Kwi-kʋrɩ taanɩ
37
Baŋa-Wɛ dam dɩm dɛɛn tu amʋ baŋa, pa DƖ tɔgɩ DƖ Joro baŋa DƖ kwe-nɩ DƖ vu DƖ zɩgɩ bolo kʋdoŋ tɩtarɩ nɩ. Kwi zanzan jagɩ sɩ yɔɔrɩ sɩ faarɩ bolo kʋm je maama. 2 Baŋa-Wɛ ma ja-nɩ pa dɩ́ yɛ kwi sɩm wʋnɩ dɩ́ kaagɩ dɩ́ veǝ. Amʋ ma nii a na kwi zanzan na tigi bolo kʋm tɩga je maama nɩ. Sɩ nan tiini sɩ kʋ mʋ. 3 O ma bwe-nɩ o wɩ: «Nabiinu, nmʋ na nɛ kwi sɩntʋ tɩn, n bʋŋɩ nɩ sɩ wʋ́ joori sɩ na ŋwɩa na?» Amʋ dɩ ma lǝr-o a wɩ: «Yuutu Baŋa-Wɛ, nmʋ yɩranɩ mʋ wʋ́ wanɩ taanɩ dɩntʋ n ta.»4 O laan ma ta dɩ amʋ o wɩ: «Ŋɔɔnɩ n ta taanɩ dɩ kwi sɩntʋ nɩ: ‹Abam kwi-kʋrɩ, cəgi-na Baŋa-Wɛ kwǝrǝ kalʋ o na maŋɩ sɩ o ta dɩ abam tɩn! 5 Yuutu Baŋa-Wɛ na tagɩ te dɩ kwi sɩntʋ tɩn mʋ tɩntʋ: Amʋ lagɩ a pa siun mʋ zʋ abam wʋnɩ, sɩ á taá jɩgɩ ŋwɩa. 6 A nan wʋ́ kwe ŋwannʋ a ba abam maama, yɩ a daarɩ a kwe ya-nwana dɩ ya-tanɩ a ma a kwǝli abam. A maa wʋ́ sin siun a yagɩ á yɩra nɩ sɩ kʋ pa á taá ŋwɩ. Abam laan maa wʋ́ lwarɩ nɩ amʋ mʋ yɩ Baŋa-Wɛ.› »
7 Amʋ ma yɔɔrɩ a ŋɔɔnɩ yiyiu-ŋwɛ nɩ Wɛ na pɛ-nɩ ni sɩ kɩ te tɩn. A ta na wʋra a ŋɔɔnɩ kʋntʋ tɩn, mʋ a ni sɔɔ karɩ-karɩ. Kwi sɩm mʋ sɩŋɩ sɩ sɩ taa tui sɩ tɩtɩ nɩ, yɩ sɩ toŋi daanɩ! 8 A ta na zɩgɩ a nii tɩn, mʋ a nɛ nɩ ŋwannʋ dɩ ya-nwana tu tɩ məəli kwi sɩm, yɩ ya-tanɩ dɩ kwǝli-sɩ. Dɩ kʋ dɩ, siun ta wʋ zʋ sɩ wʋnɩ.
9 Baŋa-Wɛ ta ma ta dɩ amʋ DƖ wɩ: «Nabiinu, ŋɔɔnɩ n ta dɩ viu kʋm nɩ: ‹Yuutu Baŋa-Wɛ na tagɩ te tɩn mʋ tɩntʋ: Viu, zaŋɩ n nuŋi lʋgʋ baŋa sapala yana yam maama nɩ n ba n dʋlɩ siun n yagɩ nɔɔna bantʋ ba ya na gʋ tɩn wʋnɩ sɩ ba laan na ŋwɩa.› » 10 Amʋ dɩ ma ŋɔɔnɩ nɩ DƖ na pɛ-nɩ ni sɩ a kɩ te tɩn. Siun ma sɩɩnɩ kʋ zʋ twa bam wʋnɩ. Ba ma pɛ ba zaŋɩ ba zɩgɩ ba nɛ baŋa nɩ yɩ ba ŋwɩ. Ba yɔɔrɩ ba yɩ jar-kərə kɔ-fɔrɔ mʋ.a
11 Baŋa-Wɛ daa ta ma ta dɩ amʋ DƖ wɩ:
«Nabiinu, kwi sɩntʋ brɩ Yisɩrayɛlɩ dwi tiinə bam maama na nyɩ te tɩn mʋ. Ba kaagɩ ba tɛ nɩ: ‹Dɩbam kwi sɩm kʋgɩ sɩ pɩɩrɩ mʋ, yɩ dɩ́ tɩɩna maama ti. Dɩbam tɩʋ kʋm daa ba jɩgɩ jwa.› 12 Kʋntʋ ŋwaanɩ, ŋɔɔnɩ n ta taanɩ dɩ ba n wɩ: ‹Yuutu Baŋa-Wɛ na tagɩ te tɩn mʋ tɩntʋ: Amʋ nɔɔna bam, amʋ tɩtɩ mʋ lagɩ a puri á yibeelǝ yam, sɩ a pa á bi. A laan maa wʋ́ ja abam a joori a ba a yagɩ Yisɩrayɛlɩ tɩga kam nɩ. 13 Amʋ nɔɔna bam, á wʋ́ ba á lwarɩ nɩ amʋ mʋ yɩ Baŋa-Wɛ dɩm, nɩ a na sɩɩnɩ a puri yibeelǝ yam á ya na tigi ya wʋnɩ tɩn pa á nuŋi pooni. 14 A maa wʋ́ kwe a Joro a kɩ abam wʋnɩ sɩ kʋ pa á na ŋwɩa, yɩ a daarɩ a pa á joori á jǝni á tɩtɩ tɩga kam baŋa nɩ. Abam laan maa wʋ́ da kʋ baŋa nɩ á lwarɩ nɩ amʋ Baŋa-Wɛ mʋ tagɩ kʋntʋ, yɩ a sɩɩnɩ a kɩ a na tagɩ nɩ a wʋ́ kɩ te tɩn. Yuutu Baŋa-Wɛ na tagɩ kʋlʋ tɩn mʋ kʋntʋ.› »
Yisɩrayɛlɩ tɩʋ dɩ Zuda tɩʋ taanɩ
15 Baŋa-Wɛ kwǝrǝ daa ma yi amʋ ka wɩ:
16 «Nabiinu, beeri daa sɩ n pʋpʋnɩ ka baŋa nɩ nɩ: ‹Zuda, dɩ Yisɩrayɛlɩ tiinə balʋ na yɩ o yɩra nɔɔna tɩn nyɩm.› Ta beeri daa kadoŋ sɩ n pʋpʋnɩ kantʋ baŋa nɩ nɩ: ‹Zʋzɛfʋ bu Efrayim nyɩm, dɩ Yisɩrayɛlɩ tiinə balʋ na yɩ wʋntʋ dɩ yɩra nɔɔna tɩn nyɩm.› 17 Laan ja sɩ niə yam n ba n toŋi daanɩ sɩ ya taa yɩ daa dɩdʋa nmʋ jɩŋa nɩ.
18 Nmʋ dwi tiinə bam na bwe sɩ ba lwarɩ n kǝm dɩm kuri, 19 sɩ n ta dɩ ba nɩ: ‹Yuutu Baŋa-Wɛ na tagɩ te tɩn mʋ tɩntʋ: Amʋ lagɩ a kwe Zʋzɛfʋ daa kam na wʋ Efrayim jɩŋa nɩ tɩn mʋ, sɩ a pa ka toŋi dɩ Zuda daa kam, sɩ bantʋ maama ji daa dɩdʋa. Ba laan maa wʋ́ taa yɩ dɩdʋa amʋ jɩŋa wʋnɩ.› 20 Nan ta n ze dɛ sɩle sɩm kʋntʋ n jɩŋa nɩ sɩ nɔɔna bam maama na. 21 Nmʋ laan ma n wʋ́ ta dɩ ba nɩ: ‹Yuutu Baŋa-Wɛ na tagɩ te tɩn mʋ tɩntʋ: Amʋ lagɩ a lɩ Yisɩrayɛlɩ tiinə bam mʋ a ja a nuŋi tɩɩnɩ dɩlʋ maama wʋnɩ ba ya na zʋʋrɩ tɩn. A maa wʋ́ la-ba a ja a nuŋi lʋgʋ baŋa sapala maama nɩ sɩ ba joori ba jǝni ba tɩtɩ tɩʋ kʋm wʋnɩ. 22 Ba na joori ba tɩga kam nɩ kʋntʋ, a lagɩ a pa ba maama ji tɩʋ dɩdʋa yɩ ba zʋʋrɩ Yisɩrayɛlɩ pweeru je sɩm nɩ. Pɛ dɩdʋa mʋ wʋ́ taa nii ba maama baŋa nɩ. Ba daa bá fɔgɩ ba pɔɔrɩ ba tɩtɩ sɩ ba ji tɩɩnɩ tɩle. 23 Ba nan daa bá digimi ba tɩtɩ dɩ ba jwə-yɔɔrʋ tɩm, dɩ ba wo-zɔɔna dɩ zwabaniə kikiə yam. Amʋ tɩtɩ mʋ lagɩ a joŋi-ba a yagɩ dɩ ba na ywəri a cwǝŋǝ kam nɩ ba cɔgɩ te tɩn. Ba maa wʋ́ taa yɩ amʋ nɔɔna sɩ amʋ dɩ taa yɩ ba Wɛ dɩm.
24 Amʋ tɩntʋŋnʋ Davidi nan mʋ wʋ́ taa yɩ ba pɛ. Nɔɔnʋ dɩdʋa wʋ́ taa nii ba maama baŋa nɩ, nɩ nayɩrʋ na kɔnɩ o peeni sɩm te tɩn mʋ. A nɔɔna bam maa wʋ́ taa tʋŋɩ ba tɔgɩ a niə yam dɩ a zaasɩm dɩm. 25 Baá taa zʋʋrɩ tɩga kalʋ a dɛɛn na kwe a pa a tɩntʋŋnʋ Zakɔbɩ tɩn wʋnɩ, mɛ seeni á nabaara dɩ dɛɛn na zʋʋrɩ da tɩn. Ba dɩ ba dwi dɩlʋ na saŋɩ ba kwaga tɩn laan maa wʋ́ taa zʋʋrɩ tɩga kam kʋntʋ nɩ sɩ kʋ taa ve wuu, yɩ amʋ tɩntʋŋnʋ Davidi dɩ taa yɩ ba dɩdɛɛrʋ maŋa maama. 26 Amʋ nan wʋ́ goni ni mʋ dɩ a nɔɔna bam bɩcar-zuru ŋwaanɩ. Ni-gonim dɩm kʋntʋ wʋ́ taa zɩga sɩ kʋ taa ve maŋa kalʋ na ba ti tɩn. Amʋ lagɩ a jəni-ba ba tɩga kam nɩ mʋ sɩ ba taa wʋra, yɩ ba puli dɩ kɔgɔ. A maa wʋ́ pa a digə kam taa wʋ ba tɩtarɩ nɩ sɩ kʋ taa ve maŋa maama. 27 Amʋ maa wʋ́ taa zʋʋrɩ ba tee nɩ sɩ a taa yɩ ba Wɛ, yɩ ba dɩ yɩ amʋ tɩtɩ nɔɔna.b 28 Lʋgʋ baŋa tɩɩnɩ dɩm maa wʋ́ lwarɩ nɩ amʋ Baŋa-Wɛ mʋ kuri Yisɩrayɛlɩ tiinə bam sɩ ba taa yɩ amʋ tɩtɩ nyɩm, nɩ a digə kam na wʋ ba tɩtarɩ nɩ sɩ kʋ taa ve maŋa maama.› »