Ezekɩyɛlɩ 41

Nɔɔnʋ wʋm laan ma ja-nɩ o zʋ di-laa kʋm. O ma maŋɩ taala yale yam na wʋ ka ni dɩm sɛn sɩle sɩm nɩ tɩn. Ya dɩdʋa na lirǝ te tɩn yɩ kantɩa ni maŋɩm bɩrdʋ mʋ. 2 Ka ni dɩm maŋɩm yɩ kantɩa ni kuni fugə mʋ. Ka sɛn kabri sɩm maa yɩ kantɩa ni maŋɩm bɩnu bɩnu saŋa maama baŋa nɩ. O ta ma maŋɩ digə kam tɩtɩ. Ka dɩdwarɩm baŋa maŋɩm maa yɩ kantɩa ni maŋɩm kuni fiinna. Ka yalɩm baŋa maŋɩm dɩ maa yɩ kantɩa ni maŋɩm kuni fiinle. 3 O laan ma vu o zʋ di-laa cɩga cɩga kam. O ma maŋɩ taala yale yam na wʋ ka ni dɩm sɛn sɩle sɩm nɩ tɩn. Ya dɩdʋa dɩdʋa maa yɩ kantɩa ni maŋɩm bɩle. Ni dɩm tɩtɩ yɩ kantɩa ni maŋɩm kuni bɩrdʋ mʋ yalɩm baŋa nɩ. Ka sɛn kabri sɩm maa yɩ kantɩa ni maŋɩm bɩrpɛ bɩrpɛ. 4 O laan ma maŋɩ di-laa cɩga cɩga kam tɩtɩ, dɩ ka na lɛɛnɩ ka yi di-laa kʋm tɩn. Kʋ maa yɩ kantɩa ni maŋɩm fiinle dɩdwarɩm baŋa nɩ. Kʋ ta yɩ kantɩa ni maŋɩm fiinle mʋ yalɩm baŋa nɩ. O ma ta dɩ amʋ o wɩ: «Digə kantʋ mʋ tiini ka yɩ lanyɩranɩ fasɩ Wɛ ŋwaanɩ.»

5 Nɔɔnʋ wʋm laan ma maŋɩ Wɛ diga kəbrə kam ni na yɩ te tɩn. Ka na lirǝ te tɩn yɩ kantɩa ni maŋɩm bɩrdʋ mʋ. Di-balwa balʋ na lɔgɩ ba yǝri Wɛ diga kəbrə kam pooni yigə seeni tɩn yɩ kantɩa ni maŋɩm bɩna bɩna mʋ yalɩm baŋa nɩ. 6 Di-balwa bam kʋntʋ lɔgɩ ba daŋɩ da-baŋa mʋ kuni bɩtɔ. Sɩ maa yɩ di fiintɔ mʋ gɩna maama nɩ. Ba nan na lɔgɩ di-kamunu kʋm kəbrə kam te tɩn, ba pɔɔrɩ mɛ di-balwa be sɩm na wʋ́ pəni da tɩn mʋ, sɩ ba daa yɩ lu bɔɔna kəbrə kam yɩra nɩ ba lɔ. 7 Di sɩlʋ na lɔgɩ sɩ daŋɩ baŋa gɩnɩ sɩm nɩ tɩn yalma sɩ dwe sɩlʋ na wʋ kuri dɩm nɩ tɩn, sɩ kʋ tɔgɩ Wɛ diga kəbrə kam na yɩ te kʋ zɩgɩ tɩga kam seeni kʋ taa diini jazɩm baŋa seeni tɩn. Natən-yiə mʋ zɩgɩ kuri gɩnɩ sɩm nɩ ya dɔɔlɩ ya tɔgɩ tɩtarɩ gɩnɩ sɩm seeni, ya kɛ ya di jazɩm baŋa seeni gɩnɩ di sɩm.

8 Amʋ ma nii a na nɩ ba lɔgɩ bimbim mʋ na kaagɩ Wɛ diga kam maama. Di-balwa bam dɛɛn cwi bimbim dɩm baŋa nɩ mʋ, yɩ dɩ maŋɩm dɩm yɩ kasʋgʋ dɩdʋa. Kantɩa ni maŋɩm kuni bɩrdʋ mʋ kʋntʋ. 9 Di-balwa bam kabri sɩm lilirim maŋɩm yɩ kantɩa ni kuni bɩnu mʋ. Kʋ daarɩ, pwələ kalʋ na tigi Wɛ diga kam di-balwa bam, 10 dɩdaanɩ kʋnkɔlɔ kʋm di sɩdonnǝ sɩm laŋa nɩ tɩn ya yɩ kantɩa ni maŋɩm fiinle mʋ ka yalɩm baŋa nɩ, sɩ kʋ ja kʋ kaagɩ Wɛ-digə kam ni maama. 11 Niə mʋ wʋra ya na tɔgɩ ya zʋʋrɩ di-balwa bam wʋnɩ, nɩ nɔɔnʋ na zɩgɩ pwələ kam nɩ o bɩɩnɩ da. Ni dɩdʋa zɩgɩ Wɛ diga kam jazɩm baŋa seeni mʋ, yɩ dɩdoŋ dɩm zɩgɩ ka jagwiə seeni. Pwələ kalʋ na daarɩ tɩn yalɩm baŋa maŋɩm dɩm laan maa yɩ kantɩa ni maŋɩm bɩnu kʋ kaagɩ Wɛ diga kam maama.

12 Digə kadoŋ dɛɛn wʋ Wɛ diga kam wa-zʋʋrɩ seeni ka na jeeri kʋnkɔlɔ kʋm. Ka maa yɩ kantɩa ni maŋɩm kuni fusɩrpɛ yalɩm baŋa nɩ. Ka kəbrə kam lilirim maŋɩm maa yɩ kantɩa ni maŋɩm bɩnu sɩ kʋ kaagɩ kʋ pu. Ka dɩdwarɩm baŋa maŋɩm maa yɩ kantɩa ni kuni funʋgʋ.

13 Nɔɔnʋ wʋm laan ma maŋɩ Wɛ diga kam. Ka yɩ kantɩa ni maŋɩm bi mʋ dɩdwarɩm baŋa nɩ. Wɛ diga kʋnkɔlɔ kʋm pwələ yalɩm maŋɩm dɩ maa yɩ kantɩa ni maŋɩm bi, sɩ kʋ vu kʋ yi digə kam dɩ ka kəbrə kam maama. 14 Wɛ diga kʋnkɔlɔ pwələ kalʋ na wʋ ka wa-puli seeni tɩn, dɩ ka yigə kam seeni dɩ maa yɩ kantɩa ni maŋɩm bi yalɩm baŋa nɩ.

15 Nɔɔnʋ wʋm daa ma maŋɩ digə kalʋ na wʋ Wɛ diga kam wa-zʋʋrɩ seeni yɩ ka jeeri kʋnkɔlɔ kʋm tɩn, kʋ wǝli dɩ di sɩlʋ na yǝri ka sɛn sɩle sɩm tɩn. Kʋ maama maa yɩ kantɩa ni maŋɩm kuni bi.

Kʋ ta na yɩ Wɛ diga napɔrɔ kʋm, dɩ ka di-laa kʋm, dɩdaanɩ di-laa cɩga cɩga kam, 16 ba kwe da-pɩlwarʋ mʋ ba kwǝli di sɩtɔ sɩm maama wʋ kəbrə kam, kʋ zɩgɩ ka tɩga kam seeni sɩ kʋ yi takwəəru tɩm na wʋ mɛ tɩn. Di sɩm niə yam, dɩ sɩ takwəəru tɩm, dɩdaanɩ sɩ gugwəəru tɩm maama mʋ ba fɔgɩ ba kwɛ kʋntʋ doŋ ba zɩgɩ. 17 Kʋ ta na yɩ ni dɩlʋ na zʋʋrɩ di-laa kʋm tɩn, ba ma kwɛ kəbrə kalʋ na wʋ dɩ baŋa kam seeni tɩn. Ba ma gɔgɩrɩ Wɛ diga kam wʋ kabri sɩm maama. 18 Kʋ nan yɩ Serubɛn dɩ kʋrʋ tiu nɛ nyɩnyʋrʋ mʋ ba gɔgɩrɩ ba kɩ da, pa Serubɛn maama gɔgɩrɩ kʋ saŋɩ kʋrʋ tiu nɛ. Ba nan kɩ Serubɛn maama pa ka jɩgɩ yibi sɩle mʋ. 19 Serubɛn maama yibiyə kalʋ na yɩ nabiinu yibiyə tɩn wʋ́ jeeri kʋrʋ tiu nɛ mʋ daa dɩdʋa nɩ, yɩ ka yibiyə kalʋ na yɩ nyoŋo yibiyə tɩn jeeri kʋrʋ tiu nɛ wʋdoŋ na saŋɩ tɩn. Tɩ kɩ kʋntʋ doŋ mʋ tɩ kaagɩ digə kam wʋ maama. 20 Kʋ na zɩgɩ tɩga nɩ sɩ kʋ ja kʋ di jǝgǝ kalʋ na wʋ ni dɩm jazɩm baŋa seeni tɩn, ba yɔɔrɩ ba gɔgɩrɩ Serubɛn, dɩ kʋrʋ tiu nɛ nyɩnyʋrʋ mʋ Wɛ di-laa kʋm kabri sɩm yɩra nɩ.

21 Ni dɩlʋ na zʋʋrɩ di-laa kʋm tɩn sɛn sɩna sɩm maɩ daanɩ mʋ. Dɩlʋ dɩm maa na zʋʋrɩ di-laa cɩga cɩga kam wʋ tɩn dɩ yɩ kʋntʋ doŋ. 22 Kaanɩm bimbim dɩlʋ ba na mɛ daa ba kɩ tɩn maa zɩgɩ da. Dɩ maa yɩ kantɩa ni maŋɩm kuni bɩtɔ wɛ-baŋa nɩ. Dɩ dɩdwarɩm dɩm jazɩm baŋa seeni dɩ dɩ yalɩm jazɩm baŋa seeni dɩ maa yɩ kantɩa ni maŋɩm bɩle bɩle. Bimbim dɩm nyɩa yam, dɩ dɩ kuri dɩm seeni, dɩdaanɩ dɩ sɛn sɩm maama yɩ dɛ mʋ ba mɛ ba kɩ. Nɔɔnʋ wʋm ma ta dɩ amʋ o wɩ: «Taabʋlʋ kʋntʋ mʋ yɩ kʋlʋ na zɩgɩ Baŋa-Wɛ yigə nɩ tɩn.»

23 Ni dɩlʋ na zʋʋrɩ di-laa kʋm tɩn, dɩ dɩlʋ na zʋʋrɩ di-laa cɩga cɩga kam tɩn maama jɩgɩ bwəəru tɩle tɩle mʋ. 24 Boro maama jɩgɩ vwana yale mʋ pa kʋ waɩ kʋ pri kʋ tɩtɩ kʋ kɩ daanɩ. 25 Ba ta ma gɔgɩrɩ Serubɛn dɩ kʋrʋ tiu nɛ nyɩnyʋrʋ di-laa kʋm ni-bwəəru tɩm yɩra nɩ, nɩ ba na kɩ te kabri sɩm yɩra nɩ tɩn. Ba mɛ dɛ mʋ ba te pwəŋə Wɛ diga napɔrɔ kʋm pooni yigə nɩ. 26 Takwəəru maa wʋ napɔrɔ kʋm ni sɛn sɩle sɩm nɩ, yɩ ba gɔgɩrɩ kʋrʋ tiu nɛ nyɩnyʋrʋ ba kɩ da. Wɛ diga di-balwa bam dɩ sɩ pwe sɩm dɩ dɛɛn kwɛ kʋntʋ doŋ mʋ.