Gɔgɩ taanɩ
38
Baŋa-Wɛ kwǝrǝ daa ma yi amʋ ka wɩ:2 «Nabiinu, pipiri n yibiyə n jeeri Magɔgɩ tɩʋ pɛ Gɔgɩ na te Mesɛkɩ dɩ Tubalɩ tɩn.a Ŋɔɔnɩ yiyiu-ŋwɛ n cɔg-o, 3 sɩ n ta nɩ: ‹Yuutu Baŋa-Wɛ na tagɩ te tɩn mʋ tɩntʋ: Amʋ dwəni dɩ nmʋ mʋ, nmʋ Gɔgɩ na yɩ Mesɛkɩ dɩ Tubalɩ yuutu tɩn. 4 Amʋ lagɩ a pa n za n kikiə yam mʋ. A maa wʋ́ kwe gwəli a ja‑m n pɩyaa seeni, yɩ a daarɩ a vaŋɩ nmʋ dɩ n jar-kərə bam maama, dɩ á siseŋ-nɔɔna dɩ balʋ na diini-sɩ tɩn. Bantʋ maama vɔgɩ jara-kǝm zɩla mʋ ba zɩgɩ diŋ-diŋ. Ba maa yɩ kɔ-fɔrɔ zanzan, yɩ ba ze sʋ-lwaanʋ dɩ najara cɩ-kwɛn. 5 Pɛrsɩ tiinə, dɩ Kusi tiinə, dɩ Puti tiinə dɩ wʋ́ tɔgɩ ba taa wʋ ba wʋnɩ, yɩ ba dɩ jɩgɩ ba najara cɩ-kwɛn dɩ ba yice. 6 Gomɛrɩ jar-kərə bam maama dɩ maa wʋra, kʋ wǝli dɩ jazɩm baŋa seeni tɩʋ Bɛtɩ-Togarama jar-kərə bam maama. Ba tu ba wǝli abam wʋnɩ, sɩ á jar-kərə kɔgɔ kʋm tiini kʋ taa daga.
7 Nmʋ Gɔgɩ, dɩ jar-kərə kɔgɔ kʋlʋ maama na wʋ n tee nɩ tɩn nan maŋɩ sɩ á cɩ á tɩtɩ mʋ. Nmʋ wʋ́ ta n nii ba baŋa nɩ. 8 Kʋ na tu kʋ daanɩ fɩɩn, baá bəŋi abam sɩ á ti á yigə najara ŋwaanɩ. Bɩna yam na yi ya ti, á laan wʋ́ vu á zaŋɩ najara dɩ Yisɩrayɛlɩ tiinə bam, dɩ ba ya na nuŋi najara wʋnɩ yɩ ba ba ba sin tɩn dɩ. Ba ma nuŋi sa-tɩɩnɩ zanzan nɩ mʋ ba joori sɔŋɔ, yɩ ba laan zʋʋrɩ ba tɩtɩ tɩʋ pweeru je sɩm nɩ mɛ ya na tigi kafɛ tɩn dɩ bɩcar-zuru. 9 Nmʋ dɩ n jar-kərə bam, dɩ dwi-gɛ tiinə balʋ na wʋ n tee nɩ tɩn nan wʋ́ vu á jeeri-ba dɩ najara mʋ, nɩ vu-dɩʋ na da kʋ zaŋɩ te tɩn. Abam wʋ́ li tɩga kam baŋa maama nɩ kunkoŋo doŋ tɩn.
10 Yuutu Baŋa-Wɛ na tagɩ te tɩn mʋ tɩntʋ: Maŋa kam kʋntʋ nɩ, wʋbʋŋa wʋ́ taa kaagɩ n yuu nɩ ya veǝ, sɩ n da kʋ ŋwaanɩ n jeeli lwarɩm sɩ n kɩ. 11 Nmʋ wʋ́ ta n tɩtɩ nɩ n wɩ: «A lagɩ a vu a kɩ jara dɩ nɔɔna bam kʋntʋ yɩ ba zʋʋrɩ cɩmm mʋ. Ba tɩɩnɩ dɩm tiini dɩ bwǝnǝ lagɩ-lagɩ, yɩ kabri wʋ cɩgɩ-dɩ. Bwəəru dɩ nan tǝrǝ sɩ ba taa pɩ-dɩ. 12 A nan wʋ́ vu a cɔgɩ je sɩlʋ ya na yɩ di-dwəənu yɩ nɔɔna laan fɔgɩ ba kwɛ-tɩ tɩn. A maa wʋ́ vrɩ nɔɔna bam wǝǝnu tɩm. Ba dɛɛn yɩ pɩɩna mʋ sa-tɩɩnɩ wʋnɩ, yɩ ba joori ba tɩtɩ tɩʋ ba zʋʋra tɩga kalʋ na wʋ lʋgʋ baŋa tɩtarɩ nɩ tɩn wʋnɩ. Ba maa jɩgɩ vara dɩ jɩjɩgɩrʋ zanzan.»
13 Nmʋ na nuŋi sɩ n zaŋɩ najara, Seba tiinə, dɩ Dedan tiinə, dɩ pipimpiinə balʋ na nuŋi Tarsisi dɩ kʋ nawuurə yam seeni tɩn wʋ́ bwe ba wɩ: «Nmʋ tu sɩ n vrɩ dɩbam mʋ na? N lagɩ n jar-kərə bam mʋ n kɩ daanɩ sɩ á ba á vrɩ dɩbam səbu-poŋo, dɩ səbu-sɩŋa, dɩdaanɩ dɩ́ vara, dɩ dɩ́ jɩjɩgɩrʋ, sɩ á zɩŋɩ wǝǝnu zanzan á ja á viiri na?» ›
14 Kʋntʋ ŋwaanɩ, nabiinu, ŋɔɔnɩ yiyiu-ŋwɛ n cɔgɩ Gɔgɩ n wɩ: ‹Yuutu Baŋa-Wɛ na tagɩ te tɩn mʋ tɩntʋ: Maŋa kam kʋntʋ na yiǝ, yɩ a nɔɔna Yisɩrayɛlɩ tiinə bam zʋʋrɩ ba tɩga kam wʋnɩ cɩmm mʋ, nmʋ bá maanɩ kʋ ni nɩ na? 15 Nmʋ wʋ́ zaŋɩ n nuŋi n jazɩm baŋa seeni tɩʋ kʋm nɩ n tɔgɩ dɩ n kɔ-fɔrɔ kʋm na yɩ tɩɩnɩ zanzan nɔɔna tɩn n vu n zaŋɩ najara dɩ Yisɩrayɛlɩ tiinə bam. Abam jar-kərə kɔ-fɔrɔ zanzan wʋ́ taa diini siseŋ-nɔɔna mʋ ba veǝ. 16 Á wʋ́ vu á zaŋɩ amʋ nɔɔna Yisɩrayɛlɩ tiinə bam baŋa nɩ mʋ nɩ kunkoŋo na li tɩga kam baŋa maama te tɩn. Gɔgɩ, da yam na yi ya ti, amʋ lagɩ a pa n vu n zaŋɩ najara dɩ a tɩtɩ tɩʋ kʋm, sɩ dwi-gɛ tiinə bam lwarɩ amʋ na yɩ wʋlʋ tɩn, nɩ a na tɔgɩ nmʋ baŋa nɩ a brɩ jaja nɩ a yɩ lanyɩranɩ tu mʋ yɩ ba na.
17 Yuutu Baŋa-Wɛ nan na tagɩ te tɩn mʋ tɩntʋ: Kʋ daɩ nmʋ taanɩ mʋ a dɛɛn ŋɔɔnɩ kʋ tɔgɩ Yisɩrayɛlɩ nijoŋnǝ bam na yɩ a tɩntʋŋna tɩn baŋa nɩ na? Ba dɛɛn kwe bɩna zanzan mʋ ba ŋɔɔnɩ ba wɩ: amʋ lagɩ a pa nmʋ kɩ jara dɩ ba. 18 Kʋ nan na wʋ́ taa yɩ te maŋa kam kʋntʋ nɩ tɩn mʋ tɩntʋ: Gɔgɩ na jeeri Yisɩrayɛlɩ tɩʋ kʋm dɩ najara, amʋ ban-lʋm dɩm wʋ́ wiiri ba baŋa nɩ. Yuutu Baŋa-Wɛ mʋ tagɩ kʋntʋ. 19 A lagɩ a da a ban-zɔŋɔ kʋm ŋwaanɩ a ta jaja nɩ: dɛ dɩm kʋntʋ nɩ tɩga kam wʋ́ tiini ka sisiŋi mʋ Yisɩrayɛlɩ laŋa kam nɩ. 20 Kʋ maa wʋ́ pa nɩnɩʋ wʋ kale, dɩ zunə balʋ na kaagɩ ba jaanɩ wɛɛnɩ tɩn, dɩ ga-vara, dɩ tɩga wo-vəəlu, dɩ lʋgʋ baŋa nabiinǝ maama wʋ́ fʋm amʋ yigə nɩ. Pweeru tɩm dɩ tɩ gugwəəru maama wʋ́ sirimi, yɩ kabri maama dɩ tʋ buri buri. 21 A maa wʋ́ pa najara ba ya jeeri Gɔgɩ amʋ tɩtɩ pweeru tɩm maama yuu nɩ. Yuutu Baŋa-Wɛ na tagɩ kʋlʋ tɩn mʋ kʋntʋ. Nɔɔnʋ maama wʋ́ kwe o sʋ-lɔŋɔ o beeri o doŋ sɩ o gʋ. 22 Amʋ nan wʋ́ tɔgɩ yawɩ-cɛɛrʋ, dɩ nɔn-gʋra baŋa nɩ mʋ a yɔɔrɩ a waar‑o. A maa wʋ́ pa dʋ-fara ba ka mag-o, sɩ a ta dʋlɩ dʋ-kambana dɩ ciribi a yagɩ o yɩra nɩ, dɩ o jar-kərə bam yɩra nɩ, dɩ dwi-gɛ tiinə kɔ-fɔrɔ kʋm na wʋ o tee nɩ tɩn dɩ yɩra nɩ. 23 Kʋntʋ baŋa nɩ mʋ amʋ wʋ́ pa lʋgʋ baŋa tɩɩnɩ zanzan lwarɩ amʋ na yɩ kamunu yɩ a ta yɩ lanyɩranɩ tu te tɩn. A maa wʋ́ vɩɩrɩ a tɩtɩ ba yigə nɩ. Ba laan maa wʋ́ lwarɩ nɩ amʋ mʋ yɩ Baŋa-Wɛ dɩm.› »