Yisɩrayɛlɩ pweeru tɩm taanɩ
36
«Nabiinu, ŋɔɔnɩ yiyiu-ŋwɛ n pa Yisɩrayɛlɩ tɩʋ pweeru tɩm sɩ n ta n wɩ: ‹Abam Yisɩrayɛlɩ tɩʋ pweeru tɩm, cəgi-na Baŋa-Wɛ kwǝrǝ. 2 Yuutu Baŋa-Wɛ na tagɩ te tɩn mʋ tɩntʋ: Abam dʋna bam laan cakɩ abam ŋwaanɩ mʋ yɩ ba tɛ ba wɩ: «Faŋa faŋa pweeru tɩm laan jigi dɩbam nyɩm mʋ.» ›3 Kʋntʋ ŋwaanɩ, ŋɔɔnɩ sɩ n ta n wɩ. ‹Yuutu Baŋa-Wɛ na tagɩ te tɩn mʋ tɩntʋ: Á dʋna bam nuŋi je maama nɩ ba ba ba cɔgɩ á laŋa kam maama, pa ka ji dwi-gɛ tiinə bam nyɩm. Nɔɔna maa baɩ bɩbara ba pa abam yɩ ba jɩgɩ abam ba yáala. 4 Kʋntʋ ŋwaanɩ, Yisɩrayɛlɩ pweeru tɩm, cəgi-na Yuutu Baŋa-Wɛ kwǝrǝ. Yuutu Baŋa-Wɛ tagɩ tɩntʋ mʋ dɩ abam pweeru tɩm, dɩ pu-kum sɩm, dɩdaanɩ á gugwəəru dɩ bwəəlu tɩm. O kwǝrǝ kam ta wʋ́ yi á tɩɩnɩ dɩlʋ maama á dʋna bam na cɔgɩ pa dɩ ji di-dwəənu yɩ nɔɔn-nɔɔnʋ daa ba zʋʋrɩ dɩ wʋnɩ, pa dwi-gɛ tiinə balʋ na gilimi abam tɩn laan vrɩ á wǝǝnu ba daarɩ ba jɩgɩ abam ba twɩ tɩn. 5 Yuutu Baŋa-Wɛ na tagɩ te tɩn mʋ tɩntʋ: Amʋ tɔgɩ a ban-lʋm baŋa nɩ mʋ a ta taanɩ a cɔgɩ dwi-gɛ tiinə bam kʋntʋ maama, kʋ fɔgɩ kʋ daɩ Edɔm tɩʋ kʋm. Bɛŋwaanɩ ba cakɩ mʋ abam cɔgɩm ŋwaanɩ, yɩ ba ta kuri sɩ ba vrɩ tɩga kalʋ abam na kɔnɩ á vara da tɩn sɩ ka taa yɩ bantʋ nyɩm.›
6 Nan ta ŋɔɔnɩ Yisɩrayɛlɩ tɩga kam taanɩ n ta dɩ ka pweeru dɩ ka zwəənu tɩm, dɩdaanɩ ka gugwəəru, dɩ ka bwəəlu tɩm nɩ: ‹Yuutu Baŋa-Wɛ na tagɩ te tɩn mʋ tɩntʋ: Amʋ ŋɔɔnɩ kʋ tɔgɩ a ban-lʋm dɩm ŋwaanɩ mʋ dɩ dwi-gɛ tiinə bam na tiini ba twɩ abam te tɩn. 7 Kʋntʋ ŋwaanɩ, Yuutu Baŋa-Wɛ laan nan tagɩ tɩntʋ mʋ: Amʋ dugi durə mʋ dɩ yi-sɩɩna nɩ: amʋ wʋ́ pa dwi-gɛ tiinə balʋ na gilimi abam tɩn na ba cavɩɩra.
8 Kʋ daarɩ abam Yisɩrayɛlɩ pweeru tɩm, tweeru daa ta wʋ́ kwi vɔɔrʋ á yuu nɩ, yɩ tɩ kɩ biə lanyɩranɩ sɩ amʋ nɔɔna Yisɩrayɛlɩ tiinə bam taa jɩgɩ ba di. Bɛŋwaanɩ, kʋ bá daanɩ dɩ ba na joori ba tɩtɩ tɩʋ. 9 Amʋ yigə wʋ abam wʋnɩ, sɩ a wǝli abam. Nɔɔna wʋ́ va tɩga kam yɩ ba du wʋdiiru ka baŋa nɩ. 10 Amʋ wʋ́ pa Yisɩrayɛlɩ dwi tiinə bam puli je maama nɩ. Ba maa wʋ́ fɔgɩ ba lɔ ba tɩɩnɩ dɩlʋ ya na cɔgɩ tɩn ba zɩgɩ, sɩ ba taa zʋʋrɩ dɩ wʋnɩ. 11 A ta wʋ́ pa nabiinǝ dɩ vara puli dɩ kɔgɔ zanzan á tɩga kam baŋa nɩ, yɩ ba daarɩ ba lʋ biə. Nɔɔna zanzan wʋ́ taa zʋʋrɩ á tɩɩnɩ dɩm wʋnɩ mʋ nɩ faŋa kam na yɩ te tɩn, yɩ á tiini á na yu-yoŋo sɩ kʋ dwǝni faŋa kam. Abam laan maa wʋ́ lwarɩ nɩ amʋ mʋ yɩ Baŋa-Wɛ dɩm. 12 A maa wʋ́ pa a nɔɔna Yisɩrayɛlɩ tiinə bam joori ba taa zʋʋrɩ á tɩga kam baŋa nɩ. Á tɩga kam wʋ́ taa yɩ ba nyɩm mʋ yɩ ba te-ka. Tɩ-ywəŋə kam kʋntʋ nan daa bá pa ba dwi ti.
13 Yuutu Baŋa-Wɛ na tagɩ te tɩn mʋ tɩntʋ: Nɔɔna kaagɩ ba tɛ abam taanɩ ba wɩ: «Á tɩga kam jɩgɩ nabiinǝ mʋ ka lirǝ, pa á tɩʋ kʋm ga kʋ biə.» 14 Kʋntʋ ŋwaanɩ, amʋ Yuutu Baŋa-Wɛ nan tagɩ nɩ: kʋ na zɩgɩ lele sɩ kʋ taa ve tɩn, tɩga kam daa bá li nabiinǝ, pa á tɩʋ kʋm ga kʋ biə. 15 Amʋ daa bá pa á ni dwi-gɛ tiinə bam na jɩgɩ abam ba mwana te tɩn. Nɔɔna daa bá taa jɩgɩ abam ba yáala sɩ á ni kʋ zʋnnɩ. Á tɩʋ kʋm dɩ nan daa bá joori kwaga abam ŋwaanɩ. Yuutu Baŋa-Wɛ na tagɩ kʋlʋ tɩn mʋ kʋntʋ.› »
16 Baŋa-Wɛ kwǝrǝ daa ta ma yi amʋ ka wɩ:
17 «Nabiinu, maŋa kalʋ Yisɩrayɛlɩ tiinə bam ya na zʋʋrɩ ba tɩtɩ tɩga kam baŋa nɩ tɩn, mʋ ba digimi-ka dɩ ba tɩtʋŋ-zɔɔna kikiə yam. Amʋ nii a na ba kikiə yam pa ya nyɩ dɩ kaanɩ na wʋra o kɩ o cana zarɩm yɩ kʋ yɩ te tɩn mʋ. 18 Amʋ ma yɔɔrɩ a lo a ban-lʋm ba baŋa nɩ a ma a waarɩ-ba, ba na cɔgɩ tɩga kam dɩ ba nɔn-gʋra dɩ ba jwǝnǝ kaanɩm kikiə yam tɩn ŋwaanɩ. 19 Amʋ ma jagɩ-ba pa ba vu yigə yigə sɩ a yagɩ-ba lʋgʋ baŋa tɩɩnɩ dɩm maama wʋnɩ, yɩ a daarɩ a waarɩ-ba sɩ kʋ maŋɩ dɩ ba kikiə yam na yɩ te tɩn. 20 Ba nan na yǝni ba vu ba gwaanɩ dɩ dwi-gɛ tiinə je sɩlʋ maama nɩ tɩn, ba dɩ maa jɩgɩ a yɩrɩ dɩm na yɩ lanyɩranɩ fasɩ tɩn ba yáala. Bɛŋwaanɩ, nɔɔna yǝni ba tɛ ba taanɩ ba wɩ: ‹Baŋa-Wɛ nɔɔna bam mʋ tɩntʋ. Dɩ kʋ dɩ, DƖ nan fɩn DƖ lɩ-ba tɩga kalʋ DƖ ya na pɛ-ba tɩn nɩ.› 21 Amʋ yigə nan wʋ a yɩrɩ dɩm zulə wʋnɩ, dɩ Yisɩrayɛlɩ dwi tiinə bam na pɛ dwi-gɛ tiinə jɩgɩ-dɩ ba yáalɩ te tɩn.
22 Kʋntʋ ŋwaanɩ, ta dɩ Yisɩrayɛlɩ dwi tiinə bam nɩ: ‹Yuutu Baŋa-Wɛ na tagɩ te tɩn mʋ tɩntʋ: Amʋ na lagɩ a joŋi abam a yagɩ tɩn daɩ abam tɩtʋŋa ŋwaanɩ. Kʋ nan yɩ amʋ na laga sɩ a tɩtɩ yɩrɩ dɩm na zulə tɩn ŋwaanɩ mʋ. Bɛŋwaanɩ, abam tiini á pa dwi-gɛ tiinə balʋ á na zʋʋrɩ ba tɩtarɩ nɩ tɩn yáalɩ-dɩ mʋ. 23 A nan wʋ́ yɔɔrɩ a brɩ dwi-gɛ tiinə bam wɩ amʋ yɩrɩ kamunu kʋm abam na yáalɩ ba maama yigə nɩ tɩn yɩ lanyɩranɩ fasɩ mʋ. Lʋgʋ baŋa tɩɩnɩ dɩm maama laan maa wʋ́ lwarɩ nɩ amʋ mʋ yɩ Baŋa-Wɛ wʋm, nɩ a na tɔgɩ abam baŋa nɩ a brɩ-ba jaja nɩ a sɩɩnɩ a yɩ lanyɩranɩ tu mʋ. Yuutu Baŋa-Wɛ na tagɩ kʋlʋ tɩn mʋ kʋntʋ.
24 Amʋ nan wʋ́ ja abam a nuŋi tɩɩnɩ dɩdonnǝ dɩm maama nɩ, yɩ a la abam a kɩ daanɩ sɩ a ja abam a joori a ba a yagɩ a tɩtɩ tɩʋ kʋm nɩ. 25 A laan maa wʋ́ lo na-ŋʋna á yɩra nɩ a ma a kwɛ abam dɩ á wo-zɔɔna dɩ á jwǝnǝ kaanɩm kikiə yam.a 26 A ta wʋ́ pa á taá jɩgɩ bɩcarɩ-dʋʋrɩ dɩ wʋbʋŋ-dʋʋra sɩ á ma á zuli-nɩ. A maa wʋ́ pa á wʋ daa yɩ kɩ dam, yɩ a daarɩ a pa á yi taa bwǝnǝ.b 27 A nan lagɩ a kwe a Joro mʋ a kɩ á bɩcara nɩ. Kʋntʋ maa wʋ́ pa á fra taa wʋ a niə yam dɩ a zaasɩm dɩm tɔgɩm wʋnɩ. 28 Abam daa maa wʋ́ taá zʋʋrɩ tɩga kam a na kwe a pa á nabaara bam tɩn, sɩ á taá yɩ amʋ nɔɔna, sɩ amʋ dɩ taa yɩ abam Wɛ. 29 A nan wʋ́ vrɩ abam a ja a nuŋi á wo-zɔɔna kikiə yam nɩ. A maa wʋ́ pa á tɩga kam kɩ wʋdiiru zanzan, sɩ kana daa yɩ ja abam. 30 Á tweeru tɩm wʋ́ taa kɩ biə zanzan dɩ pa abam, yɩ á karɩ wʋdiiru dɩ puli lanyɩranɩ, sɩ kʋ pa dwi-gɛ tiinə daa yɩ taa jɩgɩ abam ba yáalɩ ba wɩ: kana jɩgɩ abam ka gʋɩ. 31 Á ta maa wʋ́ guli á kəm-balwaarʋ yam, dɩ á kikiə yalʋ na wʋ tɔgɩ cwǝŋǝ tɩn gulə. Á fra nan wʋ́ nuŋi á tɩtɩ, lwarɩm dɩ kəm-balwaarʋ yalʋ maama á ya na kɩ tɩn ŋwaanɩ. 32 Yisɩrayɛlɩ dwi tiinə bam, nan lwarɩ-na nɩ kʋ daɩ abam tɩtʋŋ-ŋʋna ŋwaanɩ mʋ a lagɩ a kɩ tɩntʋ maama a pa abam. Abam yum nan maŋɩ sɩ dɩ tiiri tɩga nɩ mʋ dɩ cavɩɩra á kikiə yam ŋwaanɩ. Yuutu Baŋa-Wɛ na tagɩ kʋlʋ tɩn mʋ kʋntʋ.
33 Yuutu Baŋa-Wɛ daa ta na tagɩ te tɩn mʋ tɩntʋ: Dɛ dɩlʋ nɩ amʋ na wʋ́ kwɛ abam a ti dɩ á lwarɩm kikiǝ yam maama tɩn a laan wʋ́ pa á joori á taá zʋʋrɩ á tɩɩnɩ dɩm wʋnɩ. Á maa wʋ́ fɔgɩ á lɔ je sɩlʋ ya na jigi di-dwəənu tɩn. 34 Abam daa wʋ́ taá varɩ á tɩga kalʋ ya na tigi kafɛ tɩn baŋa nɩ, sɩ nɔɔna daa yɩ taa nii-ka nɩ ka ga yɩ kagʋa mʋ. 35 Ba maa wʋ́ taa tɛ nɩ: «Tɩga kantʋ ya na tigi kafɛ tɩn laan nyɩ dɩ Edɛn tɩ-ywəŋə kʋm dɛɛn na yɩ te tɩn mʋ. Nii-na! Tɩɩnɩ dɩlʋ ya na cɔgɩ yɩ dɩ sam ji di-dwəənu tɩn laan fɔgɩ dɩ lɔ dɩ pɩ dɩ dam, yɩ nɔɔna zanzan zʋʋrɩ dɩ wʋnɩ!» 36 Dwi-gɛ tiinə balʋ ta na daarɩ yɩ ba gilimi abam je sɩm tɩn laan wʋ́ lwarɩ nɩ amʋ Baŋa-Wɛ mʋ fɔgɩ a lɔ tɩʋ kʋlʋ maama ya na cɔgɩ tɩn a zɩgɩ, yɩ a joori a va tɩga kalʋ maama ya na tigi kafɛ tɩn. Amʋ Baŋa-Wɛ mʋ tagɩ kʋntʋ. A nan wʋ́ sɩɩnɩ a kɩ kʋlʋ a na tagɩ sɩ a kɩ tɩn.›
37 Yuutu Baŋa-Wɛ na tagɩ te tɩn mʋ tɩntʋ: Amʋ daa wʋ́ pa Yisɩrayɛlɩ dwi tiinə bam cwǝŋǝ sɩ ba loori zǝnǝ amʋ tee nɩ. A maa wʋ́ ləri ba wɛ-loro kʋm yɩ a pa ba kɔgɔ kʋm puli nɩ varɩ-kɔgɔ na daga te tɩn. 38 Ba nɔn-kɔgɔ kʋm wʋ́ taa daga lanyɩranɩ, nɩ vara zanzan dɛɛn na yǝni ba su Zeruzalɛm tɩʋ kʋm candi dim maŋa nɩ sɩ ba kwe-ba ba ma kɩ kaanɩm te tɩn mʋ. Kʋntʋ mʋ nɔɔna wʋ́ yɔɔrɩ ba su tɩɩnɩ dɩlʋ ya na zɩgɩ di-dwəənu yɩranɩ tɩn. Ba laan maa wʋ́ lwarɩ nɩ amʋ mʋ yɩ Baŋa-Wɛ wʋm.»