Ezipi Pa-farʋ wʋm taanɩ
31
Bɩna fugə-dɩdʋa bɩnɩ dɩm canɩ sɩtɔ cana kam pulim dɛ dɩm nɩ, mʋ Baŋa-Wɛ kwǝrǝ yi amʋ ka wɩ:2 «Nabiinu, ta n brɩ Ezipi pa-farʋ wʋm dɩ o nɔn-kɔgɔ kʋm nɩ:
‹Wɔɔ kamunni mʋ ma dɩ nmʋ?
3 Nan bʋŋɩ n nii Asiiri tɩʋ na guri te tɩn.
Kʋ dɛɛn nyɩ dɩ Sɛdrɩ tiu mʋ
na wʋ Liban tɩʋ kʋm nɩ.
Kʋ nɛ sɩm dɛɛn tagɩ mʋ lanyɩranɩ
yɩ sɩ kɩ vɔɔrʋ pa woro wʋra gaa kam nɩ.
Kʋ ma tiini kʋ kɩ dɩdɔrɔ
kʋ kɛ kʋ di wɛyuu baŋa baŋa.
4 Na maa daga da sɩ tiu kʋm taa nyɔa.
Buli-yiə yalʋ na nuŋi tɩga kuri nɩ tɩn
pɛ kʋ bɩ lanyɩranɩ.
Bu-tʋlɩ maa wʋra jǝgǝ kalʋ kʋ na jəri tɩn,
yɩ tɩ na bam duri ba vu ba yi
tweeru tɩlʋ maama dɩ na wʋ gaa kam nɩ tɩn.
5 Tiu kʋm kʋntʋ ma tiini kʋ kɩ dɩdɔrɔ
kʋ dwǝni gaa kam wʋ tweeru dɩdonnǝ dɩm maama.
Kʋ ma yɔɔrɩ kʋ ta nɛ zanzan,
yɩ sɩ tiini sɩ dwara.
Kʋ nɛ sɩm nan na yarɩgɩ kʋntʋ tɩn,
kʋ yɩ na bam na daga da tɩn ŋwaanɩ mʋ.
6 Zunə dwi dwi ma ba
ba sɔ ba pwǝru kʋ nɛ sɩm yɩra nɩ.
Kʋ daarɩ ga-vara dɩ ba
ba maŋɩ kʋ nɛ sɩm kuri nɩ ba lʋ ba biə.
Lʋgʋ baŋa dwi tiinə balʋ maama na dana tɩn dɩ ma ba
ba jǝni kʋ woro kuri nɩ.
7 Kʋ dɛɛn yɔɔrɩ kʋ jɩgɩ lam dɩ kamunni mʋ,
yɩ kʋ nɛ sɩm yarɩgɩ sɩ yi je maama.
Bɛŋwaanɩ, kʋ bʋnnʋ tɩm zʋ tɩ kwaarɩ tɩga nɩ mʋ,
pa tɩ yi na zanzan tɩga kuri nɩ.
8 Wɛ tɩtɩ kara Sɛdrɩ tweeru tɩm
bá wanɩ dɩ maŋɩ dɩ tiu kʋm kʋntʋ.
Kʋ ta na yɩ Siprɛ dɩ Palatanɩ tu-dɩdwaarʋ tɩm dɩ,
tɩ nɛ sɩm bá maŋɩ dɩ kʋntʋ nɛ sɩm na yɩ te tɩn.
Tiu dwi dɛɛn maŋɩ kʋ tǝri Wɛ tweeru kara kam nɩ,
sɩ dɩ́ kwe dɩ́ ma dɩ́ maŋɩ dɩ tiu kʋm kʋntʋ lam.
9 Kʋ yɩ amʋ mʋ pɛ kʋ lana kʋntʋ
pa kʋ jɩgɩ nɛ sɩlʋ na tiini sɩ daga tɩn,
yɩ Edɛn wʋ tweeru tɩm maama
dɛɛn tiini dɩ jɩgɩ kazwɩ dɩ di dɩ tiu kʋm kʋntʋ.
10 Kʋntʋ ŋwaanɩ, Yuutu Baŋa-Wɛ na tagɩ te tɩn mʋ tɩntʋ: Tiu kʋm tiini kʋ kɩ dɩdɔrɔ kʋ kɛ kʋ di wɛyuu kʋm, pa kʋ brɩ kʋ tɩtɩ. 11 Kʋntʋ ŋwaanɩ, a kwe-kʋ a kɩ pɛ wʋlʋ na jɩgɩ dam lʋgʋ baŋa tɩɩnɩ dɩm baŋa nɩ tɩn jɩŋa nɩ. Wʋntʋ laan ma yɔɔrɩ o waarɩ-kʋ sɩ kʋ maŋɩ dɩ kʋ kǝm-balwaarʋ na maɩ te tɩn. Amʋ mʋ dʋlɩ-kʋ a yagɩ dáa nɩ. 12 Kʋntʋ ma pa dwi-gɛ tiinə balʋ na tiini ba jɩgɩ wʋ-lʋŋʋ tɩn ba ba go-kʋ ba dɩ tɩga nɩ, ba daarɩ ba yagɩ-kʋ pa kʋ tigə kʋ na tʋ mɛ seeni tɩn. Kʋ nɛ sɩm tʋ mʋ sɩ tigi pweeru yum nɩ, dɩ bwəəlu maama tɩga nɩ. Kʋ dɛ dɩ ma bwəri yɩ sɩ tigi tɩga kam gugwəəru maama wʋnɩ. Tɩɩnɩ dɩlʋ nɔɔna ya na tigi kʋ woro kuri nɩ tɩn ma duri ba daarɩ-kʋ. 13 Zunə bam laan ma ba ba jǝni tiu kʋm təŋə kalʋ na daarɩ ka tigi tɩn baŋa nɩ. Ga-vara bam dɩ ma ba ba nɔnɩ kʋ nɛ sɩlʋ na tʋ tɩga nɩ tɩn baŋa nɩ. 14 Kʋ nan na yɩ te tɩn, tiu kʋlʋ maama na naɩ na kʋ nyɔ tɩn daa bá fɔgɩ kʋ kɩ dɩdɔrɔ kʋ di wɛyuu kʋm, nɩ tiu kʋntʋ ya na yɩ te tɩn. Na na maŋɩ ba yi tweeru tɩm te maama dɩ, dɩ bá wanɩ dɩ taa dwara kʋntʋ doŋ. Dɩ maŋɩ sɩ dɩ tɩ mʋ tɩga baŋa nɩ, nɩ kʋ na yɩ te nabiinǝ tee nɩ tɩn. Dɩ maa maŋɩ sɩ dɩ maŋɩ nabiinǝ tɩtarɩ nɩ, nɩ bantʋ na tʋa yɩ ba ve tɩga kuri nɩ te tɩn.
15 Yuutu Baŋa-Wɛ na tagɩ te tɩn mʋ tɩntʋ: Dɛ dɩlʋ nɩ tiu kʋm kʋntʋ na tʋ kʋ tɩ yɩ kʋ tu kʋ zʋ curu tɩn, amʋ ma pa buli-yiə yam ni sɩ ya keeri tiu kʋm luə. A ma cɩ bwi sɩm pa dʋ-fara tɩm daa ba durǝ. A ma pa Liban tɩga kam maama yɩ lim, tiu kʋm na tʋ tɩn ŋwaanɩ. Tweeru tɩm maama dɩ ma kwaarɩ dɩ zɩga. 16 Tiu kʋm na tʋ bʋrʋ-tʋ-tʋ yɩ dwi-gɛ tiinə bam ni tɩn, a ma pa ba yɩra saɩ, kʋ na tɔgɩ dɩ balʋ na ve tɩga kuri nɩ kʋ vu kʋ zʋ curu tɩn ŋwaanɩ. Edɛn kara kam wʋ tweeru tɩm maama, dɩ Liban tweeru tɩm, kʋ wǝli dɩ tweeru tɩlʋ maama na na yi-tɩ lanyɩranɩ tɩn maama wʋʋ laan ma zuri. 17 Lʋgʋ baŋa dwi tiinə balʋ maama ya na yǝni ba je tiu kʋm woro nɩ yɩ ba yɩ kʋ doonə tɩn dɩ ma tɔgɩ dɩ-kʋ ba zʋ curu, ba wǝli dɩ balʋ na maŋɩ ba tɩ najara wʋnɩ tɩn.
18 Edɛn kara wʋ tweeru tɩm maama wʋnɩ, tiu kɔɔ kamunni dɩ kʋ nɩnwaŋa mʋ ma dɩ nmʋ? Dɩ kʋ dɩ, ba lagɩ ba goni nmʋ ba dɩ tɩga nɩ, sɩ nmʋ dɩ wǝli Edɛn kara wʋ tweeru tɩm mʋ n zʋ tɩga kuri. Dáanɩ mʋ n lagɩ n ta n tigi dɩ balʋ na yǝri Wɛ tɩn, dɩdaanɩ balʋ maama na tɩga najara wʋnɩ tɩn.
Mɩmaŋɩ dɩntʋ brɩ kʋ na wʋ́ kɩ Ezipi tɩʋ pa-farʋ wʋm dɩ o nɔn-kɔgɔ kʋm te tɩn mʋ. Yuutu Baŋa-Wɛ na tagɩ kʋlʋ tɩn mʋ kʋntʋ.› »