Ezekɩyɛlɩ na jigi tɩʋ yɩrɩnʋ te tɩn
33
Baŋa-Wɛ kwǝrǝ daa ta ma yi amʋ ka wɩ:2 «Nabiinu, ta dɩ nmʋ dwi tiinə bam nɩ: ‹Amʋ na pɛ cwǝŋǝ sɩ najara ba tɩʋ kʋdoŋ baŋa, yɩ kʋ nɔɔna bam kuri ba wʋnɩ dɩdʋa sɩ o taa yɩrɩ ba tɩʋ kʋm, 3 kʋ tu na nɛ nɩ jar-kərə mʋ bɩɩnɩ tɩʋ kʋm baŋa pa o wu nabɔnɔ sɩ o ma o kaanɩ tɩʋ kʋm nɔɔna, 4 wʋlʋ maama na ni nabɔnɔ kʋm kwǝri yɩ o kɩ nɩ o yigə mʋ tǝrǝ, nɔɔnʋ wʋm kʋntʋ na tɩgɩ najara yam wʋnɩ, kʋ yɩ o tɩtɩ yigə mʋ. 5 Bɛŋwaanɩ, kʋ tu ni nabɔnɔ kʋm kwǝri mʋ yɩ o kɩ nɩ o yigə tǝrǝ pa o tɩ. O ya na kɩ o tɔgɩ nabɔnɔ kʋm kwǝri na brɩ te tɩn, o yaá joŋi o ŋwɩa. O tʋʋnɩ tɔgɩ dɩ o tɩtɩ mʋ. 6 Kʋ daarɩ, wʋlʋ na zɩgɩ o yɩrɩ tɩʋ kʋm tɩn na nɛ nɩ jar-kərə mʋ maa bɩɩnɩ sɩ ba jeeri-ba dɩ najara, yɩ o na vɩn sɩ o wu nabɔnɔ kʋm o kaanɩ nɔɔna bam pa ba badonnǝ tɩ najara yam baŋa nɩ, kʋ yɩ ba nɛ waarɩm ba lwarɩm kikiǝ ŋwaanɩ mʋ. Amʋ nan wʋ́ bwe nɔɔna bam kʋntʋ jana bam jɩnɩ wʋlʋ na zɩgɩ o yɩrɩ tɩʋ kʋm tɩn tee nɩ mʋ.›
7 Nabiinu, a kuri nmʋ mʋ sɩ n ji wʋlʋ na zɩgɩ n yɩrɩ Yisɩrayɛlɩ dwi tiinə bam tɩn. Nmʋ tɩtʋŋɩ mʋ maŋɩ sɩ n cəgi taanɩ dɩlʋ a na ta tɩn, sɩ n laan vu n kaanɩ-ba n pa-nɩ. 8 Amʋ na tagɩ nɔn-balɔrɔ yɩra taanɩ nɩ o maŋɩ sɩ o tɩ mʋ, yɩ nmʋ na vɩn sɩ n ŋɔɔnɩ jaja n kaan‑o sɩ o yagɩ o kǝm-balwaarʋ tɩm, nɔn-balɔrɔ wʋm kʋntʋ wʋ́ sɩɩnɩ o tɩ o lwarɩm kikiǝ yam ŋwaanɩ. A nan wʋ́ bwe kʋ tu jana bam jɩnɩ nmʋ tee nɩ mʋ. 9 Kʋ daarɩ, nmʋ na kaanɩ nɔn-balɔrɔ wʋm sɩ o yagɩ o kǝm-balwaarʋ tɩm yɩ o na vɩn n ni-kaana yam, oó sɩɩnɩ o tɩ o lwarɩm kikiǝ ŋwaanɩ, yɩ nmʋ nan wʋ́ joŋi n tɩtɩ n yagɩ.a
10 Nabiinu, ta dɩ Yisɩrayɛlɩ dwi tiinə bam nɩ: ‹Abam na kaagɩ á tɛ te tɩn mʋ tɩntʋ: Cam dɩlʋ dɩbam na nɛ dɩ́ zwabaniə kikiə dɩdaanɩ dɩ́ lwarɩm dɩm ŋwaanɩ tɩn tiini dɩ daga dɩ dwe dɩ́ jam. Dɩ́ wʋra dɩ́ bugi dɩ́ jeə ya ŋwaanɩ. Dɩbam wʋ́ kɩ tɩta mʋ sɩ dɩ́ joŋi dɩ́ ŋwɩa?› 11 Nan ta dɩ ba n wɩ: ‹Nɩ amʋ Yuutu Baŋa-Wɛ na jɩgɩ ŋwɩa te tɩn, kʋ yɩ cɩga mʋ nɩ: nɔn-balɔrɔ tʋʋnɩ bá poli amʋ wʋ. A nan soe sɩ nɔn-balwaarʋ pipiri ba yagɩ ba tɩtʋŋ-nɛ sɩm, sɩ ba daarɩ ba na ŋwɩa mʋ. Yisɩrayɛlɩ dwi tiinə bam, nan pipiri-na á yagɩ á lwarɩm kikiə yam. Á wʋ́ kuri tʋʋnɩ sɩ bɛɛ mʋ?›b
12 Nabiinu, nan ta dɩ n dwi tiinə bam n wɩ: ‹Nɔn-ŋʋm na cɔgɩ o cwǝŋǝ, o nɔn-ŋʋnnɩ kikiə bá joŋ-o ya yagɩ. Nɔn-balɔrɔ nan na yagɩ o kǝm-balwaarʋ yam, o dɩ bá tʋ o kǝm-balwaarʋ yalʋ o ya na kɩ tɩn ŋwaanɩ. Nɔn-ŋʋm na puli sɩ o taa kɩ lwarɩm, o faŋa faŋa nɔn-ŋʋnnɩ dɩm bá wan‑o dɩ joŋi dɩ yagɩ sɩ o na ŋwɩa.› 13 Amʋ nan na tagɩ dɩ nɔn-ŋʋm nɩ oó na ŋwɩa, pa o laan kwe o tɩɩna o daŋɩ o nɔn-ŋʋnnɩ dɩm baŋa nɩ sɩ dɩ joŋ-o dɩ yagɩ, yɩ o sɩŋɩ sɩ o taa kɩ tɩtʋŋ-lwaannʋ, amʋ daa bá jeeli wo-laarʋ tɩlʋ o ya na kɩ tɩn dɩ dɩdʋa dɩ. O nan wʋ́ tɩ mʋ o lwarɩm kikiə yam ŋwaanɩ. 14 A nan na tagɩ dɩ nɔn-balɔrɔ a wɩ: ‹N maŋɩ sɩ n tɩ mʋ,› yɩ kʋ tu na pipiri o yagɩ o lwarɩm dɩm, yɩ o daarɩ o tʋŋɩ cɩga kam, dɩ kikiə yalʋ na maŋɩ tɩn, oó joŋi o tɩtɩ. 15 Nɔn-balɔrɔ na kwe wǝǝnu tɩlʋ nɔɔna na pɛ‑o ba ma tiŋi daarɩ tɩn, dɩ wǝǝnu tɩlʋ o na vrɩ nɔɔna tee nɩ tɩn o joori o pa-ba, yɩ o na kɩ o tɔgɩ a zaasɩm dɩm na paɩ ŋwɩa tɩn, yɩ o daa ba kɩ wo-lwaanʋ, kʋ tu wʋ́ na ŋwɩa yɩ o daa bá tɩ. 16 Amʋ daa bá jeeli lwarɩm yalʋ maama o ya na kɩ tɩn sɩ a ma a cɔg-o. O laan tʋŋɩ cɩga mʋ yɩ o kɩ kʋlʋ na maŋɩ tɩn. Oó sɩɩnɩ o na ŋwɩa.
17 Nmʋ dwi tiinə bam nan jɩgɩ ni mʋ ba tɛ ba wɩ: ‹Cɩga tǝrǝ Baŋa-Wɛ na kɩ te tɩn wʋnɩ.› Kʋ nan yɩ bantʋ mʋ ba jɩgɩ cɩga dɩ kʋlʋ ba na jɩgɩ ba kɩ tɩn. 18 Nɔn-ŋʋm na pipiri o yagɩ o nɔn-ŋʋnnɩ kikiə, yɩ o sɩŋɩ sɩ o taa tʋŋɩ lwarɩm, oó tɩ mʋ kʋ ŋwaanɩ. 19 Nɔn-balɔrɔ nan na yagɩ o kǝm-balwaarʋ yam, yɩ o sɩŋɩ sɩ o taa kɩ cɩga kam dɩ kʋlʋ na maŋɩ tɩn, oó na ŋwɩa mʋ o kənə yam baŋa nɩ. 20 Dɩ kʋ dɩ, Yisɩrayɛlɩ dwi tiinə bam, abam ta kaagɩ á tɛ mʋ á wɩ: ‹Cɩga tǝrǝ Baŋa-Wɛ na kɩ te tɩn wʋnɩ.› Amʋ nan wʋ́ bʋrɩ abam dɩdʋa dɩdʋa taanɩ sɩ kʋ maŋɩ dɩ o kikiə na yɩ te tɩn mʋ.»
Zeruzalɛm tɩʋ tʋm dɩm taanɩ
21 Ba na kalɩ dɩbam ba vu sa-tɩʋ yigə yigə yɩ bɩna fugə-yale kɛ tɩn, bɩnɩ dɩm kʋntʋ canɩ fugə kam da yanu dɛ dɩm nɩ mʋ nɔɔnʋ wʋdoŋ nuŋi Zeruzalɛm tɩʋ kʋm nɩ o duri o lu, yɩ o ba o ta dɩ amʋ o wɩ: «Zeruzalɛm tɩʋ kʋm yɔɔrɩ kʋ tʋ mʋ najara baŋa nɩ!» 22 Dɛ dɩlʋ tɩga na wʋ́ pʋʋrɩ sɩ nɔɔnʋ wʋm laan ja kwǝrǝ kam o ba o pa-nɩ tɩn, dɩdaan-ni maŋa nɩ mʋ Baŋa-Wɛ dam yɔɔrɩ dɩ ba amʋ baŋa. O ma pa a ni puri pa a waɩ a ŋɔɔna sɩ kʋ loori nɔɔnʋ wʋm na wʋ́ ba tɩn.c
23 Baŋa-Wɛ kwǝrǝ laan ma yi amʋ ka wɩ:
24 «Nabiinu, nɔɔna balʋ ta na maŋɩ Yisɩrayɛlɩ tɩʋ kʋm di-dwəənu wʋnɩ tɩn yǝni ba tɛ ba wɩ: ‹Abraham dɛɛn yɩ o yɩranɩ dɩdʋa mʋ, yɩ o wanɩ tɩga kam maama o joŋi. Dɩbam nan yɩ kɔgɔ mʋ. Dɩ́ maŋɩ sɩ dɩ́ joŋi tɩga kantʋ mʋ sɩ ka taa yɩ dɩbam nyɩm.› 25 Nan ta dɩ ba nɩ: ‹Yuutu Baŋa-Wɛ na tagɩ te tɩn mʋ tɩntʋ: Abam ta soe sɩ á taá di nwana yalʋ yɩra jana na wʋ ya wʋnɩ tɩn mʋ, yɩ á daarɩ á kaanɩ jwǝnǝ, yɩ á gʋɩ nɔɔna. Kʋntʋ tɩn, kʋ maŋɩ sɩ á taá te tɩga kam na? 26 Abam tɩɩgɩ á sʋ-lwaanʋ tɩm baŋa nɩ mʋ, yɩ á kaagɩ á kɩ wo-zɔɔna dwi maama. Nɔɔnʋ maama maa beeri cwǝŋǝ sɩ kʋ tu cɔgɩ o doŋ kaanɩ. Abam bʋŋɩ nɩ kʋntʋ maama kwaga nɩ kʋ maŋɩ sɩ á taá te tɩga kam mʋ na?›
27 Nan ta dɩ ba n wɩ: ‹Yuutu Baŋa-Wɛ na tagɩ te tɩn mʋ tɩntʋ: nɩ amʋ na jɩgɩ ŋwɩa te tɩn, kʋ yɩ cɩga mʋ nɩ balʋ na daarɩ ba zʋʋrɩ di-dwəənu tɩm wʋnɩ tɩn wʋ́ tɩ najara wʋnɩ mʋ. Kʋ ta na yɩ balʋ dɩ na wʋ gaa wʋnɩ tɩn, a lagɩ a pa ga-vara mʋ gʋ-ba. Kʋ nan na yɩ balʋ na ve ba dalɩ dam je dɩ gugwəəru wʋnɩ tɩn, yawɩ-cɛɛrʋ mʋ wʋ́ gʋ-ba. 28 Amʋ nan wʋ́ pa ba tɩʋ kʋm maama taa tigi di-dwəənu yɩranɩ, sɩ ba dam dɩm ba ya na jɩgɩ wʋpolo dɩ baŋa nɩ tɩn ji kafɛ. Yisɩrayɛlɩ tɩʋ pweeru je sɩm wʋ́ ji kagʋa ka taa tigə, yɩ nɔɔn-nɔɔnʋ bá wanɩ o tɔgɩ dáanɩ o kɛ. 29 Kʋntʋ baŋa nɩ baá lwarɩ nɩ amʋ mʋ yɩ Baŋa-Wɛ dɩm, nɩ a na pɛ ba tɩʋ kʋm ji di-dwəənu, wo-zɔɔna yalʋ ba na jɩgɩ ba kɩ tɩn ŋwaanɩ.›
30 Kʋ daarɩ nmʋ nabiinu, nmʋ dwi tiinə bam yǝni ba jeeri daanɩ mʋ á tɩʋ kabri sɩm təŋə nɩ, dɩ ba sam mancwəənu niə nɩ, ba waasɩ ba brɩ daanɩ ba wɩ: ‹Pa-na sɩ dɩ́ vu Ezekɩyɛlɩ te, sɩ dɩ́ ni Baŋa-Wɛ kwǝrǝ kam o na maŋɩ sɩ o pa dɩbam tɩn.› 31 Ba maa yǝni ba tui nmʋ te dɩ kɔgɔ, yɩ ba cəgi n taanɩ dɩm, nɩ kʋ na maŋɩ dɩ a nɔɔna bam na kɩ te tɩn. Ba nan ba lagɩ sɩ ba tʋŋɩ ba tɔgɩ a taanɩ dɩm na brɩ te tɩn. Sono taanɩ wʋ ba niə nɩ. Ba fra nan wʋ wǝǝnu tɩlʋ na wʋ́ pa ba duni tɩn wʋnɩ mʋ. 32 Ta n ye nɩ bantʋ paɩ n yɩ gɔgɔ kʋlʋ na leeni le sɩlʋ na brɩ sono taanɩ tɩn mʋ. Ba maa sɛ nɩ n jɩgɩ kwər-ywəŋə, yɩ n ye kɔnɔ tam lanyɩranɩ. Ba soe sɩ ba taa cəgi n kwǝrǝ kam. Ba nan ba tʋŋɩ ba tɔgɩ ka na brɩ te tɩn. 33 Wǝǝnu tɩlʋ a na tagɩ tɩn nan wʋ́ sɩɩnɩ tɩ kɩ. Maŋa kam kʋntʋ nɩ mʋ baá lwarɩ nɩ Wɛ nijoŋnu ya wʋ ba tɩtarɩ nɩ.»