Ezipi tɩʋ luə ləŋə
30
Baŋa-Wɛ kwǝrǝ ma yi amʋ ka wɩ: 2 «Nabiinu, ŋɔɔnɩ sɩ n ta n wɩ: ‹Yuutu Baŋa-Wɛ na tagɩ te tɩn mʋ tɩntʋ:
Coosi-na sɩ á ta wɩ:
«Lɛɛrʋ naa!»
3 Bɛŋwaanɩ, dɛ dɩm yi dɩ ti.
Baŋa-Wɛ dɛ-kamunu kʋm mʋ kʋntʋ.
Kunkwən-luluru wʋ́ kwǝli tɩga kam
yɩ lɛɛrʋ yi lʋgʋ baŋa tɩɩnɩ dɩm
maŋa kam kʋntʋ nɩ.
4 Najara mʋ lagɩ ya tʋ Ezipi tɩʋ wʋnɩ.
Cam dɩ maa wʋ́ yi Kusi tiinə bam.
Ezipi tiinə zanzan wʋ́ tɩ najara wʋnɩ.
Ba dʋna wʋ́ zɩŋɩ ba jɩjɩgɩrʋ tɩm ba ja ba viiri,
ba daarɩ ba cɔgɩ tɩʋ kʋm
sɩ kʋ taa zɩgɩ di-dwəənu yɩranɩ.
5 Kʋ ta na yɩ Kusi, dɩ Puti, dɩ Luudi, dɩ Arabɩ tiinə maama, dɩ Libi tiinə, dɩ balʋ na nuŋi amʋ ni-gonim tɩga kam nɩ tɩn, ba maama wʋ́ da dɩ Ezipi tiinə bam mʋ ba tɩ najara wʋnɩ.
6 Baŋa-Wɛ na tagɩ te tɩn mʋ tɩntʋ:
Balʋ na zɩgɩ Ezipi tɩʋ kwaga nɩ tɩn lagɩ ba tʋ tɩga nɩ mʋ.
Dam dɩlʋ Ezipi tiinə bam na jɩgɩ wʋpolo dɩ baŋa nɩ tɩn maa wʋ́ je.
Kʋ na zɩgɩ Migidɔla nɩ, sɩ kʋ yi Siyɛnɩa tɩn,
ba maama lagɩ ba tɩ najara yalʋ na wʋ́ yi Ezipi tɩn wʋnɩ mʋ.
Yuutu Baŋa-Wɛ na tagɩ kʋlʋ tɩn mʋ kʋntʋ.
7 Ba je sɩm wʋ́ yɔɔrɩ sɩ ji kagʋa
tɩɩnɩ dɩlʋ maama na cɔgɩ tɩn wʋnɩ.
Ba tɩɩnɩ dɩm wʋ́ taa yɩ di-dwəənu yɩranɩ mʋ,
yɩ di-dwəənu dɩ gilimi-dɩ.
8 Ba laan maa wʋ́ lwarɩ nɩ amʋ mʋ yɩ Baŋa-Wɛ dɩm,
nɩ a na wʋ́ pa Ezipi tɩʋ kʋm ja mim,
yɩ a daarɩ a nɔnɩ kʋ doonə maama a cʋcʋgɩ tɩn.
9 Dɛ dɩm kʋntʋ na yiǝ, a ta lagɩ a tʋŋɩ nɔɔna nabwǝǝru wʋnɩ sɩ ba ja a kwǝrǝ ba vu ba pa Kusi tɩʋ tiinə, dɩ ba na je dɩ yazurə te tɩn dɩ. Liǝ nan wʋ́ da ya ja-ba Ezipi tɩʋ cɔgɩm maŋa kam nɩ, kʋ na wʋ́ sɩɩnɩ kʋ kɩ tɩn ŋwaanɩ.
10 Yuutu Baŋa-Wɛ nan na tagɩ te tɩn mʋ tɩntʋ:
Amʋ lagɩ a tɔgɩ Babilɔnɩ tɩʋ pɛ Nebukadnɛtsarɩ baŋa nɩ mʋ
sɩ a cɔgɩ Ezipi jar-kərə bam dam.
11 Wʋntʋ dɩ o jar-kərə bam kǝm tiini dɩ cana
dɩ dwe tɩga baŋa nɔɔna maama na yɩ te tɩn.
Ba lagɩ ba jeeri Ezipi tɩʋ kʋm dɩ najara mʋ,
sɩ ba daarɩ ba cɔgɩ ba tɩga kam.
Ba maa wʋ́ pa twa faarɩ Ezipi tɩga kam maama.
12 Amʋ wʋ́ pa Nili bugə kam wɩ,
yɩ a kwe ba tɩga kam a pa nɔn-balwaarʋ.
A yɔɔrɩ a lagɩ a tɔgɩ vərə baŋa nɩ mʋ
a cɔgɩ ba tɩga kam dɩ kʋlʋ maama na wʋ ka wʋnɩ tɩn.
Amʋ Baŋa-Wɛ mʋ tagɩ kʋntʋ.
13 Yuutu Baŋa-Wɛ ta na tagɩ te tɩn mʋ tɩntʋ:
A lagɩ a cɔgɩ ba jwǝnǝ yam mʋ,
yɩ a pa ya nyɩnyʋrʋ tɩlʋ na wʋ Memfisi nɩ tɩn je.
Ezipi tɩʋ kʋm daa bá taa jɩgɩ pwa.
A maa wʋ́ pa fʋʋnɩ zʋ kʋ nɔɔna bam maama.
14 Amʋ wʋ́ pa Patrɔsɩ taa yɩ yɔɔ yɩranɩ,
yɩ a pa mim zwɛ Sʋan tɩʋ kʋm.
A nan ta wʋ́ waarɩ Tebɛsɩ dɩ.
15 A yɔɔrɩ a lagɩ a lo a ban-lʋm dɩm Sini baŋa nɩ mʋ,
kʋ na yɩ Ezipi dam je sɩm tɩn ŋwaanɩ.
A ta wʋ́ gʋ Tebɛsɩ jar-kərə bam maama.
16 A lagɩ a pa mim mʋ ja Ezipi tɩʋ kʋm,
yɩ Sini tiinə bam wʋ́ taa yaarɩ dɩ cam.
Tebɛsɩ tɩʋ kabri sɩm lagɩ sɩ cɔgɩ mʋ.
Fʋʋnɩ maa wʋ́ tiini dɩ ja Memfisi tiinə dɛ maama wʋnɩ.
17 Ɔnɩb, dɩ Pi-Bezɛtɩc nɔn-dʋnnʋ maama wʋ́ tɩ najara wʋnɩ.
Ba maa wʋ́ ja tɩɩnɩ dɩm kʋntʋ nɔɔnad bam ba vu sa-tɩʋ yigə yigə.
18 Wɩa maŋa nɩ Tapanɛzɩ tɩʋ kʋm wʋ́ ji lim yɩranɩ,
nɩ a na jaanɩ Ezipi tɩʋ dam dɩm a ja a cɔgɩ a yagɩ.
Ba ya maa na jɩgɩ wʋpolo kʋlʋ baŋa nɩ tɩn maama wʋ́ ti.
Kunkwən-luluru mʋ wʋ́ kwǝli ba tɩga kam.
Kʋ ta na yɩ Ezipi tɩɩnɩ dɩm maama,
ba lagɩ ba ja dɩ nɔn-biə bam
ba vu sa-tɩʋ yigə yigə mʋ.
19 Amʋ laan maa na waarɩ Ezipi tɩʋ kʋm a ti,
baá lwarɩ nɩ amʋ mʋ yɩ Baŋa-Wɛ dɩm.› »
 
20 Bɩna fugə-dɩdʋa bɩnɩ dɩm pulim cana kam da yarpɛ dɛ dɩm nɩ, mʋ Baŋa-Wɛ kwǝrǝ yi amʋ ka wɩ:
21 «Nabiinu, amʋ jaanɩ Ezipi pa-farʋ wʋm jɩŋa mʋ a bwəri. Nɔɔn-nɔɔnʋ nan wʋ vɔgɩ gar-zɔŋɔ sɩ o kwe-ka o dɩ kʋ wʋnɩ. Kʋ laan ma pa o jɩŋa kam wʋ toŋi sɩ ka taa dana sɩ ka wanɩ sʋ-lɔŋɔ ka zeeri. 22 Yuutu Baŋa-Wɛ nan na tagɩ te tɩn mʋ tɩntʋ: Amʋ dwəni dɩ Ezipi tɩʋ pa-farʋ wʋm mʋ. A yɔɔrɩ a lagɩ a bwəri o jɩn sɩm maama mʋ, nɩ kʋ na yɩ o jɩ-ŋʋŋa kʋm dɩ kalʋ na maŋɩ ka bwəri tɩn maama. Kʋntʋ tɩn, o sʋ-lɔŋɔ kʋm wʋ́ lwe kʋ tʋ tɩga nɩ. 23 A nan ta lagɩ a pa Ezipi tiinə bam mʋ jagɩ ba vu yigə yigə sɩ a yagɩ-ba lʋgʋ baŋa tɩɩnɩ dɩm maama wʋnɩ. 24 A maa wʋ́ pa Babilɔnɩ tɩʋ pɛ na dam yɩ a kwe a sʋ-lɔŋɔ a kɩ o jɩŋa nɩ. A laan maa wʋ́ bwəri Ezipi pa-farʋ wʋm jɩan, sɩ o taa ŋʋʋsɩ dɩ cam Babilɔnɩ pɛ wʋm yigə nɩ, nɩ wʋlʋ na nɛ zʋnnɩ yɩ o lagɩ o tɩ tɩn. 25 Cɩga tɩn, a wʋ́ pa Babilɔnɩ tɩʋ pɛ jɩn sɩm na dam. Sɩ kʋ na yɩ Ezipi pa-farʋ wʋm, o jɩan lagɩ ya tʋ tɩga nɩ mʋ. Ba laan maa wʋ́ lwarɩ nɩ amʋ mʋ yɩ Baŋa-Wɛ, nɩ a na kwe a sʋ-lɔŋɔ kʋm a kɩ Babilɔnɩ pɛ wʋm jɩŋa nɩ, sɩ o dɩ kwe-kʋ o ma o fugi Ezipi tiinə bam. 26 A nan wʋ́ sɩɩnɩ a jagɩ Ezipi tiinə bam pa ba vu yigə yigə sɩ a yagɩ-ba lʋgʋ baŋa tɩɩnɩ dɩm maama wʋnɩ. Kʋntʋ baŋa nɩ baá lwarɩ nɩ amʋ mʋ yɩ Baŋa-Wɛ dɩm.»