Edɔm tɩʋ taanɩ
35
Baŋa-Wɛ kwǝrǝ daa ma yi amʋ ka wɩ:2 «Nabiinu, pipiri n yibiyə n jeeri Seyiri piu kʋma sɩ n ŋɔɔnɩ yiyiu-ŋwɛ n cɔgɩ-kʋ 3 n ta n wɩ: ‹Seyiri piu, amʋ Yuutu Baŋa-Wɛ dwǝni dɩ nmʋ mʋ. A nan wʋ́ twɩ a jɩŋa a jeeri‑m sɩ n ji kagʋa n ta n tigə. 4 A lagɩ a pa nmʋ tɩɩnɩ dɩm maama mʋ ji di-dwəənu dɩ taa zɩga, sɩ n laŋa kam ji kagʋa. Nmʋ laan ma n wʋ́ lwarɩ nɩ amʋ mʋ yɩ Baŋa-Wɛ dɩm.
5 Kʋ zɩgɩ faŋa kam nɩ mʋ abam jɩgɩ sɩbɔŋɔ á kɩ dɩ Yisɩrayɛlɩ tiinə bam. Á ma da kʋ ŋwaanɩ á dʋlɩ-ba á yagɩ sɩ ba tɩ najara wʋnɩ, maŋa kalʋ nɩ lɛɛrʋ na tiini tɩ yi-ba yɩ ba yɔɔrɩ ba na waarɩm ba ti tɩn. 6 Kʋntʋ ŋwaanɩ, nɩ amʋ Yuutu Baŋa-Wɛ na jɩgɩ ŋwɩa te tɩn, kʋ yɩ cɩga mʋ nɩ a lagɩ a pa cwǝŋǝ mʋ sɩ nɔɔna yɔɔrɩ ba gʋ abam. Abam bá lu dɩ á ŋwɩa, á na maŋɩ á soe nɔn-gʋra kikiə tɩn ŋwaanɩ. 7 Amʋ wʋ́ pa Seyiri pweeru je sɩm ji kagʋa ka taa tigə, yɩ a daarɩ a gʋ balʋ maama na tɔgɩ je sɩm kʋntʋ nɩ ba kɛ tɩn. 8 Twa yɩranɩ mʋ lagɩ ba faarɩ abam pweeru tɩm yuu. Balʋ na tɩgɩ najara wʋnɩ tɩn wʋ́ taa tigi a pweeru baŋa nɩ, dɩ á bwəəlu tɩm, dɩ á gugwəəru tɩm tɩga nɩ. 9 A lagɩ a pa á tɩʋ kʋm ji kagʋa mʋ sɩ kʋ taa ve maŋa maama. Nɔɔna daa bá taa zʋʋrɩ á tɩɩnɩ dɩm wʋnɩ. Abam laan maa wʋ́ lwarɩ nɩ amʋ mʋ yɩ Baŋa-Wɛ.
10 Abam nan tagɩ á tɩtɩ nɩ á wɩ: «Dɩbam mʋ wʋ́ joŋi Zuda tɩʋ dɩ Yisɩrayɛlɩ tɩʋ, dɩ ba tɩga kam maama dɩ́ taa te.» Á tagɩ kʋntʋ doŋ yɩ amʋ Baŋa-Wɛ nan wʋ ba tee nɩ. 11 Kʋntʋ ŋwaanɩ, nɩ amʋ Yuutu Baŋa-Wɛ na jɩgɩ ŋwɩa te tɩn, kʋ yɩ cɩga mʋ nɩ a lagɩ a waarɩ abam mʋ sɩ kʋ maŋɩ dɩ á na tiini á kɩ banɩ dɩ pu-sɩŋa te amʋ nɔɔna bam baŋa nɩ, yɩ á ta dʋnɩ-ba te tɩn. Amʋ laan maa wʋ́ vɩɩrɩ a tɩtɩ dɩ ba, nɩ a na waarɩ abam a ti. 12 Abam dɩ maa wʋ́ lwarɩ nɩ amʋ Baŋa-Wɛ ni á bɩtar-yɔɔrʋ tɩm, dɩ abam na yáalɩ Yisɩrayɛlɩ pweeru tɩm te tɩn. Abam maŋɩ á ta tɩ taanɩ nɩ: «Je sɩm kʋntʋ jigi kagʋa mʋ, pa dɩ́ na cwǝŋǝ sɩ dɩ́ wanɩ-ba dɩ́ di.» 13 Á brɩ á tɩtɩ kamunni mʋ amʋ yigə nɩ, yɩ á daarɩ á ŋɔɔnɩ bɩtar-balɔrɔ zanzan á ma á cɔge-nɩ. Amʋ nan ni tɩ maama. 14 Yuutu Baŋa-Wɛ nan na tagɩ te tɩn mʋ tɩntʋ: A lagɩ a pa á tɩʋ kʋm maama cɔgɩ mʋ, sɩ lʋgʋ baŋa nɔɔna maama taa caka. 15 Nɩ nmʋ dɩ dɛɛn na cakɩ maŋa kalʋ nɩ Yisɩrayɛlɩ dwi tiinə bam dɩ ba tɩga kam maama na nɛ cɔgɩm tɩn, kʋntʋ mʋ amʋ dɩ lagɩ a kɩ abam. Seyiri pweeru je sɩm dɩ Edɔm laŋa kam maama lagɩ tɩ cɔgɩ tɩ ji di-dwəənu yɩranɩ mʋ. Ba laan maa wʋ́ lwarɩ nɩ amʋ mʋ yɩ Baŋa-Wɛ.› »