Nayɩra dɩ ba peeni taanɩ
34
Baŋa-Wɛ daa ta ma pa-nɩ DƖ kwǝrǝ DƖ wɩ:2 «Nabiinu, ŋɔɔnɩ yiyiu-ŋwɛ n cɔgɩ Yisɩrayɛlɩ tɩʋ yigǝ tiinǝ balʋ na nii a nɔɔna bam baŋa nɩ tɩn. Nan ta dɩ ba n wɩ: ‹Yuutu Baŋa-Wɛ na tagɩ te tɩn mʋ tɩntʋ: Lɛɛrʋ taa wʋ á baŋa nɩ. Nayɩra maŋɩ sɩ ba taa nii ba peeni sɩm baŋa nɩ mʋ. Kʋ daɩ kʋntʋ na? Abam nan nii á tɩtɩ baŋa nɩ mʋ. 3 Á soe sɩ á taa di á peeni lara kam, yɩ á kwe sɩ kʋrʋ tɩm á sɔ gwaarʋ á ma á kwǝli á tɩtɩ. Á ma daarɩ á kuri varɩ-laarʋ tɩm á gʋ á pa á tɩtɩ, yɩ á yigə laan tǝri peeni sɩm wʋnɩ. 4 Á wʋ nii kʋ baŋa nɩ sɩ á taá cʋ peeni sɩlʋ na bwǝnǝ tɩn sɩ sɩ na dam. Á ta maa wʋ sooni varɩ-yawɩɩna bam, sɩ á daarɩ á vɔ balʋ na nɛ zʋnnɩ tɩn ŋwana yam. Abam cɩm mʋ yɩ á peeni sɩm ywəri sɩ maa jeə. Sɩlʋ maa na je tɩn, á wʋ beeri-sɩ sɩ á ja á joori. Abam nan bɛɛsɩ pe-kɔgɔ kʋm dɩ dam dɩ fɩfɩʋn mʋ. 5 Kʋ maa pa sɩ jagɩ je maama, sɩ na ba jɩgɩ nayɩrʋ sɩ kʋ tu taa nii sɩ baŋa nɩ tɩn ŋwaanɩ. Sɩ na jagɩ kʋntʋ tɩn, sɩ laan ma ji ga-vara dwi maama ni-wʋdiu. 6 Amʋ peeni sɩm yɔɔrɩ sɩ jagɩ mʋ sɩ yi tɩga baŋa ni maama. Sɩ maa kaagɩ zwəənu dɩ pweeru maama yum nɩ sɩ kɩkara, yɩ nɔɔn-nɔɔnʋ wʋ kɩ o yigə sɩ wʋnɩ sɩ kʋ tu beeri sɩ je.
7 Kʋntʋ ŋwaanɩ, abam balʋ na nii a nɔɔna bam baŋa nɩ nɩ nayɩra na kɩ te tɩn, cəgi-na Baŋa-Wɛ kwǝrǝ kam: 8 Nɩ amʋ Yuutu Baŋa-Wɛ na jɩgɩ ŋwɩa te tɩn, kʋ yɩ cɩga mʋ nɩ a jɩgɩ dɩdaanɩ abam mʋ. Bɛŋwaanɩ, a pe-kɔgɔ kʋm gɛ nayɩrʋ pa ga-vara jɩgɩ-sɩ ba tʋrɩ ba di. A nayɩra bam nan wʋ beeri amʋ peeni sɩlʋ na cɔgɩ cwǝŋǝ tɩn je, yɩ ba yɔɔrɩ ba nii ba tɩtɩ mʋ, pa ba yigə tǝri amʋ peeni sɩm wʋnɩ. 9 Kʋntʋ ŋwaanɩ, abam nayɩra bam, nan cəgi-na Baŋa-Wɛ kwǝrǝ kam. 10 Yuutu Baŋa-Wɛ na tagɩ te tɩn mʋ tɩntʋ: Amʋ jɩgɩ dɩdaanɩ nayɩra bam mʋ. A maa wʋ́ bwe-ba dɩ ba na kɩ a peeni sɩm te tɩn. Amʋ wʋ́ joŋi a peeni sɩm a daarɩ-ba sɩ ba daa yɩ taa nii-sɩ. Nayɩra bam daa bá na cwǝŋǝ sɩ ba kɔnɩ peeni sɩm, naa sɩ ba taa kɔnɩ ba tɩtɩ peeni sɩm baŋa nɩ. Ba daa bá dʋnɩ peeni sɩm nwana.
11 Yuutu Baŋa-Wɛ na tagɩ te tɩn mʋ tɩntʋ: Amʋ tɩtɩ mʋ lagɩ a nuŋi a beeri a peeni sɩm je sɩ a taa nii sɩ baŋa nɩ.a 12 Nɩ nayɩrʋ na beeri o peeni sɩlʋ na jagɩ gaa wʋnɩ te tɩn, kʋntʋ mʋ amʋ dɩ wʋ́ taa nii a peeni sɩm baŋa nɩ. Amʋ peeni sɩm dɛɛn yɔɔrɩ sɩ jagɩ mʋ dɛ dɩlʋ nɩ kunkwən-luluru na tu tɩ li tɩga kam maama tɩn. A nan wʋ́ beeri sɩ je yɩ a joŋi-sɩ a yagɩ. 13 Amʋ wʋ́ ja-ba a nuŋi tɩɩnɩ dɩdonnǝ dɩm nɩ sɩ a la-ba a kɩ daanɩ, yɩ a pa ba joori ba tɩtɩ tɩga kam nɩ. Amʋ laan maa wʋ́ kalɩ-sɩ sɩ sɩ na gaarʋ sɩ di Yisɩrayɛlɩ pweeru je sɩm nɩ, dɩ bwəəlu tɩm nɩ, dɩ je sɩlʋ maama nɔɔna na zʋʋrɩ da tɩn. 14 A lagɩ a taa yɩrɩ-sɩ sɩ sɩ taa di ga-zuru mʋ Yisɩrayɛlɩ pweeru tɩm yum nɩ. Sɩ wʋ́ taa tigi ga-zuru je nɩ mʋ, maŋɩ sɩ taa di sɩ wʋbʋŋa Yisɩrayɛlɩ tɩʋ pweeru tɩm nɩ. 15 Amʋ tɩtɩ nan mʋ lagɩ a taa nii a peeni sɩm baŋa nɩ, yɩ a daarɩ a pa sɩ taa tigi tɩga nɩ dɩ bɩcar-zuru. Yuutu Baŋa-Wɛ na tagɩ kʋlʋ tɩn mʋ kʋntʋ.b 16 Amʋ ta wʋ́ beeri peeni sɩlʋ na je tɩn mʋ, sɩ a daarɩ a kalɩ sɩlʋ na ywəri cwǝŋǝ tɩn a ja a joori. A maa wʋ́ vɔ peeni sɩlʋ na nɛ fufwələ tɩn ŋwana sɩ ya je, sɩ a daarɩ a taa cʋ sɩlʋ na bwǝnǝ tɩn sɩ sɩ na dam. Kʋ daarɩ, kʋ na yɩ peeni sɩlʋ na nugi lanyɩranɩ yɩ sɩ dana tɩn, a lagɩ a gʋ-sɩ mʋ. Amʋ wʋ́ taa kɔnɩ a peeni sɩm kʋ cwǝŋǝ kam nɩ mʋ.
17 Kʋ nan na yɩ abam na yɩ amʋ peeni sɩm tɩn, Yuutu Baŋa-Wɛ na tagɩ te tɩn mʋ tɩntʋ: Taá ye-na wɩ amʋ lagɩ a bʋrɩ taanɩ piə dɩ ka doŋ tɩtarɩ nɩ, yɩ a daarɩ a pɔɔrɩ pi-balɩ dɩ bʋ-balɩ daanɩ mʋ. 18 Abam na nɛ ga-zuru sɩ á taá di tɩn, kʋ ta wʋ maŋɩ kʋ pa abam na? Bɛŋwaanɩ mʋ á yɔɔrɩ á titirigi gaa kʋm nɩ, yɩ á jɩgɩ-kʋ á nɔnɩ á cɔga? Abam wʋʋ ba tigi dɩ na-zurə balʋ á na jɩgɩ á nyɔ tɩn mʋ pa á jɩgɩ na bam á pɔgɩlɩ na? 19 Amʋ peeni sɩsɩm sɩm daa bá na ga-zuru sɩ di, kʋ na daɩ gaa kʋlʋ abam na nɔnɩ á cɔgɩ tɩn. Sɩ maa maŋɩ sɩ sɩ nyɔ na balʋ abam á pɔgɩlɩ pa ba ji bwəru yɩranɩ tɩn mʋ.
20 Yuutu Baŋa-Wɛ nan na tagɩ te dɩ peeni sɩm tɩn mʋ tɩntʋ: Amʋ tɩtɩ mʋ lagɩ a bʋrɩ peeni sɩlʋ na nugi tɩn dɩ sɩlʋ na kwaarɩ tɩn daanɩ. 21 Abam kwe á vwana mʋ á yigi peeni sɩlʋ na bwǝnǝ tɩn, yɩ á daarɩ á cu-sɩ dɩ á nyɩa sɩ á zəli-sɩ pa sɩ jagɩ sɩ kɛ sɩ wʋ dáa dáa. 22 Kʋntʋ ŋwaanɩ amʋ wʋ́ joŋi a peeni sɩm a yagɩ, sɩ sɩ daa yɩ na bɛɛsɩm. A ta wʋ́ bʋrɩ piə dɩ ka doŋ taanɩ. 23 A laan maa wʋ́ lɩ nɔɔnʋ dɩdʋa sɩ wʋntʋ ji a nɔɔna bam maama nayɩrʋ. A tɩntʋŋnʋ Davidi mʋ kʋntʋ. O maa wʋ́ kɔnɩ-ba yɩ o ta nii ba baŋa nɩ. 24 Amʋ Baŋa-Wɛ tɩtɩ wʋ́ taa yɩ ba Tu Wɛ dɩm. A tɩntʋŋnʋ Davidi maa wʋ́ taa yɩ ba maama dɩdɛɛrʋ. Amʋ Baŋa-Wɛ mʋ tagɩ kʋntʋ.
25 Amʋ wʋ́ goni ni dɩ ba bɩcar-zuru ŋwaanɩ, yɩ a daarɩ a zəli kagʋ-vara dwi maama ba tɩga kam nɩ. Kʋntʋ maa wʋ́ pa-ba pwələ sɩ ba taa zʋʋrɩ gaa nɩ, naa ba pəni gaa wʋnɩ, yɩ fʋʋnɩ bá taa jɩgɩ-ba.c 26 Amʋ nan wʋ́ kɩ ba yu-yoŋo, sɩ dɩ yi je sɩlʋ maama na kaagɩ amʋ tɩtɩ piu kʋm tɩn. A maa wʋ́ pa dʋa taa nɩ ka maŋa nɩ lanyɩranɩ. Dʋa kam kʋntʋ mʋ wʋ́ ja yu-yoŋo ka pa-ba. 27 Kʋntʋ mʋ wʋ́ pa ba tweeru tɩm lə biə lanyɩranɩ, yɩ tɩga kam dɩ kɩ wʋdiiru zanzan ka pa-ba. Nɔɔna bam maama wʋ́ taa je ba tɩʋ kʋm nɩ yɩ kʋlʋkʋlʋ ba yaarɩ-ba. Ba laan maa wʋ́ lwarɩ nɩ amʋ mʋ yɩ ba Baŋa-Wɛ dɩm, nɩ a na jaanɩ nabɛ ban-dɛ sɩm ba dʋna na dɩ ba ban nɩ tɩn a bwəri a yagɩ pa ba nuŋi ba gabɛɛm nɩ. 28 Dwi-gɛ tiinə daa bá ba ba vrɩ-ba. Ga-vara dɩ nan daa bá ja-ba ba tʋrɩ ba di. Baá taa je ba tɩʋ nɩ dɩ yazurə mʋ, yɩ nɔɔn-nɔɔnʋ bá fugi-ba. 29 A maa wʋ́ pa-ba tɩ-ywəŋə sɩ ba jǝni ka baŋa nɩ ba va. Kʋntʋ wʋ́ pa kana daa yɩ ja-ba, sɩ dwi-gɛ tiinə bam taa jɩgɩ-ba ba yáala. 30 Ba laan maa wʋ́ lwarɩ nɩ amʋ wʋlʋ na yɩ ba Tu Baŋa-Wɛ dɩm tɩn wʋ ba tee nɩ, yɩ bantʋ Yisɩrayɛlɩ dwi tiinə bam dɩ maa yɩ amʋ nɔɔna. Yuutu Baŋa-Wɛ na tagɩ kʋlʋ tɩn mʋ kʋntʋ. 31 A maa yǝni a nii abam baŋa nɩ, nɩ nayɩrʋ na nii o pe-kɔgɔ te tɩn, yɩ á yɩ nabiinǝ. Á yɩ amʋ nɔɔna mʋ, yɩ amʋ dɩ yɩ abam Wɛ. Yuutu Baŋa-Wɛ na tagɩ kʋlʋ tɩn mʋ kʋntʋ.› »d