Ezipi Pa-farʋ wʋm luə ləŋə
32
Bɩna fugə-yale bɩnɩ dɩm canɩ fugə-sɩle cana kam pulim dɛ dɩm nɩ, mʋ Baŋa-Wɛ kwǝrǝ tu ka yi amʋ ka wɩ:2 «Nabiinu, leeni luə ləŋə n pa Ezipi tɩʋ pa-farʋ wʋm n ta dɩd-o nɩ:
‹Nmʋ ya brɩ n tɩtɩ nɩ n yɩ nyoŋo mʋ
yɩ n jɩgɩ dam lʋgʋ baŋa tɩɩnɩ dɩm maama wʋnɩ.
Kʋ nan na yɩ te tɩn, n yɔɔrɩ n yɩ nɩnɩʋ wʋ prənyoŋo mʋ.
Nmʋ ma n tigi n tɩʋ kʋm bwi sɩm nɩ
n jɩgɩ na bam n pɔgɩlɩ dɩ n nɛ,
pa na bam maama ji bwəru yɩranɩ.
3 Yuutu Baŋa-Wɛ nan na tagɩ te tɩn mʋ tɩntʋ:
Amʋ wʋ́ la nɔn-kɔgɔ zanzan mʋ
yɩ a daarɩ a dʋlɩ a bʋra sɩ a ma a ja‑m.
Nɔɔna bam laan maa wʋ́ vaŋɩ‑m
ba ja ba nuŋi bugə kam nɩ.
4 A maa wʋ́ dʋlɩ‑m a yagɩ tɩ-kʋra baŋa nɩ,
sɩ n ta n tigi pwələ nɩ.
Amʋ ta wʋ́ pa wɛyuu zunə bam maama ba
ba jǝni nmʋ baŋa nɩ,
sɩ ga-vara bam maama dɩ ba ba di n yɩra yam ba su.
5 A ta lagɩ a kwe n ya-nwana yam
a jarɩ pweeru tɩm yuu nɩ mʋ.
Nmʋ yɩra yalʋ na daarɩ yɩ ya pɔ tɩn
maa wʋ́ faarɩ bwəəlu tɩm maama.
6 N jana wʋ́ duri ba taa tʋlɩ tɩga kam je maama nɩ mʋ
ba kɛ ba yi pweeru je sɩm,
yɩ ba su gugwəəru tɩm dɩ.
7 Amʋ na yɔɔrɩ a cɔgɩ‑m a ti,
a lagɩ a li wɛyuu kʋm mʋ
sɩ calɩcwɩ sɩm yɩ ta sɩ nuŋi.
A ta wʋ́ pa kunkoŋo mʋ kwǝli wɩa kam.
Cana kam dɩ daa bá nyɩ ka pooni dɩm.
8 Wɛyuu pooni dwi maama wʋ́ ji lim kʋ pa‑m,
pa n tɩʋ kʋm je maama taa yɩ lim yɩranɩ.
Yuutu Baŋa-Wɛ na tagɩ kʋlʋ tɩn mʋ kʋntʋ.
9 Lʋgʋ baŋa tɩɩnɩ dɩm na nɛ nmʋ na yɔɔrɩ n cɔgɩ te tɩn,
a laan wʋ́ pa liǝ tiini ya ja-ba,
kʋ na maŋɩ kʋ yɩ dwi-gɛ tiinə
balʋ nmʋ ya na yǝri ba ni nɩ tɩn dɩ.
10 A ta wʋ́ pa nɔɔna zanzan yɩra sɔɔrɩ nmʋ ŋwaanɩ.
Ba pwa bam wʋ́ fʋm mʋ yɩ ba yɩra taa saɩ,
a na wʋ́ kwe a sʋ-lɔŋɔ kʋm
a liligi ba yigə nɩ tɩn ŋwaanɩ.
Nmʋ tʋm dɛ dɩm nɩ mʋ fʋʋnɩ wʋ́ ja ba maama,
yɩ liǝ taa jɩgɩ-ba maŋa maama
dɩ ba ŋwɩa na lagɩ ka ti te tɩn.
11 Bɛŋwaanɩ, Yuutu Baŋa-Wɛ na tagɩ te tɩn mʋ tɩntʋ:
Babilɔnɩ tɩʋ pɛ wʋm mʋ lagɩ o ba
o jeeri n tɩʋ kʋm dɩ najara.
12 A nan lagɩ a tɔgɩ pamaŋa sʋ-lwaanʋ baŋa nɩ mʋ,
sɩ a gʋ n jar-kərə bam maama.
Pamaŋna bam kʋntʋ jɩgɩ wʋ-lʋŋ-tɩtʋŋa mʋ
ba dwe lʋgʋ baŋa tɩɩnɩ dɩm maama.
Ba lagɩ ba cɔgɩ Ezipi kamunni maama mʋ,
yɩ ba daarɩ ba cʋcʋgɩ ba jar-kərə kɔgɔ kʋm maama.
13 Kʋ ta na yɩ n tɩʋ kʋm naanɩ dɩlʋ na beeri bwi sɩm ni nɩ tɩn,
a lagɩ a cɔgɩ dɩ maama mʋ.
Nabiinǝ daa bá dɩ ba nɛ bwi sɩm na wʋnɩ sɩ ba pɔgɩlɩ-ba.
Naanɩ dɩ napɔɔna dɩ daa bá nɔnɩ na bam wʋnɩ
sɩ ba pa ba pɔgɩlɩ.
14 Kwaga seeni mʋ a laan wʋ́ pa
n tɩʋ kʋm bwi sɩm na bam pəni cɩmm,
sɩ bu-tʋlɩ sɩm na dɩ taa duri ba kɛa nɩ nugə na kɩ te tɩn.
Yuutu Baŋa-Wɛ na tagɩ kʋlʋ tɩn mʋ kʋntʋ.
15 Amʋ wʋ́ sɩɩnɩ a pa Ezipi tɩʋ kʋm ji di-dwəənu yɩranɩ,
sɩ kʋlʋkʋlʋ daa yɩ daarɩ tɩga kam baŋa nɩ.
A ta wʋ́ magɩ balʋ maama na zʋʋrɩ kʋ wʋnɩ tɩn pa ba tʋ tɩga nɩ.
Maŋa kam kʋntʋ nɩ mʋ ba laan wʋ́ lwarɩ nɩ amʋ mʋ yɩ Baŋa-Wɛ dɩm.›
16 Luə ləŋə kantʋ mʋ ba lagɩ ba leeni ba pa‑o. Kʋ nan yɩ dwi-gɛ tiinə bam bukwa mʋ lagɩ ba mɔ luə ləŋə kam kʋntʋ ba pa Ezipi tɩʋ dɩ kʋ nɔn-biə bam maama. Yuutu Baŋa-Wɛ na tagɩ kʋlʋ tɩn mʋ kʋntʋ.»
17 Bɩna fugə-yale bɩnɩ dɩm canɩ fugə-sɩle cana kama da fugə-yanu dɛ dɩm nɩ, mʋ Baŋa-Wɛ kwǝrǝ yi amʋ ka wɩ:
18 «Nabiinu, yɔɔrɩ n ta n keeri Ezipi tɩʋ nɔn-biə bam ŋwaanɩ. Bantʋ maŋɩ sɩ ba tɔgɩ dɩ tɩ-kamunnu dɩdonnǝ nɔɔna mʋ sɩ ba maama tɩ ba daarɩ ba tu tɩga kuri je sɩm nɩ. 19 Ta dɩ ba nɩ: ‹Abam bʋŋɩ nɩ á jɩgɩ lam á dwe dwiə yadonnə mʋ na? Á nan maŋɩ sɩ á tu tɩga kuri nɩ á taá tigi dɩ balʋ na yǝri Wɛ tɩn mʋ.› 20 Ba nan wʋ́ tɔgɩ dɩ balʋ na tʋ najara wʋnɩ tɩn mʋ ba tɩ. Sʋ-lwaanʋ lagɩ tɩ ba tɩ gʋ-ba mʋ lɩla! Ezipi tɩʋ kʋm dɩ kʋ nɔn-biə bam maama maŋɩ sɩ ba dʋna bam mʋ zi-ba ba ja ba viiri. 21 Pamaŋ-bɩbɛ sɩlʋ na maŋɩ ba wʋ curu wʋnɩ tɩn wʋ́ ta Ezipi tɩʋ dɩ kʋ doonə bam taanɩ ba wɩ: ‹Ba laan tu dɩbam te sɩ ba taa tigi dɩ balʋ na yǝri Wɛ tɩn, dɩdaanɩ balʋ na tɩgɩ najara wʋnɩ tɩn.›
22 Asiiri tɩʋ dɩ kʋ jar-kərə bam maama maa wʋra. Bantʋ tɩgɩ najara wʋnɩ yɩ ba yibeelǝ tigi da. 23 Ba dɛɛn na ŋwɩ tɩga baŋa nɩ tɩn, ba tiini ba fugi nɔɔna zanzan. Ba maama ma tɩ najara wʋnɩ, yɩ ba yibeelǝ yam wʋ tɩga kuri goŋo kʋm gugwəəru wʋnɩ.
24 Elam tɩʋ dɩ maa wʋra dɩ kʋ nɔn-biə bam maama ba tigi ba yibeelǝ wʋnɩ. Ba maama dɛɛn tɩgɩ najara wʋnɩ mʋ. Balʋ maama ya na ŋwɩ yɩ ba tiini ba fugi nɔɔna zanzan tɩn laan mʋ zʋ curu yɩ ba ta yǝri Wɛ. Ba ma tɔgɩ dɩ balʋ maama na zʋ tɩga kuri goŋo kʋm wʋnɩ tɩn mʋ ba na ba cavɩɩra. 25 Ba ma kwɛ jǝgǝ ba pa Elam tɩʋ curu nɩ sɩ kʋ taa tigi o jar-kərə bam maama tɩtarɩ nɩ. Bantʋ maama yǝri Wɛ yɩ ba laan ba ba tɩ najara wʋnɩ. Ba ma tɔgɩ dɩ balʋ maama na zʋʋrɩ curu wʋnɩ tɩn ba na ba cavɩɩra, ba ya ta na ŋwɩ yɩ ba fugi nɔɔna zanzan tɩn ŋwaanɩ. Ba laan maa tigi balʋ na tɩgɩ najara wʋnɩ tɩn tɩtarɩ nɩ.
26 Mesɛkɩ dɩ Tubalɩ pwa bam dɩ maa wʋra, ba wǝli dɩ ba nɔn-biə bam maama yɩ ba tigi ba yibeelǝ wʋnɩ. Ba maama nan yǝri Wɛ yɩ ba tɩ najara wʋnɩ, ba ya ta na ŋwɩ yɩ ba tiini ba fugi nɔɔna zanzan tɩn ŋwaanɩ. 27 Ba nan wʋ kɩ-ba yibeelə dɩ zulə nɩ ba na kɩ te dɩ faŋa faŋa yigə tiinə balʋ na tɩgɩ najara wʋnɩ tɩn mʋ. Bantʋ dɛɛn zʋ curu wʋnɩ yɩ ba jɩgɩ ba sʋ-lwaanʋ ba ma ba yǝri ba yum, ba daarɩ ba jɩgɩ ba najara cɩ-kwɛn ba kwǝli ba yɩra. Pamaŋ-bɩbɛ sɩm kʋntʋ ya ta na ŋwɩ tɩn, ba ya tiini ba fugi nɔɔna zanzan.
28 Ezipi tɩʋ pɛ, kʋ nan na yɩ nmʋ, nmʋ dɩ lagɩ n tɩ mʋ, sɩ n tɔgɩ n taa wʋ balʋ na yǝri Wɛ yɩ ba gʋ-ba najara nɩ tɩn wʋnɩ.
29 Edɔm tɩʋ, dɩ kʋ pwa, dɩ kʋ dɩdɛɛra bam dɩ maa tɔgɩ ba wʋ curu wʋnɩ. Ba tu ba tɔgɩ dɩ balʋ na tɩgɩ najara wʋnɩ tɩn, dɩ ba na maŋɩ ba jɩgɩ dam te maama tɩn dɩ. Ba laan maa tigi dɩ balʋ ya na yǝri Wɛ yɩ ba zʋ tɩga kuri goŋo kʋm wʋnɩ tɩn.
30 Jazɩm baŋa seeni tɩɩnɩ dɩm dɩdɛɛra dɩdaanɩ Sidɔn tɩʋ tiinə bam maama maa wʋra. Ba ma tɔgɩ dɩ balʋ na tɩgɩ najara wʋnɩ tɩn ba na ba cavɩɩra yɩ ba tɩ, dɩ ba ya na maŋɩ ba da ba dam-fɔrɔ ŋwaanɩ ba fugi nɔɔna te tɩn dɩ. Ba laan maa tigi ba yibeelǝ wʋnɩ yɩ ba ta yǝri Wɛ. Ba dɩ di ba cavɩɩra nɩ balʋ maama na zʋ tɩga kuri goŋo kʋm wʋnɩ tɩn mʋ.
31 Ezipi tɩʋ pa-farʋ wʋm wʋ́ na kʋlʋ na yi tɩɩnɩ dɩm kʋntʋ maama dɩ dɩ nɔn-biə bam tɩn. O wʋʋ laan wʋ́ zuri dɩ o tɩtɩ jar-kərə bam na tɩgɩ najara wʋnɩ te tɩn. Mʋ kʋ na wʋ́ kɩ Ezipi pa-farʋ wʋm dɩ o jar-kərə bam maama te tɩn. Yuutu Baŋa-Wɛ na tagɩ kʋlʋ tɩn mʋ kʋntʋ. 32 Amʋ ya mʋ sɩɩnɩ a pa‑o dam sɩ o fugi tɩga baŋa nabiinǝ bam. Wʋntʋ dɩ o nɔn-kɔgɔ kʋm maama nan tɔgɩ dɩ balʋ maama na tɩgɩ najara wʋnɩ tɩn mʋ ba tigi balʋ na yǝri Wɛ tɩn tɩtarɩ nɩ. Yuutu Baŋa-Wɛ na tagɩ kʋlʋ tɩn mʋ kʋntʋ.»