Zeruzalɛm nadʋŋʋ kʋm taanɩ
40
Baŋa-Wɛ dam dɩm dɛɛn tu amʋ baŋa. Kʋ yɩ bɩnɩ dɩlʋ ba na kalɩ dɩbam ba vu sa-tɩʋ yigə yigə yɩ bɩna fiinle-yanu kɛ tɩn pulim cana kam da fugə dɛ dɩm nɩ mʋ kʋntʋ. Kʋ nan yɩ Zeruzalɛm tɩʋ tʋm dɩm kwaga nɩ bɩna fugə-yana bɩnɩ dɩm nɩ mʋ. Baŋa-Wɛ dam dɩm na tu amʋ baŋa dɛ dɩm kʋntʋ nɩ tɩn mʋ DƖ jaanɩ-nɩ DƖ vu DƖ brɩ-nɩ Zeruzalɛm na yɩ te tɩn. 2 Wɛ ma vɩɩrɩ wǝǝnu DƖ brɩ-nɩ yɩ DƖ pa a vu Yisɩrayɛlɩ tɩga kam seeni sɩ a zɩgɩ piu na tiini kʋ dwara tɩn yuu nɩ.a Amʋ na nii jagwiə seeni tɩn, mʋ a nɛ sam zanzan na lɔgɩ dɩ zɩga, nɩ tʋ-fɔrɔ mʋ zɩgɩ dɩ sam tɩn. 3 DƖ na jaanɩ-nɩ pa a fʋfɔ a yi da tɩn, mʋ a nɛ nɔɔnʋ na zɩga, yɩ o nyɩɩna nɩ canna na yɩ te tɩn. Kʋ tu yɔɔrɩ o zɩgɩ mancoŋo ni boro kʋm nɩ mʋ, yɩ o ze ŋʋna dɩ kasʋgʋ o jɩŋa nɩ, nɩ ba na ma-sɩ ba maŋɩ wǝǝnu te tɩn. 4 Nɔɔnʋ wʋm laan ma ta dɩ amʋ o wɩ: «Nabiinu, fɔgɩ n puri n yiǝ sɩ n nii, n daarɩ n pʋrɩ n zwa sɩ n cəgi kʋlʋ maama a na lagɩ a brɩ-m tɩn. Bɛŋwaanɩ, kʋntʋ ŋwaanɩ mʋ ba jaanɩ‑m ba ba yo seeni. Tʋlɩ kʋlʋ maama n na nɛ tɩn n brɩ Yisɩrayɛlɩ tiinə bam.»Wɛ-di-kamunu kʋnkɔlɔ wa-puli seeni ni dɩm
5 Amʋ ma nii a na kəbrə na lɔgɩ ka cɩ Wɛ-di-kamunu kʋm je sɩm maama. Nɔɔnʋ wʋm na ze kasʋgʋ kʋlʋ tɩn dɩdwarɩm dɛɛn yɩ kantɩ sɩrdʋ mʋ. O ma kwe-kʋ o maŋɩ kəbrə kam na lirǝ te tɩn. Ka maŋɩm dɛɛn nan yɩ kasʋgʋ dɩdʋa. Ka dɩdwarɩm baŋa maŋɩm dɩ maa yɩ kasʋgʋ dɩdʋa.
6 O laan ma vu o yi Wɛ-di-kamunu kʋm ni dɩlʋ na jeeri wa-puli seeni tɩn. O ma din natənə yam baŋa, yɩ o daarɩ o maŋɩ manco-ni dɩm seeni na dwara te tɩn. Dɩ maŋɩm dɩm dɛɛn yɩ kasʋgʋ dɩdʋa mʋ. 7 Yɩn-yɩrna bam di-biə bardʋ dɛɛn mʋ zɩgɩ ba gɩɩnɩ tɩtarɩ cwǝŋǝ kam ka sɛ sɩle sɩm nɩ. Tɩ dɩdwarɩm baŋa maŋɩm yɩ kasʋgʋ dɩdʋa mʋ. Tɩ saŋ-kukugə baŋa maŋɩm dɩ maa yɩ kasʋgʋ dɩdʋa. Kəbrə kalʋ na cɩgɩ ka pɔɔrɩ yɩn-yɩrna bam di-biə bam maama daanɩ tɩn maa yɩ kantɩa ni maŋɩm kuni bɩnu. Napɔrɔ kʋlʋ na jeeri Wɛ-di-kamunu kʋm tɩn manco-ni maŋɩm dɩ maa yɩ kasʋgʋ dɩdʋa.
8 Nɔɔnʋ wʋm ta ma maŋɩ napɔrɔ kʋm tɩtɩ. 9 Kʋ wʋʋ kʋm maa yɩ kantɩa ni maŋɩm kuni nana, yɩ kʋ taala yam maa yɩ kantɩa ni maŋɩm bɩle. Napɔrɔ kʋm ni dɩm dɛɛn jeeri Wɛ-di-kamunu kʋm tɩtɩ mʋ.
10 Yɩn-yɩrna bam di-biə batɔ batɔ maa wʋ tɩtarɩ cwǝŋǝ kam sɛ sɩle sɩm maama nɩ. Ba maama maɩ daanɩ mʋ, yɩ taala yalʋ na wʋra tɩn dɩ maa maɩ daanɩ. 11 O ta ma maŋɩ cwǝŋǝ kalʋ na tɔgɩ ni dɩm seeni tɩn. Ka na yalma te tɩn maa yɩ kantɩa ni maŋɩm kuni fugə. Ka dɩdwarɩm baŋa maŋɩm maa yɩ kantɩa ni maŋɩm kuni fugə-sɩtɔ. 12 Di-bu maama yigə nɩ, gɩŋgaŋa mʋ zɩgɩ da yɩ ka maŋɩ dɩ kantɩa ni maŋɩm dɩdʋa. Yɩn-yɩrna bam di-biə bam tɩtɩ maama maa yɩ kantɩa ni maŋɩm kuni sɩrdʋ sɩ sɛn sɩna sɩm maama baŋa nɩ. 13 Nɔɔnʋ wʋm daa ma zɩgɩ di-bu dɩdʋa kwaga kəbrə kam seeni, o tɔgɩ tɩtarɩ cwǝŋǝ kam seeni o maŋɩ o zʋ di-bu wʋdoŋ kwaga kəbrə kam. Kʋ maa yɩ kantɩa ni maŋɩm kuni fiinle-bɩnu. 14 O laan ma jeeli napɔrɔ kʋm wɛ-baŋa maŋɩm dɩm. Kʋ maa yɩ kantɩa ni maŋɩm kuni fusɩrdʋ. Napɔrɔ kʋm dɛɛn jeeri kʋnkɔlɔ kʋlʋ na wʋ kʋ sɛn sɩtɔ sɩm nɩ tɩn mʋ. 15 Pwələ kalʋ ba na tɔgɩ da ba kɛ, kʋ zɩgɩ pooni yigə ni dɩm nɩ sɩ kʋ yi napɔrɔ kʋm ni dɩm tɩn maŋɩm maa yɩ kantɩa ni maŋɩm fiinnu. 16 Yɩn-yɩrna bam di-biə bam dɩ ba taala yam dɛɛn jɩgɩ takwəəru mʋ tɩ kabri sɩm yɩra maama nɩ. Napɔrɔ kʋm dɩ maa jɩgɩ takwəəru kʋntʋ doŋ. Kʋrʋ tiu nɛ nyɩnyʋrʋ mʋ gɔgɩrɩ tɩ tigi taala yam maama yɩra nɩ.
Dayigǝ kʋnkɔlɔ kʋm
17 Nɔɔnʋ wʋm ma ja-nɩ pa dɩ́ zʋ Wɛ-di-kamunu kʋm dayigǝ kʋnkɔlɔ kʋm. Amʋ ma nii a na di sɩlʋ na lɔgɩ da tɩn, dɩ kʋ pwələ kalʋ na fɔgɩ ka kwɛ tɩn. Di sɩm kɩ daanɩ sɩ yɩ fiintɔ mʋ. Sɩ dɛɛn lɔgɩ sɩ jeeri pwələ kam mʋ yɩ sɩ kaagɩ kʋnkɔlɔ kʋm maama. 18 Pwələ kam maa tigi ka tɔgɩ kʋnkɔlɔ kʋm niə yam maama, pa ka dɩdwarɩm maŋɩ dɩ-ya. Kuri seeni pwələ kam mʋ kʋntʋ. 19 O ma maŋɩ pwələ kalʋ na tigi kʋnkɔlɔ kʋm niə yale yam tɩtarɩ laŋa nɩ tɩn. Kʋ na zɩgɩ wa-puli seeni ni dɩm sɩ kʋ taa ve jazɩm baŋa seeni ni dɩm tɩn, kʋ maŋɩm yɩ kantɩa ni maŋɩm kuni bi mʋ.
Jazɩm baŋa seeni ni dɩm
20 Nɔɔnʋ wʋm daa ma maŋɩ ni dɩlʋ na jeeri jazɩm baŋa seeni yɩ dɩ tʋlɩ dɩ ve dayigǝ kʋnkɔlɔ kʋm tɩn. 21 Yɩn-yɩrna bam di-biə batɔ batɔ na wʋ tɩtarɩ cwǝŋǝ kam sɛn sɩm nɩ tɩn, dɩ tɩ taala yam, kʋ wǝli dɩ napɔrɔ kʋm maama maŋɩm yɩ bɩdwɩ mʋ dɩ wa-puli seeni ni dɩm na yɩ te tɩn. Ni dɩm digə kam yɩ kantɩa ni maŋɩm kuni fiinnu mʋ dɩdwarɩm baŋa nɩ. Dɩ taa yɩ kantɩa ni maŋɩm fiinle-bɩnu kʋ saŋ-kukugə baŋa nɩ. 22 Ka takwəəru tɩm, dɩ napɔrɔ kʋm, dɩdaanɩ kʋrʋ tiu nɛ nyɩnyʋrʋ tɩlʋ na gɔgɩrɩ tɩ tigi ka kabri sɩm yɩra nɩ tɩn maama yɔɔrɩ tɩ yɩ bɩdwɩ mʋ dɩ wa-puli seeni ni dɩm na yɩ te tɩn. Ka maa jɩgɩ natənə yarpɛ na diini ya ve ka wʋnɩ. Nɔɔna na diini ba yi da, ka napɔrɔ kʋm wʋ́ taa wʋ ba yigə nɩ mʋ. 23 Ni dɩdoŋ dɩ maa wʋra dɩ na ve dɩ zʋʋrɩ tɩtarɩ kʋnkɔlɔ kʋm wʋnɩ, yɩ dɩ jeeri jazɩm baŋa seeni ni dɩm. Ni dɩdoŋ dɩ maa wʋ kʋnkɔlɔ kʋm wa-puli seeni. Nɔɔnʋ wʋm ma maŋɩ pwələ kalʋ na tigi ni dɩdwɩ nɩ, sɩ kʋ yi ni dɩdoŋ dɩm nɩ tɩn. Kʋ maa yɩ kantɩa ni maŋɩm kuni bi.
Jagwiə seeni ni dɩm
24 Nɔɔnʋ wʋm laan ma tɔgɩ a yigə pa dɩ́ vu kʋnkɔlɔ kʋm jagwiə dɩm seeni. Amʋ ma nii a na ni dɩlʋ na jeeri jagwiə seeni tɩn. O ma maŋɩ dɩ taala yam, dɩ dɩ napɔrɔ kʋm. Tɩ maama maŋɩm dɩm yɔɔrɩ dɩ yɩ bɩdwɩ dɩ niə yadonnə yam na yɩ te tɩn mʋ. 25 Ni dɩm digə kam dɩ dɩ napɔrɔ kʋm maa jɩgɩ takwəəru nɩ niə yadonnə yam takwəəru tɩm na yɩ te tɩn. Digə kam yɩ kantɩa ni maŋɩm kuni fiinnu mʋ dɩdwarɩm baŋa nɩ. Ka ta yɩ kantɩa ni maŋɩm fiinle-bɩnu mʋ saŋ-kukugə baŋa nɩ. 26 Ka maa jɩgɩ natən-yiə yarpɛ na diini ya ve ka wʋnɩ. Nɔɔna na diini ba yi da, ka napɔrɔ kʋm wʋ́ taa wʋ ba yigə nɩ mʋ. Ka taala yam maa jɩgɩ kʋrʋ tiu nɛ nyɩnyʋrʋ na gɔgɩrɩ tɩ tigi ya yɩra nɩ tɩn, kʋrʋ tiu nɛ dɩdʋa saŋa maama nɩ. 27 Wɛ-di-kamunu kʋm tɩtarɩ kʋnkɔlɔ kʋm dɩ maa jɩgɩ ni dɩlʋ na jeeri jagwiə seeni tɩn. Nɔɔnʋ wʋm ma maŋɩ pwələ kalʋ na tigi jagwiə seeni niə yale yam tɩtarɩ laŋa nɩ tɩn. Kʋ maa yɩ kantɩa ni maŋɩm kuni bi.
Niə yalʋ na ve ya zʋʋrɩ tɩtarɩ kʋnkɔlɔ kʋm wʋnɩ tɩn
28 O daa ma tɔgɩ jagwiə ni dɩm seeni o ja-nɩ pa dɩ́ zʋ Wɛ diga tɩtarɩ kʋnkɔlɔ kʋm wʋnɩ. O ma maŋɩ jagwiə seeni ni dɩm, yɩ dɩntʋ dɩ niə yadonnə yam maŋɩm yɩ bɩdwɩ. 29 Dɩ yɩn-yɩrɩna bam di-biə bam, dɩ taala yam, dɩ napɔrɔ kʋm maama maŋɩm dɩm yɩ bɩdwɩ dɩ niə yadonnə yam mʋ. Ni dɩm digə kam, dɩ napɔrɔ kʋm kabri maama maa jɩgɩ takwəəru sɩ yɩra nɩ. Ka maa yɩ kantɩa ni maŋɩm kuni fiinnu dɩdwarɩm baŋa nɩ. Ka ta yɩ kantɩa ni maŋɩm fiinle-bɩnu mʋ saŋ-kukugə baŋa nɩ. 30 Tɩtarɩ kʋnkɔlɔ kʋm saŋa maama jɩgɩ ka napɔrɔ mʋ. Tɩ maama yɩ kantɩa ni maŋɩm kuni fiinle-bɩnu mʋ dɩdwarɩm baŋa nɩ. Tɩ ta yɩ kantɩa ni maŋɩm kuni bɩnu mʋ saŋ-kukugə baŋa nɩ. 31 Napɔrɔ kʋm nan jeeri dayigǝ kʋnkɔlɔ kʋm mʋ. Kʋrʋ tiu nɛ nyɩnyʋrʋ dɛɛn gɔgɩrɩ mʋ tɩ tigi kabri sɩm yɩra nɩ. Natən-yiə nana dɩ maa tʋlɩ ya diini ni dɩm kʋntʋ nɩ.
32 Nɔɔnʋ wʋm daa ma ja-nɩ o vu o yi tɩtarɩ kʋnkɔlɔ kʋm wa-puli seeni saŋa kam. O ma maŋɩ ka ni dɩm. Dɩ dɩ maŋɩm yɔɔrɩ dɩ yɩ nɩ yadonnə yam maŋɩm na yɩ te tɩn mʋ. 33 Dɩ yɩn-yɩrɩna bam di-biə bam, dɩ taala yam, dɩ napɔrɔ kʋm maama maŋɩm yɩ bɩdwɩ dɩ niə yadonnə yam mʋ. Ni dɩm digə kam, dɩ napɔrɔ kʋm kabri maama maa jɩgɩ takwəəru sɩ yɩra nɩ. Ka maa yɩ kantɩa ni maŋɩm kuni fiinnu dɩdwarɩm baŋa nɩ. Ka ta yɩ kantɩa ni maŋɩm fiinle-bɩnu mʋ saŋ-kukugə baŋa nɩ. 34 Napɔrɔ kʋm jeeri dayigǝ kʋnkɔlɔ kʋm mʋ. Kʋrʋ tiu nɛ nyɩnyʋrʋ dɛɛn maa gɔgɩrɩ tɩ tigi kabri sɩm yɩra nɩ. Natən-yiə nana dɩ maa tʋlɩ ya diini ni dɩm kʋntʋ nɩ.
35 O daa ma ja-nɩ pa dɩ́ yi jazɩm baŋa seeni ni dɩm, yɩ o maŋɩ-dɩ. Dɩntʋ dɩ maŋɩm yɩ bɩdwɩ dɩ niə yadonnə yam na maɩ te tɩn, 36 dɩdaanɩ dɩ yɩn-yɩrɩna bam di-biə bam, dɩ taala yam, dɩ napɔrɔ kʋm maama mʋ. Digə kam kabri sɩm maama maa jɩgɩ takwəəru sɩ yɩra nɩ. Ka maŋɩm dɩm yɩ kantɩa ni maŋɩm fiinnu mʋ dɩdwarɩm baŋa nɩ. Ka ta yɩ kantɩa ni maŋɩm fiinle-bɩnu mʋ saŋ-kukugə baŋa nɩ. 37 Napɔrɔ kʋm jeeri dayigǝ kʋnkɔlɔ kʋm mʋ. Kʋrʋ tiu nɛ nyɩnyʋrʋ dɛɛn mʋ gɔgɩrɩ tɩ tigi kʋ kabri sɩm yɩra nɩ. Natən-yiə nana dɩ maa tʋlɩ ya diini ni dɩm kʋntʋ nɩ.
Kaanɩm vara kwɛɛm digə
38 Digə kadoŋ dɩ ka ni maa wʋ kʋnkɔlɔ ni dɩm kʋntʋ napɔrɔ kʋm təŋə nɩ. Ka wʋnɩ mʋ ba yǝni ba zarɩ vara balʋ ba na wʋ́ gʋ ba ma kɩ zwɛɛm kaanɩm tɩn. 39 Taabʋllʋ tɩna mʋ zɩgɩ napɔrɔ kʋm nɩ. Tɩ tɩle mʋ zɩgɩ digə kam saŋa dɩdʋa seeni, yɩ tɩle dɩ zɩgɩ saŋa kadoŋ kam nɩ. Tɩ baŋa nɩ mʋ ba nan gʋɩ vara balʋ ba na wʋ́ ma ba kɩ zwɛɛm kaanɩm, dɩ lwarɩm saarɩm kaanɩm, dɩ lwarɩm jɩnɩ kaanɩm tɩn. 40 Taabʋllʋ tɩna ta mʋ wʋ napɔrɔ kʋm pooni yigə nɩ, mɛ nɔɔna na diini ba tɔgɩ jazɩm baŋa seeni ni dɩm tɩn. Tɩle maa wʋ ni dɩm saŋa dɩdʋa seeni, yɩ tɩle dɩ wʋ saŋa kakam kam nɩ. 41 Kʋ maa na yɩ te tɩn, taabʋllʋ nana mʋ wʋra. Tɩna mʋ wʋ napɔrɔ kʋm wʋnɩ, yɩ tɩna dɩ wʋ pooni yigə kam nɩ. Tɩ maa maŋɩ sɩ ba gʋ kaanɩm vara bam mʋ tɩ baŋa nɩ. 42 Taabʋllʋ tɩna maa wʋra ba na sarɩ kandwa yɩ ba ma-ya ba kɩ-tɩ tɩn. Ba maɩ tɩntʋ mʋ ba caɩ zwɛɛm kaanɩm vara bam. Taabʋllʋ tɩm kʋntʋ dɩdwarɩm baŋa maŋɩm yɩ kantɩa ni maŋɩm dɩdʋa dɩ cicoro mʋ. Tɩ yalɩm baŋa maŋɩm dɩ ta yɩ kʋntʋ mʋ. Tɩ wɛ-baŋa maŋɩm maa yɩ kantɩa ni maŋɩm dɩdʋa. Zɩla yalʋ ba na maɩ ba kɩ zwɛɛm kaanɩm dɩ kaanɩm dwi maama tɩn mʋ ba kwe ba tiŋi taabʋllʋ tɩm kʋntʋ baŋa nɩ. 43 Gwəli dɩ maa məəli digə kam wʋʋ kəbrə yɩra maama nɩ. Sɩ yɩ dayigǝ nʋa maŋɩm mʋ. Taabʋllʋ tɩm nan wʋra sɩ ba na gʋ vara bam, sɩ ba kwe nwana yam mʋ ba daŋɩ tɩ baŋa nɩ.
Kaanɩm tiinə bam di sɩm
44 Wɛ diga tɩtarɩ kʋnkɔlɔ kʋm wʋnɩ di sɩle maa wʋra, sɩ na wʋ kʋnkɔlɔ ni dɩm pooni yigə nɩ tɩn. Sɩ dɩdʋa yǝri ni dɩlʋ na wʋ jazɩm baŋa seeni tɩn mʋ yɩ ka jeeri jagwiə seeni. Digə kadoŋ kam dɩ maa yǝri ni dɩlʋ na wʋ jagwiə seeni tɩn, yɩ ka jeeri jazɩm baŋa seeni. 45 Nɔɔnʋ wʋm laan ma ta dɩ amʋ o wɩ: «Digə kalʋ na jeeri jagwiə seeni tɩn yɩ kaanɩm tiinə balʋ na nii Wɛ-di-kamunu kʋm baŋa nɩ tɩn nyɩm mʋ. 46 Kʋ daarɩ kalʋ na jeeri jazɩm baŋa seeni tɩn maa yɩ kaanɩm tiinə balʋ na nii kaanɩm bimbim dɩm baŋa nɩ tɩn dɩ nyɩm. Bantʋ nan yɩ Sadoki digə kam tiinə mʋ. Levi dwi dɩm maama wʋnɩ nɔɔna bantʋ yɩranɩ mʋ jɩgɩ cwǝŋǝ sɩ ba fʋfɔ ba twɛ Baŋa-Wɛ te sɩ ba taa tʋŋa ba pa‑DƖ.»b
47 Nɔɔnʋ wʋm laan ma maŋɩ tɩtarɩ kʋnkɔlɔ kʋm. Kʋ yɔɔrɩ kʋ maɩ da kʋ maɩ da mʋ, dɩdwarɩm baŋa, dɩ saŋ-kukugə baŋa nɩ. Kʋ maa yɩ kantɩa ni maŋɩm bi bi. Kaanɩm bimbim dɩm maa zɩgɩ Wɛ-di-kamunu kʋm yigə nɩ.
Wɛ diga kam
48 O laan ma ja-nɩ o vu o yi Wɛ diga kam tɩtɩ napɔrɔ kʋm. O ma maŋɩ kʋ taala yale yam na wʋ ni dɩm sɛn sɩle sɩm nɩ tɩn. Ya na lirǝ te tɩn yɩ kantɩa ni maŋɩm kuni bɩnu mʋ. Napɔrɔ kʋm ni dɩm maa yɩ kantɩa ni maŋɩm fugə-bɩna yalɩm baŋa nɩ. Ka sɛn kabri sɩm yɩ kantɩa ni maŋɩm bɩtɔ bɩtɔ saŋa maama baŋa nɩ mʋ. 49 Napɔrɔ kʋm maa yɩ kantɩa ni maŋɩm fiinle yalɩm baŋa nɩ. Kʋ ta yɩ kantɩa ni maŋɩm fugə-bɩle mʋ dɩdwarɩm baŋa nɩ. Natən-yiəc mʋ tɔgɩ ya diini ya yi digə kam ni. Ywə yale na wʋ taala yam təŋə nɩ tɩn dɛɛn maa cwi ya zɩgɩ ni dɩm saŋa maama nɩ.