ jazɩm baŋa seeni di sɩm na yɩ te tɩn mʋ. Sɩ niə yam dɩ maa yɩ bɩdwɩ dɩ niə yalʋ na wʋ jazɩm baŋa seeni di sɩm nɩ tɩn. 12 Jagwiə di sɩm maa jɩgɩ ni dɩlʋ na jeeri wa-puli seeni sɩ kʋ maŋɩ dɩ kəbrə kam na puli mɛ seeni ka lɔ ka zɩgɩ tɩn.
13 Nɔɔnʋ wʋm laan ma ta dɩ amʋ o wɩ: «Di sɩntʋ na wʋ Wɛ diga tɩtarɩ kʋnkɔlɔ kʋm jazɩm baŋa seeni, dɩ sɩlʋ na wʋ kʋ jagwiə seeni tɩn yɩ lanyɩranɩ fasɩ mʋ. Daanɩ mʋ Baŋa-Wɛ kaanɩm tiinə balʋ na bwələ dɩ DƖ tɩn wʋ́ yǝni ba di kaanɩm wʋdiu kʋlʋ na tiini kʋ yɩ lanyɩranɩ fasɩ tɩn. Ba maa wʋ́ tiŋi wǝǝnu tɩlʋ na yɩ lanyɩranɩ fasɩ tɩn di sɩm kʋntʋ wʋnɩ, nɩ kʋ na yɩ wʋdiu kaanɩm ŋwaanɩ, dɩ lwarɩm saarɩm kaanɩm, dɩ lwarɩm jɩnɩ kaanɩm ŋwaanɩ. Bɛŋwaanɩ, di sɩm yɩ lanyɩranɩ fasɩ mʋ Wɛ ŋwaanɩ. 14 Kaanɩm tiinə bam na yǝni ba zʋ Wɛ diga kam tɩtɩ, ba daa bá wanɩ ba nuŋi ka je sɩm nɩ, sɩ ba zʋ dayigǝ kʋnkɔlɔ kʋm, yɩ ba wʋ lɩ ba kaanɩm gwaarʋ tɩm ba tiŋi di sɩm kʋntʋ wʋnɩ. Ba maa wʋ́ yǝni ba kwe gwaarʋ tɩdonnǝ ba zʋ, sɩ ba laan wanɩ ba yi nɔɔna bam na wʋ mɛ seeni tɩn.»
15 O na maŋɩ woŋo kʋlʋ dwi maama na wʋ Wɛ diga je sɩm nɩ o ti tɩn, mʋ o jaanɩ-nɩ pa dɩ́ tɔgɩ wa-puli seeni ni dɩm dɩ́ nuŋi pooni. O laan ma maŋɩ pwələ kalʋ na kaagɩ daanɩ maama tɩn. 16 O kwe kasʋgʋ kʋlʋ o ya na jɩgɩ o maŋɩ wǝǝnu tɩm maama tɩn mʋ o maa maŋɩ wa-puli seeni saŋa kam. Ka yɩ kantɩa ni maŋɩm biə-yanu mʋ. 17 O ta ma kwe kasʋgʋ kʋm o maŋɩ jazɩm baŋa seeni saŋa kam. Ka dɩ yɩ kantɩa ni maŋɩm biə-yanu mʋ. 18 O daa ma maŋɩ jagwiə seeni saŋa kam. Ka dɩ yɩ kantɩa ni maŋɩm biə-yanu mʋ. 19 O ma pipiri o vu o maŋɩ wa-zʋʋrɩ seeni saŋa kam. Ka dɩ maa yɩ kantɩa ni maŋɩm biə-yanu. 20 O dɛɛn tɔgɩ cwǝŋǝ kam kʋntʋ mʋ o maŋɩ Wɛ diga kam je sɩm dɩ kəbrə kalʋ na kaagɩ-ka tɩn. Ka sɛn sɩm maɩ da sɩ maɩ da mʋ, kantɩa ni maŋɩm kuni biə-yanu yanu. Kəbrə kam dɛɛn lɔgɩ ka cɩ Wɛ diga kam, sɩ kʋ pɔɔrɩ wǝǝnu tɩlʋ na yɩ lanyɩranɩ fasɩ tɩn, dɩ tɩlʋ na wʋra dɛ maama tɩtʋŋa ŋwaanɩ tɩn daanɩ mʋ.