39
«Nabiinu, ŋɔɔnɩ yiyiu-ŋwɛ n cɔgɩ Gɔgɩ sɩ n ta nɩ: ‹Yuutu Baŋa-Wɛ na tagɩ te tɩn mʋ tɩntʋ: Gɔgɩ, amʋ dwəni dɩ nmʋ, nmʋ wʋlʋ na yɩ Mesɛkɩ, dɩ Tubalɩ yuutu tɩn. 2 A lagɩ a pa n za n kikiə yam mʋ. A maa wʋ́ kalɩ‑m, sɩ a pa n nuŋi jazɩm baŋa seeni tɩʋ kʋm mɛ n ya na wʋra tɩn sɩ n ba n zaŋɩ najara Yisɩrayɛlɩ pweeru tɩm baŋa nɩ. 3 A laan maa wʋ́ magɩ taŋa kalʋ n na ze n jagwiə nɩ tɩn a dɩ tɩga nɩ, yɩ a daarɩ a pa n cɩna yam n na ze n jazɩm nɩ tɩn dɩ lwe ya tʋ tɩga nɩ. 4 Yisɩrayɛlɩ pweeru tɩm yuu nɩ mʋ n lagɩ n tɩ, nmʋ dɩ n jar-kərə bam maama, dɩ dwi-gɛ tiinə balʋ na wʋ n tee nɩ tɩn. Abam yɩra yam laan maa wʋ́ ji duurə, dɩ zunə dwi maama, dɩ ga-vara ni-wʋdiu. 5 Nmʋ yɩra yam wʋ́ yɔɔrɩ ya taa tigi kagʋa wʋnɩ mʋ parɩ-parɩ. Amʋ Yuutu Baŋa-Wɛ mʋ tagɩ kʋntʋ. 6 Amʋ lagɩ a tarɩgɩ mim mʋ a dɩ Magɔgɩ dɩ balʋ na zʋʋrɩ cɩmm nɩnɩʋ kʋm ni nɩ tɩn wʋnɩ. Ba laan maa wʋ́ lwarɩ nɩ amʋ mʋ yɩ Baŋa-Wɛ wʋm.7 Amʋ lagɩ a pa a nɔɔna Yisɩrayɛlɩ tiinə bam taa ye amʋ yɩrɩ dɩm ni nɩ mʋ. A daa bá pa-ba cwǝŋǝ sɩ ba yáalɩ-dɩ, dɩ na yɔɔrɩ dɩ yɩ lanyɩranɩ fasɩ tɩn ŋwaanɩ. Lʋgʋ baŋa tɩɩnɩ dɩm maama dɩ maa wʋ́ lwarɩ nɩ amʋ Baŋa-Wɛ mʋ yɩ Wʋ-poŋo Tu yɩ a nii Yisɩrayɛlɩ tɩʋ kʋm baŋa nɩ. 8 Nii-na! Maŋa lagɩ ka yi sɩ wǝǝnu tɩntʋ sɩɩnɩ tɩ kɩ! Yuutu Baŋa-Wɛ na tagɩ kʋlʋ tɩn mʋ kʋntʋ. Kʋ yɩ maŋa kalʋ amʋ na maŋɩ a ta ka taanɩ tɩn mʋ.
9 Maŋa kam kʋntʋ nan na yiǝ, Yisɩrayɛlɩ tiinə bam wʋ́ nuŋi ba sam dɩm nɩ ba vu ba pɛ najara zɩla yalʋ jar-kərə bam na tɩga ba daarɩ tɩn, sɩ ba kwe-ya ba ma dwe mim. Ba maa wʋ́ kwe ba najara cɩ-kwɛn sɩm, dɩ ba tɛn sɩm, dɩ ba cɩna yam, dɩ ba jara-kǝm gwələ yam, dɩ ba cicwə yam, sɩ ba taa jɩgɩ-tɩ ba dwe mim bɩna yarpɛ. 10 Ba daa bá vu gaa sɩ ba puuri da-kʋrɩ, naa ba zʋ punnu wʋnɩ sɩ ba goni dɛ, ba na wʋ́ taa jɩgɩ najara zɩla yam ba ma ba dwe mim tɩn ŋwaanɩ. Kʋntʋ tɩn, Yisɩrayɛlɩ tiinə bam wʋ́ yiri ba jɩnɩ balʋ dɛɛn na vrɩ-ba tɩn baŋa nɩ, dɩ ba na vrɩ bantʋ dɩ wǝǝnu tɩn. Yuutu Baŋa-Wɛ na tagɩ kʋlʋ tɩn mʋ kʋntʋ.
11 Maŋa kam kʋntʋ nɩ, amʋ wʋ́ kwe tɩga Yisɩrayɛlɩ laŋa kam nɩ a pa Gɔgɩ, sɩ ba kɩ o dɩ o jar-kərə bam da. Ka maa wʋ́ taa yɩ cwə-vələ bolo kʋm nɩ, nɔɔna na tɔgɩ mɛ ba ve nɩnɩʋ kʋm wa-puli seeni tɩn mʋ. Ba yibeelǝ yam nan wʋ́ cɩ cwǝŋǝ kam mʋ sɩ nɔɔna daa yɩ wanɩ ba tɔgɩ da ba kɛ, ba na wʋ́ kɩ Gɔgɩ dɩ o kɔ-fɔrɔ kʋm maama da tɩn ŋwaanɩ. Kʋntʋ ŋwaanɩ baá taa bǝi je sɩm nɩ: «Gɔgɩ nɔn-kɔgɔ bolo» mʋ.
12 Yisɩrayɛlɩ tiinə bam wʋ́ kwe canɩ sɩrpɛ mʋ ba kɩ twa bam ba ti, sɩ ba wanɩ ba kwɛ tɩga kam. 13 Tɩʋ kʋm nɔn-biə bam maama nan mʋ wʋ́ kɩ twa bam. Kʋ maa wʋ́ pa ba joŋi yɩrɩ dɛ dɩlʋ nɩ amʋ na wʋ́ brɩ a paarɩ-zulǝ yam jaja tɩn. Yuutu Baŋa-Wɛ na tagɩ kʋlʋ tɩn mʋ kʋntʋ. 14 Ba maa wʋ́ kuri nɔɔna sɩ ba taa kaagɩ tɩga kam ni maama ba beerǝ, sɩ ba nii ba na twa balʋ ta na tigi pwələ nɩ tɩn. Ba maa na nɛ-ba, nɔɔna badaara wʋ́ kɩ-ba yibeelə mʋ sɩ kʋ kwɛ tɩga kam. Baá taa kɩ kʋntʋ mʋ canɩ sɩrpɛ. 15 Ba na kaagɩ tɩga kam nɩ ba veǝ, yɩ ba dɩdʋa na nɛ nabiinu kuə, kʋ tu wʋ́ kɩ maana mʋ o tiŋi ka yɩra nɩ. Bayɛ maa wʋ́ ba ba kwe kuə kam ba vu ba kɩ Gɔgɩ nɔn-kɔgɔ bolo kʋm nɩ. 16 Baá tɔgɩ cwǝŋǝ kam kʋntʋ mʋ ba kwɛ tɩga kam. Tɩʋ kʋdoŋ nan wʋ́ taa wʋ je sɩm kʋntʋ nɩ, kʋ yɩrɩ na yɩ Hamona.›
17 Kʋ nan na yɩ nmʋ, nabiinu, Yuutu Baŋa-Wɛ na tagɩ te dɩ nmʋ tɩn mʋ tɩntʋ: Bəŋi zunə dwi maama, dɩ ga-vara bam sɩ n ta nɩ: ‹Nuŋi-na je maama á ba á jeeri daanɩ Yisɩrayɛlɩ pweeru tɩm yuu nɩ, sɩ á di kaanɩm candiǝ kalʋ a na kɩ sɩ a pa abam tɩn. Kʋ yɩ candi-fara mʋ a kɩ dáanɩ, sɩ a pa abam di nwana, yɩ á daarɩ á nyɔ jana á su. 18 Á wʋ́ di pamaŋa ya-nwana yɩ á daarɩ á nyɔ tɩga baŋa dɩdɛɛra jana. Baá taa nyɩ dɩ pi-balɩ, dɩ pəlbiə, dɩ bʋ-balɩ, dɩ na-balɩ mʋ ba pɛ abam sɩ á di, yɩ ba maama nugi lanyɩranɩ nɩ Basan vara bam na yɩ te tɩn mʋ. 19 Abam na tu á di candiǝ kalʋ amʋ na wʋ́ kɩ a pa abam tɩn, á wʋ́ di nabiinǝ yɩra lara sɩ á yɩra ba ya sɔɔrɩ, yɩ ba jana bam á na wʋ́ nyɔ tɩn dɩ maa wʋ́ pa á bugi. 20 Wʋdiu kʋlʋ amʋ na wʋ́ pa abam sɩ á di tɩn, abam wʋ́ kuri siseŋ-nɔɔna dɩ balʋ ya na diini-sɩ tɩn nwana mʋ á di á wʋbʋŋa.› Yuutu Baŋa-Wɛ na tagɩ kʋlʋ tɩn mʋ kʋntʋ.
21 Amʋ nan wʋ́ pa a paarɩ-zulǝ yam brɩ jaja lʋgʋ baŋa dwi maama tɩtarɩ nɩ. Ba maama wʋ́ na a na tɔgɩ a dam-fɔrɔ kʋm ŋwaanɩ a yɔɔrɩ a waarɩ-ba te tɩn. 22 Kʋ maa na wʋ́ zɩgɩ maŋa kam kʋntʋ nɩ sɩ kʋ taa ve tɩn, Yisɩrayɛlɩ dwi tiinə bam wʋ́ lwarɩ nɩ amʋ mʋ yɩ ba Tu Baŋa-Wɛ dɩm. 23 Dwi-gɛ tiinə bam dɩ maa wʋ́ lwarɩ nɩ Yisɩrayɛlɩ tiinə bam na kɩ lwarɩm yɩ ba nuŋi amʋ kwaga nɩ tɩn ŋwaanɩ mʋ amʋ dɛɛn dʋlɩ-ba a yagɩ sa-tɩʋ nɩ yigə yigə. A laan ma lɩ a yigə ba wʋnɩ, yɩ a kɩ-ba ba dʋna jɩŋa nɩ, pa ba maama tɩ najara wʋnɩ. 24 A dɛɛn waarɩ-ba sɩ kʋ maŋɩ dɩ ba tɩtʋŋ-zɔɔna dɩ ba zwabaniə kikiə yam na yɩ te tɩn mʋ. Amʋ yigə daa tǝrǝ ba wʋnɩ.
25 Kʋntʋ ŋwaanɩ, Yuutu Baŋa-Wɛ na tagɩ te tɩn mʋ tɩntʋ: Amʋ wʋ́ pa Zakɔbɩ dwi dɩm joori ba taa jɩgɩ yu-yoŋo, yɩ a duri Yisɩrayɛlɩ tiinə bam maama ŋwaŋa. A maa wʋ́ sɩɩnɩ a yiǝ sɩ a zǝŋi a yɩrɩ dɩm na yɩ lanyɩranɩ fasɩ tɩn wɛɛnɩ. 26 Ba na tu ba jǝni ba tɩtɩ tɩga kam wʋnɩ yɩ nɔɔn-nɔɔnʋ daa ba fugi-ba, ba laan wʋ́ swe cavɩɩra yalʋ maama ba ya na nɛ tɩn, dɩ zwabaniə kikiə yalʋ ba na kɩ ba cɔgɩ amʋ yigə tɩn ni nɩ. 27 Amʋ wʋ́ lɩ-ba a ja a nuŋi tɩɩnɩ dɩlʋ ba ya na zʋʋrɩ dɩ wʋnɩ tɩn, sɩ a joŋi-ba ba dʋna jɩŋa nɩ. A maa wʋ́ tɔgɩ ba baŋa nɩ a brɩ jaja nɩ a yɩ wʋ-poŋo tu, sɩ dwi-gɛ tiinə zanzan taa zɩgɩ ba niə. 28 Amʋ nɔɔna bam laan maa wʋ́ lwarɩ nɩ amʋ mʋ yɩ ba Tu Baŋa-Wɛ dɩm. Bɛŋwaanɩ, amʋ ya mʋ dʋlɩ-ba a yagɩ tɩɩnɩ dɩdonnǝ wʋnɩ, yɩ a nan daa wʋ́ ja-ba a joori a jǝni ba tɩtɩ tɩʋ kʋm wʋnɩ. A daa bá yagɩ ba dɩdʋa tɩtɩ dɩ sɩ kʋ tu daarɩ je sɩm kʋntʋ nɩ. 29 Amʋ daa bá lɩ a yigə ba wʋnɩ. A nan lagɩ a lo a Joro mʋ a yagɩ Yisɩrayɛlɩ dwi tiinə bam baŋa nɩ. Yuutu Baŋa-Wɛ na tagɩ kʋlʋ tɩn mʋ kʋntʋ.»